༢༠༡༦ ཟླ་ ༡༢ ཚེས་ ༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༦ ཟླ་ ༡༢ ཚེས་ ༦ ཉིན་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་བ་ལྟར་ན། དེ་སྔ་རང་ལུས་མེར་བསྲེགས་མཁན་ཞིག་གི་སྐུ་ཕུང་རླངས་འཁོར་ནང་་བཅུག་པ་ལ་བརྟེན་ནས། རྒྱ་གཞུང་གིས་མི་བསད་པའི་ནག་ཉེས་བཙུགས་ནས་ལོ་གསུམ་གྱི་ཁྲིམས་ཐག་བཅད་པའི་སྒྲོལ་མ་མཚོ་དང་དཀོན་མཆོག་བློ་གྲོས་གཉིས་ཟླ་འདིའི་ཕྱི་ཚེས་༤ཉིན་ཁྲིམས་ཐག་དུས་ཡུན་ཚང་ནས་གློད་གྲོལ་བཏང་འདུག
འདིའང་ད་ལྟ་ཨོ་སི་ཀྲོ་ལེ་ཡར་བཞུགས་པའི་སྒྲོལ་མ་མཚོའི་ཕུ་བོ་རྨེའུ་དཀོན་རྒྱམ་ལགས་ཀྱིས་འདི་ག་ལྟེ་གནས་ཁང་དུ་གཏོང་འབྱོར་ལྟར་ན། དེ་ཡང་ཕྱི་ལོ་ ༢༠༡༦ ཟླ་ ༡༢ ཚེས་ ༤ ཉིན་གྱི་མཚན་མོའི་ཆུ་ཚོད་༩ཡས་མས་སུ་རྔ་བ་རྫོང་རྨེའུ་རུ་མའི་རུ་ཆེན་གསུམ་པའི་དགེ་རིག་ཚང་གི་སྒྲོལ་མ་མཚོར་རྒྱ་གཞུང་གིས་ལོ་ངོ་གསུམ་ལ་ཁྲིམས་ཐག་བཅད་པའི་བཙོན་དུས་ཚང་ནས་རང་ཁྱིམ་དུ་བསྐྱལ་འདུག སྐབས་དེར་སྒྲོལ་མ་མཚོ་ལ་གཉེན་ཉེ་དང་ཡུལ་མི། བོད་མི་ཉིས་བརྒྱ་ལྷག་གིས་ཁ་བཏགས་གཡོགས་ནས་ཕེབས་བསུ་བྱས་འདུག
ཡང་རྨེའུ་དཀོན་རྒྱམ་གྱིས་” དཀོན་མཆོག་བློ་གྲོས་ཀྱང་ཉིན་མ་དེ་ག་རང་ལ་གློད་འདུག་ལ། ཕལ་ཆེར་སྒྲོལ་མ་མཚོ་དངོས་སུ་མ་གློད་གྲོལ་གྱི་ཆུ་ཚོད་ཁ་ཤས་ཤིག་གི་སྔོན་དེར་ཡིན་འདུག”ཅེས་བཤད་བྱུང་།
འདི་ག་ལྟེ་གནས་ཁང་གིས་དེ་སྔ་གནས་ཚུལ་འདོན་པ་ལྟར་ན། རྒྱ་གཞུང་གིས་མི་གསོད་ཉེས་མིང་འོག་ལོ་༣ ཀྱི་བཙོན་འཇུག་ཁྲིམས་ཐག་བཅད་ཡོད་ཅིང་ད་ལྟ་དགུང་ལོ་༣༠ བོད་རིགས་བུད་མེད་སྒྲོལ་མ་མཚོ་ནི། རྔ་བ་རྫོང་རྨེའུ་རུ་མའི་རུ་ཆེན་གསུམ་པའི་དགེ་རིག་ཚང་གི་ཡིན་པ་དང་། ༢༠༡༣ཟླ་༡༢ཚེས་༣ཉིན་རྨེའུ་རུ་མའི་བོད་མི་དཀོན་མཆོག་ཚེ་བརྟན་ལགས་ཀྱིས་རང་ལུས་མེར་བསྲེགས་ཀྱི་རྒྱ་གཞུང་ལ་ངོ་རྒོལ་གྱིས་འདས་གྲོངས་སྐབས། ཁོ་མོས་ཁོང་གི་སྐུ་ཕུང་རླངས་
