༢༠༡༠ ཕྱི་ཟླ་ ༦ ཚེས་ ༡༠ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༦ ཚེས་ ༦ ནས་ ༨ བར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ཡུ་རོབ་ཁུལ་གྱི་ནོར་ཝེའི་རྒྱལ་ས་ཨོ་སོ་ལོར་ (Oslo) ཕེབས་ཏེ་ཕྱི་ཚེས་ ༦ ཉིན་རྒྱབ་ནོར་ཝེ་ནང་གནས་སྡོད་བོད་རིགས་ཚོར་གསུང་བཤད་གནང་། སྐབས་དེར་ཚོགས་གཙོ་མཆོག་གིས་བཙན་བྱོལ་བོད་གཞུང་གི་ལས་དོན་བྱེད་སྒོ་ཁག་དང་བོད་གཞུང་གི་མང་གཙོའི་ཀ་བ་གསུམ་གྱི་མཚོན་ལྷན་ཁང་ཁག་གི་ལས་དོན་གལ་གནད་ཆེ་ཆུང་གོ་རིམ་ཐོག་ལས་དོན་སྤེལ་ཕྱོགས། དང་བླངས་དཔྱ་ཁྲལ་ལག་དེབ་ཀྱི་ (Green Book) ཡོང་འབབ་བརྒྱུད་བོད་མི་རྣམས་ཀྱིས་བཙན་བྱོལ་བོད་གཞུང་གི་ལས་དོན་སྤེལ་རྒྱུར་དཔལ་འབྱོར་མཐུན་འགྱུར་ཇི་ཙམ་སྤྲོད་ཀྱི་ཡོད་མེད་ཅེས་སོགས་ཀྱི་སྐོར་ཞིབ་ཕྲ་གསལ་བཤད་གནང་ཡོད་པ་མ་ཟད། ཚོགས་གཙོ་མཆོག་གི་གསུང་བཤད་གྲུབ་བསྟུན་མི་མང་ཚོར་དྲི་བ་དྲིས་ལན་གྱི་གོ་སྐབས་ཀྱང་ཕུལ་ཡོད།
ཕྱི་ཚེས་ ༧ ཉིན་སྤྱི་འཐུས་ཚོགས་གཙོ་མཆོག་དང་ནོར་ཝེ་བོད་རིགས་ཚོགས་པའི་ཆུང་དག་ཀོ་རེན་ལགས་རྣམ་གཉིས་རྒྱ་ནག་གཞུང་གི་ཕྱི་སྲིད་བློན་ཆེན་གཞོན་པའི་གཏམ་བཤད་ཀྱི་ཚོགས་འདུར་ཕེབས། དེ་ཉིན་གྱི་ཕྱེད་ཡོལ་སྤྱི་འཐུས་ཚོགས་གཙོ་མཆོག་གིས་ནོར་ཝེ་འགྲོ་བ་མིའི་ཐོབ་ཐང་ཚོགས་ཁང་དུ་མང་ཚོགས་ལ་གསུང་བཤད་གནང་ཡོད། ཕྱི་ཚེས་ ༨ ཉིན་གྱི་སྔ་དྲོ་སྤྱི་འཐུས་ཚོགས་གཙོ་མཆོག་ནོར་ཝེའི་ཕྱི་སྲིད་ལས་ཁུངས་ཀྱི་སྐུ་ཚབ་འཐུས་མི་རྣམས་དང་མཇལ་འཕྲད་གནང་སྟེ་རྒྱ་ནག་གཞུང་དང་༸གོང་ས་མཆོག་གི་སྐུ་ཚབ་དབར་བོད་རྒྱ་ཞི་མོལ་གྱི་ད་ལྟའི་གནས་སྟངས་ཇི་ཡིན་དང་། དེ་བཞིན་བོད་ཀྱི་གནད་དོན་གཙོ་གནད་ཁག་གཅིག་གི་ཐོག་བགྲོ་གླེང་ལྷུག་པོ་གནང་ཡོད་པ་མ་ཟད། སྐབས་དེར་རྒྱ་ནག་གི་རྒྱལ་ས་པེ་ཅིང་ནང་ནོར་ཝེ་དང་རྒྱ་ནག་གཉིས་དབར་འགྲོ་བ་མིའི་ཐོབ་ཐང་གི་བགྲོ་གླེང་ཚོགས་འདུ་འཚོགས་བཞིན་ཡོད་པའི་གནས་སྟངས་ཐོག་ལའང་བགྲོ་གླེང་གནང་ཡོད། ནོར་ཝེ་དང་རྒྱ་ནག་གཞུང་དབར་འགྲོ་བ་མིའི་ཐོབ་ཐང་གི་བགྲོ་གླེང་ཚོགས་འདུ་དེ་བཞིན་ཆབ་སྲིད་ཀྱི་གནས་བབ་མཐོ་པོའི་ཐོག་འཚོགས་བཞིན་ཡོད་པ་དང་། ཚོགས་འདུ་དེར་ནོར་ཝེ་དང་རྒྱ་ནག་གཞུང་ཕྱོགས་གཉིས་ཀྱི་འབྲེལ་ཡོད་དྲུང་ཆེ་རྣམས་མཉམ་ཞུགས་གནང་བཞིན་ཡོད། ཚོགས་འདུ་དེའི་སྐབས་བོད་ཀྱི་གནད་དོན་ཐོག་ལའང་བགྲོ་གླེང་གནང་རྒྱུ་ཡིན་འདུག ཉིན་རྒྱབ་ཚོགས་གཙོ་མཆོག་ནོར་ཝེའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་དང་མཇལ་འཕྲད་གནང་། སྐབས་དེར་ནོར་ཝེ་གཞུང་དང་ཚོགས་པ་ཁག་གིས་རྒྱ་ནག་གཞུང་ལ་༸གོང་ས་ཏཱ་ལའི་བླ་མ་མཆོག་གི་སྐུ་ཚབ་དང་ལྷན་དོན་སྨིན་ལྡན་པའི་བོད་རྒྱ་ཞི་མོལ་ཡོང་ཆེད་རྒྱ་ནག་གཞུང་ལ་འབོད་སྐུལ་ཤུགས་ཆེ་རུ་ཇི་ལྟར་གཏོང་དགོས་མིན་གྱི་ཐབས་ལམ་ཇི་ཡོད་ཐོག་བགྲོ་གླེང་གནང་ཡོད། དེ་ཡང་ཚོགས་གཙོ་མཆོག་གིས་ནོར་ཝེའི་ནང་འཚམས་གཟིགས་ལེགས་པར་གྲུབ་མཚམས་རེས་གཟའ་མིག་དམར་གྱི་ཕྱེད་ཡོལ་ཌེན་མག་ (Denmark) ཏུ་ཕེབས། ཚོགས་གཙོ་མཆོག་གིས་ནོར་ཝེའི་ནང་གསར་འགོད་པ་ཁག་གཅིག་དང་ཡང་ཐུག་འཕྲད་གནང་ཡོད། སྤྱི་འཐུས་ཚོགས་གཙོ་མཆོག་གི་ནོར་ཝེའི་ནང་གི་གཞུང་འབྲེལ་གཟིགས་སྐོར་གོ་སྒྲིག་གནང་མཁན་ནོར་ཝེ་བོད་ཀྱི་ཚོགས་པ་ (Norwegian Tibet Committee) དང་། བོད་ཀྱི་འབོད་སྒྲ་དགེ་རྩ་ཚོགས་པ་ (Foundation Voice of Tibet) གཉིས་ཟུང་འབྲེལ་ཡིན་འདུག་པ་བཅས།།
