༢༠༡༦ ཟླ་ ༡༡ ཚེས་ ༢༡ རེས་གཟའ་ཟླ་བ།

༄༅། །ཕྱི་ལོ་ ༢༠༡༦ ཟླ་ ༡༡ ཚེས་ ༢༡ ཉིན་འཕྲོད་བསྟེན་ལས་ཁུངས་ཀྱི་གོ་སྒྲིག་འོག་བཞུགས་སྒར་རྡ་སའི་ཉེ་འགྲམ་དུ་ཡོད་པའི་དབུས་སྣེ་ལེན་འབྲེལ་མཐུད་ཁང་གི་ཚོགས་ཁང་དུ་བཙན་བྱོལ་བོད་མིའི་འདུ་སྡོད་ས་གནས་ཁག་ ༣༧ ཙམ་ནས་སྨན་ཁང་འགན་འཛིན་དང་། སྨན་ཞབས་པ། དེ་བཞིན་ས་གནས་སྨན་བཅོས་ལྟ་སྐྱོང་ལས་གཞིའི་འབྲེལ་ཡོད་ལས་བྱེད་བཅས་ཁྱོན་མི་གྲངས་ ༤༡ ལ་སྨན་བཅོས་ལྟ་སྐྱོང་ལས་གཞིའི་སྐོར་ཟབ་སྦྱོང་དབུ་འཛུགས་ཀྱི་མཛད་སྒོར་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་གསུང་བཤད་གནང་དོན།

རྩ་བའི་སྨན་བཅོས་ལྟ་སྐྱོང་གི་ལས་གཞི་འདི་ཕྱི་ལོ་ ༢༠༡༢ ནས་འགོ་འཛུགས་གནང་བ་ཞིག་ཆགས་ཡོད།  དེ་སྔོན་བོད་མི་མང་སྤྱི་འཐུས་སྐབས་ ༡༤ དང་བཀའ་ཤག་སྐབས་ ༡༣ སྐབས་ངས་དྲན་ཚོད་བྱས་ན་ཕལ་ཆེར་ཕྱི་ལོ་ ༢༠༠༧ ལོར་བཙན་བྱོལ་བོད་མིའི་ཁྲོད་འཕྲོད་བསྟེན་སྨན་བཅོས་ཀྱི་ཉེན་སྲུང་ཞིག་འཛིན་སྐྱོང་གི་ངོས་ནས་འབད་བརྩོན་གནང་དགོས་སྐོར་གྲོས་ཚོགས་ནང་བགྲོ་གླེང་དང་གོ་བསྡུར་ལྷུག་པོ་བྱུང་ཡོད།   དེའི་སྐབས་འཕྲོད་བསྟེན་བཀའ་བློན་སྐལ་བཟང་དབྱངས་སྐྱིད་ལགས་ཆགས་ཡོད་པ་དང་། རིམ་བཞིན་དེའི་ཐོག་ཁྱད་ལས་པ་གདན་ཞུ་དང་དཔྱད་ཞིབ་སོགས་གནང་མཐར། བཀའ་ཤག་སྐབས་གོང་མས་ཕྱི་ལོ་ ༢༠༡༢ ལོར་ལས་གཞི་འདི་དངོས་སུ་ལག་བསྟར་དབུ་འཛུགས་གནང་ཡོད།

འདས་པའི་ལོ་བཞི་ལྷག་གི་བརྒྱུད་རིམ་ཁྲོད་ང་ཚོས་ཉམས་མྱོང་དང་ཤེས་རྟོགས་གང་ལེགས་བྱུང་ཡོད། ལོ་རེ་རེའི་ནང་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞིའི་ནང་འགྱུར་བ་གང་འདྲ་ཞིག་འགྲོ་དགོས་ཡོད་མེད་དང་། བཙན་བྱོལ་སྤྱི་ཚོགས་ཀྱི་གནས་བབ་ལ་གཞིགས་པའི་དགོས་མཁོ་གང་འདྲ་ཡོད་མེད་སོགས་ཀྱི་ཐོག་རྣམ་པ་ཚོས་འདུ་འཛོམས་འདི་ལྟ་བུ་གནང་བའི་ཐོག་ནས་དཔྱད་ཞིབ་གནང་ཡོད།

