༢༠༡༦ ཟླ་ ༦ ཚེས་ ༢༢ རེས་གཟའ་ལྷག་པ།

༄༅། །ཕྱི་ལོ་ ༢༠༡༦ ཟླ་ ༦ ཚེས་ ༢༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་ཡུ་ཊ་མངའ་སྡེའི་སོལ་ཊི་ལེཀ་ Salt Lake City གྲོང་ཁྱེར་དུ་ཡོད་པའི་ཡུ་ཊ་གཙུག་ལག་སློབ་གཉེར་ཁང་གི་ Huntsman Cancer Institute ཞེས་པའི་སྨན་ཁང་དུ་༸ཞབས་སོར་འཁོད་སྐབས་སློབ་གཉེར་ཁང་གི་ཚོགས་གཙོ་ཌེ་ཝིད་པར་ཤིང་ David Pershing ལགས་དང་སྨན་ཁང་དེའི་ངེས་སྟོན་པ་ཌོག་ཊར་མེ་རི་བྷེག་ཀར་ལེ་ Dr Mary Beckerle ལགས་རྣམ་གཉིས་ཀྱིས་ཕེབས་བསུའི་སྣེ་ལེན་ཞུས་ཡོད། སྐབས་དེར་༸གོང་ས་མཆོག་གིས་སྨན་ཁང་དེའི་སྨན་པ་དང་། སྨན་ཞབས་པ། ནད་པ་དྲག་སྐྱེད་བྱུང་བ་ཁག་གཅིག་སོགས་ལ་མཇལ་ཁ་དང་བཀའ་སློབ་སྩལ་དོན། ན་ཚ་ནི་ང་ཚོའི་མི་ཚེའི་ཆ་ཤས་ལྟ་བུ་ཆགས་ཡོད། མི་ཚོས་སྨན་ཁང་ནང་ནད་གསོ་བའི་ཆེད་ཡོང་བཞིན་ཡོད། མི་གཞན་ལ་བྱམས་སྐྱོང་བྱེད་རྒྱུ་ནི་བྱང་ཆུབ་སེམས་དཔའི་ཉམས་ལེན་ཡིན་པས་དེ་ལྟར་གནང་མཁན་ཚོར་ངོས་ཀྱིས་བསྔགས་བརྗོད་ཞུ་བཞིན་ཡོད།

སྐྲན་ནད་ནི་ནད་གཞི་ཉེན་ཚབས་ཆེ་བ་ཞིག་ཆགས་ཡོད། འོན་ཀྱང་རྣམ་པ་ཚོས་ནད་པ་ཚོར་ནད་གཞི་དེ་བཅོས་ཐབས་གནང་བཞིན་པ་དེ་ནི་ཧ་ཅང་ཡག་པོ་རེད། རྩ་བའི་ནད་གཞི་དྲག་སྐྱེད་ཡོང་བར་རེ་བ་མ་བརླག་པའི་ཐོག་ནས་གནས་ཐུབ་པ་བྱེད་རྒྱུ་དེ་ཡིན། འོན་ཀྱང་དེའི་ཐོག་སྨན་པའི་ཀུན་སློང་གིས་ཁྱད་པར་བཟོ་བཞིན་ཡོད། དུས་རྒྱུན་བོད་པ་ཚོས། སྨན་པ་མཁས་ཀྱང་ཀུན་སློང་བཟང་པོ་མེད་ན། ཁོས་སྤྲད་པའི་སྨན་དེས་དེ་ཙམ་ཕན་ཐོགས་མེད། གལ་ཏེ་སྨན་པ་དེ་ཙམ་མི་མཁས་ཀྱང་ཀུན་སློང་བཟང་པོ་ཡོད་ན། ཁོའི་སྨན་དེ་ཕན་ཐོགས་ཧ་ཅང་ཡོད། ཅེས་བརྗོད་སྲོལ་ཡོད། གལ་ཏེ་སྨན་པ་དང་སྨན་ཞབས་པ་ཚོས་ནད་པར་སྨན་བཅོས་བྱེད་སྐབས་ངོ་ནག་པོ་དང་བྱམས་བརྩེ་འདུ་ཤེས་མེད་པའི་རྣམ་འགྱུར་མཐོང་དུས་ནད་པར་ལྷོད་ལྷོད་ཡོང་རྒྱུའི་ཚབ་ལ་དངངས་སྐྲག་སྐྱེས་ཀྱི་ཡོད་པ་ངོས་རང་ལ་དངོས་སུ་ཉམས་མྱོང་བྱུང་། ཞེས་བཀའ་སློབ་སྩལ་རྗེས་མགོན་པོ་གང་ཉིད་མཆོག་གིས་སྨན་ཁང་དེར་སྨན་བཅོས་བྱེད་བཞིན་པའི་ནད་པ་ཁག་གཅིག་ལ་མཇལ་ཁ་དང་སེམས་གསོ་མཛད་ཡོད།

དེ་རྗེས་༸གོང་ས་མཆོག་བཞུགས་གནས་མགྲོན་ཁང་དུ་ཡུ་ཊ་མངའ་སྡེའི་སྲིད་སྐྱོང་གྷེ་རི་ཧར་བྷར་ཊི་ Gary Herbert མཆོག་སྟེང་ཞལ་རྣམ་གཉིས་ཀྱིས་གཙོས་སྐུ་མགྲོན་ ༢༥༠ ཙམ་དང་ལྷན་ཉིན་གུང་ལྗགས་སྨིན་ལྷན་བཞེས་མཛད་གྲུབ་མཚམས། མངའ་སྡེའི་སྲིད་སྐྱོང་མཆོག་གིས་༸གོང་ས་མཆོག་ནི་འཛམ་གླིང་ནང་འཚོ་བཞིན་བཞུགས་པའི་མཐུན་འབྲེལ་གྱི་དཔེ་མཚོན་ཡིན་ཞེས་ངོ་སྤྲོད་མཛད་པ་དང་ཆབས་ཅིག མགོན་པོ་གང་ཉིད་མཆོག་ལ་བཀའ་སློབ་སྩལ་གནང་ཡོང་བའི་གསོལ་འདེབས་ཞུས་རྗེས་བཀའ་སློབ་སྩལ་དོན། ངོས་ལ་སྐད་ཆ་ཤོད་རྒྱུའི་གོ་སྐབས་ནམ་བྱུང་ལ་ངོས་ནས་དེར་འདུས་མང་ཚོགས་ལ་སྤུན་ཟླ་ཕོ་མོ་ཞེས་འབོད་ཀྱི་ཡོད། ང་ཚོས་འཛམ་གླིང་འདིའི་སྟེང་གི་མི་ཐེར་འབུམ་བདུན་ཚང་མ་སོ་སོའི་སྤུན་མཆེད་ཡིན་བསམས་ན། དཀའ་ངལ་མང་པོ་ཞིག་རང་བཞིན་གྱིས་སེལ་འགྲོ་གི་རེད། གཞི་རྩའི་ཆ་ནས་ང་ཚོ་ཚང་མ་འགྲོ་བ་མིའི་རིགས་གཅིག་མཚུངས་ཆགས་ཡོད། ང་ཚོ་ཚང་མས་མི་ཚེ་བདེ་སྐྱིད་ལྡན་པ་ཞིག་སྐྱེལ་འདོད་ཡོད་པ་བཞིན། དེ་ལྟར་འདོད་རྒྱུའི་ཐོབ་ཐང་ཡང་གཅིག་མཚུངས་སུ་ཡོད། ཅེས་དང་། དེ་བཞིན་༸གོང་ས་མཆོག་གིས་མགོན་པོ་གང་ཉིད་མཆོག་གི་༧སྐུའི་རླབས་ཆེན་གྱི་མཛད་འགན་གཙོ་བོ་གསུམ་གྱི་ཐོག་བཀའ་སློབ་གཟབ་རྒྱས་སྩལ་ཡོད།

