༢༠༡༠ ཟླ་ ༩ ཚེས་ ༢༠ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༩ ཚེས་ ༡༨ ཉིན་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་དབུ་མའི་ལམ་གྱི་མི་མང་ལས་འགུལ་ཁང་གིས་གོ་སྒྲིག་འོག་དབུ་མའི་ལམ་གྱི་ཉིན་མོ་སྲུང་བརྩི་ཞུས་པ།དེ་ཉིན་སྔ་དྲོ་ ༩།༣༠ ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་དང་། རྒྱལ་ཡོངས་ཧིན་བོད་མཛའ་འབྲེལ་ཚོགས་པའི་ཚོགས་གཙོ་ཨ་གྷི་ནེ་ཧི་ཏི་རེ་ལགས། རྡ་ས་ས་གནས་འཐུས་ཚབ། གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ། དབུ་མའི་ལམ་གྱི་མི་མང་ལས་འགུལ་ཁང་གི་ཚོགས་མི་རྣམ་པ། དེ་བཞིན་མི་མང་བཅས་ཁྱོན་མི་གྲངས་ ༡༠༠ བརྒལ་བ་ལྷན་འཛོམས་ཐོག་སྐུ་མགྲོན་གཙོ་བོ་རྣམ་གཉིས་ནས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་དང་། དེ་རྗེས་བོད་རྒྱལ་ཁབ་ཆེན་མོའི་རྒྱལ་གླུ་དང་བོད་བསྟན་སྲིད་སླད་རང་སྲོག་བློས་གཏོང་གནང་མཁན་གྱི་དཔའ་བོ་དཔའ་མོ་རྣམས་ཀྱི་ཆེད་མྱ་ངན་གུས་འདུད་ཞུས་གྲུབ་མཚམས་གསོལ་ཇ་འབྲས་སིལ་ཕུལ། དེ་ནས་དབུ་མའི་ལམ་གྱི་མི་མང་ལས་འགུལ་ཁང་གི་འགན་འཛིན་དང་བོད་མི་མང་སྤྱི་འཐུས་ཟླ་བ་ཚེ་རིང་ལགས་ནས་དབུ་མའི་ལམ་གྱི་ཉིན་མོ་སྲུང་བརྩི་ཞུ་དགོས་པའི་རྒྱུ་མཚན་ངོ་སྤྲོད་གྲུབ་བསྟུན་ཧིན་བོད་མཛའ་འབྲེལ་ཚོགས་པའི་ཚོགས་གཙོས་གསུང་བཤད་གནང་།
དེ་རྗེས་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་གིས་གསུང་བཤད་གནང་དོན། དེ་རིང་བཙན་བྱོལ་ནང་དབུ་མའི་ལམ་གྱི་ཉིན་མོ་སྲུང་བརྩི་ཐེངས་དང་པོ་ཆགས་ཡོད། དེར་བརྟེན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་འཁྲིད་པའི་བཙན་བྱོལ་གཞུང་གི་དབུ་མའི་ལམ་གྱི་སྲིད་བྱུས་ལ་བསྔགས་བརྗོད་དང་སྦྲགས་དེ་རིང་འདིར་ཕེབས་མཁན་ཡོངས་ལ་མཚམས་འདྲི་ཞུ་རྒྱུ་ཡིན། དབུ་མའི་ལམ་གྱི་སྲིད་བྱུས་དང་། ཐབས་ལམ་དེ་སྤྱིར་འཛམ་གླིང་ནང་རྒྱལ་ཁབ་གཉིས་དང་རྒྱལ་ཁབ་ནང་ཁུལ་དབར་དཀའ་རྙོག་བྱུང་བའི་སྐབས་ལ་དྲང་བདེན་དང་འཚེ་བ་སྤང་པའི་ཐོག་ནས་ཆབ་སྲིད་ཀྱི་གནད་དོན་སེལ་ཐུབ་རྒྱུའི་ལམ་དང་། གཅིག་རྒྱལ་གཅིག་ཕམ་མིན་པར་གཉིས་ཕན་ཡོད་པའི་ལམ་ཞིག་ཡིན། དེ་ཡང་བོད་གཅིག་པུའི་ཆེད་དུ་མིན་པར་འཛམ་བུ་གླིང་ཚང་མར་དགོས་རྒྱུ་ཞིག་ཡིན་ཞེས་སོགས་ཀྱི་གསུང་བཤད་གནང་རྗེས་དབུ་མའི་ལམ་གྱི་མི་མང་ལས་འགུལ་ཁང་གི་འགན་འཛིན་གཞོན་པས་ཐུགས་རྗེ་ཆེ་ཞུས་ཏེ་མཛད་སྒོ་གྲོལ་བ་དང་། ཐེག་ཆེན་ཆོས་གླིང་གཙུག་ལག་ཁང་དུ་སྤྱི་པའི་བསོད་ནམས་ཀྱི་བགོ་སྐལ་དང་རྣམ་དཀར་དགེ་བའི་ཚོགས་བསགས་ཆེད་མར་མེ་སྟོང་མཆོད་ཕུུལ་བ་བཅས་སུ།།
