༢༠༡༦ ཟླ་ ༡༢ ཚེས་ ༡༩ རེས་གཟའ་ཟླ་བ།

༄༅། །ཕྱི་ལོ་ ༢༠༡༦ ཟླ་ ༡༢ ཚེས་ ༡༧ ཉིན་རྒྱ་གར་གྱི་རྒྱལ་ས་ལྡི་ལི་གསར་པའི་ནང་ཡོད་པའི་ Constitution Club of India ཞེས་པའི་ཚོགས་ཁང་ནང་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག   བོད་ཀྱི་འདས་མ་ད་གསུམ་གྱི་གནད་དོན་ཐད་བགྲོ་གླེང་ལྷན་ཚོགས་ཤིག་དབུ་འབྱེད་གནང་བ་དང་སྦྲགས། ༼བོད་རྒྱ་ནག་གི་ཆ་ཤས་མིན།  འོན་ཀྱང་བོད་ཀྱི་གནད་དོན་གསལ་ཐུབ་པའི་ཐབས་ལམ་ཉག་གཅིག་ནི་དབུ་མའི་ལམ་གྱི་སྲིད་བྱུས་འདི་ཉིད་ཡིན།༽ ཞེས་པའི་དཔེ་དེབ་བོད་ཡིག་དང་ཨིན་ཇི། དེ་བཞིན་རྒྱ་ཡིག་བཅས་སྐད་རིགས་གསུམ་གྱི་ནང་ཕྱོགས་སྒྲིག་ཞུས་པ་དེ་དབུ་འབྱེད་གནང་ འདུག  དེ་ཡང་ལྷན་ཚོགས་དབུ་འབྱེད་ཀྱི་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་ སྲིད་སྐྱོང་བློ་བཟང་སེངྒེ་མཆོག་དང་། རྒྱ་གར་གྲོས་ཚོགས་གོང་མའི་འཐུས་མི་སྐུ་ཞབས་མ་ནི་ཤང་ཀར་ཨ་ཡི་ཡར་ MP, Shri Mani Shankar Aiyar མཆོག ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས། དྲིལ་བསྒྲགས་དྲུང་ཆེ་ཤར་གླིང་བསྟན་འཛིན་ཟླ་སྒྲོན་ལགས་བཅས་དབུ་བཞུགས་ཐོག་ དབུ་འབྱེད་མཛད་སྒོ་ཚོགས་འདུག

དེ་ཡང་ཤོག་གྲངས་ ༡༠༧ ཅན་གྱི་དཔེ་དེབ་དེའི་ནང་གནད་དོན་གཙོ་ཆེ་ཁག་དཔེར་ན། ལོ་རྒྱུས་ཐོག་བོད་ཀྱི་གནས་སྟངས་དང་།  ༸རྒྱལ་བའི་ཡང་སྲིད་ཀྱི་གནད་དོན།  བོད་ཀྱི་ཁོར་ཡུག་གནས་སྟངས་ཉིན་རེ་བཞིན་ཛ་དྲག་ཏུ་འགྲོ་བཞིན་པའི་གནས་སྟངས།  དཔལ་འབྱོར་འཛུགས་སྐྲུན་གྱི་རྫུན་འབག་གྱོན་ནས་བོད་ཀྱི་གྲོང་གསེབ་ས་ཁུལ་ཁག་ གྲོང་ཁྱེར་གྱི་ངོ་བོར་བསྒྱུར་རྒྱུ་བཙན་དེད་བྱེད་བཞིན་པའི་གནས་སྟངས།  དེ་བཞིན་བོད་ཀྱི་གནད་དོན་གསལ་ཆེད་བོད་མིའི་སྒྲིག་འཛུགས་ཀྱི་བཏོན་པའི་དབུ་ མའི་ལམ་གྱི་སྲིད་བྱུས་བཅས་ཚུད་འདུག སྤྱིར་ཕྱི་ལོ་ ༢༠༠༩ ལོར་ཕྱི་དྲིལ་ལས་ཁུངས་ཀྱིས་འགྲེམས་སྤེལ་ཞུ་པའི་དངོས་ཡོད་ཀྱི་ལམ་ནས་བདེན་པ་ འཚོལ་བ། ཞེས་པའི་དཔེ་དེབ་འདོན་སྤེལ་ཞུས་པ་ནས་བཟུང་ད་བར་ལོ་ངོ་བདུན་རྗེས་སླར་ཡང་བོད་ ནང་གི་དངོས་ཡོད་གནས་སྟངས་ཧ་ཅང་ཁ་གསལ་ལ་གོ་བདེ་ཞིང་།  ལོ་རྒྱུས་ཀྱི་དཔང་རྟགས་རྗེན་པ་ཕྱིར་ཡོངས་གྲགས་གནང་བ་ཞིག་ཆགས་འདུག