འཁོར་ནང་འཇོག་རོགས་བྱས་པར་བརྟེན་ནས། རྒྱ་གཞུང་གིས་མི་གསོད་ཀྱི་ཉེས་མིང་བཀལ་ཏེ་འཇུ་བཟུང་བཀག་ཉར་བྱས་འདུག་དང། ཕྱི་ལོ་ ༢༠༡༤ ཟླ་ ༡༡ ཚེས་ ༣ ཉིན་གྱི་བོད་ནང་གི་ཆུ་ཚོད་ ༩ དང་ཕྱེད་ཀའི་ཐོག རྔ་བ་རྫོང་མི་དམངས་ཁྲིམས་ཁང་ཟེར་བས་ཁྲིམས་ར་འཚོགས་ཏེ་མི་བསད་ཀྱི་ཉེས་འཛུགས་འོག་སྒྲོལ་མ་མཚོར་ལོ་ ༣ ཡི་ཁྲིམས་ཐག་བཅད་ནས་། རྒྱ་ནག་དབང་སྒྱུར་གྲལ་རིམ་གྱི་བོད་ས་བཅད་བགོས་ལྟར་ན། སི་ཁྲོན་མེ་ཡན་བཙོན་ཁང་ནང་དུ་བཅུག་ཡོད་འདུག
གནས་ཚུལ་མཁོ་སྒྲུབ་པས་བཤད་གསལ་ལ། ཕྱི་ལོ་ ༢༠༡༥ ཟླ་ ༡༢ ནང་ལ་ཁྲིམས་ཁང་ནས་ཡི་གེ་སྔ་ཕྱི་གཉིས་ཁྱིམ་བདག་ཚོར་འབྱོར་ནས་སྒྲོལ་མ་མཚོར་ཛ་དྲག་གི་གཤག་བཅོས་གཏོང་དགོས་སྐོར་བྲིས་ཤིང་ཁྱིམ་བདག་ཚོའི་མིང་རྟགས་འགོད་ཚུལ་བཙན་བཀའ་གཏོང་སྐབས། ཁྱིམ་བདག་ཚོས་ཁྲིམས་ཁང་ལ་ཁ་པར་བཏང་སྟེ་སྒྲོལ་མ་མཚོ་ལ་དངོས་སུ་ཐུག་བཅུག་ན་སྒྲོལ་མ་མཚོའི་གནས་བབ་གང་ཞིག་ཡིན་པ་ཤེས་རྟོགས་ཡོང་བས། དངོས་སུ་ཐུག་འཇུག་པའི་རེ་འདུན་བཏོན་ཀྱང་ཐུག་བཅུག་མི་འདུག སྐབས་དེའི་གཡས་གཡོན་ཞིག་ལ། སྒྲོལ་མ་མཚོས་ཁྲིམས་ཁང་བརྒྱུད་ཁྱིམ་བདག་ཚོར་སྐར་མ་ལྔའི་རིང་ཁ་པར་བཏང་སྟེ་”བཙོན་སྲུང་བ་ཚོས་ང་ལ་ན་ཚ་ཞིག་ཡོད་པས་བཙན་གྱིས་གཤག་བཅོས་གཏོང་དགོས་པའི་བཙན་སྐུལ་ཡང་ཡང་བྱས་རུང་། ངའི་ངོས་ནས་ཁས་ལེན་རྩ་བ་ནས་བྱས་མེད། ཁྱོད་ཚོས་ཀྱང་ཁས་ལེན་རྩ་བ་ནས་མ་བྱེད་”ཅེས་བརྗོད་ཡོད་འདུག
གློད་གྲོལ་བྱུང་བའི་སྒྲོལ་མ་མཚོའི་ད་ལྟའི་གཟུགས་གཞིའི་གནས་སྟངས་ཐད་གནས་ཚུལ་མཁོ་སྒྲུབ་པས་གསུང་གསལ་ལྟར་ན། ཁོང་མོའི་མགོ་ཡུ་འཁོར་བ། གཉིད་མི་ཡོང་བ། གཟུགས་པོ་སྐྱོ་བོ་ཆགས་པ་མ་ཟད། དེ་སྔ་རྩེ་དགོད་ལ་དགའ་བའི་ཁོང་མོའི་གཤིས་ཀ་འགྱུར་ནས་སྙིང་ཁམས་མི་བདེ་བའང་ཆགས་འདུག་ཐོག