༄༅། །ཨ་རིར་ཡོད་པའི་སྤྱི་དམངས་ནུས་སྟོབས་ཚོགས་པ་ Initiative for China ཞེས་གཞུང་འབྲེལ་མིན་པའི་རྒྱ་རིགས་མང་གཙོ་གོང་སྤེལ་གྱི་ལས་འགུལ་ཚོགས་པའི་ཚོགས་གཙོ།  རྒྱ་རིགས་མཁས་དབང་མང་གཙོ་གདོན་གཉེར་བ་སྐུ་ཞབས་ཡང་ཅི་ལིས་ Dr. Yang Jianli  ཐེངས་འདིར་སོག་པོའི་གཞུང་མང་གཉིས་ཀྱིས་རྒྱ་ནག་གཞུང་གིས་གནོན་ཤུགས་ལ་འཛེམས་ཟོན་སྤུ་ཙམ་མེད་པའི་ཐོག་ནས་བོད་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སོག་ཡུལ་དུ་གདན་འདྲེན་ཞུས་ཏེ་རང་གི་ཕ་མེས་ཀྱི་རིག་གཞུང་དེ་དག་རང་མོས་ལྟར་རང་དབང་ཐོག་ནས་འཛིན་སྐྱོང་སྤེལ་གསུམ་གྱི་ལས་དོན་ལ་ཡི་རང་བསྔགས་བརྗོད་རྒྱ་ཆེ་ཞུས་པའི་བསྒྲགས་གཏམ་ཞིག་སྤེལ་འདུག  དེ་ཡང་བསྒྲགས་གཏམ་ནང་འཁོད་པ་ལྟར་ན་རྒྱ་ནག་གཞུང་གིས་སོག་པོའི་གཞུང་ལ་ཆིབས་སྒྱུར་ལ་བསྙད་དེ་སོག་གཞུང་དང་འབྲེལ་བ་མཚམས་འཇོག་བྱ་རྒྱུའི་རྣམ་འགྱུར་བསྟན་པ་དེ་ནི་ཐུབ་སར་བརྙས་བཅོས་དང་།  མ་ཐུབ་སར་སྤྲེལ་ལད། ཞེས་ཟེར་སྲོལ་ཡོད་པ་དེ་ལྟར་ཤིན་ཏུ་མི་འཚམས་པ་ཞིག་ཡིན་པ་དང་། ༸གོང་ས་ཏཱ་ལའི་བླ་མ་མཆོག་ཁུལ་དེར་ཆོས་ཕྱོགས་ཁོ་ནའི་དོན་དུ་ཡིན་མིན་ལ་མ་ལྟོས་པར་རྒྱ་ནག་གཞུང་གིས་སོག་པའི་གཞུང་ལ་ཞེ་ཁྲེལ་ནས་སྡོད་རྒྱུ་དེ་ནི་ཐ་ཤལ་གྱི་བྱ་སྤྱོད་ཅིག་ཡིན་སྐོར་སྐྱོན་བརྗོད་ཤུགས་ཆེ་གནང་འདུག

དེ་ཡང་བསྒྲགས་གཏམ་ནང་འཁོད་དོན།  སོག་ཡུལ་མིག་དཔེར་བཟུང་ནས།  རྒྱལ་ཁབ་གཞན་ཚོས་ཀྱང་མཉམ་རུབ་ཐོག    རྒྱལ་སྤྱིའི་འབྲེལ་ལམ་ཐད་རྒྱ་ནག་གཞུང་གིས་རང་ཁེ་ཁོ་ནར་དམིགས་ནས་རང་་སྣང་གང་དྲན་གྱིས་གནོན་ཤུགས་སྤྲོད་རྒྱུའི་གཏི་ཐུག་གི་བྱ་སྤྱོད་དེར་ངོས་ལེན་བྱེད་ཐབས་རྩ་བ་ནས་མེད། ཅེས་པའི་བརྡ་ལན་གསལ་པོ་ཞིག་སྤྲོད་ཐབས་གནང་དགོས། རྒྱུ་མཚན་དེར་བརྟེན་ང་ཚོས་ཐེ་ཝན་དང་ལྷོ་ཨ་ཕི་རི་ཀ དེ་བཞིན་རྒྱལ་ཁབ་གཞན་ཚོར་སོག་ཡུལ་ལ་མིག་དཔེ་བལྟ་རོགས། ཞེས་འབོད་སྐུལ་ཤུགས་ཆེ་ཞུ་རྒྱུ་མ་ཟད།  ཨ་རིའི་སྲིད་འཛིན་དུ་འོས་འདེམས་བྱུང་བ་སྐུ་ཞབས་ཌོ་ནལ་ཊམ་ Donald Trump  མཆོག་གིས་༸གོང་ས་ཏཱ་ལའི་བླ་མ་མཆོག་མགྱོགས་མྱུར་མཇལ་འཕྲད་ཞུ་དགོས་པའི་རེ་འདུན་ཞུ་རྒྱུ་ཡིན། ཅི་ཡང་མི་སྨྲ་བའི་རྟུལ་ཞུགས་ཀྱི་སྤྱོད་པ་བོར་ཚེ་ད་གཟོད་གཉའ་གནོན་དང་ཐུབ་ཚོད་ཤོད་རྒྱུའི་ཁོར་ཡུག་ལས་ལྡོག་སྟེ།  དྲང་བདེན་དང་འཆམ་མཐུན་གྱི་ཁོར་ཡུག་བཟང་པོ་ཞིག་རྒྱལ་སྤྱིའི་ཁྱོན་ལ་ཡུག་གཅིག་ཏུ་ཁྱབ་པར་བྱེད་ཐུབ། ཅེས་འཁོད་འདུག