༢༠༡༦ ཟླ་ ༧ ཚེས་ ༢༨ རེས་གཟའ་ཕུར་བུ།

༄༅། །ཕྱི་ལོ་ ༢༠༡༦ ཟླ་ ༧ ཚེས་ ༢༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་རྒྱལ་ས་སླེ་རུ་རྟེན་གཞི་བྱས་པའི་ཇོ་ཁང་དང་ཁ་ཆེའི་མཆོད་ཁང་སོགས་སུ་གནས་གཟིགས་མཛད་འདུག དེ་ཡང་མགོན་པོ་གང་ཉིད་མཆོག་གིས་ཇོ་ཁང་དགོན་པར་ཞབས་ཐང་ཐོག་ཆིབས་སྒྱུར་བསྐྱངས་སྐབས་དད་ལྡན་མང་ཚོགས་དང་ཡུལ་སྐོར་སྤྲོ་འཆམ་པ་སོགས་ཀྱིས་གཙོས་མི་མང་སྟོང་ཕྲག་བརྒལ་བས་འཚང་ཁ་ཤིག་ཤིག་གིས་མཇལ་ཁ་ཞུས་འདུག སྐབས་དེར་ཡུལ་སྐོར་སྤྲོ་འཆམ་པ་ཞིག་གིས་ཁོང་རང་ཉིད་ཕ་རན་སིའི་གྲོང་ཁྱེར་ནི་སི་ Nice ཞེས་པ་ནས་ཡིན་སྐོར་ཞུས་ནས་འཚམས་འདྲི་ཞུ་སྐབས། ༸གོང་ས་མཆོག་གིས་སྐབས་དེར་ཁོང་ལ་ཞལ་ཕྱོགས་ནས་ཐུགས་བརྩེ་བ་ཆེན་པོས་ཉེ་ལམ་ས་གནས་དེར་འཇིགས་སྐུལ་དྲག་སྤྱོད་པས་ཉེས་མེད་མང་ཚོགས་ ༨༠ ལྷག་སྡེབ་གསོད་བྱས་པའི་གནས་ཚུལ་བྱུང་བར་ཐུགས་ཕམ་ཧ་ཅང་མཛད་པ་མ་ཟད། ས་གནས་མང་ཚོགས་རྣམས་ལ་ཐུགས་གསོ་དང་སྦྲགས་གདུང་སེམས་མཉམ་སྐྱེ་མཛད། སྨོན་ལམ་བརྒྱབ་པ་ཙམ་གྱིས་འཛམ་གླིང་ཞི་བདེ་སྐྲུན་མི་ཐུབ་པར་བརྟེན་ཚང་མས་ལག་ལེན་གྱི་ཐོག་ནས་འབད་བརྩོན་བྱེད་དགོས་པའི་ལམ་སྟོན་ཡང་མཛད།

དེ་རྗེས་ཇོ་ཁང་གི་སྒོ་རྭའི་ནང་༸ཞབས་སོར་འཁོད་མཚམས་ལ་དྭགས་ནང་པའི་ཆོས་ཚོགས་དང་། ལ་དྭགས་ནང་པའི་གཞོན་ནུ་ཚོགས་པ། དེ་བཞིན་ལ་དྭགས་ནང་པའི་བུད་མེད་ཚོགས་པ་བཅས་ཀྱི་འབྲེལ་ཡོད་ལས་བྱེད་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས། དེ་ནས་ཇོ་ཁང་ནང་དུ་ཐིག་སེ་རིན་པོ་ཆེ་དང་། བསོད་ནམས་ཟླ་བ་ལགས། མངའ་སྡེའི་གྲོས་ཚོགས་འཐུས་མི་ངག་དབང་རིགས་འཛིན་ཇོ་ར་མཆོག་སོགས་ཀྱིས་༸གོང་ས་མཆོག་ལ་ཕེབས་བསུ་གཟབ་རྒྱས་ཞུས། སྐབས་དེར་༸གོང་ས་མཆོག་གིས་རྟེན་འབྲེལ་བསྟོད་པ་དང་རིས་མེད་བསྟན་རྒྱས་སྨོན་ལམ་གསུང་འདོན་མཛད་རྗེས་བཀའ་སློབ་སྩལ་དོན། ངོས་རང་བོད་པའི་དགོན་པ་དང་ལྷ་ཁང་དེ་འདྲར་ནམ་བསྐྱོད་སྐབས་བོད་མི་ཚོར་དགོན་པ་དང་ལྷ་ཁང་ཟེར་དུས་ཕྱག་མཆོད་འབུལ་དང་སྨོན་ལམ་རྒྱག་ས་ཙམ་ལ་མ་བཞག་པར་ནང་ཆོས་སློབ་གཉེར་བྱེད་ས་དང་། སྟོན་པ་བཅོམ་ལྡན་འདས་ཀྱི་གསུང་གཞུང་ཆེན་དེ་དག་ལ་སློབ་གཉེར་བྱེད་སའི་བསྟི་གནས་ཁང་གི་ངོ་བོར་འགྱུར་དགོས་པའི་འབོད་སྐུལ་དེ་འདྲ་བྱེད་བཞིན་ཡོད། ནང་པ་སངས་རྒྱས་པ་ངོ་མ་ཞིག་བྱེད་དགོས་ན་ནང་པའི་ཆོས་གང་ཡིན་པ་ཆ་ཚང་ཤེས་དགོས། དེར་བརྟེན་དེ་རིང་འདིར་ཇོ་ཁང་འདི་ཡང་ནང་ཆོས་སློབ་གཉེར་བྱེད་སའི་བསྟི་གནས་ཁང་ཞིག་ཏུ་འགྱུར་ཐབས་གནང་དགོས། ཞེས་བཀའ་སློབ་སྩལ།

སྐབས་དེར་ལ་དྭགས་ནང་པའི་ཚོགས་པས་ལས་བསྡོམས་སྒྲོགས་སྦྱང་ཞུ་སྐབས་ཀར་སྒིལ་ནས་ཁ་ཆེ་དེ་འདྲ་ཇོ་ཁང་ནང་མགྲོན་འབོད་ཀྱིས་ཆོས་ལུགས་ཕན་ཚུན་གོ་རྟོགས་སྤེལ་ཐབས་བྱས་པའི་ལས་རིམ་གསལ་བ་དེར་༸གོང་ས་མཆོག་གིས་ཐུགས་དགྱེས་ཚོར་ཆེན་པོས་ལེགས་གསོལ་བསྔགས་བརྗོད་མཛད་པ་དང་སྦྲགས། མཚམས་རེ་ཆོས་ལུགས་དུས་ཆེན་གྱི་གུང་སང་དེ་འདྲའི་སྐབས་ནང་པ་དང་དེ་བཞིན་ཆོས་ལུགས་གཞན་གྱི་རྗེས་འབྲང་པ། དེ་བཞིན་ཆོས་ཁས་མི་ལེན་མཁན་སོགས་ཀྱང་མགྲོན་དུ་འབོད་ནས་བགྲོ་གླེང་དེ་འདྲ་གོ་སྒྲིག་གནང་ཐུབ་ན་དགེ་མཚན་ཆེན་པོ་ཡོད་སྐོར་ལམ་སྟོན་མཛད་དོན། ལོ་ངོ་སྟོང་གི་རིང་རྒྱ་གར་ནང་ཆོས་ལུགས་མཐུན་སྒྲིལ་ཉམས་ལེན་བྱས་ནས་དེང་སྐབས་འཛམ་གླིང་ཀུན་ལ་མིག་དཔེ་སྟོན་ཐུབ་པ་ཞིག་དགོས་རྒྱུ་ཧ་ཅང་གལ་ཆེན་པོ་རེད། དེང་སྐབས་སི་རི་ཡ་དང་ཨབ་གྷ་ནི་སི་ཐན། ཨི་རག་བཅས་ཀྱི་ནང་ཆོས་ཀྱི་མིང་འཁྱེར་ནས་དྲག་སྤྱོད་ཀྱི་ལས་འགུལ་ཚབས་ཆེ་སྤེལ་ནས་མི་གཅིག་གིས་གཅིག་ལ་གསོད་རེས་བྱེད་བཞིན་ཡོད། ངོས་རང་ཡང་ཆོས་པ་ཞིག་ཡིན་པའི་ངོས་ནས་གནས་ཚུལ་དེ་དག་ལ་སྣང་མེད་དུ་བཏང་ནས་བསྡད་པ་ཡིན་ན་བཟང་སྤྱོད་དང་འགལ་བཞིན་ཡོད། ཆོས་ལུགས་ཕན་ཚུན་འཆམ་མཐུན་དང་བསམ་ཤེས་སྤེལ་རེས་བྱས་ནས་འཛམ་གླིང་ཞི་བདེ་ལྡན་པ་ཞིག་བཟོ་རྒྱུར་ང་ཚོ་ཚང་མར་ལས་འགན་ཡོད། ཅེས་བཀའ་སློབ་སྩལ། དེ་ནས་སླར་ཡང་མི་ཊར་ ༥༠ ཙམ་གྱི་སར་ཆགས་པའི་ཁ་ཆེའི་ཆོས་ལུགས་ཀྱི་སུན་ནི་སྡེ་ཚན་གྱི་མཆོད་ཁང་ Sunni Mosque ཞིག་ཡོད་པ་དེར་གནས་གཟིགས་མཛད།