ཁོང་མོས་”བཙོན་ཁང་གིས་མི་སྤྱོད་ལས་འདས་པའི་མནར་སྤྱོད་དང་སྡུག་སྦྱོང་གིས་ང་སྨྱོན་གྲབས་བྱས་སོང་་”ཅེས་བཤད་འདུག ཁོང་མོའི་ད་ལྟའི་འཕྲོད་བསྟེན་ཐད་ལ་ནང་མི་ངོས་ནས་སེམས་ཁྲལ་ཆེན་པོ་གནང་གི་ཡོད་འདུག
སྒྲོལ་མ་མཚོ་ནི། རྔ་བ་རྫོང་རྨེའུ་རུ་མའི་དགེ་ཚང་གི་ཡིན་ཞིང་། ཕ་དགེ་རིག་དང་མ་དོན་ཁོ་གཉིས་ཡིན་འདུག ཁོང་མོ་ལ་ལོ་ ༡༤ ཅན་གྱི་བུ་མོ་ཚུལ་ཁྲིམས་སྒྲོལ་མ་ཟེར་བ་ཞིག་ཡོད་འདུག
འདི་ག་ལྟེ་གནས་ཁང་གིས་དེ་སྔ་གནས་ཚུལ་བཏོན་པའི་ནང་དུ། རྒྱ་གཞུང་གིས་དཀོན་མཆོག་ཚེ་བརྟན་ལགས་ཀྱིས་རང་ལུས་མེར་བསྲེགས་གནང་བ་དེར་རྐྱེན་བྱས་ཏེ་རྨེའུ་རུ་མའི་ཡུལ་མི་ ༢༠ ལྷག་འཇུ་བཟུང་བཀག་ཉར་བྱས་ཡོད་ཀྱང་། མི་ཁག་ཅིག་ཉིན་བཅུ་གྲངས་འགའ་ཤས་རིང་བཀག་ཉར་གཅར་རྡུང་བྱས་མཐར་རིམ་པར་གློད་ཡོད་ཀྱང་། དེའི་ཁྲོད་ནས་སྒྲོལ་མ་མཚོ་དང་དཀོན་མཆོག་བློ་གྲོས། དགེ་འདུན་འཕེལ་རྒྱས། གྲྭ་བློ་བཟང་རྒྱ་མཚོ། གྲྭ་བསྟན་པ་བཅས་མི་ ༡༠ ལ་ནག་ཉེས་ལྕི་མོ་བཀལ་ཏེ་ཟླ་༡༡་བཀག་ཉར་བྱས་མཐར། ཕྱི་ལོ་ ༢༠༡༤ ཟླ་ ༡༡ ཚེས་ ༣ ཉིན་གྱི་བོད་ནང་གི་ཆུ་ཚོད་ ༩ དང་ཕྱེད་ཀའི་ཐོག རྔ་བ་རྫོང་མི་དམངས་ཁྲིམས་ཁང་ཟེར་བས་ཁྲིམས་ར་འཚོགས་ཏེ་མི་བསད་ཀྱི་ཉེས་འཛུགས་འོག སྒྲོལ་མ་མཚོར་ལོ་ ༣ དང་། དཀོན་མཆོག་བློ་གྲོས་ལ་ལོ་ ༣ ། དགེ་འདུན་འཕེལ་རྒྱས་ལ་ལོ་ ༢ བཅས་ཀྱི་བཙོན་འཇུག་ཁྲིམས་ཐག་བཅད་བཅད་ཡོད་འདུག་པ་བཞིན། དངོས་སུ་ཁྲིམས་ཐག་བཅད་པའི་དགེ་འདུན་འཕེལ་རྒྱས་གློད་གྲོལ་བྱུང་ཡོད་མེད་གསལ་བོ་ཤེས་རྟོགས་ཐུབ་མེད།
དཀོན་མཆོག་བློ་གྲོས་ནི་རྔ་བ་རྫོང་རྨེའུ་རུ་མ་ཡུལ་ཚོའི་རུ་ཆེན་གཉིས་པའི་གོ་ཚེ་གི་ཡིན་པ་དང་། དགེ་འདུན་འཕེལ་རྒྱས་ནི་རྔ་བ་རྫོང་རྨེའུ་རུ་མ་ཡུལ་ཚོའི་རུ་ཆེན་བཞི་བའི་མར་ལི་ཚང་གི་རེད་འདུག
