༢༠༡༦ ཟླ་ ༡༢ ཚེས་ ༡༩ རེས་གཟའ་ཟླ་བ།

དགའ་ལྡན་ཁྲི་པ་བློ་བཟང་བསྟན་འཛིན་རིན་པོ་ཆེ་མཆོག་ལ་མཇལ་ཁ་སྩོལ་བཞིན་པ།

༄༅། །འདི་གའི་ཆེད་གཉེར་གསར་འགོད་པ་ཡེ་ཤེས་ཀུན་གྲགས་ལགས་ཀྱིས་ས་གནས་ནས་བཏང་འབྱོར་ནང་འཁོད་དོན། ཕྱི་ལོ་ ༢༠༡༦ ཟླ་ ༡༢ ཚེས་ ༡༦ ཉིན་གྱི་སྔ་དྲོ་ཆུ་ཚོད་ ༡༡།༣༠  ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་རྟེན་གཞི་བྱས་པའི་འབྲས་སྤུངས་བླ་སྤྱིར་༸ཞབས་སོར་བདེ་བར་འཁོད་སྐབས། དགའ་ལྡན་ཁྲི་པ་བློ་བཟང་བསྟན་འཛིན་རིན་པོ་ཆེ་མཆོག་དང་དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག  བྱང་རྩེ་ཆོས་རྗེ་མཆོག་གིས་དབུས་གདན་ས་ཁག་གི་མཁན་ལས་ཟུར་རྣམ་པ་དང་། བདེ་སྲུང་བཀའ་བློན་མཆོག   ཕྱོགས་བཞུགས་བོད་མི་མང་སྤྱི་འཐུས་ཁག་གཅིག མོན་གྷོ་འདོད་རྒུ་གླིིང་བོད་མིའི་ས་གནས་འགོ་འཛིན་དང་ས་འཐུས།   གཞན་ཡང་གཞུང་འབྲེལ་དང་གཞུང་འབྲེལ་མིན་པའི་སྒྲིག་འཛུགས་ཁག་གི་སྐུ་ཚབ་སོགས་ཀྱིས་དགའ་དད་སྤྲོ་གསུམ་གྱི་ངང་ཕེབས་བསུ་གཟབ་རྒྱས་ཞུས་ཡོད།

ཐོག་མར་མགོན་པོ་གང་ཉིད་མཆོག་འབྲས་སྤུངས་བླ་སྤྱིའི་འདུ་ཁང་དུ་རྟེན་གཙོ་རྣམས་ལ་ཆོས་མཇལ་དང་གནས་གཟིགས་ཕེབས་རྗེས་རྟེན་འབྱུང་གསོལ་ཇ་དང་འབྲས་སིལ་འདེགས་འབུལ་ཞུས་གྲུབ་མཚམས། མགོན་པོ་གང་ཉིད་མཆོག་གིས་བཀའ་སློབ་སྩལ་དོན།

དེ་རིང་འདིར་དགའ་ལྡན་ཁྲི་ཟུར་རིན་པོ་ཆེ་མཆོག་དང་། དགའ་ལྡན་ཁྲི་པ་གསར་པ་མཆོག་རྣམ་གཉིས་ཀྱིས་དབུས་པའི་མཁན་པོ་དང་བླ་མ། དགེ་བཤེས་བྱས་མོ་མང་པོ་ཞིག་འདིར་འདུས་ཡོད། ཁྱེད་རང་ཚོ་ཚང་མར་སྔོན་ལ་འཚམས་འདྲི་ཞུ་གི་ཡོད།

སྤྱིར་སང་ཉིན་གནངས་ཉིན་སྐད་ཆ་ཡོང་གི་རེད། གདན་ས་ཆེན་པོ་འདི་ཕྱག་བཏབ་ནས་ལོ་དྲུག་བརྒྱའི་ནང་སྤྱིར་བཏང་དགོན་པ་དང་འདྲ་གི་མ་རེད། འདི་ལ་ང་རང་ཚོ་བོད་ཀྱི་ནང་གངས་ཅན་གྱི་ནཱ་ལེནྡྲ་ཞེས་ལྟ་བུ་གསུང་སྲོལ་ཡོད། དེར་བརྟེན་དཔལ་ལྡན་འབྲས་དཀར་སྤུངས་པ་ཕྱག་བཏབ་ནས་ལོ་དྲུག་བརྒྱའི་ནང་དངོས་འབྲེལ་མཁས་པའི་དབང་པོ་ག་ཚོད་བྱུང་ཡོད་རེད། དེ་བཞིན་འཇམ་དགོན་བླ་མ་ཙོང་ཁ་པ་ཆེན་པོ་རང་གིས།

