༢༠༡༦ ཟླ་ ༡༠ ཚེས་ ༢༡ རེས་གཟའ་པ་སངས།
༄༅། །ཕྱི་ལོ་ ༢༠༡༦ ཟླ་ ༡༠ ཚེས་ ༡༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྔ་དྲོ་ཐོག་མར་ཅེག་སྤྱི་མཐུན་རྒྱལ་ཁབ་ཀྱི་རིག་གཞུང་བློན་ཆེན་མཆོག་དང་གྲོས་ཚོགས་འཐུས་མི་བཅས་དང་མཇལ་འཕྲད་གྲུབ་རྗེས་མ་ནེ་སི་ཚོགས་ཁང་ Manes Hall དུ་ཆིབས་སྒྱུར་བསྐྱངས་ནས་སྣང་གནས་མི་མཐུན་པའི་ཆོས་ཀྱི་གནད་ལུགས་ལ་ལྟ་ཚུལ་སྐོར་གྱི་བགྲོ་གླེང་ལྷན་ཚོགས་སུ་བཀའ་སློབ་སྩལ། དེ་རྗེས་ཉིན་གུང་ལྗགས་སྨིན་གྲུབ་རྗེས་མགོན་པོ་གང་ཉིད་མཆོག་གིས་ཛོ་ཕིན་གསོལ་མགྲོན་ཁང་ Zofin Palace ཞེས་པའི་ནང་།  ད་ལྟའི་འཛམ་གླིང་གི་གནས་སྟངས་འོག་ནས་དཀའ་ངལ།  The World and Its Current Challenges ཞེས་པའི་བརྗོད་གཞིའི་ཐོག་བགྲོ་གླེང་ལྷན་ཚོགས་ཐོག་བཀའ་སློབ་སྩལ།

དེ་ཡང་༸གོང་ས་མཆོག་གསོལ་མགྲོན་ཁང་གི་ཚོགས་ཁང་དུ་༸ཞབས་སོར་འཁོད་རྗེས་བགྲོ་གླེང་ནང་མཉམ་ཞུགས་གནང་མཁན་ཅེག་ཡེ་ཤུའི་ཤེས་ཡོན་བསྟི་གནས་ཁང་ Czech Christian Academy གི་ཚོགས་གཙོ་གཙུག་ལག་སློབ་དཔོན་སྐུ་ཞབས་ཐོ་མ་སི་ཧ་ལིག་ Prof Tomas Halik ལགས་དང་།  སའོ་དི་ཨ་རབ་ཡུལ་ Saudi Arabia ནས་རྩོམ་པ་པོ་དང་བུད་མེད་ཐོབ་ཐང་འཐབ་རྩོད་པ་ལྕམ་སྐུ་མ་ནལ་ཨལ་ཤ་རིབ་ Manal al-Sharif ལགས་བགྲོ་གླེང་ནང་མཉམ་ཞུགས་གནང་འདུག སྤྱིར་མ་ནལ་ཨལ་ཤ་རིབ་ཁོང་ལ་ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་དམ་པ་སྐུ་ཞབས་ཝག་ལབ་ཧེ་ཝེལ་ Vaclav Havel མཆོག་གི་མཚན་ཐོག་ནས་གཟེངས་རྟགས་ཕུལ་ཡོད་འདུག   སྐབས་དེར་ལས་རིམ་གཙོ་སྐྱོང་བ་སྤྱི་ཚོགས་རིག་གནས་ཀྱི་ཉམས་ཞིབ་པ་སྐུ་ཞབས་སུ་རེནྡྲ་མུན་ཤི་ Surendra Munshi ལགས་ཀྱིས། གླེང་སྟེགས་ཕྱི་ལོ་ ༢༠༠༠ ཞེས་པའི་ཞི་བདེའི་ལྷན་ཚོགས་ཀྱི་ཚོགས་ཆེན་སྐབས། བརྗོད་གཞི་སྣ་མང་ཐོག་ཞི་བདེའི་དེད་དཔོན།  དབུ་ཁྲིད། མཁས་དབང། ཉམས་ཞིབ་པ་སོགས་གདན་ཞུས་ཀྱིས་བགྲོ་གླེང་ལས་རིམ་གནང་ཟིན་པའི་ནང་། འགོ་ཁྲིད་དང་། ཤེས་ལྡན་མི་སྣའི་ལས་འགན། དྲང་བདེན་བཅས་ད་བར་བགྲོ་གླེང་ཞུས་ཟིན་པ་རྣམས་ཀྱི་སྤྱི་སྒྲོམ་གསལ་བཤད་ཞུས་གྲུབ་བསྟུན།