དེ་ཡང་༸གོང་ས་མཆོག་མཆོད་ཁང་དེར་༸ཞབས་སོར་འཁོད་བསྟུན་ཁ་ཆེའི་མཆོད་དཔོན་སོགས་ཀྱིས་ཕེབས་བསུ་གཟབ་རྒྱས་ཞུས། དེ་རྗེས་ཁ་ཆེའི་དབུ་བླ་རྣམས་དང་ལྷན་སྨོན་ལམ་གསུང་འདོན་མཛད། གནས་གཟིགས་ཡོངས་སུ་ལེགས་གྲུབ་རྗེས་རྒྱང་ཐག་མི་ཊར་ ༢༠༠ ཙམ་གྱི་སར་ཆགས་པའི་ཁ་ཆེའི་ཆོས་ལུགས་ཀྱི་ཤི་ཡ་སྡེ་ཚན་གྱི་མཆོད་ཁང་ Shia Mosque ཞིག་ཡོད་པ་དེར་གནས་གཟིགས་མཛད། དེར་ཁ་ཆེ་ཙམ་མ་ཟད་ནང་པའི་སྐུ་ཚབ་སོགས་ཀྱང་ཕེབས་འདུག སྐབས་དེར་ཤི་ཡ་མཆོད་དཔོན་མཆོག་གིས་༸གོང་ས་མཆོག་ཁ་ཆེའི་མཆོད་ཁང་དེར་ཆིབས་སྒྱུར་བསྐྱངས་ཐེངས་གསུམ་པ་ཆགས་ཡོད་སྐོར་སྙན་སྒྲོན་ཞུས་པ་དང་སྦྲགས། དེང་སྐབས་འཛམ་གླིང་ནང་ཆོས་ཀྱི་མིང་འཁྱེར་ནས་དྲག་སྤྱོད་ཀྱི་ལས་འགུལ་སྤེལ་བཞིན་པ་ནི་ཧ་ཅང་ཐབས་སྡུག་ཡིན་སྐོར་དང་། མཐའ་གཅིག་ཏུ་ནོར་བ་ཡིན་སྐོར་སྙན་སེང་ཞུས། སྐབས་དེར་༸གོང་ས་མཆོག་གིས་བོད་ལ་༸རྒྱལ་བ་ལྔ་པའི་སྐབས་ལ་དྭགས་ཁ་ཆེའི་ཚོང་པ་ཚོར་ཁ་ཆེའི་ལྷ་ཁང་བཞེང་ཆེད་ཆེད་མངགས་ས་ཆ་གསོལ་རས་སྩལ་ཡོད་སྐོར་དང་། དེ་ནས་བཟུང་རིམ་བཞིན་བོད་པ་ཁ་ཆེའི་ཚོགས་པ་བྱུང་ཞིང་བོད་གཞུང་གི་གཞུང་འབྲེལ་མཛད་སྒོ་ཚང་མའི་ནང་བོད་པ་ཁ་ཆེའི་སྐུ་ཚབ་མགྲོན་འབོད་ཀྱིས་མཉམ་ཞུགས་བྱེད་སྲོལ་ཡོད་པ་དང་། ཁ་ཆེ་དེ་དག་ཞི་དུལ་བག་ཡོད་ཅན་ཤ་སྟག་རེད། ཕན་ཚུན་འཁྲུག་པ་བརྒྱབ་པའི་གནས་ཚུལ་རིགས་རྩ་བ་ནས་གོ་མྱོང་མེད། ཁོང་ཚོ་དེ་དག་ཁ་ཆེ་མཆོད་པ་ཡང་དག་པ་རེད། འདས་པའི་དུས་སྐབས་རིང་འཛམ་གླིང་དམག་ཆེན་དང་པོ་དང་གཉིས་པའི་སྐབས་མི་ཧ་ཅང་མང་པོ་དམར་གསོད་བཏང་ཡོད་པ་མ་ཟད། དུས་ད་ལྟའང་འཛམ་གླིང་འདིའི་ནང་མི་གྲངས་སྟོང་ཕྲག་མང་པོ་ཕན་ཚུན་གསོད་རེས་དང་དེ་བཞིན་ལྟོགས་ཤི་ཐེབས་བཞིན་ཡོད། ཅེས་སོགས་ཀྱི་བཀའ་སློབ་སྩལ།།