དང་པོ་རྒྱ་ཆེར་ཐོས་པ་མང་བསྩལ། །བར་དུ་གཞུང་ལུགས་ཐམས་ཅད་གདམས་པར་ཤར། ། ཐ་མར་ཉིན་མཚན་ཀུན་ཏུ་ཉམས་སུ་བླངས། །  ཀུན་ཀྱང་བསྟན་པ་རྒྱས་པའི་ཆེད་དུ་བསྔོས། ། ཞེས་གསུངས་ཡོད།

ཚུལ་འདི་བསམས་ཤིང་མདུན་མ་ལེགས་ནས་གདའ། །བཀའ་དྲིན་ཆེའོ་རྗེ་བཙུན་མཁྱེན་པའི་གཏེར། །

ཞེས་རྗེ་རིན་པོ་ཆེ་ཁོང་རང་གིས་རྟོགས་བརྗོད་བདུན་ལེགས་མའི་ནང་གསུངས་ཡོད། དེ་འདྲ་ཡིན་དུས་འཇམ་མགོན་བླ་མ་ཙོང་ཁ་པ་ཆེན་པོའི་རྗེས་འཇུག་མཁས་པ་ཚོས་ཐོས་དོན་བསྒྲུབ་གཞོན་ནས་བསྟན་པ་དང་འགྲོ་བའི་དོན་མཛད་རྒྱུ་ཞིག་ཡོང་གི་ཡོད།

དེར་བརྟེན་ལོ་ཡུན་འདིའི་རིང་དངོས་གནས་མཁས་གྲུབ་གཉིས་ལྡན་གྱི་སྐྱེས་བུ་དམ་པ་ག་ཚོད་བྱུང་ཡོད་རེད། དེ་དག་གིས་བོད་ཆོལ་ཁ་གསུམ་གྱི་ས་ཁུལ་ཡོངས་རྫོགས་ལ་ཕལ་ཆེར་ཆོས་སྡེ་གསར་འཛུགས་བྱེད་རྒྱུས་མཚོན་དཔེར་ན་མདོ་སྨད་ཁུལ་དུ་བཀྲ་ཤིས་འཁྱིལ་ལ་སོགས་པ་མང་པོ་ཞིག་འབྲས་སྤུངས་དང་འབྲེལ་བ་ཡོད་པ་ཞིག་ཆགས་ནས་འབྲས་སྤུངས་ཀྱི་དགོན་ཁག་ལྟ་བུ་ཆགས་ཡོད། ཆེན་པོ་ཧོར་གྱི་ཡུལ་དང་འབྲས་སྤུངས་དམིགས་བསལ་འབྲེལ་བ་ཡོད་པ་ཞིག་བྱས་ནས་གང་ལྟར་དངོས་གནས་མཁས་གྲུབ་གཉིས་ལྡན་གྱི་སྐྱེས་བུ་དམ་པ་དེ་དག་གིས་བསྟན་པ་དང་འགྲོ་བའི་དོན་དུ་མཛད་རྗེས་ཆེན་པོ་ཞིག་བཞག་གནང་ཡོད།

སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་གནང་སྟངས་ནི་གཞུང་ཆེན་ལ་བསླབ་པ་སློབ་གཉེར་བརྒྱབ་ནས།  དེ་ཡང་ཚད་མའི་གཞུང་དང་འབྲེལ་ནས་བསླབ་པ་སློབ་གཉེར་བརྒྱབ་པ་འདིས་རྩ་བ་བརྟན་པོ་ཚུགས་བསྡད་པ་ཞིག་ཆགས་ཡོད།  དད་པ་ཙམ་མིན་པར་དངོས་འབྲེལ་གཞི་ལམ་འབྲས་གསུམ་གྱི་རྣམ་གཞག་རིགས་པའི་ལམ་ནས་གཏན་ལ་ཕབ་སྟེ་ངེས་པ་རྙེད་པའི་སྒོ་ནས་སངས་རྒྱས་པའི་ཆོས་ལ་ཤེས་ནས་དད་པ་ཐོབ་པ་བྱས་ཏེ། བསྟན་པའི་ཞབས་འདེགས་སྒྲུབ་ཡོང་དུས་མི་འདྲ་བ་ཞིག་ཡོང་བཞིན་ཡོད།

