ཕྱི་ལོ་ ༢༠༡༦ ཟླ་ ༧ ཚེས་ ༧ རེས་གཟའ་ཕུར་བུ།

༄༅། །འདི་གའི་ཆེད་གཉེར་གསར་འགོད་པ་བསྟན་འཛིན་དབང་ཕྱུག་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༦ ཟླ་ ༧ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༡ ལ་ཕེབས་པའི་སྐུའི་འཁྲུངས་སྐར་དུས་ཆེན་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་རྟེན་གཞི་བྱས་པའི་འབྲས་སྤུངས་བླ་སྤྱིའི་མདུན་ཐང་དུ་སྲུང་བརྩི་གཟབ་རྒྱས་ཞུས་སོང་།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཙམ་ལ་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་དང་། ཤར་བྱང་ཆོས་རྗེ་རྣམ་གཉིས་མཆོག། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག ཡབ་གཞིས་སྐུ་འཁོར། ས་གནས་སུ་ཡོད་པའི་སྤྱི་འཐུས་ཁག་གཅིག གདན་ས་ཁག་གི་མཁན་བླ་སྤྲུལ། ས་གནས་ཀྱི་ཆོས་ལུགས་འདྲ་མིན་གྱི་དབུ་ཁྲིད་ཁག་གཅིག ལྷོ་སྤྱིས་གཙོས་མོན་གྷོ་གཞིས་ཆགས་སུ་ཡོད་པའི་གཞུང་དང་གཞུང་འབྲེལ་མིན་པའི་ཚོགས་སྡེ་ཁག་གི་འགན་འཛིན། གཞན་ཡང་རྒྱ་གར་ས་གནས་གནད་ཡོད་མི་སྣ་ཁག་གཅིག་དང་ས་གནས་སེར་སྐྱ་མི་མང་སྟོང་ཚོ་བརྒལ་བ་ཚང་འཛོམས་ཀྱིས་དགའ་དད་སྤྲོ་གསུམ་གྱི་ངང་སྐུའི་འཁྲུངས་སྐར་དུས་ཆེན་སྲུང་བརྩི་ཞུས་སོང་།

མཛད་སྒོའི་ཐོག་མར་ཚང་མ་སྐུ་བཞེངས་ཐོག་རྔ་རོལ་དང་བཅས་འཕགས་བོད་གཉིས་ཀྱི་རྒྱལ་གླུ་བཏང་གྲུབ་མཚམས། འབྲས་སྤུངས་ཁྲི་པ་རིན་པོ་ཆེ་མཆོག་གིས་དགའ་བསུའི་འཚམས་འདྲི་དང་། མོན་གྷོ་འདོད་རྒུ་གླིང་བོད་མིའི་ས་གནས་འགོ་འཛིན་གྱིས་ལས་བསྡོམས་སྒྲོགས་སྦྱང་ཞུས་རྗེས། སྐུའི་འཁྲུངས་སྐར་རྟེན་འབྲེལ་མཚོན་བྱེད་དུ་ Cake འདེགས་འབུལ་ཞུས་པ་དང་ལྷན། མི་མང་ཡོངས་ལ་མངར་ཟས་བགོ་འགྲེམས་གནང་།

དེ་ནས་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་རྣམ་གཉིས་ཀྱིས་བཀའ་ཤག་དང་སྤྱི་འཐུས་ལྷན་ཚོགས་ཀྱི་གསུང་འཕྲིན་སྒྲོགས་སྦྱང་གནང་། དེ་ནས་མོན་གྷོ་འདོད་རྒུ་གླིང་གཞིས་ཆགས་བཙུགས་ནས་ལོ་ངོ་ ༥༠ ཧྲིལ་པོ་འཁོར་བར་མོན་གྷོ་འདོད་རྒུ་གླིང་སེར་སྐྱ་མི་མང་ཡོངས་ནས་༧རྒྱལ་བའི་བཀའ་དྲིན་རྗེས་དྲན་མཚོན་བྱེད་དུ་རྒྱུ་སེར་དངུལ་ལས་གྲུབ་པའི་འཁོར་ལོ་ཞིག་འབུལ་ལམ་ཞུས་སོང་།

