༢༠༡༠ ཕྱི་ཟླ་ ༦ ཚེས་ ༡༤ རེས་གཟའ་ཟླ་བ།
༄༅། ཕྱི་ལོ་ ༢༠༡༠ ཟླ་ ༦ ཚེས་ ༡༣ ཉིན་རྡ་ས་ཉིན་མོའི་སློབ་གྲྭའི་ཚོགས་ཁང་དུ་འགྲོ་བ་མིའི་གོམས་སྟབས་ཚོགས་པ་ཞེས་པས་གོ་སྒྲིག་ཐོག་རྒྱལ་སྤྱིའི་བྱིས་པའི་ངལ་རྩོལ་ངོ་རྒོལ་གྱི་ཉིན་མོ་སྲུང་བརྩི་ཞུས་ཡོད།
དེ་ཡང་ཉིན་དེའི་ཉིན་རྒྱབ་ཆུ་ཚོད་ ༢ ཐོག་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་དང་། ཤེས་རིག་བཀའ་བློན་ཐུབ་བསྟན་ལུང་རིག་མཆོག བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱ་བསྟི་གནས་ཁང་གི་འཇམ་དཔལ་སྨོན་ལམ་ལགས་དང་། མི་མང་། གསར་འགོད་པ་བཅས་སུམ་ཅུ་བརྒལ་བ་ལྷན་འཛོམས་ཀྱིས་ཐོག་མར་འཇམ་དཔལ་སྨོན་ལམ་ལགས་ཀྱིས་རྒྱལ་སྤྱིའི་བྱིས་པའི་ཐོབ་ཐང་དང་ཁྲིམས་ཡིག་འཕེལ་རིམ་སྐོར་ལ་གསུང་བཤད་གྲུབ་རྗེས་ཤེས་རིག་བཀའ་བློན་མཆོག་གིས་བྱིས་པའི་ངལ་རྩོལ་ཐད་ལ་གཞུང་གི་ལངས་ཕྱོགས་དང་སྲིད་བྱུས་ཞེས་པའི་བརྗོད་གཞིའི་ཐོག་གསུང་བཤད་གནང་དོན། རྒྱལ་སྤྱིའི་བྱིས་པའི་ངལ་རྩོལ་ངོ་རྒོལ་ཉིན་མོ་སྲུང་བརྩིར་ཕེབས་མཁན་ཚང་མར་འཚམས་འདྲི་ཞུ་རྒྱུ་དང་། བཙན་བྱོལ་གཞུང་གི་བཀའ་ཤག་ནས་བྱིས་པའི་ངལ་རྩོལ་གྱི་ལམ་ཕྱོགས་ཐད་སྲིད་བྱུས་གསལ་པོ་རེད། ཕྱི་ལོ་ ༡༩༩༤ ནས་གཞུང་གི་གསལ་བསྒྲགས་རིམ་པའི་ནང་བཀའ་ཤག་གིས་ནང་སྲིད་དང་ས་གནས་འགོ་འཛིན་བརྒྱུད་དེ་མང་ཚོགས་ནང་གཅིག་མཇུག་གཉིས་མཐུད་བྱས་ཏེ་ཡི་གེ་བཏང་འདུག ལས་དོན་འདི་ཁྲིམས་དང་མཐུན་མི་མཐུན་དང་རྒྱབ་སྐྱོར་གྱི་རྣམ་པ་མཚོན་པ་ཙམ་མ་ཟད། ཡག་པོ་ཡིན་པའི་ངོས་འཛིན་ཐུབ་སླད་ཞུ་གི་ཡིན། ལངས་ཕྱོགས་དང་སྲིད་བྱུས་ཡིག་ཐོག་ནས་དམིགས་བསལ་གཏན་འབེབས་གང་ཡང་མེད། འོན་ཀྱང་གནས་སའི་རྒྱལ་ཁབ་ཀྱི་གནས་སྟངས་ཀྱི་ཁྲིམས་འཁྱེར་དགོས་པ་བཞིན་བཀའ་ཤག་གི་ལངས་ཕྱོགས་དང་སྲིད་བྱུས་དེ་རང་ཆགས་ཡོད། དེ་བཞིན་རྒྱ་གར་འདི་འཛམ་གླིང་ནང་གནས་ཡོད་པར་སོང་རྒྱལ་སྤྱིའི་སྟེང་བྱིས་པའི་ངལ་རྩོལ་གྱི་ཁྲིམས་གང་འདྲ་ཡོད་པ་དེ་ང་ཚོ་བཙན་བྱོལ་གཞུང་གིས་ཀྱང་བརྩི་བཀུར་ཞུ་རྒྱུ་ཆགས་ཡོད། བཀའ་ཤག་གི་གསལ་བསྒྲགས་ནང་། ཡུལ་ཁྲིམས་དང་མི་མཐུན་པའི་ལས་ཀ་ནོར་འཁྲུལ་ཕྱིན་པ་དང་། རྐྱེན་ཆུང་གི་བོད་མི་རིགས་ཀྱི་ལ་རྒྱར་གནོད་རྒྱུ་དེ་འདྲ་ཡོང་གི་ཡོད།
