༢༠༡༦ ཟླ་ ༨ ཚེས་ ༩ རེས་གཟའ་མིག་དམར།
སྐུ་པར་བདག་དབང་དགའ་ལྡན་ཕོ་བྲང་།
༄༅། །འདི་གའི་ཆེད་གཉེར་གསར་འགོད་པ་བསྟན་འཛིན་འཆི་མེད་ལགས་ཀྱིས་ས་གནས་ནས་བཏང་གནས་ནང་འཁོད་དོན། མངའ་རིས་ནང་ཆོས་རིགས་ལམ་སློབ་གཉེར་ཁང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་སྔོན་ནས་གསོལ་འདེབས་ཞུས་དོན་བཞིན་བཀའ་བཞེས་བཟང་པོ་སྨིན་སྩལ་གྱིས་ཕྱི་ལོ་ ༢༠༡༦ ཟླ་ ༨ ཚེས་ ༨ ཉིན་གྱི་སྔ་དྲོ་ཆུ་ཚོད་ ༨ ཐོག་མགོན་པོ་གང་ཉིད་མཆོག་གིས་བཞུགས་གནས་ཕོ་བྲང་ཞི་བའི་ཚལ་ནས་རྒྱང་ཐག་ཀི་ལོ་མི་ཊར་ ༡༤ སར་ཆགས་པའི་ས་ཕུད་གྲོང་གསེབ་ཏུ་རྟེན་གཞི་བྱས་པའི་མངའ་རིས་ནང་ཆོས་རིགས་ལམ་སློབ་གཉེར་ཁང་རྟེན་དང་བརྟེན་པ་བཅས་པ་གསར་བཞེངས་ལེགས་གྲུབ་བྱུང་བར་དབུ་འབྱེད་རབ་གནས་བཀའ་དྲིན་བསྐྱངས།
སྐུ་པར་བདག་དབང་དགའ་ལྡན་ཕོ་བྲང་།
སྐབས་དེར་སློབ་གཉེར་ཁང་གི་དགེ་སློབ་གཙོ་བོར་གྱུར་བའི་གྲོང་གསེབ་ཀྱི་མང་ཚོགས་ཆིག་སྟོང་ཙམ་ལ་༸གོང་ས་མཆོག་གིས་ནང་པ་སངས་རྒྱས་པའི་ཆོས་ལ་ཤེས་ནས་དད་པ་ཐོབ་པ་ཞིག་དགོས་པ་དང་། ནང་ཆོས་ལ་སློབ་གཉེར་བྱེད་ནས་ཉམས་ལེན་བྱ་དགོས་པ།
དེ་བཞིན་ཆོས་ལུགས་ཚང་མར་ལྟ་གྲུབ་མི་འདྲ་བ་ཡོད་ཀྱང་ཚང་མས་བྱམས་པ་དང་བརྩེ་བའི་བསླབ་བྱ་གཅིག་མཚུངས་གསུང་བཞིན་ཡོད་པས་ཆོས་ལུགས་དབར་ཕན་ཚུན་གུས་བརྩི་ཞུ་དགོས་པའི་བཀའ་སློབ་སྩལ་བ་དང་སྦྲགས། མང་ཚོགས་ཀྱི་ཆེད་དུ་དཀའ་ངལ་ལ་མ་འཛེམས་པར་ལས་སྣེ་ཚོས་ཤེས་ཡོན་བསྟི་གནས་ཁང་དེ་འདྲ་གསར་འཛུགས་གནང་ཐུབ་པར་བསྔགས་བརྗོད་ཀྱང་མཛད།
སློབ་གཉེར་ཁང་འདི་ནི་དེ་སྔ་༸གོང་ས་༸སྐྱབས་མགོན་ཆེན་པོ་མཆོག་གིས་གདན་ས་ཁག་གི་ནང་སློབ་གཉེར་གནང་མཁན་ཧི་མཱ་ལ་ཡའི་རི་རྒྱུད་ཀྱི་དགེ་འདུན་པ་ཚོར་སློབ་གཉེར་གནང་གྲུབ་རྗེས་སོ་སོའི་ལུང་པར་ལོག་ནས་མང་ཚོགས་ལ་ཕན་ཐོགས་བསྒྲུབ་དགོས་པའི་བཀའ་སློབ་ཕེབས་དོན་ལྟར། སེར་བྱེས་དགེ་བཤེས་ཚེ་དབང་རྡོ་རྗེ་ལགས་ཀྱིས་ཐོག་མར་ཕྱི་ལོ་ ༢༠༠༦ ལོར་གསར་འཛུགས་ཀྱི་ལས་གཞི་འགོ་འཛུགས་གནང་བ་ཞིག་ཡིན་པ་དང་། ད་ལྟའི་ཆར་ད་ཕྲུག་དང་ཕ་མ་ཡ་བྲལ། ཁྱིམ་ཚང་ཉམ་ཐག་སོགས་ཀྱི་ཕྲུ་གུ་གྲངས་ ༤༥ ཙམ་ལ་སྡོད་ཁང་དང་། འཛིན་ཁང་། དཔེ་མཛོད་ཁང་། སྨན་ཁང་སོགས་ཀྱི་མཐུན་རྐྱེན་སྦྱར་ཏེ་གསོ་སྐྱོང་གནང་བཞིན་ཡོད་འདུག