དེ་ཡང་དྲིལ་བསྒྲགས་དྲུང་ཆེ་ཤར་གླིང་བསྟན་འཛིན་ཟླ་སྒྲོན་ལགས་ཀྱིས། དངོས་ཡོད་བདེན་པའི་གནས་ཚུལ་དེར་རྒྱ་ནག་གཞུང་གིས་རང་མོས་ལྟར་བཅོས་ནས་འཁྱོག་ བཤད་ཐོག་རང་གི་ཆབ་སྲིད་ཀྱི་དགོས་མཁོ་བསྒྲུབ་རྒྱུའི་ལག་ཆར་དུས་རྟག་ཏུ་བཀོལ་ བཞིན་ཡོད། འོན་ཀྱང་ཐེངས་འདིར་ཕྱི་དྲིལ་ལས་ཁུངས་ཀྱི་འགྲེམས་སྤེལ་ཞུས་པའི་པེ་དེབ་འདིས་ རྒྱ་ནག་གཞུང་གི་འཁྱོག་བཤད་དང་དྲིལ་བསྒྲགས་ལོག་པ་བྱས་དང་བྱེད་བཞིན་པའི་གཡོ་ སྒྱུའི་རྫུན་འབག་དམར་རྗེན་དུ་བཏོན་ནས་དངོས་ཡོད་བདེན་པའི་གནས་ཚུལ་ལྷམ་མེར་ གསལ་ཐུབ་པ་ཞིག་བྱུང་ཡོད། ཅེས་སོགས་གསུངས།

གཞན་ཡང་སྐབས་དེར་རྒྱ་གར་ གྲོས་ཚོགས་གོང་མའི་འཐུས་མི་སྐུ་ཞབས་མ་ནི་ཤང་ཀར་ཨ་ཡི་ཡར་ Mr Mani Shankar Aiyar མཆོག་གིས་གསུང་དོན།  བོད་མི་ཚོས་བོད་ཀྱི་གནད་དོན་གསལ་ཆེད་ལས་གཞི་སྤེལ་བཞིན་པ་འདིས་རྒྱ་གར་གཞུང་ གིས་རྒྱ་ནག་དང་ལྷན་ས་མཚམས་ཀྱི་རྩོད་རྙོག་གསལ་ཐབས་བྱེད་བཞིན་པ་དེ་དང་འབྲེལ་ བ་ཧ་ཅང་ཡོད་པ་མ་ཟད། ད་ལྟ་༸གོང་ས་ཏཱ་ལའི་བླ་མ་མཆོག་གིས་འདོན་གནང་མཛད་པའི་བཞེངས་ཕྱོགས་དེར་མུ་ མཐུད་བོད་མི་ཚོས་རྒྱུན་སྐྱོང་གནང་བཞིན་པའི་ལངས་ཕྱོགས་དེ་ནི་ནེ་རུའི་འཆར་ སྣང་དང་ཡོངས་སུ་མཐུན་པ་ཞིག་ཆགས་ཡོད།  ཅེས་གསུངས་པ་དང་སྦྲགས། བོད་མི་ཚོས་སེམས་ཤུགས་མ་ཆག་པར་མུ་མཐུད་འབད་བརྩོན་གནང་དགོས་པ་དང་།  ཁོང་གིས་བོད་ཀྱི་བདེན་པའི་མཐའ་མགྱོགས་མྱུར་གསལ་ཐུབ་རྒྱུར་རེ་བ་ཧ་ཅང་གནང་ བཞིན་ཡོད་སྐོར་གསུང་དོན།

དཀའ་ ངལ་ལ་མ་འཛེམས་པར་རེ་བའི་སྣེ་མོ་མུ་མཐུད་འཛིན་ནས་སྡོད་རྒྱུ་ལས་ཡིད་ཞུམ་ནས་ འབད་བརྩོན་གང་མང་མ་བྱེད་པར་སྡོད་རྒྱུ་དེ་ལས་སླ་བ་ཡོད།  འོན་ཀྱང་དངོས་ཡོད་གནས་ཚུལ་ལ། དེ་སྔ་གྲོས་མོལ་བྱུང་ཐུབ་པ་དེ་ཙམ་གྱིས་བོད་མིའི་འཐབ་རྩོད་ཀྱི་ལས་འགུལ་ལ་ རྨང་གཞི་བརྟན་པོ་ཞིག་བཙུགས་ནས་རིམ་བཞིན་ཡར་རྒྱས་ཀྱི་ཕྱོགས་སུ་གོམ་པ་སྤོ་ བཞིན་ཡོད་པ་མཚོན་ཐུབ།  རྒྱ་ནག་དང་ཐུག་སྐབས་དཀའ་ངལ་ཇི་ཙམ་ཡོད་མིན་འཕགས་བོད་ཕྱོགས་གཉིས་ཀས་ཤེས་གསལ་ རེད། འོན་ཀྱང་ང་ཚོའང་ལས་སླ་པོ་ཞིག་མིན།  ཞེས་རྒྱ་ནག་གཞུང་ལ་བརྡ་ལན་སྤྲོད་ཐབས་བྱེད་བཞིན་ཡོད།  དམག་དཔུང་གི་སྡིག་སྐུལ་ཇི་ཙམ་བཏང་ཡང་ཚིག་སྟོང་པ་ཙམ་ལས་ཕན་ཐོགས་གང་ཡང་མེད། ཅེས་གསུངས།

