༢༠༡༠ ཕྱི་ཟླ་ ༧ ཚེས་ ༥ རེས་གཟའ་ཟླ་བ།
༄༅། །བླ་མ་རྣམས་ཀྱི་ཡང་སྲིད་ངོས་འཛིན་བྱས་པ་ནི་ནང་ཆོས་དང་འབྲེལ་བའི་བོད་ཀྱི་ཐུན་མོང་མ་ཡིན་པའི་སྲོལ་རྒྱུན་ཞིག་ཡིན་པས་ཆབ་སྲིད་དང་འབྲེལ་བ་མེད་ཅིང་། སྲིད་དོན་གྱི་བེད་སྤྱོད་དུ་སོང་ན་ཆོས་དང་འགལ་བ་ཡིན། ཕྱི་ལོ་ ༢༠༠༧ ཟླ་ ༧ ཚེས་ ༡༨ ཉིན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆོས་ལུགས་ལས་ཁུངས་ནས་སྤྲུལ་སྐུའི་ཡང་སྲིད་ངོས་འཛིན་དོ་དམ་བྱེད་ཐབས་ཡིག་ཆ་སྤེལ་བ་དེ་ནི་ཆོས་སྲིད་གང་དང་མི་མཐུན་པ་ཡིན་པས་ཕྱི་ལོ་ ༢༠༠༧ ཟླ་ ༩ ཚེས་ ༢ ཉིན་བོད་བརྒྱུད་ནང་བསྟན་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་དབུ་ཁྲིད་བླ་ཆེན་རྣམས་དང་བཙན་བྱོལ་བོད་གཞུང་ཆོས་རིག་ལས་ཁུངས་ཐུན་མོང་ནས་དོན་ཚན་བདུན་ཅན་གྱི་ངོས་ལེན་མེད་པའི་བསྒྲགས་གཏམ་སྤེལ་བ་དང་། དེ་བཞིན་ཕྱི་ལོ་ ༢༠༠༨ ཟླ་ ༥ ཚེས་ ༣ ཉིན་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་དང་བཅས་པའི་ཆེས་མཐོའི་དབུ་ཁྲིད་བླ་ཆེན་རྣམ་པའི་དམིགས་བསལ་ལྷན་ཚོགས་ཐོག་ཡིག་ཆ་དེ་ངོས་ལེན་མེད་པ་དང་། འབྱུང་འགྱུར་བོད་ཀྱི་ཆོས་བོན་སུ་ཞིག་གི་སྤྲུལ་སྐུའི་ཡང་སྲིད་ངོས་འཛིན་ཆོས་ལུགས་ཆོས་བརྒྱུད་སུ་ཡིན་སོ་སོའི་ཆེས་མཐོའི་དབུ་ཁྲིད་ཀྱི་མཐའ་མའི་ཆོག་མཆན་མེད་པར་ཡང་སྤྲུལ་ཚད་ལྡན་དུ་ངོས་འཛིན་མི་བྱེད་པའི་གྲོས་ཆོད་བཞག་སྟེ་ཡོངས་ཁྱབ་གསལ་བསྒྲགས་གནང་ཡོད།
ཕྱི་ལོ་ ༢༠༡༠ ཟླ་ ༧ ཚེས་ ༤ ཉིན་འབྲས་བློ་གླིང་རྒྱལ་རོང་སྡེ་དྲུག་རིན་པོ་ཆེའི་ཡང་སྲིད་ངོས་འཛིན་ཟེར་བ་རྒྱ་དམར་གྱི་ལྟ་སྐྱོང་འོག་གསེར་བུམ་དཀྲུག་འདོན་གྱིས་ངོས་འཛིན་བྱས་སྐད་འདུག་པ་དེ་ནི་ཆོས་དང་མི་མཐུན་ཞིང་། སྲིད་དོན་གྱི་དམིགས་ཡུལ་བཟུང་བའི་བྱ་བ་ཞིག་ཡིན་པས་གོང་གསལ་བསྒྲགས་གཏམ་དང་གྲོས་ཆོད་གཞིར་བཟུང་བོད་མི་རྣམས་ཀྱིས་ངོས་ལེན་བྱ་ཐབས་མེད། སྡེ་དྲུག་སྐུ་གོང་མ་བོད་ཀྱི་ཆོས་རིག་འཛིན་སྐྱོང་སོགས་མི་རིགས་ཀྱི་དོན་དུ་ལྷག་བསམ་ཅན་ཞིག་ཡིན་པས་དེའི་ཡང་སྲིད་ཀྱང་སྲོལ་རྒྱུན་དང་མཐུན་པར་དགེ་ལུགས་དབུ་ཁྲིད་དགའ་ལྡན་ཁྲི་པ་རིན་པོ་ཆེའི་བརྒྱུད་གནང་དགོས་པའི་གསལ་བསྒྲགས་སུ། བཙན་བྱོལ་བོད་གཞུང་ཆོས་རིག་ལས་ཁུངས་ནས་ ༢༠༡༠ ཟླ་ ༧ ཚེས་ ༥ ལ།། །