སྐུ་པར་བདག་དབང་དགའ་ལྡན་ཕོ་བྲང་།
ཕྱོགས་མཚུངས་བསྟི་གནས་ཁང་དེས་ས་གནས་ཀྱི་སྐྱ་བོ་ཕོ་མོ་དབྱེར་མེད་ལ་ནང་ཆོས་ངོ་སྤྲོད་ཀྱིས་མཚོན་ཤེས་ཡོན་ཐོག་མཐུན་འགྱུར་གནང་བཞིན་ཡོད་འདུག གཞན་ཡང་དབུ་འབྱེད་རབ་གནས་ཀྱི་མཛད་སྒོའི་ཐོག་ཁ་ཆེ་དང་ཡེ་ཤུའི་ཆོས་པ་ཁག་གཅིག་ཀྱང་བཅར་འདུག དབུ་འབྱེད་རབ་གནས་ཀྱི་མཛད་སྒོ་ཡོངས་སུ་ལེགས་གྲུབ་རྗེས་༸གོང་ས་མཆོག་ས་ཕུད་ནས་སྤྱི་ལེ་ ༡༨ ཙམ་གྱི་སར་ཆགས་པའི་ཏོག་གྲོང་གསེབ་ཏུ་སིདྡཱར་ཐ་འབྲིང་རིམ་སློབ་གྲྭར་ Siddhartha High School ཆིབས་སྒྱུར་བསྐྱངས་ཏེ་དགེ་ལས་སློབ་མ་ཁྱོན་གྲངས་ ༤༠༠ ལྷག་ལ་བཀའ་སློབ་ཀྱི་ནང་དོན་སྙིང་པོར་དུས་རབས་གསར་པ་འདི་ཞི་བདེ་ལྡན་པའི་དུས་རབས་ཤིག་ཡོང་བར་གཙོ་ཆེ་ཤོས་གཞོན་སྐྱེས་ཚོས་ད་ལྟ་ནས་འགན་ཁུར་བླང་དགོས་སྐོར་སོགས་ཀྱི་བཀའ་སློབ་སྩལ། སྤྱིར་ཐེངས་འདིར་༸གོང་ས་༸སྐྱབས་མགོན་ཆེན་པོ་མཆོག་སློབ་གྲྭ་དེར་ཆིབས་སྒྱུར་བསྐྱངས་ཐེངས་གསུམ་པ་དེ་ཆགས་ཡོད་འདུག
སྐུ་པར་བདག་དབང་དགའ་ལྡན་ཕོ་བྲང་།
སིདྡཱར་ཐ་འབྲིང་རིམ་སློབ་གྲྭའི་མཛད་འཕྲིན་སྒྲུབ་རྗེས། ཏོག་གྲོང་གསེབ་ཀྱི་ལ་དྭགས་དམག་ཟུར་ཚོགས་པ། ལྷག་བསམ་ཚོགས་པས་གསོལ་འདེབས་ཞུས་པ་བཞིན། གྲོང་གསེབ་ཀྱི་དབུས་སུ་གསར་བཞེངས་ལེགས་གྲུབ་བྱུང་བའི་སྟོན་པ་བཅོམ་ལྡན་འདས་ཀྱི་སྐུ་བརྙན་མཐོ་ཚད་ཕི་ཊི་ ༧༡ ཅན་ཞིག་ལ་རབ་གནས་བཀའ་དྲིན་བསྐྱངས་པ་དང་།
སྐུ་པར་བདག་དབང་དགའ་ལྡན་ཕོ་བྲང་།
དེར་འདུས་པའི་ས་གནས་མང་ཚོགས་ཆིག་སྟོང་ཙམ་ལ་སྟོན་པ་རྗེས་དྲན་ཆེད་དུ་སྐུ་བརྙན་བཞེངས་པ་ཙམ་མིན་པར་གཙོ་བོ་སྟོན་པའི་གསུང་ལ་སློབ་གཉེར་གྱིས་ཉམས་ལེན་བྱེད་དགོས་པ་སོགས་ཀྱི་བཀའ་སློབ་སྩལ། སྟོན་པའི་སྐུ་བརྙན་དེ་བཞིན་ཏོག་གི་དམག་མི་ཟུར་པའི་ཚོགས་མི་རྣམ་པས་འགན་ཁུར་བླངས་ཏེ་བཞེངས་པ་ཞིག་ཡིན་པ་དང་།
སྐུ་པར་བདག་དབང་དགའ་ལྡན་ཕོ་བྲང་།
ཕྱི་ལོ་ ༢༠༡༢ ལོར་༸སྐྱབས་རྗེ་དགའ་ལྡན་ཁྲི་རིན་པོ་ཆེ་མཆོག་དང་བ་ཀུ་ལ་མཆོག་རྣམ་གཉིས་ཀྱིས་ས་གཞིར་བྱིན་རླབས་གནང་གྲུབ་པ་དང་། ཕྱི་ལོ་ ༢༠༡༥ ལོར་གསར་བཞེངས་ལེགས་གྲུབ་བྱུང་བ་ཞིག་ཡིན་འདུག དེ་ཉིན་༸གོང་ས་མཆོག་དང་ལྷན་དུ་སྐྱབས་རྗེ་དགའ་ལྡན་ཁྲི་རིན་པོ་ཆེ་མཆོག་གིས་དབུས་པའི་མངའ་སྡེའི་གྲོས་ཚོགས་ཀྱི་འཐུས་མི་སོགས་ལྷན་བཅར་ཞུས་ཡོད་པ་བཅས།།
