༢༠༡༦ ཟླ་ ༨ ཚེས་ ༩ རེས་གཟའ་མིག་དམར།
༄༅། །བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཚོང་ལས་ཡར་རྒྱས་རམ་འདེགས་ཚན་པས་ Tibetan Entrepreneurship Development འདས་པའི་བདུན་ཕྲག་གཅིག་གི་རིང་རྒྱ་གར་ལྷོ་ཕྱོགས་ཁུལ་གྱི་བཙན་བྱོལ་བོད་མིའི་སློབ་གྲྭ་ཁག་ཏུ་སློབ་ཕྲུག་ཚོང་ལས་ཡར་རྒྱས་རམ་འདེགས་ཚོགས་པ་འཛུགས་རྒྱུའི་ལས་གཞི་དང་པོ་དེ་ཉིད་མཇུག་སྒྲིལ་ཡོད།
དེ་ཡང་དཔལ་འབྱོར་ལས་ཁུངས་ཀྱི་ཚོང་ལས་ཡར་རྒྱས་རམ་འདེགས་ཚན་པའི་སློབ་ཕྲུག་འབྲེལ་མཐུད་པ་བསྟན་འཛིན་ནོར་བཟང་ལགས་ཀྱིས། རྒྱ་གར་ལྷོ་ཕྱོགས་མོན་གྷོ་གཏན་སློབ་དང་། སྦེལ་ཀོབ་བོད་ཁྱིམ། ཏཱ་ལའི་བླ་མ་མཐོ་སློབ་བཅས་ཀྱི་སློབ་ཕྲུག་རྣམས་ལ་ཚོང་ལས་ཡར་རྒྱས་རམ་འདེགས་ལས་གཞིའི་སྐོར་ངོ་སྤྲོད་དང་། ལས་གཞི་འདི་བཙན་བྱོལ་བོད་མིའི་སྤྱི་ཚོགས་ནང་གལ་ཆེན་པོ་ཇི་ལྟར་ཡིན་སྐོར་དང་། ལྷག་པར་སློབ་ཕྲུག་རྣམས་ལ་ལས་གཞི་འདིའི་བརྒྱུད་འབྱུང་འགྱུར་ཚོང་རིགས་ལས་དོན་ལ་དོན་གཉེར་གྱིས་དཔལ་འབྱོར་འདུ་འགོད་ཀྱི་ལས་རིགས་ཐོག་ད་ལྟ་ནས་མཐོང་རྒྱ་ཆེ་བའི་ཁོར་ཡུག་སྐྲུན་ཐུབ་པ་ཡིན་ན། མ་འོངས་མདུན་ལམ་ལའང་ཕན་ཐོགས་ཇི་ཡོད་སོགས་ཀྱི་སྐོར་གོ་རྟོགས་སྤེལ་འདུག
མོན་གྷོ་གཏན་སློབ་ཏུ་སློབ་ཕྲུག་ཚོང་ལས་ཡར་རྒྱས་རམ་འདེགས་ཚོགས་པ་ཆེད་འཛུགས་གནང་ཐུབ་པ་བྱུང་ཡོད་པ་མ་ཟད། ལོ་རྗེས་མར་སྦེལ་ཀོབ་བོད་ཁྱིམ་སློབ་གྲྭར་དེ་ལྟར་འཛུགས་འཆར་ཡོད་འདུག ཏཱ་ལའི་བླ་མ་མཐོ་སློབ་དང་ཚོང་ལས་ཡར་རྒྱས་རམ་འདེགས་ཚན་པ་ཟུང་འབྲེལ་ཐོག་ཏཱ་ལའི་བླ་མ་མཐོ་སློབ་ཏུ་ཚོང་ལས་ཡར་རྒྱས་རམ་འདེགས་ཚོགས་པ་འཛུགས་ཆེད་ལས་གཞི་སྤེལ་འདུག
སློབ་ཕྲུག་ཚོར་ལས་འཆར་ཁག་གཅིག་ནི། མཁས་མྱོང་ཅན་གྱི་ཚོང་པས་གསུང་བཤད་དང་། དོ་བདག་སོ་སོའི་རིག་པ་དང་རྣམ་དཔྱོད་ཐོག་རིག་གསར་གྱི་རྩེད་རིགས་གསར་གཏོད། དེ་བཞིན་རང་གིས་རང་ལ་བརྟག་དཔྱད་བྱས་པ་བརྒྱུད་གོ་རྟོགས་ཇི་ཙམ་ཡོད་མེད་ཤེས་རྟོགས་ཐུབ་པ་བྱ་རྒྱུ། ཚོང་གི་འཆར་གཞི་བཀོད་སྒྲིག་བྱེད་སྟངས། འཆར་གཞི་གང་ཡིན་གཞན་ལ་དེའི་སྐོར་ངོ་སྤྲོད་བྱེད་སྟངས་སོགས་ཡོད་འདུག
དཔལ་འབྱོར་ལས་ཁུངས་ཀྱི་ཚོང་ལས་ཡར་རྒྱས་རམ་འདེགས་ལས་གཞི་འདི་བཞིན་བཙན་བྱོལ་བོད་མིའི་མང་ཚོགས་ཀྱི་དཔལ་འབྱོར་གནས་བབས་ཡར་རྒྱས་ཕུགས་བརྟན་འགྲོ་ཐབས་སྤྱི་དང་། ཡང་སྒོས་རང་རེའི་སྤྱི་ཚོགས་ནང་ན་གཞོན་ལས་མེད་ཀྱི་དཀའ་ངལ་སེལ་ཐབས་ཀྱི་དམིགས་ཡུལ་གཙོ་བཟུང་གིས་འགོ་འཛུགས་ཞུས་པ་དང་། ལས་གཞི་འདིའི་བརྒྱུད་རྒྱ་གར་དང་བལ་ཡུལ་ནང་གནས་སྡོད་བོད་རིགས་བཟོ་ཚོང་འདྲ་མིན་གཉེར་བཞིན་པའི་ཁོངས་ནས་རང་གི་ཚོང་ལས་འཆར་གཞི་དང་ལྡན་པའི་རྒྱ་སྐྱེད་གཏོང་འཆར་ཡོད་རིགས་དང་། དེ་མཚུངས་ཚོང་ལས་འཆར་གཞི་ཚད་ལྡན་ཁུངས་འཕེར་ཡོད་པའི་ཐོག་བཟོ་ཚོང་ལས་གཞི་གསར་འཛུགས་འདུན་པ་གཉིས་ལྡན་ཡོད་པའི་ན་གཞོན་ཁག་ལ་སྦྱོང་བརྡར་དང་། ཁྲིམས་སྒྲིག་གི་སློབ་སྟོན། མཁས་མྱོང་ཅན་གྱི་ཚོང་པ་དང་། དེ་བཞིན་བཟོ་ཚོང་གསར་འཛུགས་ཐོག་ལམ་སྟོན་དང་རམ་འདེགས་གནང་མཁན་གྱི་ཚོགས་སྡེ་ཆེ་ཁག་དང་ལྷན་འབྲེལ་བ་འཛུགས་ཐབས་བཅས་གླ་ཡོན་གནང་མི་དགོས་པར་རོགས་ཕན་བྱ་རྒྱུ་ཡིན་འདུག་པ་བཅས།།
