༢༠༡༦ ཟླ་ ༧ ཚེས་་༡ རེས་གཟའ་པ་སངས།
༄༅། །འདི་གའི་ཆེད་གཉེར་གསར་འགོད་པ་བསྟན་འཛིན་དབང་ཕྱུག་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༦ ཟླ་ ༧ ཚེས་ ༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་རྟེན་གཞི་བྱས་པའི་འབྲས་སྤུངས་བླ་སྤྱིར་༸ཞབས་སོར་བདེ་བར་འཁོད་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཙམ་ལ་མགོན་པོ་གང་ཉིད་མཆོག་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་༸ཞབས་སོར་བདེ་བར་འཁོད་སྐབས། དགའ་ལྡན་ཁྲི་རིན་པོ་ཆེ་མཆོག་དང་ཤར་རྩེ་ཆོས་རྗེ་མཆོག་གིས་དབུས་རྣམ་གྲྭ་མཁན་པོ་མཆོག དེ་བཞིན་གདན་ས་ཁག་གི་མཁན་པོ་དང་མཁན་ཟུར། བདེ་སྲུང་བཀའ་བློན་མཆོག ལྷོ་ཕྱོགས་སུ་ཡོད་པའི་བོད་མི་མང་སྤྱི་འཐུས་ཁག་གཅིག ལྷོ་སྤྱི་དང་ལྷོ་ཕྱོགས་གཞིས་ཆགས་ཁག་ལྔའི་ས་གནས་འགོ་འཛིན་རྣམ་པ། ས་གནས་ཀྱི་གཞུང་དང་གཞུང་འབྲེལ་མིན་པའི་སྒྲིག་འཛུགས་ཁག་གི་སྐུ་ཚབ་དང་གནད་ཡོད་མི་སྣ། དེ་བཞིན་དད་ལྡན་སེར་སྐྱ་མང་ཚོགས་བཅས་ཀྱིས་དགའ་དད་སྤྲོ་གསུམ་གྱི་ངང་ཕེབས་བསུ་ཟབ་རྒྱས་ཞུས་ཡོད།
ཐོག་མར་མགོན་པོ་གང་ཉིད་མཆོག་འབྲས་སྤུངས་བླ་སྤྱིའི་འདུ་ཁང་དུ་རྟེན་གཙོ་རྣམས་ལ་ཆོས་མཇལ་དང་གནས་གཟིགས་ཕེབས་རྗེས་རྟེན་འབྱུང་གསོལ་ཇ་དང་འབྲས་སིལ་འདེགས་འབུལ་ཞུས་གྲུབ་མཚམས། མགོན་པོ་གང་ཉིད་མཆོག་གིས་བཀའ་སློབ་སྩལ་
དོན། ཁྲི་རིན་པོའི་ཞལ་སྔ་ནས་དབུ་མཛད་དེ་ཤར་པ་ཆོས་རྗེ་རེད། ཕལ་ཆེར་སེ་འབྲས་ཀྱི་མཁན་པོ་མང་ཆེ་བ་ཡོད་ས་རེད། ད་རེས་ཧ་ཅང་བྲེལ་བ་ཚ་པོ་བྱུང་། ཨ་རིར་བདུན་ཕྲག་གཉིས་ཙམ་བསྡད་པ་ཡིན། ད་རེས་འཁྲུངས་སྐར་དུས་ཆེན་འདིར་བྱེད་རྒྱུ་དང་། དེའི་གོང་དུ་ཉིན་མ་གསུམ་བཞི་ཡོད་པ་དེའི་རིང་བསྙེན་རྫོགས་ག་ཚོད་ཚར་ཚར་བསྒྲུབ་ཐུབ་པའི་ཐོག་མའི་འཆར་གཞི་འདི་ལྟར་རེད། དེ་རིང་འདིར་དགེ་འདུན་པ་དང་། གཞིས་ཆགས་འདིའི་ནང་ལས་ཀ་བྱེད་མཁན་ཚོ་རེད། ཁྱེད་རང་ཚོ་ཚང་མར་ཐོག་མར་འཚམས་འདྲི་ཡོད། འཛམ་གླིང་འདིའི་སྟེང་ཨ་རི་གཙོ་བོར་གྱུར་པའི་ནང་པ་མིན་པའི་ཡུལ་གྲུ་ཁག་གི་ནང་སེམས་ཁམས་རིག་པའི་སྐོར་དོ་སྣང་གསར་པ་ཞིག་སླེབ་བཞིན་ཡོད་སྟབས། དེ་དག་རིམ་བཞིན་ལག་ལེན་བསྐྱལ་རྒྱུའི་མཚམས་ལ་སླེབ་ན། ངོས་ཀྱིས་མཚམས་སྦྱོར་བྱེད་རྒྱུ་མ་གཏོགས་གཞན་ངོས་ཀྱི་ཤེས་ཀྱི་མ་རེད། དེར་བརྟེན་འདི་མཇུག་བསྐྱལ་མཁན་ནི་གཞུང་ཆེན་ཕྲན་བུ་སློབ་གཉེར་ཡོད་པ་དེ་དག་གི་ནང་ནས་ཡོང་རྒྱུ་རེད་མ་གཏོགས། དེ་འདྲའི་གཞུང་ཆེན་སློབ་གཉེར་ཧ་ཅང་མེད་མཁན་ཞིག་གིས་ཁག་པོ་རེད། དེར་བརྟེན་དམིགས་པ་ལྟ་བུ་བསམ་བློ་གཏོང་ཡོང་དུས་གྲྭ་ས་མ་གཏོགས་འགྲོ་ས་མི་འདུག
གཞི་རྩའི་དེང་སྐབས་ཨ་རིའི་ནང་ལ་ཡང་བྱམས་བརྩེའི་ཉམས་ལེན་ཐོག་དོ་སྣང་ཆེན་པོ་བྱེད་བཞིན་པ་དང་། ལྷག་པར་ཨ་རིའི་གྲོང་ཁྱེར་གཉིས་ཙམ་གྱི་མིང་ཡང་སྙིང་རྗེའི་གྲོང་ཁྱེར་དང་བྱམས་བརྩེའི་གྲོང་ཁྱེར་ཞེས་པའི་མིང་བཏགས་ཡོད་པ་མ་ཟད། དེ་འབྲེལ་གྲོང་ཁྱེར་དེ་དག་ནང་བྱམས་བརྩེ་དང་འབྲེལ་བའི་བགྲོ་གླེང་དང་། དེ་དག་གི་བརྒྱུད་ནས་གྲོང་ཁྱེར་དེ་དག་གི་ནང་འཁྲུག་རྩོད་རིགས་ཀྱང་ཇེ་ཉུང་དུ་སོང་ཡོད་པ་སོགས་དངོས་སུ་ཕན་ཐོགས་བྱུང་བ་ལུང་འདྲེན་གནང་བ་འབྲེལ་ཉེ་ཆར་མགོན་པོ་གང་ཉིད་མཆོག་ཨ་རིར་ཆིབས་སྐྱུར་བསྐྱངས་པའི་སྐབས་གྲོང་ཁྱེར་སྤྱི་ཁྱབ་པ་ཉིས་བརྒྱ་ལྷག་ཙམ་གྱི་ལྷན་འཛོམས་སྐབས་ཁོང་རྣམས་པས་ཀྱང་དེའི་ཐད་ཐུགས་སྣང་ཧ་ཅང་ཆེན་པོ་གནང་བཞིན་པ་སོགས་ངོ་སྤྲོད་གནང་བ་དང་ལྷན་བྱམས་བརྩེ་དང་སེམས་ཁམས་རིག་པའི་ཤེས་ཡོན་སློབ་གསོ་ནི་ཐོག་མ་སྔོན་འགྲོའི་སློབ་གྲྭ་ནས་འགོ་འཛུགས་བྱེད་དགོས་པ་དང་དེའི་རྒྱབ་ལྗོངས་སུ་རིམ་བཞིན་སེམས་ཁམས་རིག་པའི་རྣམ་གཞག་གི་སློབ་ཚན་རྒྱ་ཆེ་རུ་གཏོང་དགོས་པ་ཞིག་ཡིན་ཞིང་དེའི་ཆེད་ཆོས་ལུགས་དང་མ་འབྲེལ་ཞིང་བཟང་སྤྱོད་གོང་འཕེལ་གྱི་སློབ་གསོའི་སློབ་དེབ་ཞིག་