༢༠༡༦ ཟླ་ ༩ ཚེས་ ༡ རེས་གཟའ་ཕུར་བུ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨིན་ཌོ་ནེ་ཤི་ཡ་དང་། ཀོ་རི་ཡ། མ་ལེ་ཤི་ཡ། སིངྒ་པུར། ཐའེ་ལན་ཌི། ཝེ་ཏི་ནམ་བཅས་ཀྱི་དད་ལྡན་ཆོས་ཞུ་བ་གཙོ་བོར་གྱུར་བའི་དད་ལྡན་སེར་སྐྱ་མང་ཚོགས་རྣམས་ལ་ཕྱི་ལོ་ ༢༠༡༦ ཟླ་ ༨ ཚེས་ ༢༩ ནས་ཕྱི་ཟླ་ ༩ ཚེས་ ༡ བར་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བའི་བཀའ་ཆོས་སྩལ་ཡོད། དེ་ཡང་ཆོས་འབྲེལ་ཉིན་མཐའ་མ་སྟེ་ཕྱི་ལོ་ ༢༠༡༦ ཟླ་ ༩ ཚེས་ ༡ ཉིན་མགོན་པོ་གང་ཉིད་མཆོག་གིས་སྤྱན་རས་གཟིགས་ཕྱག་སྟོང་སྤྱན་སྟོང་གི་བཀའ་དབང་སྩལ།
དེ་ཡང་བཀའ་དབང་ཉིན་གྱི་སྔ་དྲ་ཆུ་ཚོད་ ༨ ཙམ་ལ་༸གོང་ས་མཆོག་ནས་བཀའ་དབང་གི་སྔོན་འགྲོའི་གསུང་ཆོས་སྩལ་ཞིང་། སྟོང་ཉིད་ཀྱི་ལྟ་བ་གཞིར་བཞག་ཐོག་གསང་སྔགས་ཀྱི་ཉམས་ལེན་དགོས་པར་བརྟེན། བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་ཉིན་མཚན་སྦྲེལ་ནས་གོམས་འདྲིས་བསྟེན་དགོས་པ་དང་། ལྷ་སྐུ་སྒོམ་ཚུལ། ལུས་རྣམ་སྣང་གི་ཆོས་བདུན་སྐོར་དང་། ལྷའི་ང་རྒྱལ་དང་གསལ་སྣང་སྒོམ་ཚུལ་སོགས་སྔོན་འགྲོའི་བཀའ་ཆོས་ཟབ་རྒྱས་སྩལ། དེ་རྗེས་བཀའ་དབང་གི་སྔོན་འགྲོ་བགེགས་གཏོར་གཏོང་གནང་མཛད་ཅིང་སྔ་དྲོ་ཆུ་ཚོད་ ༩ ཙམ་ལ་བགེགས་གཏོར་གྲུབ། དེ་རྗེས་༸གོང་ས་མཆོག་གིས་སྔ་དྲོ་ཆུ་ཚོད་ ༩ ཡོལ་ཙམ་ལ་དགེ་བསྙེན་གྱི་སྡོམ་པ་འབོགས་ཆོག་མཛད་རྗེས། སེམས་བསྐྱེད་དང་། བཀའ་དབང་གི་སྔོན་འགྲོར་འཁྱོར་ཆུ་དང་། སྲུང་སྐུད་འབྱིན་པ་སོགས་མཛད་པ་དང་སྦྲགས། བཀའ་དབང་དངོས་གཞི་དབུ་འཛུགས་མཛད།
བཀའ་དབང་ཡོངས་སུ་ལེགས་གྲུབ་རྗེས་སྔ་དྲོ་ཆུ་ཚོད་ ༡༠ དང་སྐར་མ་ ༥༠ ཙམ་ལ་ལྷོ་ཤར་ཨེ་ཤ་ཡའི་ཆོས་ཞུ་བ་རྣམས་ནས་མགོན་པོ་གང་ཉིད་མཆོག་བསྟན་འགྲོའི་མགོན་དཔུང་དམ་པར་སྐུ་ཚེ་༸ཞབས་པད་བརྟན་པའི་བརྟན་བཞུགས་དབྱིན་སྐད་ཐོག་སྒྲོག་སྦྱངས་ཞུས་ཤིང་། མགོན་པོ་གང་ཉིད་མཆོག་ནས་བསྡུ་ཆོག་གི་རིམ་པ་རྣམས་བསྐྱངས་རྗེས། ཆོས་ཞུ་བ་རྣམས་དང་ལྷན་དུ་དྲན་རྟེན་སྐུ་པར་སྒྲོན་གནང་མཛད་དེ་ཉིན་བཞིའི་རིང་གི་བཀའ་ཆོས་དང་། བཀའ་དབང་བཅས་ཐུགས་གྲ་ལེགས་བསྒྲིགས་ཐོག་ཡོངས་སུ་གྲུབ་པ་བཅས་སོ།།