དེ་ནས་མཛད་སྒོའི་སྐུ་མགྲོན་དུ་ཕེབས་པའི་ས་གནས་ཀྱི་ཧིན་དུ་དང་། ཡེ་ཤུ། ཁ་ཆེ་ཆོས་ལུགས་བཅས་ཀྱི་ཆོས་དཔོན་གསུམ་ལ་མགོན་པོ་གང་ཉིད་མཆོག་གིས་ཐུབ་པའི་སྐུ་རེ་དང་མཇལ་དར་རེར་ལེགས་སྐྱེས་སུ་འབུལ། སྐབས་དེར་༸གོང་ས་མཆོག་གིས་བཀའ་སློབ་སྩལ་བའི་ནང་། མགོན་པོ་གང་ཉིད་མཆོག་གི་འཁྲུངས་སྐར་དང་མོན་གྷོ་འདོད་རྒུ་གླིང་བོད་མིའི་གཞིས་གཞིས་ཆགས་དབུ་བརྙེས་ནས་ལོ་ངོ་ ༥༠ འཁོར་བའི་དུས་ཆེན་གྱི་མཛད་སྒོ་གཟབ་རྒྱས་གོ་སྒྲིག་གནང་བར་ཐུགས་དགྱེས་ཚོར་ཆེན་པོ་བྱུང་ཡོད་སྐོར་དང་། ཕྱི་ལོ་ ༡༩༥༩ སྐབས་ཀྱི་གནས་སྟངས་དང་ད་ལྟའི་གནས་སྟངས་བར་ཡར་རྒྱས་ཆེན་པོ་སོང་ཡོད་ཀྱང་མུ་མཐུད་བོད་མིའི་ཆོས་དང་རིག་གཞུང་སྲུང་སྐྱོབ་དང་དར་སྤེལ་ཡོང་ཐུབ་པའི་འབད་བརྩོན་གནང་དགོས་གལ་དང་། མགོན་པོ་གང་ཉིད་མཆོག་གི་སྐུ་ཚེའི་རླབས་ཆེན་གྱི་མཛད་འགན་གཙོ་བོ་གསུམ་ལས་ཆོས་ལུགས་མཐུན་འབྲེལ་དང་འབྲེལ་བའི་སྐོར། རྒྱ་གར་ནང་ཆོས་ལུགས་དང་འབྲེལ་བའི་རྙོག་གླེང་ཕྲན་བུ་ཡོང་གི་ཡོད་པ་དེ་ནི་ཆོས་ཉིད་ཡིན་པ་ལས་སྤྱི་ཡོངས་ནས་རྒྱ་གར་ནི་འཛམ་གླིང་ནང་ཆོས་ལུགས་ཆེ་ཁག་འདྲ་མིན་མཐུན་འབྲེལ་ངང་འཚོ་གནས་བྱེད་མཁན་རྒྱལ་ཁབ་དཔེ་མཚོན་བཟང་ཤོས་ཤིག་ཡིན། ཞེས་སོགས་ཀྱི་སོགས་ཀྱི་བཀའ་སློབ་སྩལ་སོང་།

དེ་རྗེས་རྟེན་འབྲེལ་མཚོན་ཆེད་དུ་མོན་གྷོ་གཏན་ཉིན་སློབ་གྲྭ་དང་འདོད་རྒུ་གླིང་མི་མང་ནས་གཞས་སྣ་གཉིས་འཁྲབ་སྟོན་ཞུས་རྗེས་སྐུའི་འཁྲུངས་སྐར་སྲུང་བརྩི་གཟབ་རྒྱས་ངང་གྲུབ་ཡོད་པ་བཅས།།