སྤྱིར་དགོན་པ་ནི་སྟོང་ཕྲག་མང་པོ་ཡོད། འོན་ཀྱང་དེ་ལྟ་བུའི་དངོས་གནས་དྲང་གནས་གཞུང་ཆེན་གྱི་སློབ་གཉེར་ཡོད་པའི་དགོན་པ་དེ་དག་བསྟན་པའི་ཞབས་འདེགས་བསྒྲུབ་རྒྱུ་དམིགས་བསལ་ཞིག་བསྒྲུབས་ཡོད། དེར་བརྟེན་འདས་པའི་ལོ་དྲུག་བརྒྱའི་རིང་མཁས་ཤིང་གྲུབ་པའི་དབང་ཕྱུག་བསྟན་པའི་བྱ་བ་མཛད་མཁན་དེ་དག་གིས་མཛད་པ་རྣམ་པར་དག་པ་ལ་རྗེས་སུ་ཡི་རངས་བ་དང་འབྲེལ་བའི་ཐོག་ནས།   ང་ཚོ་བོད་གངས་ཅན་ལྗོངས་ཀྱི་ལོ་རྒྱུས་ནང་དེ་སྔ་རྐྱེན་ངན་ཡོང་གི་ཡོད་ཀྱང་བོད་ཡོངས་རྫོགས་ལ་དཀའ་ངལ་འཕྲད་པ་ཕལ་ཆེར་དེ་སྔ་ཕལ་ཆེར་བྱུང་མྱོང་མེད།

མདོ་སྟོད་སྨད་ཀྱི་ས་ཁུལ་དུ་དགོན་པ་གཏོར་རྒྱུས་མཚོན་གྲྭ་པ་གསོད་རྒྱུ་ལྟ་བུ་ཡོང་བཞིན་ཡོད། འོན་ཀྱང་བོད་ཁྱོན་ཡོངས་ལ་དེ་ལྟ་བུའི་དམ་བསྒྲགས་བྱས་ཏེ་མདོར་ན་སྡུག་ས་ནས་བཤད་པ་ཡིན་ན་ཧ་ལམ་བོད་མི་རིགས་རིག་གཞུང་དང་བཅས་པ་ཆགས་འཇིགས་ཀྱི་མཚམས་ལ་སླེབ་པའི་དུས་ཆོད་ཅིག་བྱུང་བ་རེད།

དེའི་རིང་ང་ཚོ་བཙན་བྱོལ་ལ་བོད་མི་ཉུང་ཤས་ཤིག་བསླེབས་པའི་ནང་ནས་དཔེ་ཆ་ལྟ་མཁན་དེ་དག་གིས་ཐོག་མར་སྦག་སར་རྒྱ་གར་གཞུང་གིས་མི་གསུམ་རྒྱ་རྩིས་པ་རེད། ང་ཚོས་སྙན་གསེང་སོགས་ཞུས་ཏེ་ ༡༥༠༠ ཙམ་བྱུང་བ་རེད། དེ་དག་ས་གནས་ཀྱི་བབ་དང་མཐུན་རྐྱེན་ཞན་པོ་ཡོད་པར་བརྟེན་ནད་པ་ཧ་ཅང་མང་པོ་ཆགས་ནས་གཞིས་སྒར་ཆེ་ས་ཁག་ཏུ་ཚུར་སྤོས་པ་རེད།    ལོ་ཡུན་དེའི་རིང་དངོས་གནས་བསྟན་པ་སླར་གསོ་བྱེད་རྒྱུའི་རྨང་གཞི་བརྟན་པོ་ཚུགས་ཡོད།

ཁྱེད་རང་ཚོར་དཀའ་ངལ་ཡོད་ཀྱང་ཚང་མས་ཤུགས་སྐྱོན་ནས་གལ་ཆེ་ཤོས་དཔེ་ཁྲིད་གནང་མཁན་དགེ་རྒན་རྣམ་པ་ཆོས་ཧུར་ཐག་གནང་བ་དང་། སློབ་གཉེར་བྱེད་མཁན་ཚོས་ཧུར་ཐག་བྱས་པར་བརྟེན་ད་ཆ་ང་ཚོར་གྲུབ་འབྲས་ཐོན་ཡོད།
བོད་ཀྱི་སངས་རྒྱས་པའི་བསྟན་པ་བརྗོད་སྐབས་མཁན་ཆེན་ཞི་བ་འཚོས་ངོ་སྤྲོད་གནང་ནས་བསྟན་པ་ཚུགས་པ་ཞིག་ཡིན་པ་རེད། མཁན་ཆེན་ཞི་བ་ཚོ་ནི་ནཱ་ལེནྡྲའི་མཁས་པའི་དབང་པོ་ཞིག་ཆགས་ཡོད། ཁོང་མཁས་པའི་དབང་པོ་གང་འདྲ་ཡིན་མིན་ཁོང་གིས་མཛད་པའི་དབུ་མ་རྒྱན། ལྷག་པར་དུ་ཚད་ཆེན་སོགས་ང་ཚོར་མཇལ་རྒྱུ་ཡོད།  དེ་དག་མཇལ་སྐབས་ཚད་མའི་གཞུང་དང་དབུ་མའི་གཞུང་གི་མཁས་པ་ཞིག་ཡིན་པ་རྟོགས་ཐུབ།  ཅེས་སོགས་ཀྱི་བཀའ་སློབ་སྩལ་ཡོད།།