༢༠༡༦ ཟླ་ ༨ ཚེས་ ༡༧ རེས་གཟའ་ལྷག་པ།
༄༅། ། ཕྱི་ལོ་ ༢༠༡༦ ཟླ་ ༨ ཚེས་ ༡༤ ཉིན་ལ་དྭགས་རི་ལྗོངས་ཡར་རྒྱས་ལྷན་ཚོགས་ Ladakh Autonomous Hill Development Council ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གུང་ཚིགས་གསོལ་སྟོན་ཞིག་འདེགས་འབུལ་ཞུ་སྐབས་༸གོང་ས་མཆོག་གིས་བཀའ་སློབ་སྩལ་དོན། སྤུན་མཆེད་ཕོ་མོ་རྣམ་པ། དེ་རིང་གི་མཛད་སྒོ་འདི་ལྟ་བུར་ངོས་རང་ཐེངས་མང་འགྲོ་མྱོང་ཡོད། ལ་དྭགས་པ་ཚོའི་སྲོལ་རྒྱུན་གྱི་གཞས་སྣ་དེ་དག་ལ་ངོས་རང་རྒྱུས་མངའ་གང་ཙམ་ཡོད། ཐེངས་འདིར་སླར་ཡང་ཁྱེད་ཚོས་མཛད་སྒོ་འདི་འདྲ་ཞིག་གོ་སྒྲིག་གནང་བར་བསྔགས་བརྗོད་ཞུ་རྒྱུ་ཡིན། ཐུགས་རྗེ་ཆེ། ངོས་ཀྱིས་སྤུན་མཆེད་ཕོ་མོ། ཞེས་ཁྱེད་ཚོར་བརྗོད་སྐབས་དངོས་གནས་ང་ཚོ་སེམས་ཐག་ཧ་ཅང་ཉེ་བའི་སྤུན་མཆེད་རེད། ཕྱིའི་ལུས་པོ་ཙམ་མ་ཟད་ནང་གི་ཆོས་ཕྱོགས་དང་འབྲེལ་བའི་བསམ་བློའི་འདུ་ཤེས་ཐོག་ནས་ཧ་ཅང་ཉེ་པོ་རེད། དེར་བརྟེན་བསྔགས་བརྗོད་ཡོད།
ལྷག་པར་དེ་རིང་འདིར་ཏུར་ཐུག་ནས་ཡིན་པའི་གྲོགས་པོ་ཁོང་གིས་ངོས་ལ་ཞྭ་མོ་འདི་གནང་བྱུང་བར་དམིགས་བསལ་ཐུགས་རྗེ་ཆེ་ཞུ་རྒྱུ་ཡིན། ཧི་མཱ་ལ་ཡའི་རི་རྒྱུད་ནུབ་ལ་དྭགས་ནས་ཤར་མོན་ཡུལ་བར་ནང་པ་སངས་རྒྱས་པའི་ཆོས་དར་ཁྱབ་བྱས་ནས་ཡོད། ཁྱེད་ཚོར་རང་དབང་ཡོད་སྟབས་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་བྱེད་ཐུབ་རྒྱུའི་ང་ཚོས་ཁྱེད་རྣམས་ལ་རེ་བ་རྒྱག་བཞིན་ཡོད། ང་ཚོའི་ལུང་པའི་ནང་དུས་འགྱུར་བྱུང་ནས་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་བྱ་རྒྱུར་དཀའ་ངལ་ཧ་ཅང་ཆེ་བའི་གཉན་འཕྲང་ཆེ་བའི་དུས་སྐབས་འདིར་ཁྱེད་ཚོས་སངས་རྒྱས་ཀྱི་བསྟན་པ་ཉམས་པ་སླར་གསོ་ཡོང་རྒྱུར་ཕན་ཐོགས་བྱེད་ཐུབ། རྒྱ་གར་རང་དབང་ལུང་པ་འདིའི་ནང་བོད་མི་བཙན་བྱོལ་བ་ཆིག་འབུམ་ལྔ་ཁྲི་ཙམ་ཡོད། ང་ཚོས་སོ་སོའི་ཐུན་མིན་རིག་གཞུང་ནང་པ་སངས་རྒྱས་པའི་བསྟན་པ་འཛིན་སྐྱོང་སྤེལ་གསུམ་བྱ་རྒྱུར་འབད་བརྩོན་བྱེད་བཞིན་ཡོད། ང་ཚོ་རྒྱ་གར་ནང་གི་བོད་མིའི་དགོན་པ་གྲྭ་ཚང་ཁག་གི་ནང་གྲྭ་རྒྱུན་ཧ་ཅང་དཀོན་པའི་དུས་སྐབས་སུ་ཁྱེད་ཚོ་ལ་དྭགས་དང་ཁུ་ནུ། ལ་ཧོལ་སྤྱི་ཏི། དེ་བཞིན་མོན་ཡུལ་སོགས་ནས་གྲྭ་རྒྱུན་གཏོང་རྒྱུར་ཧ་ཅང་ཕན་ཐོགས་བྱུང་ཡོད། ད་ཆ་གྲྭ་རྒྱུན་དེ་དག་ཁྲོད་བརྒྱ་ཕྲག་འགའ་ཤས་སློབ་གཉེར་མཐར་སོན་ནས་གདན་ས་ཁག་ཙམ་མ་ཟད། སོ་སོའི་ཡུལ་ལུང་ནང་ཕན་ཐོགས་བཞིན་པ་རེད། ལོ་ངོ་ཉིས་སྟོང་རིང་གི་བོད་ཀྱི་ལོ་རྒྱུས་ཁྲོད་ཆེས་མུན་ནག་གི་དུས་སྐབས་འདིར་རྒྱ་ཆེ་ཆུང་ལ་མ་ལྟོས་པར་ཁྱེད་ཚོས་ཕན་ཐོགས་བྱེད་བཞིན་ཡོད་སྟབས། བོད་མི་ས་ཡ་དྲུག་གི་ཚབ་བྱས་ནས་ཐུགས་རྗེ་ཆེ་ཟེར་རྒྱུ་ཡིན། ད་དུང་ཡིན་ནའང་ང་ཚོར་ཁྱེད་རྣམ་པའི་རོགས་པ་དགོས། ཞེས་སོགས་ཀྱི་བཀའ་སློབ་སྩལ།།