ཡུ་ཊ་མངའ་སྡེའི་སྲིད་སྐྱོང་ Gary Herbert མཆོག་དང་ལྷན།

ཕྱེད་ཡོལ་ཡུ་ཊ་གཙུག་ལག་སློབ་གཉེར་ཁང་གི་ཚོགས་གཙོ་ཌེ་ཝིད་པར་ཤིང་ལགས་ཀྱིས་མགོན་པོ་གང་ཉིད་མཆོག་ནས་འཛམ་གླིང་འདི་བཟང་ཕྱོགས་སུ་འགྱུར་རྒྱུའི་རླབས་ཆེན་གྱི་མཛད་རྗེས་ལ་ཆེ་བསྟོད་མཚོན་ཆེད་President’s Medal ཞེས་པ་འབུལ་ལམ་ཞུས་ཡོད། སྐསབ་དེར་༸གོང་ས་མཆོག་གིས་ཡུ་ཊ་གཙུག་ལག་སློབ་གཉེར་ཁང་གི་དགེ་ལས་སློབ་ཕྲུག་དང་མང་ཚོགས་བཅས་ཁྱོན་མི་གྲངས་ ༡༢༠༠༠ ཙམ་ལ་བཀའ་སློབ་སྩལ་དོན། ང་ཚོ་བོད་རིགས་ཕལ་ཆེར་འདས་པའི་ལོ་ཧ་ལམ་སྟོང་ཕྲག་གཉིས་ཙམ་བཤད་ཆོག་གི་རེད། ད་ལྟའི་དུས་ཚོད་འདི་མི་རིགས་རིག་གཞུང་དང་བཅས་པ་ཆག་འཇིག་གི་མཚམས་སུ་སླེབ་པའི་དུས་ཚོད་ཞིག་ཆགས་པ་རེད། ང་ཚོའི་མི་རབས་འདི་དངོས་གནས་དཀའ་ངལ་ཆེན་པོ་དང་གཉན་འཕྲང་ཅན་གྱི་དུས་ཚོད་ལ་སྐྱེས་པའི་མི་རབས་ཤིག་རེད། ཕྱོགས་གཅིག་ནས་བསལ་བློ་བཏང་ན་ང་ཚོས་དངོས་གནས་མི་རིགས་ཀྱི་སྙིང་སྟོབས་དང་རྣམ་དཔྱོད་སྟོན་རྒྱུའི་གོ་སྐབས་བྱུང་བ་རེད། དེ་སྔ་བོད་ལ་རྩ་བའི་སྙིང་སྟོབས་དང་རྣམ་དཔྱོད་ཡོད་རེད་དེ་ཆུང་ཙག་ལ་མགོ་འཁོར་ནས་ང་རང་ཚོ་ནང་ཁུལ་གཅིག་གིས་གཅིག་ལ་ནང་རྡུང་ཏོག་ཙམ་བཏང་ནས་དེ་ལྟར་སྡོད་བཞིན་ཡོད།

དེ་བཞིན་ཆོས་ལུགས་ཐོག་ནས་ཀྱང་གཅིག་གིས་གཅིག་ལ་ནང་རྡུང་ཕྲན་བུ་གཏོང་བཞིན་ཡོད། བླ་མ་སྐྱེས་བུ་དམ་པ་དེ་འདྲས་གཅིག་གིས་གཅིག་ལ་མཐུ་བསྐྱོན་རེས་བྱས་ཏེ་ཆེ་ས་ནས་བསམ་བློ་དེ་ཙམ་མེད་པར་ཆུང་ས་ནས་སོ་སོའི་དགོན་པ་དང་བླ་བྲང