ད་ལྟ་རྒྱལ་སྤྱིའི་སྟེང་ང་ཚོ་བོད་པར་རྒྱབ་སྐྱོར་ཚད་དང་ཤ་ཞེན་ཡོད་པ་མང་པོ་ཡོད། དེ་དག་གི་རྒྱབ་སྐྱོར་ལའང་གནོད་པའི་གནས་ཚུལ་ཡོང་གི་འདུག དེ་རིགས་མེད་པ་བྱེད་དགོས་སོགས་ཀྱི་གསུང་བཤད་གནང་ཡོད། དེ་རྗེས་བོད་མི་མང་སྤྱི་འཐུས་ཚོགས་གཞོན་མཆོག་གིས་ངལ་རྩོལ་དང་དོ་མཉམ་པའི་ཁྲིམས་མཐུན་ཞེས་པའི་བརྗོད་གཞིའི་ཐོག་གསུང་བཤད་གནང་དོན། སྤྱིར་ད་ལྟ་བཙན་བྱོལ་གཞུང་གི་ཆབ་སྲིད་ཀྱི་གནས་བབ་ཐོག་ནས་རྒྱལ་སྤྱིའི་བཅའ་ཁྲིམས་མང་པོ་ཞིག་ལ་རྒྱབ་སྐྱོར་ཡོད་ནའང་རྒྱལ་སྤྱིའི་སྡིངས་ཆའི་སྟེང་ལ་ཕྱིན་ཏེ་རྒྱབ་སྐྱོར་ཡོད་ཟེར་བའི་གནས་བབ་མེད། འོན་ཀྱང་ད་ལྟ་ང་ཚོ་བཙན་བྱོལ་དུ་ཡོད་སྐབས་ང་རང་ཚོས་རྩིས་དགོས་ས་དེ་བཙན་བྱོལ་བོད་མིའི་བཅའ་ཁྲིམས་རིན་པོ་ཆེ་ཆགས་ཡོད། དེའི་དགོངས་དོན་རྒྱལ་སྤྱིའི་ཁྲིམས་ལ་ང་ཚོས་བརྩི་བཀུར་ཞུ་གི་ཡིན་ཞེས་གཏན་འབེབས་གནང་ཡོད། གནད་དོན་དེའི་ཐོག་ནས་དེ་རིང་བྱིས་པའི་ངལ་རྩོལ་ངོ་རྒོལ་གྱི་ཉིན་མོ་འདིར་བོད་མི་མང་སྤྱི་འཐུས་ལྷན་ཚོགས་ནས་མཉམ་ཞུགས་དང་རྒྱབ་སྐྱོར་ཡོད་ཞུ་གི་ཡིན། ང་ཚོ་བོད་པའི་སྤྱི་ཚོགས་ནང་བོད་པའི་ཕྲུ་གུ་རང་ལོ་མ་སོན་པ་འདྲ་ལ་ངལ་རྩོལ་སྐུལ་གྱི་ཡོད་པ་ཧ་ཅང་ཉུང་ཤས་རེད། འོན་ཀྱང་བྱིས་པའི་ངལ་རྩོལ་གྱི་གནད་དོན་དེ་བོད་པའི་ཕྲུ་གུ་དང་སྤྱི་ཚོགས་གནས་བབ་གང་འདྲ་རེད་དམ། ང་ཚོ་སོ་སོའི་ཐོབ་ཐང་རྩོད་མཁན་གྱི་རྒྱལ་ཁབ་གཅིག་དང་མི་རིགས་ཤིག་གི་འགྲོ་བ་མི་ཚང་མར་ཐོབ་ཐང་འདྲ་མཉམ་དགོས་ཀྱི་ཡོད་པ་ཞིག་ལ་ངོས་འཛིན་ཐོག་ནས་རྒྱབ་སྐྱོར་གྱི་རྣམ་པ་སྟོན་དགོས་རྒྱུ་དེ་གལ་ཆེན་པོ་རེད། དེར་བརྟེན་བགྲོ་གླེང་འགོ་ཁྲིད་གནང་རྒྱུ་དེ་ཡག་པོ་བྱུང་འདུག་ཞུ་རྒྱུ་ཡིན། འཛམ་གླིང་ནང་ད་ལྟ་བལྟས་ན་བྱིས་པའི་ཐོབ་ཐང་ཐད་ལོ་བརྒྱ་གོང་ལས་ཡར་རྒྱས་ཞེ་དྲག་ཕྱིན་ཡོད། སོགས་གསུང་བཤད་ཟབ་རྒྱས་གནང་རྗེས་དྲི་བ་དྲིས་ལན་ཡང་གནང་ཡོད་པ་བཅས།།
