༢༠༡༦ ཟླ་ ༡༢ ཚེས་ ༡༣ རེས་གཟའ་མིག་དམར།

༄༅། །ཕྱི་ལོ་ ༢༠༡༦ ཟླ་ ༡༢ ཚེས་ ༢༢ ཉིན་རྒྱ་གར་ལྷོ་ཕྱོགས་བྱེས་ཀྱི་གདན་ས་ཆེན་པོ་དཔལ་ལྡན་འབྲས་དཀར་སྤུངས་པ་ཕྱག་ བཏབ་ནས་མི་ལོ་ཧྲིལ་པོ་ ༦༠༠ འཁོར་བའི་དུས་ཚིགས་ཁྱད་པར་ཅན་དང་སྟབས་བསྟུན།   སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཙུན་མ་གྲངས་ ༢༠ ལ་དགེ་བཤེས་མའི་ཕྱག་འཁྱེར་གསོལ་སྩལ་མཛད་རྒྱུ་ཡིན་པར་བརྟེན། བོད་མིའི་སྒྲིག་འཛུགས་ཀྱི་ཕྱི་དྲིལ་སྒྲ་བརྙན་ཚན་པས་དྲ་ལམ་བརྒྱུད་ ཐད་ཀར་རྒྱང་སྲིད་ཞུ་རྒྱུ་ཡིན་འདུག

དེ་ཡང་ཆོས་རིག་ལས་ཁུངས་ཀྱི་ཟུང་དྲུང་ཐུབ་བསྟན་ཚེ་རིང་ལགས་ཀྱིས་འདི་གའི་གསར་འགོད་པར་ངོ་སྤྲོད་གནང་དོན།   ཕྱི་ལོ་ ༢༠༡༦ ཟླ་ ༡༢ ཚེས་ ༢༢ ཉིན་རྒྱ་གར་ལྷོ་ཕྱོགས་མོན་གྷོར་བྱེས་ཀྱི་གདན་ས་ཆེན་པོ་དཔལ་ལྡན་འབྲས་དཀར་སྤུངས་པ་ཕྱག་བཏབ་ནས་མི་ལོ་ཧྲིལ་པོ་ ༦༠༠ འཁོར་བའི་དུས་ཚིགས་ཁྱད་པར་ཅན་དང་སྟབས་བསྟུན་དགེ་བཤེས་མའི་ཕྱག་འཁྱེར་གནང་གཏན་འཁེལ་ཡོད།

ཐེངས་འདིར་བཙུན་མ་བསླབ་པ་མཐར་སོན་པ་དགེ་བཤེས་མ་གྲངས་ ༢༠  ཡོད། ད་ལྟའི་འཆར་དགེ་བཤེས་མའི་ལས་འཆར་ནང་འཛུལ་ཞུགས་གནང་མཁན་བཙུན་དགོན་གྲངས་ ༦ ཆགས་ཡོད་ཁོངས་ནས་གཅིག་ད་ལྟ་ཡིག་རྒྱུགས་གཏོང་རྒྱུ་མེད། གཞན་ཁག་ལྔ་ནི། མོན་གྷོ་གཞིས་ཆགས་ཀྱི་བྱང་ཆུབ་ཆོས་གླིང་། རྡ་རམ་ས་ལའི་དགེ་ལྡན་ཆོས་གླིང་། འཇམ་དབྱངས་ཆོས་གླིང་། བལ་ཡུལ་གྱི་མཁའ་ཆོས་དགའ་རྒྱལ་གླིང་། སྒྲོལ་མ་གླིང་བཅས་ཡིན། སྒྲོལ་མ་གླིང་ནི་རིས་མེད་ལྟ་བུ་ཆགས་ཡོད། 

དེ་ཡང་དགེ་བཤེས་མའི་བྱུང་རིམ་ནི།   སྤྱིར་ཕྱི་ལོ་ ༡༩༥༩ ལོ་ནས་བཟུང་བཙན་བྱོལ་དུ་བཙུན་མའི་འདུས་སྡེའམ་བཙུན་མའི་དགོན་པ་ཕྱག་བཏབ་པ་དང་རིམ་པས་ཡར་རྒྱས་ཕྱིན་པ་དང་སྦྲགས། ༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གཞིར་བཟུང་བསླབ་པ་སློབ་གཉེར་འགོ་འཛུགས་གནང་སྟེ་ད་ལྟ་མུ་མཐུད་འགྲོ་བཞིན་ཡོད་པ་རེད།

