༢༠༡༦ ཟླ་ ༡༠ ཚེས་ ༢༧ རེས་གཟའ་ཕུར་བུ།
༄༅། །ཕྱི་ལོ་ ༢༠༡༦ ཟླ་ ༡༠ ཚེས་ ༢༡ ཉིན་ཨ་རིའི་ཕྱི་སྲིད་ལས་ཁུངས་ནང་དུ་ཨ་རི་སྐུ་ཚབ་དོན་གཅོད་ཚོགས་ཟུར་སྤེན་པ་ཚེ་རིང་མཆོག་གིས་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ས་ར་སི་ཝེལ་ Sarah Sewall མཆོག་དང་མཇལ་འཕྲད་གནང་འདུག སྐབས་དེར་བོད་དོན་དམིགས་བསལ་འབྲེལ་མཐུད་པ་མཆོག་གིས་ཐོག་མར་ཚོགས་ཟུར་སྤེན་པ་ཚེ་རིང་མཆོག་ཨ་རིའི་སྐུ་ཚབ་དོན་གཅོད་གསར་པར་བསྐོ་གཞག་གནང་བར་འཚམས་འདྲི་གནང་བ་དང་སྦྲགས། ད་ལྟའི་བོད་ནང་གི་གནས་སྟངས་སྤྱི་དང་། ལྷག་པར་བོད་རྒྱ་འབྲེལ་མོལ། ཕོ་མོ་འདྲ་མཉམ་གྱི་གནས་སྟངས་ཐོག་བོད་མིའི་སྒྲིག་འཛུགས་ཀྱི་སྲིད་བྱུས་ལངས་ཕྱོགས། ཕྱི་ལོ་ ༢༠༡༧ ནང་༸གོང་ས་མཆོག་ཨ་རིའི་ཁུལ་དུ་ཆིབས་སྒྱུར་སྐོར།
དེ་བཞིན་བོད་དོན་ཐོག་མུ་མཐུད་ཨ་རིའི་སྲིད་གཞུང་གི་རྒྱབ་སྐྱོར་ཐོབ་ཐབས་ཙམ་མ་ཟད། ཨ་རིའི་རྒྱལ་ཡོངས་འོས་བསྡུ་ཆེན་མོ་ཟིན་རྗེས་སྲིད་གཞུང་གསར་པའི་ངོས་ནས་བོད་ཀྱི་གནད་དོན་ཐོག་རྒྱབ་སྐྱོར་མུ་མཐུད་གནང་ཆེད་བོད་མིའི་ཕྱོགས་ནས་ཨ་རིའི་གཞུང་དང་འབྲེལ་ལམ་སྤེལ་ཕྱོགས། སྤྱིར་རྒྱལ་སྤྱིའི་ཁྱོན་དུ་བོད་དོན་རྒྱབ་སྐྱོར་གྱི་ལས་འགུལ་ཤུགས་ཆེ་རུ་ཇི་ལྟར་གཏོང་དགོས་མིན་སྐོར་གོ་བསྡུར་གནང་འདུག
སྐབས་དེར་སྐུ་ཚབ་དོན་གཅོད་ངོས་ནས་༸གོང་ས་མཆོག་གི་ཐུགས་བསྐྱེད་དམ་བཅའ་གསུམ་གྱི་སྐོར་ཞུས་པ་མ་ཟད། ཨ་རིའི་སྲིད་གཞུང་སྔ་རྗེས་དང་ཨ་རིའི་བོད་དོན་དམིགས་བསལ་འབྲེལ་མཐུད་པས་ད་བར་བོད་དོན་ཐོག་ལྷག་བསམ་ཆེན་པོས་ཐོག་ནས་རྒྱབ་སྐྱོར་དང་མཐུན་འགྱུར་རོགས་རམ་གནང་དང་གནང་མུས་ལ་ཞེ་ཐག་པ་ནས་བཀའ་དྲིན་ཆེ་ཞུས་པ་དང་སྦྲགས། འབྱུང་འགྱུར་ལྕམ་སྐུ་མཆོག་དང་ལྷན་འབྲེལ་ལམ་ཉེས་པོའི་ཐོག་ནས་ལས་དོན་མུ་མཐུད་སྤེལ་རྒྱུའི་རེ་བ་ཞུ་བཞིན་ཡོད་སྐོར་ཞུས་འདུག སྤྱིར་ལྕམ་སྐུ་ས་ར་སི་ཝེལ་མཆོག་ནི་ཨ་རིའི་གཞུང་གི་སྤྱི་དམངས་བདེ་འཇགས་དང་མང་གཙོ། འགྲོ་བ་མིའི་ཐོབ་ཐང་སྲུང་སྐྱོབ་ལྷན་ཁང་གི་དྲུང་གཞོན་ལས་རོགས་ཀྱི་གནས་རིམ་ཐོག་ཕྱག་ལས་གནང་བཞིན་ཡོད་འདུག །
