༢༠༡༦ ཟླ་ ༡༡ ཚེས་ ༢༨ རེས་གཟའ་ཟླ་བ།

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཕྱི་ཚེས་ ༢༦ ཉིན་ཉི་ཧོང་གི་ས་ཡི་ཏ་མའི་གྲོང་ཁྱེར་དུ་རྟེན་གཞི་བྱས་པའི་ས་ཡི་ཏ་མའི་སྨན་གྱི་མཐོ་སློབ་ Saitama Medical University ཏུ་བྱམས་བརྩེའི་ཉམས་ལེན་སྐོར་བླང་དོར་བཀའ་སློབ་སྩལ། དེ་ཡང་ཐོག་མར་༸གོང་ས་མཆོག་གིས་ས་ཡི་ཏ་མའི་སྨན་གྱི་མཐོ་སློབ་དང་སྨན་ཁང་དབུ་འཛུགས་གནང་མཁན་མ་རུ་ཀི་ནང་མི་ Maruki Family མི་རབས་གསུམ་གྱིས་བོད་མི་དང་༸གོང་ས་མཆོག་ལ་མཛའ་བརྩེའི་འབྲེལ་ལམ་རྒྱུན་སྐྱོང་འོག་མཐུན་འགྱུར་རོགས་རམ་རྒྱ་ཆེ་གནང་བར་ཐུགས་རྗེ་ཆེ་ཞུས་གནང་མཛད་རྗེས་དགེ་ལས་སློབ་ཕྲུག་རྣམས་ལ་བྱམས་བརྩེའི་ཉམས་ལེན་སྐོར་བཀའ་སློབ་སྩལ་དོན།

འཛམ་གླིང་འདིའི་ནང་སྐད་ཡིག་མི་འདྲ་བ་ཧ་ཅང་མང་པོ་ཡོད་ཀྱང་འཛམ་གླིང་མི་འབོར་ཐེར་འབུམ་བདུན་ཡོད་པ་ཚང་མས་བྱམས་བརྩེ་གལ་ཆེན་པོ་ཡིན་པར་ངོས་འཛིན་བྱེད་བཞིན་ཡོད། མི་ཙམ་མ་ཟད་དུད་འགྲོ་ཚུན་ཆད་ཀྱང་བྱམས་བརྩེ་བྱེད་མཁན་དེར་དགའ་པོ་བྱེད་བཞིན་ཡོད། མི་དངོས་གནས་བྱམས་བརྩེ་ལྡན་པ་ཞིག་དང་ཐུག་སྐབས་ཚང་མས་དགའ་པོ་བྱེད་ནས་གྲོགས་འདྲིས་བྱེད་འདོད་དང་།  མི་རླུང་ལང་པོ་ཞིག་དང་ཐུག་སྐབས་ཚང་མས་གཡོལ་ཐབས་བྱེད་ཀྱི་རེད།   འདས་པའི་ལོ་ངོ་ ༣༠ ལྷག་རིང་ངོས་ཀྱིས་ཚན་རིག་པ་དང་ལྷན་བགྲོ་གླེང་བྱས་པ་ཡིན། ཚན་རིག་པ་ཚོས་བརྟག་དཔྱད་ཀྱི་ལམ་ནས་མིའི་ལྷན་སྐྱེས་རང་བཞིན་ནི་བྱམས་བརྩེ་ལྡན་པ་ཞིག་ཡིན་སྐོར་བརྗོད་ཀྱི་འདུག

