༢༠༡༦ ཟླ་ ༡༡ ཚེས་ ༩ རེས་གཟའ་ལྷག་པ།
༄༅། །ཐེངས་འདིར་ཨ་རིའི་རྒྱལ་ཡོངས་སྲིད་འཛིན་འོས་བསྡུའི་སྐབས་སྐུ་ཞབས་ཌོ་ནལ་ཊམ་ Donald J Trump མཆོག་ལ་རྒྱལ་ཁ་ཐོབ་པར། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཕྱི་ལོ་ ༢༠༡༦ ཟླ་ ༡༡ ཚེས་ ༩ རེས་གཟའ་ལྷག་པའི་ཉིན་འཚམས་འདྲི་ཞུས་པའི་ནང་འཁོད་དོན།
ངས་བོད་མི་དང་བོད་མིའི་སྒྲིག་འཛུགས་ཀྱི་ཚབ་ཞུས་ནས་སྐུ་ཉིད་མཆོག་དང་སྐུ་ཉིད་མཆོག་གི་ཆབ་སྲིད་ཚོགས་པར་ཨ་རིའི་སྲིད་འཛིན་གསར་པའི་འོས་བསྡུའི་ནང་རྒྱལ་ཁ་ཐོབ་པར་སྙིང་ཐག་པ་ནས་དགའ་བསུའི་འཚམས་འདྲི་ཞུ་རྒྱུ་དང་སྦྲགས། སྐུ་ཉིད་མཆོག་ལ་ད་ཆ་སྟོབས་ཆེན་རྒྱལ་ཁབ་ཨ་རིའི་སྲིད་འཛིན་གྱི་ལས་འགན་གསར་པ་ཞིག་ཡོད་སྟབས། ལས་དོན་གང་ཅིར་བྱ་བ་ལམ་ལྷོང་ཡོང་བའི་སྨོན་འདུན་ཞུ་རྒྱུ་ཡིན།
ཨ་རིའི་གཞུང་མང་གཉིས་ནས་ཐེངས་མང་པོར་བོད་མིའི་ཆོས་ཕྱོགས་ཀྱི་དབུ་ཁྲིད་བླ་ན་མེད་པ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་སྲིད་འཛིན་གྱི་ཕོ་བྲང་དཀར་པོའི་ནང་ཡང་ཡང་གདན་ཞུ་གནང་བར་ངས་བཀའ་དྲིན་བསམ་ཤེས་ཐུབ་ཀྱི་འདུག་པ་མ་ཟད།
ལྷག་པར་དབུ་མའི་ལམ་གྱི་སྲིད་བྱུས་ལ་ཨ་རིའི་གཞུང་གིས་བསྔགས་བརྗོད་དང་སྦྲགས་༸གོང་ས་མཆོག་དང་རྒྱ་ནག་དཔོན་རིགས་དབར་གྲོས་མོལ་བརྒྱུད་ཕན་ཚུན་མི་མཐུན་པ་རྣམས་སེལ་ནས་ཞི་བདེའི་ཁོར་ཡུག་སྐྲུན་ཐབས་ཆེད་རྒྱབ་སྐྱོར་གནང་བ་དེ་ནི་བོད་མི་ཚོར་ཧ་ཅང་བཀའ་དྲིན་ཆེན་པོ་ཆགས་ཡོད།
སྐུ་ཉིད་མཆོག་གིས་རྒྱལ་ཁའི་གཏམ་བཤད་གནང་སྐབས། རྒྱལ་ཁབ་ཀྱི་ཁེ་ཕན་རྩ་འཛིན་ཐོག་ནས་འཛམ་གླིང་སྤྱི་ཚོགས་གཞན་ཚང་མར་དྲང་བདེན་ཐོག་ནས་གཟིགས་སྐྱོང་གནང་རྒྱུ་ཡིན་སྐོར་གསུངས་པ་ལྟར། ང་ཚོས་སྐུ་ཉིད་མཆོག་དང་སྐུ་ཉིད་མཆོག་གི་སྲིད་གཞུང་ངོས་ནས་ཞི་བའི་ལམ་ནས་བོད་ཀྱི་གནད་དོན་གསལ་ཆེད་རྒྱ་ནག་དང་ལྷན་གྲོས་མོལ་ཡོང་སླད་རྒྱབ་སྐྱོར་མུ་མཐུད་གནང་རོགས་ཞེས་རེ་འདུན་ཞུ་རྒྱུ་ཡིན། ཞེས་འཁོད་འདུག །