ལྷག་པར་རྒྱ་གར་གྱི་ཁྱད་ལས་པ་གདན་ཞུས་ཀྱིས་གོ་བསྡུར་དང་བགྲོ་གླེང་སོགས་རབ་དང་རིམ་པ་གནང་དང་གནང་བཞིན་ཡོད། འཕྲོད་བསྟེན་ལས་ཁུངས་ཀྱི་ངོས་ནས་ཨ་རིའི་རོགས་ཚོགས་ USAID མཐུན་འགྱུར་འོག་རྒྱ་གར་ཁྱད་ལས་པས་བཙན་བྱོལ་བོད་མིའི་སྨན་བཅོས་ལྟ་སྐྱོང་གི་ལས་གཞིའི་ཐོག་དཔྱད་ཞིབ་གནང་ཡོད། དཔྱད་ཞིབ་བྱས་པའི་སྙན་ཐོའི་ནང་འགྱུར་བ་ཇི་དགོས་ཁག་ལ་རྒྱབ་གཉེར་དང་། དེ་དང་འབྲེལ་བའི་ཐོག་དབུས་ལས་ཁུངས་སུ་ཚོགས་འདུ་ཁག་ཕལ་ཆེར་ཐེངས་གསུམ་ཙམ་ཚོགས་ཡོད། ཉེ་ཆར་ཕྱི་ཟླ་ ༡༠ ནང་ཚོགས་འདུ་འཚོགས་སྐབས་དེ་རིང་གི་ཟབ་སྦྱོང་འཚོགས་རྒྱུ་གཏན་འབེབས་བྱུང་བ་ལྟར། དེ་རིང་རྣམ་པ་ཚོ་འདིར་ཕེབས་ཏེ་ཉིན་གྲངས་གསུམ་རིང་ས་གནས་ས་ཐོག་ལ་སྨན་བཅོས་ལྟ་སྐྱོང་གི་ལས་གཞི་འགྲོ་སྟངས་ཇི་ལྟར་འགྲོ་མིན་གྱི་ཐོག་གོ་བསྡུར་སྦྱང་བཤད་གནང་རྒྱུ་རེད།

ལྷག་དོན་ཆེད་དུ་གདན་ཞུ་གནང་བའི་ཟབ་ཁྲིད་པ་དང་ལྷན་བསམ་ཚུལ་བརྗེ་ལེན་བྱས་པའི་ཐོག་ནས་མཐར་ཕྱི་ལོ་ ༢༠༡༧།༡༨ ལོའི་ནང་སྨན་བཅོས་ལྟ་སྐྱོང་གི་ལས་གཞིའི་སྲིད་བྱུས་སམ་ལམ་སྟོན་གང་འདྲ་ཞིག་གཏན་ལ་དབབ་དགོས་མིན་ཐད་ཐེངས་འདིའི་འདུ་འཛོམས་དང་དཔྱད་ཞིབ་ཀྱི་ཐོག་ནས་གཏན་འབེབས་ཆགས་ཐུབ་པ་དགོས་རྒྱུ་རེད་སྙམ།  བཀའ་སྤྱི་གཉིས་ནས་ལས་གཞི་འདི་གལ་གནད་ཆེན་པོ་ཞིག་ལ་ངོས་འཛིན་གནང་བཞིན་ཡོད་པ་དང་། དབུས་ལས་ཁུངས་ཀྱི་འགོ་ལས་ཡོངས་ཀྱིས་ལས་གཞི་འདིའི་ཐོག་ཤུགས་སྐྱོན་བཞིན་ཡོད་པ་མ་ཟད། ལྷག་པར་ས་གནས་ས་ཐོག་ཏུ་རྣམ་པ་ཚོས་དོན་ལ་དམིགས་པའི་བྱ་ར་སྟངས་འཛིན་གནང་མཁན་གཙོ་བོ་རྣམ་པ་ཚོ་ཆགས་ཡོད་པར་བརྟེན། རྣམ་པ་ཚོས་དེ་སྔ་ལྟར་མུ་མཐུད་ཤུགས་སྐྱོན་དགོས་རྒྱུ་དང་ལས་གཞི་འདིའི་ཐོག་འབད་འབུངས་གནང་དགོས་པའི་གནས་སྟངས་ཤིག་ཆགས་ཡོད།

རྩ་བའི་སྨན་བཅོས་ལྟ་སྐྱོང་གི་ལས་གཞི་འདི་གལ་ཆེན་པོ་ཞིག་ཡིན་པ་དང་། ལས་གཞི་འདིའི་ཐོག་ང་ཚོས་དཔྱད་ཞིབ་རབ་དང་རིམ་པ་བྱེད་དགོས་པ་དང་། འབྱུང་འགྱུར་ལས་གཞི་འདི་རང་ཁ་རང་གསོ་ཡོང་ཐབས་ཆེད་ང་ཚོ་ཚང་མས་ཤུགས་བརྒྱབ་དགོས། རྣམ་པ་ཚོས་དེ་རིང་གི་ཟབ་སྦྱོང་འདིའི་ཐོག་མཉམ་ཞུགས་ཧུར་ཐག་གནང་སྟེ། ས་གནས་ས་ཐོག་ཏུ་འབྱོར་མཚམས་ཐེངས་འདིའི་ཟབ་སྦྱོང་ཐོག་གང་ཤེས་པ་དེ་དག་ལག་བསྟར་གནང་ཐབས་ཡོང་བའི་རེ་སྐུལ་ཞུ་རྒྱུ་ཡིན། ཞེས་གསུང་བཤད་གནང་ཡོད། །