༢༠༡༦ ཟླ་ ༡༠ ཚེས་ ༡༩ རེས་གཟའ་ལྷག་པ།
༄༅། །ཕྱི་ལོ་ ༢༠༡༦ ཟླ་ ༡༠ ཚེས་ ༡༥ ཉིན་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་བ་ལྟར་ན། རྒྱ་གཞུང་གིས་བླ་རུང་བཀྲ་ཤིས་འཁྱིལ་བསང་ཁོག་ཞང་ནས་རང་ལུས་མེར་སྲེག་གནང་མཁན་ཞིག་གིས་ཕུང་བོ་ཉེན་རྟོག་པའི་ལག་ཏུ་ཤོར་ཉེན་བྱུང་སྐབས། ཉེན་རྟོག་པའི་ལག་ཏུ་མ་ཤོར་བའི་ཆེད་དུ་ཕུང་བོ་བོར་འདྲེན་གྱི་རོགས་པ་བྱས་པའི་བོད་མི་ཞིག་འཇུ་བཟུང་བྱས་འདུག
རང་ལོ་ ༤༦ ཡིན་པའི་གསང་བདག་སྐྱབས་ལགས། ཟླ་༩ ཚེས་ ༢༩ ཉིན་གྱི་བོད་ནང་གི་ཕྱི་དྲོ་ཆུ་ཚོད་ ༥ ཡས་མས་སུ། ཁོང་དང་བཟའ་ཟླ་བྱམས་སྐྱིད་གཉིས་ཀས་ནང་ལས་ཙག་ཙིག་ཅིག་བྱེད་བཞིན་པའི་སྐབས་སུ། ཉེན་རྟོག་པ་གློ་བུར་ཁྱིམ་དུ་འཛུལ་ནས་གསང་བདག་སྐྱབས་ལགས་འཇུ་བཟུང་དང་། ད་ལྟ་བླ་བྲང་གྲོང་ཁྱེར་ནས་སྐར་མ་ ༡༥ ནས་ ༢༠ ཙམ་གྱི་བར་ཐག་ཡོད་པའི་བང་དཀར་ཐང་གི་བཀག་ཉར་ཁང་དུ་བཀག་བསྐྱིལ་བྱས་འདུག་ལ། དུས་རྒྱུན་གྱི་གཟའ་པ་སངས་ཉིན། ཁོང་ལ་ཟ་མ་བསྐྱལ་ཆོག་པ་དང་། ནང་མིར་ཁྲིམས་ལྟར་འཇུ་བཟུང་ཟིན་པའི་བརྡ་སྦྱོར་བྱས་འདུག
ཕྱི་ལོ་༢༠༡༢ཟླ་ ༡༠ ཚེས་ ༢༦ ཉིན། ཨ་མདོ་བླ་བྲང་བཀྲ་ཤིས་འཁྱིལ་རྫོང་བསང་ཁོག་གསེར་ཁྲི་རུ་ཁག་བཞི་བའི་མགོ་བྷ་ཚང་གི་བུ་མོའི་མག་པ་ཐུབ་དབང་སྐྱབས་ཀྱིས་རང་ལུས་མེར་སྲེག་བཏང་སྟེ། རྒྱལ་བ་རིན་པོ་ཆེ་བོད་ལ་ཆིབས་སྒྱུར་གནང་དུ་འཇུག་དགོས། པཎ་ཆེན་སྐུ་ཕྲེང་༡༡་པ་བཟང་བཙོན་འོག་ནས་གློད་གྲོལ་གཏོང་དགོས་ཞེས་ངོ་རྒོལ་བྱས་ནས་འདས་གྲོངས་སུ་སོང་བས། སྐབས་དེར་བོད་མི་བོད་མི་རྡོ་རྗེ་རྣམ་རྒྱལ་དང་། སྦྱིན་པ། རྡོ་རྗེ་བཀྲ་ཤིས། གསང་བདག་སྐྱབས་བཅས་ཁོང་བཞི་ཡིས་འདས་པོའི་ཕུང་བོ་ཁྱིམ་དུ་འོར་འདྲེན་གྱི་ནང་མིར་རྩིས་སྤྲོད་གནང་བའི་དབང་གིས། ཉེན་རྟོག་པ་ཁོང་ཚོ་བཞི་བོ་འཇུ་བཟུང་བྱེད་དུ་སླེབས། གསང་བདག་སྐྱབས་དེ་མུར་ཉེན་ཡོལ་ལ་འགྲོ་བྱོལ་དུ་སོང་ཡོད་འདུག
རྒྱ་གཞུང་གིས་རྡོ་རྗེ་རྣམ་རྒྱལ་དང་། སྦྱིན་པ། རྡོ་རྗེ་བཀྲ་ཤིས་བཅས་རེ་རེ་ལ་ཁྲིམས་ཆད་ལོ་གཉིས་དང་ཕྱེད་ཀ གསུམ་བཅས་དུས་ཡུན་མ་འདྲ་བ་བཅད་ནས་བཙོན་འཇུག་བྱས། འདི་ལོར་རིམ་གྱི་ཁོང་ཚོ་བཙོན་གྲོལ་བཏང་བ་དང་བསྟུན། གསང་བདག་སྐྱབས་ཀྱིས་ཀྱང་གནད་དོན་མི་འབྱུང་བར་སྙམ་ནས་ཚུར་རང་ཁྱིམ་དུ་ལོག་ཀྱང་། ཉེན་རྟོག་པས་ཅུང་མ་འགོར་བས་ཁོང་འཇུ་བཟུང་དང་ད་ལྟ་བང་དཀར་མངགས་གཏོང་ཁང་དུ་བཀག་ཉར་བྱས་འདུག མངགས་གཏོང་ཁང་དེ་ནི་ཕྱི་ལོ་ ༢༠༡༢ ལོར། བོད་དོན་ལས་འགུལ་བ་མགོ་ལོག་འཇིགས་མེད་ཐེངས་གསུམ་པ་བཀག་སྐྱིལ་བྱས་ས་དེ་ཆགས་ཡོད།
གསང་བདག་སྐྱབས་ནི་བསང་ཁོག་སྡེ་བ་རུའི་རུ་ཁག་གཉིས་པ་ནས་ཡིན་པ་དང་། ཕོའི་མིང་ལ་ཚེ་ལོ་ཟེར། ཁོང་དང་བཟའ་ཟླ་བྱམས་སྐྱིད་གཉིས་ལ་ཕྲུ་གུ་ཕོ་གཉིས་ཡོད་འདུག