་དེ་འདྲའི་ཐོག་ནས་མཚོན་ཆ་བེད་སྤྱོད་བྱེད་ཀྱི་མེད་ནའང་དེ་ལྟར་བྱུང་བ་རེད། ང་ཚོ་གཉན་འཕྲང་གི་དུས་ཚོད་འདི་བོད་རྒྱ་ཆེའི་མི་མང་བོད་མི་ས་ཡ་དྲུག་འདི་ཕལ་ཆེར་གཉིད་ལས་བླངས་པའི་བཟོ་འདྲ་བོ་ཆགས་སོང་། མཁྱེན་སོང་ངམ། འཛམ་གླིང་འགྱུར་བ་ཧ་ཅང་འགྲོ་བཞིན་པ་འདི་ངོས་ཀྱིས་སྐབས་རེ་བསྟན་བཤིག་བླངས་ནས་བཤད་ཀྱི་ཡོད། དེ་སྔ་བོད་ལ་ང་ཚོ་བོད་པ་ཚོས་མགོ་བཏུམ་ནས་གཡས་གཡོན་དུ་གང་ཡོང་གི་ཡོད་མེད་དོ་སྣང་ཁྱོན་ནས་མེད་པར་སྡོད་ཀྱི་ཡོད། ད་ཆ་ང་ཚོ་གནས་ཚུལ་ཧ་ཅང་ཐབས་སྡུག་འོག་འཛམ་གླིང་ཕྱི་ལ་ཐོན་པ་རེད། དེར་བརྟེན་གནས་ཚུལ་མང་པོ་ཞིག་མཐོང་གི་ཡོད། འདིས་ང་ཚོའི་རྣམ་དཔྱོད་དང་སྙིང་སྟོབས་སྟོན་རྒྱུ་དང་། སྙིང་སྟོབས་འདི་དངོས་སུ་ལག་ལེན་འགེལ་རྒྱུའི་དུས་ཚོད་ལ་སླེབ་ཡོད་པར་བརྟེན། ང་ཚོའི་མི་རབས་འདི་ཕྱོགས་གཅིག་ནས་བསམ་བློ་གཏང་ན། དངོས་གནས་ལས་ངན་བསགས་པའི་མི་རབས་བཟོ་འདྲ་བོ་རེད་དེ། ཕྱོགས་གཞན་ཞིག་ནས་བསམ་བློ་གཏང་ན།

བོད་མི་རིགས་ཀྱི་ཆོས་དང་རིག་གཞུང་དངོས་གནས་དྲང་གནས་སྲུང་སྐྱོབ་བྱེད་རྒྱུ་དང་། སྲུང་སྐྱོབ་ཙམ་མ་ཟད་སླར་གསོ་དང་། སླར་གསོ་དེའང་བོད་པ་གཅིག་པུར་མ་ཡིན་པ། འཛམ་གླིང་ཡང་སྟེང་འདིའི་སྒང་གང་ཙམ་ཕན་ཐོགས་བྱེད་ཐུབ་རྒྱུའི་དུས་ཚོད་སྟེང་སླེབས་ཡོད། ངོས་ལ་ཆ་བཞག་ན་ངོས་རང་བོད་པ་ཞིག་རེད། འདས་པའི་ཉམས་མྱོང་དེ་ལྟར་གསོག་ཡོང་དུས་ད་ཆ་ངོས་རང་དངོས་གནས་དྲང་གནས་གདེང་ཚོད་ལྟ་བུ་སྐྱེ་གི་འདུག