ཕྱི་ལོ་ ༡༩༩༥ ཡང་ན་ ༡༩༩༦ གཡས་གཡོན་ཞིག་ལ་༸གོང་ས་༸སྐྱབས་མགོན་ཆེན་པོ་མཆོག་གིས་བཙུན་མ་ཚོ་རིམ་པས་དགེ་བཤེས་མའི་དམ་བཅའ་དང་དགེ་བཤེས་མའི་མཚན་རྟགས་བཞེས་ཐུབ་རྒྱུ་བཟོ་དགོས་འདུག  ཞེས་བཀའ་སློབ་གསུང་གི་བདུད་རྩི་ཕེབས་པར་བརྟེན།  རིམ་བཞིན་བོད་ཀྱི་ཆོས་བརྒྱུད་ཆེན་པོ་བཞི་གཡུང་དྲུང་བོན་དང་བཅས་པའི་བླ་ཆེན་ལྷན་འཛོམས་ཐོག་བཀའ་བསྡུར་བྱུང་བ་མ་ཟད།   མཐར་ཕྱི་ལོ་ ༢༠༡༢ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་ཆེ་མཆོག་གིས་གཙུག་ལག་ཁང་དུ་སྐྱེས་རབས་གསུང་ཆོས་གནང་བའི་སྐབས་དགེ་བཤེས་མའི་གཏོང་སྟངས་ཐོག་སྒྲིག་གཞི་ཞིག་གཏན་འབེེབས་བྱེད་དགོས་འདུག རྡ་རམ་ས་ལའི་དགོན་པ་ཁག་དང་ཆོས་རིག་ལས་ཁུངས་ནས་འགན་བླངས་ཏེ་བྱེད་དགོས་འདུག་ཅེས་བཀའ་ཕེབས་པར་བརྟེན།

ཕྱི་ལོ་ ༢༠༡༢ ཟླ་ ༥ ནང་འབྲེལ་ཡོད་བཙུན་དགོན་ཁག་གི་སྐུ་ཚབ་གཉིེས་རེ་དང་དགེ་བཤེས་ཁག་གཅིག དགོན་པ་སོ་སོའི་དཔེ་འཁྲིད་དགེ་རྒན་བཅས་རྡ་རམ་ས་ལར་ཚོགས་འདུ་བསྐོང་ཚོགས་གནང་སྟེ་དགེ་བཤེས་མའི་སྒྲིག་གཞི་གཏན་འབེབས་གནང་ཡོད། ཕྱི་ལོ་ ༢༠༡༣ ཕྱི་ཟླ་ ༥ ནང་ལོ་རིམ་དང་པོའི་ཡིག་རྒྱུགས་གཏོང་འགོ་བཙུགས་ནས་རིམ་པས་ལོ་རིམ་བཞིའི་ཡིག་རྒྱུགས་ཡོད་པ་ཞིག་གཏན་འབེབས་གནང་སྟེ་འདི་ལོར་བསླབ་པ་མཐར་སོན་བྱུང་བའི་དགེ་བཤེས་མ་རྣམས་ལ་ཕྱག་འཁྱེར་གནང་རྒྱུ་ཡིན་པ་རེད།

ཐེངས་འདིའི་དགེ་བཤེས་མའི་ཕྱག་འཁྱེར་འབུལ་རྒྱུའི་མཛད་སྒོར་སྐུ་མགྲོན་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཆིབས་སྒྱུར་བསྐྱངས་ཀྱི་ཡོད་པ་དང་། སྐུ་གྲོན་གཞན་ཁག་ནི་དགའ་ལྡན་ཁྲི་པ་དང་ཁྲི་ཟུར། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག ཆོས་རིག་བཀའ་བློན་མཆོག ཆོས་རིག་བཀའ་ཟུར་མཆོག ཤེས་རིག་བཀའ་ཟུར་རིན་ཆེན་མཁའ་འགྲོ་མཆོག གདན་ས་ཁག་གི་མཁན་པོ་རྣམ་པ་བཅས་གདན་འདྲེན་ཞུས་ཡོད།

དགེ་བཤེས་མའི་ཡིག་རྒྱུགས་ནང་ཆོས་ལུགས་རིས་མེད་ཀྱི་བཙུན་མ་རྣམས་ནས་འཛུལ་ཞུགས་གནང་ཆོག་གི་ཡོད། སྒྲོལ་མ་གླིང་ལྟ་བུ་ཆ་བཞག་ན། ཆོས་ལུགས་རིས་མེད་བརྩི་བཞིན་ཡོད། ཁོང་རང་ཚོ་ཐེངས་འདིའི་དགེ་བཤེས་མའི་ཡིག་རྒྱུགས་ནང་འཛུལ་ཞུགས་གནང་བཞིན་ཡོད། དགེ་བཤེས་མའི་ཡིག་རྒྱུགས་ནང་སུ་ཡིན་ཡང་འཛུལ་ཞུགས་ཆོག་གི་ཡོད་པ་དང་།

ཡིག་རྒྱུགས་དང་པོ་དེ་འཇམ་དབྱངས་ཆོས་གླིང་ལ་ཚུགས་པ་རེད། ཡིག་རྒྱུགས་གཏོང་ཡུལ་འདི་བཙུན་དགོན་ཁག་ལྔ་རིམ་པས་བང་སྒྲིག་སྟེ་་ཡོད། ད་ཐེངས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་དོན་ལྟར། འབྲས་སྤུངས་སུ་མཛད་སྒོ་དང་སྟབས་བསྟུན་དགེ་བཤེས་མའི་ཕྱག་འཁྱེར་བསྩལ་དགོས་སྐོར་དགའ་ལྡན་ཕོ་བྲང་ནས་ལམ་སྟོན་གནང་བ་རེད། ཅེས་གསུངས།