༢༠༡༠ ཟླ་ ༩ ཚེས་ ༧ རེས་གཟའ་མིག་དམར།
༄༅། །འདི་གར་ཨ་རིའི་བོད་གཞུང་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བཙན་བྱོལ་བོད་མིའི་སྤྱི་ཚོགས་ནང་མང་གཙོའི་ལམ་ལུགས་ཕྱག་བསྟར་གནང་ནས་འདི་ལོ་མི་ལོ་ཧྲིལ་པོ་ལྔ་བཅུ་ཐམ་པ་འཁོར་བའི་ཉིན་མོ་དང་བསྟུན་ཕྱི་ཟླ་ ༩ ཚེས་ ༤ རེས་གཟའ་སྤེན་པའི་ཉིན་ཨ་རིའི་གྲོང་ཁྱེར་ནིའུ་ཡོཀ་ནང་དུས་ཆེན་སྲུང་བརྩིའི་མཛད་སྒོ་ཚོགས་ཡོད། དེ་ཡང་བྱང་ཨ་རིའི་སྐུ་ཚབ་དོན་གཅོད་བློ་བཟང་སྙན་གྲགས་མཆོལག་དང་། རྒྱ་རིགས་རྩོམ་པོ་དང་ཆབ་སྲིད་ཉམས་ཞིབ་པ་སྐུ་ཞབས་གྲན་ཕོ་ཁུང་། གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ། ཨ་རི་སྐུ་ཚབ་དོན་གཅོད་ཁང་གི་གཞུང་ཞབས་རྣམ་པ། མང་ཚོཌ་བཅས་ཁྱོན་མི་གྲངས་བརྒྱ་སྐོར་ལྷན་འཛོམས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་སྟེ་མཛད་སྒོ་དབུ་འཛུཌ་གནང་བའི་ཐོག་མར་ཚང་མ་སྐུ་བཞེངས་ཀྱིས་བོད་བསྟན་སྲིད་མི་རིགས་ཀྱི་སླད་དུ་སྐུ་སྲོག་ལེགས་སྐྱེས་སུ་ཕུལ་བའི་དཔའ་བོ་དཔའ་མོ་རྣམས་ལ་གདུང་སེམས་མཉམ་སྐྱེ་མཚོན་སླད་ངག་བཅད་སྐར་མ་གཅིག་གནང་བ་དང་ཆབས་ཅིག་ཁོང་རྣམ་པའི་བྱས་རྗེས་ལ་དྲན་གསོ་གནང་། དེ་ནས་མཛད་སྒོ་གོ་སྒྲིག་གནང་མཁན་ས་གནས་གཞོན་ནུ་ལྷན་ཚོགས་ཀྱི་ཚོགས་གཙོ་ངག་དབང་བཀྲིས་ལགས་ཀྱིས་གསུང་དོན། བོད་མི་ཚང་མས་མང་གཙོའི་ལམ་ལུགས་ལྡན་པའི་སྤྱི་ཚོགས་ཁྲོད་མང་ཚོགས་ལ་ལས་འགན་ག་རེ་ཡོད་པ་མ་བརྗེད་པ་བྱེད་དགོས་ཞེས་སོགས་ཀྱི་གསུང་བཤད་གྲུབ་བསྟུན།
སྐུ་ཚབ་དོན་གཅོད་བློ་བཟང་སྙན་གྲགས་མཆོག་ཀྱིས་མང་གཙོའི་དུས་ཆེན་ཐེངས་ ༥༠ པའི་ཐོག་བཀའ་ཤག་གིས་གནང་བའི་གསུང་བཤད་སྒྲོགས་སྦྱང་གནང་རྗེས། བྱང་ཨ་རིར་བོད་མི་ཚོས་སྤྱི་འཐུས་དང་། བཀའ་ཁྲིའི་འོས་བསྡུའི་དེབ་སྐྱེལ་གྱི་གནས་སྟངས་སྙིང་བསྡུས་ངོ་སྤྲོད་དང་རིང་མིན་ཡོང་རྒྱུའི་བཀའ་སྤྱིའི་སྔོན་འགྲོའི་འོས་བསྡུ་དང་། དངོས་གཞིའི་འོས་བསྡུའི་སྐབས་མང་ཚོགས་ཚང་མས་གོ་སྐབས་ལེན་དགོས་པའི་འབོད་སྐུལ་བསྐྱར་ནན་གནང༌། ཕྱོགས་མཚུངས་སྐབས་དེར་རྒྱ་རིགས་སྐུ་མགྲོན་སྐུ་ཞབས་གྲན་ཕོ་ཁུང་གིས་རྒྱ་སྐད་ནང་གསུང་བཤད་གནང་དོན། རྒྱ་ནག་ནང་གང་ཅིར་དམ་བསྒྲགས་ཆེ་བའི་དབང་གིས་རྒྱ་རིགས་ཚོས་བོད་མིའི་མང་གཙོའི་འཕེལ་རིམ་གྱི་སྐོར་གཏན་ནས་ཤེས་ཀྱི་མེད། གལ་སྲིད་ཁོང་ཚོས་བོད་མིའི་མང་གཙོའི་འཕེལ་རིམ་དངོས་རྣམས་ཤེས་པ་ཡིན་ན། དངོས་གནས་ཧ་ལས་ཀྱི་རེད་བསམ་གྱི་ཡོད། གང་ཡིན་ཟེར་ན། བོད་མིས་བཙན་བྱོལ་ནང་མང་གཙོའི་ལམ་ལུགས་ལག་བསྟར་བྱས་ནས་ལོ་ལྔ་བཅུ་ཐམ་པ་འགྲོ་གི་ཡོད། ཅེས་སོགས་གསུངས་ཡོད། ཡང་ཁོང་གིས། བོད་མི་ཚོས་༸གོང་ས་ཏཱ་ལའི་བླ་མ་མཆོག་གི་དབུ་ཁྲིད་འོག་ཆོས་དང་རིག་གཞུང་སྲུང་སྐྱོབ་ཐུབ་པ་མ་ཟད། དེང་དུས་ཀྱི་མང་གཙོའི་ལམ་ལུགས་ལག་བསྟར་ཐུབ་པ་དེ་ནི་བོད་མི་ཚོའི་འདས་ལོ་ལྔ་གཅིག་ནང་གི་གྲུབ་འབྲས་ཆེན་པོ་གཉིས་ལ་ངོས་འཛིན་བྱེད་ཀྱི་ཡོད། རྒྱ་ནག་ནང་གཅིག་ནས་ཆོས་དད་ཀྱི་རང་དབང་མེད་པ་དང་། གཉིས་ནས་མང་གཙོའི་ལམ་ལུགས་ཀྱི་དྲི་མ་མེད་ཅིང་། དེ་ལ་ལྟོས་ན་བོད་མི་ཚོར་ཐོབ་པའི་གྲུབ་འབྲས་ནི་རླབས་ཆེན་གྱི་གྲུབ་འབྲས་ཤིག་རེད། ང་རང་གིས་ཤེས་རྟོགས་བྱུང་བར་གཞིགས་ན། ད་ལྟའི་རྒྱ་ནག་གཞུང་གིས་༸གོང་ས་མཆོག་གི་སྐུ་ཚེ་འབུད་རྒྱག་བརྒྱབ་སྡོད་ཀྱི་ཡོད། ཡིན་ནའང་བོད་མི་ཚོས་མུ་མཐུད་ནས་སོ་སོའི་ཆོས་དང་རིག་གཞུང་སྲུང་སྐྱོབ་བྱེད་ཐུབ་པ་དང་། ད་ལྟ་ལག་ལེན་བསྟར་བཞིན་པའི་མང་གཙོའི་ལམ་ལུགས་རྒྱུན་འཁྱོངས་ཐུབ་པ་བྱུང་ཚེ། ༸གོང་ས་ཏཱ་ལའི་བླ་མ་མཆོག་ནམ་ཞིག་ཞལ་མ་བཞུགས་པའི་སྐབས་སུ་ཡང་བོད་མི་རྣམས་འཆམ་མཐུན་གོང་བུ་ཆིག་སྒྲིལ་དུ་གནས་ཐུབ་རྒྱུར་ང་རང་ལ་རེ་བ་དང་ཡིད་ཆེས་གཙང་མ་ཡོད། རྒྱ་ནག་གཞུང་གིས་དེ་སྔའི་བོད་ཀྱི་སྤྱི་ཚོཌ་ནི་ཞིང་བྲན་གྱི་སྤྱི་ཚོཌ་ཡིན་ཞེས་དམའ་འབེབས་གཏོང་གི་ཡོད་པ་དང་། བོད་ལ་བཙན་འཛུལ་བྱས་པ་དེ་ནི་བོད་བཅིངས་བཀྲོལ་བཏང་བ་ཡིན་ཞེས་འུད་སྒྲོགས་བྱེད་ཀྱི་ཡོད། ང་རང་གི་ངོས་འཛིན་ལ་རྒྱ་ནག་གིས་བོད་བཙན་བཟུང་བྱས་རྗེས་བོད་འདི་གཞི་ནས་མིང་དོན་མཚུངས་པའི་ཞིང་བྲན་གྱི་སྤྱི་ཚོགས་ཤིག་ལ་གྱུར་བའི་ངོས་འཛིན་བྱེད་ཀྱི་ཡོད། ཅེས་གསུངས་པ་དང་། མཇུག་ཏུ་ཁོང་གིས་གསུང་དོན། ངས་༸གོང་ས་ཏཱ་ལའི་བླ་མ་མཆོག་དང་རྒྱ་ནག་གི་འགོ་ཁྲིད་དབར་མི་འདྲ་བ་བཞི་མཐོང་གི་ཡོད། གཅིག སྔ་མ་དེས་ཉིན་ལྟར་སྐད་ཆ་དྲང་པོ་ཤོད་ཅིང་། ཕྱི་མ་དེས་ཉིན་ལྟར་སྐད་ཆ་རྫུན་མ་ཤོད་ཀྱི་ཡོད། གཉིས། སྔ་མ་དེས་བཟོད་བསྲན་གྱི་དགོངས་བཞེས་གནང་གི་ཡོང་ཅིང་། ཕྱི་མ་དེས་དྲག་ཤུགས་ཁོ་ནར་གཡེང་ནས་བསྡད་ཡོད། གསུམ་པ། སྔ་མ་དེས་བྱམས་དང་སྙིང་རྗེ་དར་སྤེལ་གནང་ཞིང་། ཕྱི་མ་དེས་འཁོན་འཛིན་གྱི་ས་བོན་འདེབས་ཀྱི་ཡོད། བཞི་པ། སྔ་མ་དེས་ཆོག་ཤེས་ལ་བརྩི་བཀུར་གནང་གི་ཡོད་ཅིང་། ཕྱི་མ་དེས་སྐྱིད་འདོད་ཁོ་ན་ཡོང་ཐབས་བྱེད་ཀྱི་ཡོད་ཅེས་གསུང་ཡོད། སྐུ་ཞབས་གྲན་ཕོ་ཁུང་ལགས་ནི་ལོ་བཅུ་ཞིའི་སྔོན་རྒྱ་ནག་ནང་མང་གཙོ་རྩོད་ལེན་གནང་རྐྱེན་ལོ་བཞི་ལྷག་བཙོན་ཁང་ནང་བཞུགས་དགོས་བྱུང་བ་དང་། དེ་རྗེས་ཨ་རིར་བཙན་བྱོལ་དུ་མ་ཕེབས་ཀ་མེད་བྱུང་བ་ཞིག་ཡིན། དེང་སང་ཁོང་ནི་རྩོམ་པ་པོ་དང་ཚང་མས་རྒྱུས་མངའ་ཡོད་པའི་ཆབ་སྲིད་ཉམས་ཞིབ་པ་ཞིག་རེད། ཁོང་གིས་ཐེངས་འདིར་ས་གནས་གཞོན་ནུ་ཚོགས་པས་གདན་ཞུས་ལྟར་མང་གཙོའི་དུས་དྲན་ཐེངས་ལྔ་བཅུ་པ་སྲུང་བརྩིའི་མཛད་སྒོར་རྒྱ་སྐད་ནང་གསུང་བཤད་གནང་བ་རྣམས་བོད་གཞུང་ཨ་རི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཟུང་དྲུང་ཀུན་དགའ་བཀྲིས་ལགས་ནས་བོད་སྐད་ནང་སྒྱུར་ཡོད་པ་བཅས།།