ཀྱང་རྩོམ་སྒྲིག་གནང་བཞིན་པ་མ་ཟད། ཟླ་ཤས་ནང་གཏན་འབེབ་གནང་ཐུབ་པའི་སྐོར་བཀའ་སློབ་སྩལ་དོན། སེམས་ཀྱི་ཞི་བདེ་དཀྲུག་མཁན་ནི་ཞེ་སྡང་ལ་སོགས་པ་དེ་ཚོས་བྱེད་ཀྱི་ཡོད་སྟབས། དེའི་གཉེན་པོ་བསྟེན་སྟངས་དེ་འདྲའི་སེམས་ཁམས་རིག་པའི་སྐོར་ལ་སློབ་གྲྭ་ཆུང་ཆུང་ལ་དེ་ལ་དཔག་པའི་མདོར་བསྡུས་ཤིག་འགྲེལ་བཤད་བརྒྱག་རྒྱུ། དཔེར་ན། བྱིས་པ་འགྲོ་སའི་སློབ་གྲྭ་ཆུང་ཆུང་ kindergarden ནང་མདོར་བསྡུས་ཤིག་དང་། དེ་ནས་ཡར་འཛིན་གྲྭ་མཐོ་རུ་ཕྱིན་པའི་སྐབས་སུ་རིམ་པས་རྒྱས་པར་གཏང་ནས་འགྲོ་རྒྱུ་ཞིག་ང་ཚོས་སློབ་དེབ་བཟོ་བཞིན་ཡོད།
དམིགས་བསལ་ཆོས་དང་མ་འབྲེལ་བའི་ཡ་རབས་སྤྱོད་བཟང་གོང་སྤེལ་གཏང་རྒྱུའི་སློབ་དེབ་ཞིག་སྤྱིར་བཏང་ཤེས་ཡོན་གྱི་སློབ་དེབ་ནང་བསླབ་ཐུབ་རྒྱུ་ཞིག་ཁ་སྔོན་རྒྱ་གར་ནང་གོ་བསྡུར་དེ་འདྲ་བྱས་ཡོད། འགོ་འཛུགས་ནས་ལོ་གཅིག་གཉིས་ཕྱིན་པ་རེད། ཉེ་ཆར་ཨ་རིར་ཉམས་ཞིབ་བྱེད་མཁན་དང་། ཉམས་མྱོང་ཡོད་མཁན་གང་ཙམ་རུབ་རུབ་བྱས་ནས་གོ་བསྡུར་དེ་འདྲ་གང་ཙམ་བྱུང་། ཕལ་ཆེར་ཟླ་བ་ཁ་ཤས་ནང་གཏན་འབེབས་བྱེད་ཐུབ་ཀྱི་ཡོད། ཐོག་མ་སྔོན་འགྲོའི་སློབ་གྲྭ་ནས་རིམ་པས་ཡ་རབས་སྤྱོད་བཟང་གི་སློབ་སྦྱོང་སྤྲད་ཡོང་དུས་རྒྱབ་ལྗོངས་སུ་སེམས་ཁམས་རིག་པའི་རྣམ་གཞག་སྐོར་རྒྱས་རུ་གཏང་ནས་འགྲོ་རྒྱུ་ཡོད་པ་གཅིག་བསམ་བློའི་ནང་བང་འདི་ལྟར་སྒྲིག་བཞིན་ཡོད། དངོས་སུ་ལག་ལེན་འགོ་འཛུགས་ནས་གྲུབ་འབྲས་བལྟས་ཡོང་དུས་དོ་སྣང་བྱེད་མཁན་ཤུགས་ཆེན་པོ་ཡོད་པའི་བཟོ་འདྲ་བོ་ཞིག་འདུག འདིར་ཉིན་གྲངས་གཅིག་གཉིས་སྡོད་པའི་རིང་གོ་བསྡུར་བྱེད་རྒྱུ་བྱུང་བ་ཡིན་ན། གོ་བསྡུར་བྱེད་ན་སྙམ་བྱུང་། ཞེས་དང་། རྒྱ་ནག་ནང་ཆ་བཞག་ན། དཔལ་ནཱ་ལེནྡྲའི་ཆོས་བརྒྱུད་འཛིན་མཁན་གཅིག་གྱུར་ཆགས་ཡོད། རྒྱ་ནག་ནང་ནང་པ་ཧ་ཅང་ཕོན་ཆེན་པོ་འདུག དེང་སྐབས་རྒྱ་ནག་ནང་ནང་པའི་གྲངས་འབོར་ས་ཡ་ ༤༠༠ ཙམ་ཡོད་པ་ཤོད་ཀྱི་འདུག