༢༠༡༠ ཕྱི་ཟླ་ ༦ ཚེས་ ༢༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༦ ཚེས་ ༢༦ ཉིན་རྡ་སའི་ཉེ་འགྲམ་མེས་དབོན་དཔེ་སྟོན་སློབ་གྲྭར་བཀའ་ཁྲི་ཟམ་གདོང་རིན་པོ་ཆེ་མཆོག་ཆེད་ཕེབས་ཀྱིིས་སློབ་ཕྲུག་རྣམས་དང་བསམ་ཚུལ་བརྗེ་རེས་ལྷུག་གླེང་གནང་ཡོད། དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༢།༠༠ པའི་ཐོག་བཀའ་ཁྲི་མཆོག་དང་།
ཤེས་རིག་གི་སམ་བྷོ་ཊའི་སྤྱི་ཁྱབ་འགན་འཛིན་ཀརྨ་ཆུང་བདག་ལགས། མེས་དབོན་དཔེ་སྟོན་སློབ་གྲྭའི་སློབ་སྤྱི། དེ་བཞིན་འཛིན་རིམ་དྲུག་པ་དང་བདུན་པའི་སློབ་ཕྲུག་ལྔ་བཅུ་བརྒལ་བ་ཞིག་ལྷན་ཚོགས་ཐོག་བཀའ་ཁྲི་མཆོག་གིས་ནག་པང་སྟེང་བསླབ་པ་གསུམ་གྱི་ཐ་སྙད་རྣམས་ཉིན་རེ་བཞིན་སློབ་ཕྲུག་ཚོས་སློབ་གྲྭའི་ནང་བྱ་བ་བྱེད་ཚུལ་དང་སྦྱར་ནས་གོ་བདེའི་འགྲེལ་བཤད་མདོར་བསྡུས་ཤིག་གནང་རྗེས་ཆེས་གུ་ཡངས་ཀྱི་རྣམ་པའི་ཐོག་སློབ་ཕྲུག་རྣམས་ནས་བོད་མི་རིགས་ཀྱི་སྐད་ཡིག་དང་། འཛམ་གླིང་གི་ཁོར་ཡུག བཀའ་ཁྲིའི་འོས་གཞི། བོད་ནང་ས་ཡོམ་དང་འབྲེལ་བའི་ཆབ་སྲིད་གནས་སྟངས་བཅས་ཀྱི་དྲི་བ་བཏོན་པ་ཁག་ལ་བཀའ་ཁྲི་མཆོག་གིས་བཀའ་ལན་ལྷུག་པོ་གནང་ཡོད། སློབ་ཕྲུག་དེ་དག་ནི་ཤེས་ཡོན་སྲིད་བྱུས་གསར་པའི་ལམ་སྟོན་འོག་ཆེད་འཛུགས་བྱས་པས་སློབ་གྲྭ་དེའི་འཛིན་གྲྭ་མཐོ་ཤོས་ཡིན་པ་དང་། ཁོང་རྣམས་ནི་རང་ལོ་བཅུ་གཅིག་ནས་བཅུ་གསུམ་བར་ཡིན་པ་མ་ཟད། ན་མཉམ་གྱི་སློབ་གྲྭ་གཞན་ཁག་དང་བསྡུར་ན་ཤེས་ཡོན་གྱི་གྲུབ་འབྲས་ཇེ་ལེགས་སུ་ཐོན་ཐུབ་པ་མངོན་སུམ་གྱི་གྲུབ་ཡོད་པ་བཅས་སོ།