ཕྲུ་གུ་ཆུང་དུས་རང་བཞིན་གྱིས་ཕན་ཚུན་གཅིག་གིས་གཅིག་ལ་མཛའ་བརྩེའི་རྣམ་འགྱུར་འདོན་གྱི་ཡོད། འོན་ཀྱང་རིམ་བཞིན་ལོ་ན་ཚོད་ཡར་རྒྱས་འགྲོ་སྐབས་མི་ཕན་ཚུན་དབར་ཤ་མདོག་མི་འདྲ་བ་དང་རྒྱལ་ཁབ་ཐ་དད། དབུལ་ཕྱུག་དང་ཤེས་ཡོན་ཡོད་མེད་སོགས་རྒྱབ་ལྗོངས་ཀྱི་རིམ་པ་གཉིས་པའི་གནས་སྟངས་ལ་གཙིགས་ཆེན་པོར་འཛིན་བཞིན་ཡོད། དེ་ཚོ་རིམ་པ་གཉིས་པ་རེད། རིམ་པ་དང་པོ་དེ་ང་ཚོ་ཚང་མ་གཞི་རྩའི་འགྲོ་བ་མི་གཅིག་གྱུར་ཡིན།   ངོས་ཀྱིས་བསམ་པར་ང་ཚོས་རིམ་པ་དང་པོའི་གནས་སྟངས་དེར་དོ་སྣང་དེ་ཙམ་མ་བྱས་པར་རིམ་པ་གཉིས་པའི་ཐོག་ཧ་ཅང་གཙིགས་ཆེན་པོ་འཛིན་བཞིན་པ་དེ་ནི་གཙོ་བོ་དེང་དུས་ཀྱི་ཤེས་ཡོན་སློབ་གསོ་དང་འབྲེལ་བ་ཡོད་པ་ལྟ་བུ་འདུག   དེང་དུས་ཤེས་ཡོན་སློབ་གསོ་སྤྲོད་སྐབས་མིའི་ནང་གི་གཤིས་རྒྱུད་དང་འབྲེལ་བའི་བཟང་པོའི་རིན་ཐང་དེ་དག་ལ་དེ་ཙམ་གལ་ཆེར་མ་བརྩི་བར་ཕྱི་དངོས་པོའི་མཐུན་རྐྱེན་ཡར་རྒྱས་ཀྱི་བསམ་བློ་གཙོ་བོར་འཛིན་བཞིན་པའི་ལམ་སྲོལ་དེ་ལ་བརྟེན་ནས་བཟང་སྤྱོད་ཉམས་པའི་དཀའ་ངལ་སོགས་འཕྲད་བཞིན་ཡོད། ཞེས་སོགས་ཀྱི་བཀའ་སློབ་སྩལ་རྗེས་དམིགས་བསལ་སྨན་གྱི་སློབ་མ་རྣམས་ལ་བཀའ་སློབ་སྩལ་དོན།

ནད་པར་སྨན་བཅོས་བྱེད་སྐབས་སྨན་པའི་ལག་རྩལ་གཞན་དང་མི་འདྲ་བར་ནད་པར་བྱམས་བརྩེ་རྣམ་པ་གདོན་དགོས་པ་དེ་ཡང་ཧ་ཅང་གལ་ཆེན་པོར་བརྩི་དགོས། ངོས་རང་གིས་དངོས་སུ་ཉམས་མྱོང་བྱུང་བ་ལྟར། ངོས་རང་སྨན་བཅོས་བྱེད་སྐབས་སྨན་པ་དང་སྨན་ཞབས་པ་ཚོས་བྱམས་བརྩེའི་ཚོར་བའི་ཐོག་ནས་སྨན་བཅོས་བྱེད་སྐབས་སེམས་ནང་རང་བཞིན་གྱི་ཞི་བདེ་བག་ཕེབས་ཡོང་གི་འདུག གཞན་སྨན་པ་ཁག་གཅིག་གིས་ནད་པ་དེར་མིའི་ཚོར་བ་དེ་ཙམ་མེད་པར་སེམས་མེད་བེམ་པོར་ཁབ་བརྒྱབ་པ་ལྟ་བུ་བྱེད་སྐབས་སེམས་ནང་ཏོག་ཙམ་ཐེ་ཚོམ་ཡོང་བཞིན་འདུག   ཁྱེད་ཉི་ཧོང་པ་ཚོས་འཛུམ་མདངས་ཀྱི་རྣམ་འགྱུར་མང་ཙམ་ཐོན་དགོས། ང་ཚོ་མི་ཞིག་ཡིན་པའི་ངོས་ནས་ཕན་ཚུན་མཛའ་བརྩེའི་རྣམ་འགྱུར་ཆུང་ཙག་དེ་དག་ལའང་དོ་སྣང་བྱེད་དགོས། ཞེས་སོགས་བཀའ་སློབ་སྩལ་བསྟུན་དྲི་བ་རྣམས་ལ་བཀའ་ལན་སྩལ། དེ་ཡང་ཐེངས་འདིར་༸གོང་ས་མཆོག་གིས་ཉི་ཧོང་ཁུལ་གྱི་མཛད་འཕྲིན་ཁག་རེ་ཞིག་ཡོངས་སུ་ལེགས་གྲུབ་རྗེས་རྒྱལ་ས་ཊོག་ཡོའི་རྒྱལ་སྤྱིའི་ན་རི་ཏ་གནམ་ཐང་ཉེ་འགྲམ་ཞིག་ཏུ་ཆིབས་སྒྱུར་བསྐྱངས་གནང་མཛད་ནས་ཁུལ་དེར་བཞུགས་གནས་གསོལ་མགྲོན་ཁང་ཞིག་ཏུ་མཚན་མོ་བཞུགས་བཞག་མཛད་རྗེས་ཕྱི་ཉིན་རྒྱ་གར་དུ་ཆིབས་༸ཞལ་བསྒྱུར་ཡོད་པ་བཅས།།