དེ་ཡང་སྲིད་སྐྱོང་མཆོག་གིས་སྐབས་དེར་གསུང་དོན། བོད་འདི་ཧ་ཅང་ཕུན་སུམ་ཚོགས་པོ་ཡོད་པའི་རྣམ་པ་ཞིག་རྫུན་སྒྲིག་བྱས་ནས་རྒྱ་ནག་ གཞུང་གིས་དུས་རྟག་ཏུ་འཛམ་གླིང་ཕྱི་ལ་དྲིལ་བསྒྲགས་སྤེལ་ཐབས་བྱེད་བཞིན་པ་འདི་ དོན་དངོས་དང་མི་འཚམས་པ་ཞིག་ཡིན།  ཕྱི་ལོ་ ༡༩༤༩ ལོར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཟེར་བ་དབུ་བརྙེས་མཚམས། བཅིངས་བཀྲོལ་གྱི་རྫུན་འབག་གྱོན་ནས་རྒྱ་ནག་གཞུང་གིས་བོད་སར་བཙན་འཛུལ་བྱས་ རྐྱེན་བོད་ནང་གི་བོད་མི་ཚོས་རྒྱ་ནག་གཞུང་གི་སྲིད་བྱུས་ལ་ཐེངས་མང་ཞི་རྒོལ་ རྔམ་སྟོན་ཤུགས་ཆེ་བྱས་ཡོད།

༸རྒྱལ་ བའི་ཡང་སྲིད་སྐོར་དང་བོད་ཀྱི་ཁོར་ཡུག་ཉམས་ཆག བོད་ཀྱི་གྲོང་གསེབ་ས་ཁུལ་གྲོང་ཁྱེར་ཅན་དུ་བསྒྱུར་རྒྱུའི་སྲིད་བྱུས་སོགས་ ཀྱི་ཤུགས་རྐྱེན་འཛམ་གླིང་སྤྱི་ལ་ཐད་ཀར་ཐེབས་བཞིན་ཡོད་པ་ཧ་ཅང་གསལ་པོ་རེད། རྒྱ་ནག་གཞུང་གི་དབང་སྒྱུར་འོག་བོད་ནང་གི་ད་ལྟའི་དངོས་ཡོད་གནས་སྟངས་ཇི་ཡིན་ དྲིལ་བསྒྲགས་བྱ་རྒྱུ་དང་། དེའི་ཐོག་ནས་ང་ཚོའི་ལངས་ཕྱོགས་ཇི་ཡིན་གསལ་ཁ་གཏོད་དེ་རྒྱལ་སྤྱིའི་དོ་སྣང་དང་ འཛམ་གླིང་མི་མང་གི་བོད་ཀྱི་དངོས་ཡོད་གནས་སྟངས་ཐོག་བགྲོ་གླེང་ཡོང་ཐབས་བཅས་ལ་ དམིགས་ནས་ང་ཚོས་སྙན་ཐོ་འདི་འདོན་སྤེལ་ཞུས་པ་ཡིན།  ཞེས་གསུངས།

ཕྱོགས་ མཚུངས་ལྕམ་སྐུ་ཇཱ་ཡ་ཇེ་ཊི་ལི་  Jaya Jaitly མཆོག་གིས་དེ་སྔ་རྒྱ་གར་བདེ་སྲུང་བློན་ཆེན་ཟུར་པ་སྐུ་ཞབས་ཇོར་ཇི་ཕར་ནན་ཌེ་ སི་མཆོག་དྲན་གསོ་ཞུས་པ་དང་སྦྲགས།  བློན་ཆེན་ཟུར་པ་མཆོག་གིས་བོད་ཀྱི་བདེན་པའི་འཐབ་རྩོད་ལ་རྒྱབ་སྐྱོར་ཤུགས་ཆེ་ ཞུས་པ་མ་ཟད།  ཕྱི་ལོ་ ༡༩༨༩ ཕྱི་ཟླ་ ༨ ནང་བོད་དོན་ཐོག་རྒྱལ་སྤྱིའི་ལྷན་ཚོགས་ཐེངས་དང་པོ་གོ་སྒྲིག་གནང་མྱོང་ཡོད་ པའི་ལོ་རྒྱུས་ཀྱི་དྲན་ཐོ་མདོར་ཙམ་ངོ་སྤྲོད་དང་སྦྲགས་གསུང་དོན།   སྤྱིར་བོད་མི་རྣམས་རྒྱ་གར་ཡུལ་ནང་ཕེབས་པར་ངས་དགའ་བསུ་ཞུ་བཞིན་ཡོད།  འོན་ཀྱང་དེ་ལས་བོད་མི་རྣམས་རང་ཡུལ་དུ་ཕྱིར་ལོག་ཐུབ་པ་བྱུང་ན་དགའ་བསུ་ཤུགས་ ཆེ་བ་ཞུ་རྒྱུ་ཡིན། ཞེས་གསུངས། །