བོད་པའི་ཤེས་ཡོན་ནང་སེམས་ཁམས་རིག་པ་གཙོ་བོར་གྱུར་པའི་བྱམས་པ་དང་བརྩེ་བ་ཟེར་རྒྱུ་དེ་ཚོ་ཇི་ལྟར་སློབ་སྦྱོང་སྤྲོད་དགོས་ཀྱི་ཡོད་མེད་དང་། ལག་ལེན་ཇི་ལྟར་འགེལ་དགོས་མིན། འགལ་རྐྱེན་ཞེ་སྡང་ལ་གཉེན་པོ་གང་འདྲ་སྟོན་དགོས་མིན་དེ་ཚོའི་གྲས་ང་ཚོའི་གཞུང་ནང་ཡོད་པ་དེ་དག་ཆོས་ཀྱི་གནས་ཚུལ་དུ་མ་བཞག་པར་མཛམ་གླིང་སྤྱི་ལ་མཁོ་བ་ཞིག་རེད་འདུག་ལ་མཁོ་བ་འདི་ངོ་ཤེས་པའི་ཐོག་ནས་འཛམ་གླིང་སྤྱི་ལ་ཞབས་འདེགས་བསྒྲུབ་ཐུབ་པའི་བསམ་བློ་གཏང་རྒྱུའི་དུས་ཚོད་སླེབས་འདུག ང་ཚོ་བོད་པ་ཚོས་ད་བར་ཧུར་ཐག་བྱས་པ་རེད། ད་དུང་ཡིན་ནའང་ཚང་མས་ཧུར་ཐག་བྱོས། སྙིང་སྟོབས་སྐྱེ། གཞིས་ལུས་རྒྱ་ཆེའི་མི་མང་དེ་དག་དཀའ་ངལ་དེ་འདྲའི་འོག་དངོས་འབྲེལ་ལྷག་བསམ་སྙིང་སྟོབས་འགྱུར་བ་མེད་པར་སྡོད་བཞིན་ཡོད། མི་རབས་གསུམ་པ་བཞི་པར་སླེབ་བཞིན་ཡོད།

ལྔ་བཅུ་ང་གྲངས་ནས་དུས་ད་ལྟ་བར་མི་རབས་ཁ་ཤས་ཕྱིན་ཟིན་པ་རེད། དངོས་གནས་དྲང་གནས་བོད་མི་རིགས་ཀྱི་སེམས་ཤུགས་འདི་འགྱུར་བ་མེད་པར་སྡོད་བཞིན་འདུག བོད་མི་རིགས་ཀྱི་སྐད་ཡིག་དང་། རིག་གཞུང་། སངས་རྒྱས་པའི་ཆོས་ཞེས་སྨོན་ལམ་རྒྱག་པ་དང་། འདོན་པ་འདོན་རྒྱུ་ཙམ་མ་རེད། སངས་རྒྱས་པའི་གཞུང་ནས་གསུངས་པའི་ལྟ་གྲུབ་འདི་ཕལ་ཆེར་ང་ཚོ་བོད་པས་བླ་སྲོག་རེད། ཅེས་བརྗོད་ཐུབ་རྒྱུ་རེད་འདུག བོད་པར་རང་བཞིན་གྱི་རྣམ་དཔྱོད་ཡོད་པ་འདི་རྒྱ་གར་མཁས་པའི་གཞུང་དེ་དག་རིགས་པའི་ལམ་ལ་བརྟེན་ནས་ཉམས་ཞིབ་བྱེད་རྒྱུ་དང་། རིགས་པའི་ལམ་ལ་བརྟེན་ནས་རྩད་གཅོད་བྱེད་རྒྱུ་དེ་འདྲ་ཡོད་པ་ཞིག་འདུག ང་ཚོ་ཚང་མ་བོད་པ་ཞིག་ཡིན་པ་དང་། ང་ཚོ་སྔོན་གྱི་མེས་པོ་ཚོས་དཀའ་ལས་བསྐྱོན་ནས་ང་ཚོར་ཆོས་དང་རིག་གཞུང་། ལྟ་གྲུབ། ཆོས་དེ་ལྟ་གྲུབ་གཞི་མར་བཞག་པའི་ཆོས་ཤིག་ཆགས་ཡོད། དེ་འདྲའི་རིག་གཞུང་དང་ལྟ་གྲུབ་ཟེར་ན་མི་འདུག