ནང་ཆོས་ལ་དོ་སྣང་བྱེད་མཁན་ཇེ་མང་འགྲོ་བཞིན་ཡོད་པའི་བཟོ་འདྲ་བོ་ཞིག་འདུག རྒྱ་ནག་ནང་ང་ཚོས་གང་ཡང་བྱེད་ཐུབ་ཐབས་མེད། སྔོན་ལ་ཨ་རི་གཙོ་བོར་གྱུར་པའི་རང་དབང་གི་ཡུལ་གྲུ་ཁག་ཏུ་རིམ་པས་ལས་འགུལ་སྤེལ་ཐུབ་ན། དེས་ཤུགས་རྐྱེན་རྒྱ་ནག་ནང་ཏན་ཏན་སླེབ་ཀྱི་རེད། རིམ་པས་རྒྱ་ནག་གི་སྲིད་བྱུས་ལ་འགྱུར་བ་ཏན་ཏན་འགྲོ་གི་རེད། འགྱུར་བ་མ་ཕྱིན་པའི་ཐབས་མེད། རྒྱ་ནག་རང་གི་ཁེ་ཕན་ལ་བལྟ་ནས་འགྱུར་བ་འགྲོ་དགོས་རྒྱུ་རེད། རིམ་པས་རྒྱ་ནག་ནང་ཤུགས་རྐྱེན་ཐེབས་རྒྱུ་ཞིག་ཏན་ཏན་ཡོང་གི་རེད། དེའི་ཐོག་ནས་བོད་དོན་ལ་ཡང་ཕན་ཐོགས་ཡོང་གི་རེད། བར་སྐབས་ནས་ངོས་ལ་བསམ་བློ་གསར་པ་འདི་འདྲ་ཞིག་འཁོར་ཡོང་གི་ཡོད། འདི་ཁྱེད་རང་ཚོར་གཅིག་ཞུ་ན་དྲན་པ་རེད། སང་གནངས་དུས་ཚོད་འདྲ་བྱུང་བ་ཡིན་ན་གོ་བསྡུར་བྱེད་ཆོག་གི་རེད། ཅེས་དང་།
དུས་ད་ལྟ་བར་དུ་རྒྱུན་འཛིན་བྱེད་པའི་དཔལ་ནཱ་ལེནྡྲའི་ཆོས་བརྒྱུད་འཛིན་པའི་བོད་ཀྱི་ནང་ཆོས་ནི་རིག་གཞུང་གི་རྩ་བ་ཡིན་པ་དང་། དེང་སྐབས་དཔལ་ནཱ་ལེནྡྲའི་མཁས་པས་མཛད་པའི་ལེགས་བཤད་འདི་དག་དེ་སྔ་གཅེས་ནོར་བཞིན་ང་ཚོས་བདག་སྲུང་བྱེད་པ་ལྟ་བུ་མ་ཡིན་པར་འཛམ་གླིང་སྤྱི་ལ་ཕན་པ་སྒྲུབ་ཐུབ་པ་བྱ་རྒྱུ་གལ་ཆེན་པོ་ཡིན་པ། དེ་ཡང་སེམས་ཁམས་རིག་པའི་ཐད་ལ་བོད་ཀྱི་ནང་ཆོས་ཐོག་ནས་ཞབས་འདེགས་ཆེན་པོ་བསྒྲུབ་ཐུབ་རྒྱུ་ཡོད་སྐོར། དེ་བཞིན་བྱམས་བརྩེ་གོང་མཐོར་གཏོང་བར་སྨོན་ལམ་རྒྱག་པ་གཅིག་པུའི་ཕན་ཡོན་མེད་པ་དང་། བྱམས་བརྩེའི་རྒྱུ་རྐྱེན་ངོས་བཟུང་དགོས་པ། དེའི་མི་མཐུན་ཕྱོགས་ཞེ་སྡང་དང་ཁོང་ཁྲོ་སོགས་ཀྱི་གཉེན་པོ་བསྟེན་ཚུལ་ཤེས་དགོས་གལ་སོགས་ཀྱི་བཀའ་སློབ་སྩལ་གྲུབ་རྗེས་བླ་སྤྱིའི་འདུ་ཁང་ཡང་སྟེང་དགའ་ལྡན་ཕོ་བྲང་གཟིམ་ཆུང་དུ་སྐུ་ཐང་གསོ་གནང་མཛད་སོང་། སང་ཉིན་ཕྱི་ཚེས་ ༢ ནས་ ༥ བར་མགོན་པོ་གང་ཉིད་མཆོག་གིས་བསྙེན་རྫོགས་ཀྱི་སྡོམ་པ་བསྩལ་རྒྱུ་ཡིན་པ་བཅས།།
