ཁ་སང་(༢༠༠༨།༣།༠༧)གསར་ལམ་ཁག་གིས་གནས་ཚུལ་སྤེལ་བར། བོད་ནང་གི་རྒྱ་ནག་གི་འགོ་ཁྲིད་མཐོ་ཤོས་ཀྲང་ཆིང་ལིས༸གོང་ས་ཏཱ་ལའི་བླ་མ་མཆོག་གིས་བཅར་འདྲི་ཞིག་འཁྱོག་བཤད་བྱས་ཏེ། ༸གོང་ས་མཆོག་གིས་པེ་ཅིང་ཨོ་ལམ་པིཀ་རྩེད་འགྲན་ལ་འགོག་རྐྱེན་བཟོ་ཡི་ཡོད་སྐོར་གྱི་སྐྱོན་འཛུགས་ཞུས་ཡོད།

དེ་འདྲའི་ཆེས་རྩབ་པའི་སྐྱོན་བརྗོད་དེ་ནི་འདི་ལོའི་ཕྱི་ཟླ་དང་པོའི་བདུན་ཕྲག་གསུམ་པའི་ནང་དབྱིན་ཇིའི་བརྙན་འཕྲིན་ (ITV Network) ཞེས་པས་༸གོང་ས་མཆོག་ལ་བཅར་འདྲི་ཞུས་པས་གནས་ཚུལ་ལ་གཞི་བཞག་པ་ཞིག་ཡིན་འདུག གསར་ལམ་དེས་ཨོ་ལམ་པིཀ་རྩེད་འགྲན་འགོ་མ་ཚུགས་བར་ཞི་བའི་ངོ་རྒོལ་བྱེད་རྒྱུར་༸གོང་ས་མཆོག་གིས་རྒྱབ་སྐྱོར་གནང་ཡོད་ཚུལ་གྱི་གནས་ཚུལ་བཏོན་ཡོད་འདུག

རྒྱལ་སྤྱིའི་གསར་ལམ་ཁག་གིས་བཅར་འདྲི་འདིའི་ཆ་ཤས་ཤིག་བསྒྲུགས་ནས་བཏོན་པར། ༸གོང་ས་མཆོག་གི་ལོན་ཌོན་སྐུ་ཚབ་དོན་གཅོད་ཁང་ནས་ཕྱི་ཟླ་ ༠༡ ཚེས་ ༢༣ ཉིན་གསར་ལམ་ཁག་ལ་གནས་ཚུལ་ངོ་མ་གང་གསུངས་ཡོད་པ་འགྲེལ་བརྗོད་ཁ་གསལ་གནང་ཡོད།

གསར་འགོད་པས། བོད་དོན་རྒྱབ་སྐྱོར་ཚོགས་པས་གཙོས་འགྲོ་བ་མིའི་ཐོབ་ཐང་ཚོགས་པ་ཁག་གིས་པེ་ཅིང་དུ་ཨོ་ལམ་པིཀ་རྩེད་འགྲན་ཚོགས་སྐབས་དེའི་ནང་མཉམ་ཞུགས་མི་བྱེད་རྒྱུར་རྒྱལ་ཁབ་མང་པོར་འབོད་སྐུལ་བྱེད་ཀྱི་ཡོད་པ་དེར་༸གོང་ས་མཆོག་གིས་རྒྱབ་སྐྱོར་གནང་གི་ཡོད་མེད་བཀའ་འདྲི་ཞུས་པར། ༸གོང་ས་མཆོག་གིས་དབྱིན་ཇིའི་ཚིག་ (radical) བེད་སྤྱོད་གནང་ནས་དེ་ནི་ཐལ་ཆའི་བྱེད་སྟངས་ཤིག་རེད་ཅེས་བཀའ་གསལ་པོ་གནང་སྟེ་ནས་གསར་འགོད་པའི་དྲི་བར་མོས་མཐུན་གནང་མེད།

ཡང་གསར་འགོད་པས། གཞུང་འབྲེལ་མ་ཡིན་པའི་ཚོགས་ཁག་དེ་ཚོས་ངོ་རྒོལ་གྱི་ལས་འགུལ་མུ་མཐུད་བྱེད་དགོས་མིན་བཀའ་འདྲི་ཞུས་པར། ༸གོང་ས་མཆོག་གིས་བོད་ནང་དྲག་གནོན་དང་ཛ་དྲག་གི་གནས་སྟངས་སྐོར་ལ་རྒྱ་ནག་གི་མི་མང་ཐེ་བའི་རྒྱལ་སྤྱིའི་སྤྱི་ཚོགས་ལ་དྲན་སྐུལ་མུ་མཐུད་བྱེད་འོས་ཞེས་བཀའ་གནང་ཡོད།

པེ་ཅིང་ཨོ་ལམ་པིཀ་གནད་དོན་ལ་༸གོང་ས་མཆོག་ནས་རྒྱ་ནག་ནང་ ༢༠༠༨ ལོར་རྩེད་འགྲན་དེ་འཚོག་རྒྱུར་རྒྱབ་སྐྱོར་ཡོད་པའི་བཀའ་འགྱུར་བ་མེད་པར་གནང་བ་ཀུན་གྱི་མཁྱེན་གསལ་རེད།

འབྲེལ་གཏུགས་ཞུ་ཡུལ།

ཐུབ་བསྟན་བསམ་འཕེལ་དང་། དྭགས་པོ་བསོད་ནམས་ནོར་བུ།

བཙན་བྱོལ་བོད་གཞུང་ཕྱི་དྲིལ་ལས་ཁུངས།

ཁ་པར་ཨང་། ༢༢༢༥༡༠ ། ༢༢༢༤༥༧ ། ༢༢༤༦༦༢ །