༸གོང་ས་མཆོག་གིས་བཀའ་སློབ་སྩལ་དོན། དཀའ་ངལ་གྱིས་ངོ་གདོང་ཙམ་ལ་བལྟ་ན་རེ་བ་མེད་པ་ལྟར་སྣང་སྲིད་ཀྱང་། ཕྱོགས་ཡོངས་ཀྱི་གནས་སྟངས་ལ་གཞི་བཅོལ། བསམ་བློ་རྒྱ་ཆེ་ས་ནས་གཏོང་སྐབས་དཀའ་ངལ་དེ་དག་དེ་ཙམ་ཛ་དྲག་པོ་ཞིག་དང་སེལ་མི་ཐུབ་པ་མི་འདུག་བསམས་པའི་རེ་བ་བཟང་ས་ཞིག་མཐོང་ཐུབ།  རྒྱུ་མཚན་དང་ཚན་རིག་གི་དཔྱད་དོན་ཐོག་ནས་ཁོང་ཁྲོ་དང་ཞེ་སྡང་། འཇིགས་སྣང་སོགས་ཀྱི་སེམས་ནང་གི་ཞི་བདེ་དཀྲུག་བཞིན་ཡོད། དེར་བརྟེན་དེང་དུས་ཤེས་ཡོན་ལམ་ལུགས་ནང་དུ་ནང་གཤིས་རྒྱུད་དང་འབྲེལ་བའི་བཟང་པོའི་རིན་ཐང་དཔེར་ན། བྱམས་བརྩེ་དང་བཟོད་བསྲན། ཆོག་ཤེས། བག་ཡོད་བསྟེན་ཚུལ་སོགས་ཀྱི་ཐོག་ལ་དོ་སྣང་མང་ཙམ་བྱེད་དགོས་པ་ཧ་ཅང་གལ་ཆེན་པོ་རེད། ང་ཚོས་འགྲོ་བ་མི་རིགས་སྤྱི་དང་གོ་ལ་འདིའི་གནས་སྟངས་ཐོག་ལ་བསམ་བློ་གཏོང་དགོས་པའི་དུས་ལ་བསླེབས་ཡོད། ངོས་ཀྱི་ཡུ་རོབ་སྤྱི་མཐུན་གྱི་སྒྲིག་འཛུགས་འདིར་རྗེས་སུ་ཡི་རངས་ཞུ་བཞིན་ཡོད། རྒྱལ་ཁབ་བྱེ་བྲག་པ་སོ་སོ་གཅིག་པོར་བསམ་བློ་བཏང་སྟེ་གུ་དོག་བྱས་ནས་མ་བསྡད་པར་སྤྱིའི་ཁེ་ཕན་གཙོ་འཛིན་བྱེད་བཞིན་ཡོད། ངོས་ཀྱིས་ཡུལ་འདིའི་སྲིད་འཛིན་ཞིང་གཤེགས་དམ་པ་སྐུ་ཞབས་ཝག་ལབ་ཧ་ཝེལ་མཆོག་དང་ཁོང་གིས་བདེན་པའི་འཐབ་རྩོད་དེར་བསྔགས་བརྗོད་ཞུ་བཞིན་ཡོད། ད་ལྟ་ཁོང་གི་ལུས་པོ་འདིར་ང་ཚོ་དང་ལྷན་དུ་མེད་ཀྱང་། ཁོང་གི་སྙིང་སྟོབས་རྒྱུན་འཛིན་ཐོག་ནས་འཆར་སྣང་དེ་དག་ང་ཚོས་བསྒྲུབ་ཐབས་བྱེད་དགོས། ཞེས་བཀའ་སློབ་སྩལ།

གཞན་ཡང་སྐབས་དེར་གཙུག་ལག་སློབ་དཔོན་སྐུ་ཞབས་ཐོ་མ་སི་ཧ་ལིག་ Prof Tomas Halik ལགས་ཀྱིས་གོ་ལ་གཅིག་གྱུར་གྱི་ཤུགས་རྐྱེན་འོག་ཕྱི་གསལ་ནང་གསལ་བྱེད་དགོས་སྟབས། སྤྱི་ཚོགས་རིང་ལུགས་ཕམ་ཉེས་འགྲོ་རྒྱུ་རེད། འོན་ཀྱང་དེང་སྐབས་གོ་ལ་གཅིག་གྱུར་གྱི་ལམ་ལུགས་ལ་དེ་སྔ་ལྟར་རྒྱབ་སྐྱོར་མ་ཐོབ།  འཛམ་གླིང་དུམ་བུར་འགྲོ་བཞིན་ཡོད། གོ་ལ་གཅིག་གྱུར་ལམ་ལུགས་དར་བ་དེས་ཆེད་མཐར་ལྷུང་བའི་ཆོས་ལུགས་རྨོང་ཞེན་བྱེད་མཁན་ཇེ་མང་དུ་འགྲོ་ཡོད་སྲིད།  ཁྲོམ་རའི་ལམ་ལུགས་དེས་ལྐོག་ཟ་བྱེད་མཁན་མང་དུ་བཏང་ཡོད། ཅེས་གསུངས། ཕྱོགས་མཚུངས་རྩོམ་པ་པོ་དང་བུད་མེད་ཐོབ་ཐང་འཐབ་རྩོད་པ་ལྕམ་སྐུ་མ་ནལ་ཨལ་ཤ་རིབ་ Manal al-Sharif ལགས་ཀྱིས་གསུང་དོན། ངའི་རྒྱལ་ཁབ་སའོ་དི་ཨ་རབ་ Saudi Arabia ཡུལ་གྱིས་དེ་སྔ་སྣུམ་ཕྱིར་ཚོང་བྱས་པ་ཤེས་ཀྱི་ཡོད། འོན་ཀྱང་ད་ཆ་སྣུམ་ཙམ་མ་ཟད། ཁ་ཆེའི་ཆོས་དེ་ཡང་ཧ་ཅང་མཁྲེགས་བཟུང་ཅན་ཞིག་བཟོས་ནས་གཞན་ལ་ཁྱབ་སྤེལ་བྱེད་བཞིན་ཡོད་པ་ཤེས་བྱུང་།  དཀོན་མཆོག་གིས་སྲུང་མ་བཀོད་ཡོད་ཚུལ་གཞུང་ནས་གསུངས་ཡང་ད་ཆ་བུད་མེད་ཚོས་རང་ཉིད་རང་གི་སྲུང་མ་ཡིན།  ཞེས་བརྗོད་བཞིན་ཡོད།   ཅེས་སོགས་གསུངས།།