གཏིང་ཟབ་ཡོད་པ་འདི་ང་ཚོས་བདག་པོ་བརྒྱག་རྒྱུ་ཧ་ཅང་གལ་ཆེན་པོ་རེད། སོ་སོའི་མི་རིགས་ཀྱི་སྤོབས་པ་སླེབ་རྒྱུ་ཏན་ཏན་འདིའི་ཐོག་ནས་ཡོང་གི་འདུག འཛམ་གླིང་སྤྱི་ལ་ཡིན་ནའང་ཕན་ཐོགས་བྱེད་ཐུབ་རྒྱུའི་གོ་སྐབས་ཡོད། དེའི་རྩ་བ་ལྟ་བུ་བོད་ཡིག་རེད་འདུག ཁྱེད་རང་ཚོ་གཞོན་སྐྱེས་ཚོ་བོད་ཡིག་ཐོག་དོ་སྣང་བྱོས། ཆོས་ལ་དད་པ་ཡོད་ན་རེད་མེད་ན་རེད། དཔལ་ནཱ་ལེནྡྲའི་མཁས་པ་ཚོས་གསུངས་པའི་ལྟ་གྲུབ་དང་ཚད་མ་རིག་པ་འདི་དོ་སྣང་བྱེད་དགོས་པ་དང་ཤེས་དགོས་པ་ཞིག་རེད། མཁྱེན་སོང་ངམ། ངོས་རང་ལོ་ ༨༡ སླེབ་པའི་སྤོ་ཞིག་རེད། ངོས་རང་སློབ་ཕྲུག་ཞིག་ཡིན་བསམས་པའི་ཐོག་ནས་དུས་ཚོད་ཡོད་ན་ག་དུས་ཡིན་ནའང་གཞུང་དེ་ཚོའི་གྲས་ལྟ་ནས་སློབ་སྦྱོང་བྱེད་བཞིན་ཡོད། དེར་བརྟེན་ཁྱེད་རང་ཚོས་བློ་སྐྱེད་ཡོང་རྒྱུ་དང་བློ་ཡར་རྒྱས་འགྲོ་རྒྱུ་དེ་འདྲའི་ཐོག་དོ་སྣང་བྱེད་ན་ཡག་པོ་རེད། བཀའ་འགྱུར་བསྟན་འགྱུར་པོ་ཏི་སུམ་བརྒྱ་ཙམ་ཡོད་པ་དེ་དག་མཆོད་གཤོམ་ནང་རྩ་ཆེན་པོ་བྱས་ནས་སྒྲིག་རྒྱུ་མ་རེད། སློབ་སྦྱོང་བྱེད་རྒྱུའི་ཀློག་དེབ་རེད། དེ་དག་ཆ་ཚང་བསླབ་ཐུབ་རྒྱུ་ཡོང་གི་མ་རེད། འོན་ཀྱང་དེའི་ནང་ནས་གཞུང་བྱེ་བྲག་པ་དེ་འདྲར་དོ་སྣང་བྱོས། གོ་སོང་ངམ། དེ་ལྟར་བྱོས། ངོས་རང་དེ་རིང་ཡོང་སྟེ་ཁྱེད་རང་ཚོ་ཐུག་རྒྱུ་བྱུང་བར་ཧ་ཅང་དགའ་པོ་བྱུང་། ས་ཆ་འདིར་ཧ་ཅང་སྐྱིད་པོ་འདུག ཨ་རིར་ཡོད་པའི་ཁྱེད་རང་ཚོ་ Salt Lake ས་ཆ་བདམས་པ་ནོར་མི་འདུག ས་ཆ་ཧ་ཅང་ཡག་པོ་བྱུང་འདུག དེ་ནས་གཟབ་གཟབ་དང་ཧུར་ཐག་བྱོས་ཨང་། ཞེས་བཀའ་སློབ་སྩལ་ཡོད།།