༢༠༡༦ ཟླ་ ༦ ཚེས་ ༢༡ རེས་གཟའ་མིག་དམར།

ཁེ་ལི་ཕོར་ནི་ཡ་མངའ་སྡེའི་སྲིད་སྐྱོང་མཆོག་དང་ལྷན།

༄༅། །ཕྱི་ལོ་ ༢༠༡༦ ཟླ་ ༦ ཚེས་ ༢༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁེ་ལི་ཕོར་ནི་ཡ་མངའ་སྡེའི་རྒྱལ་ས་སཀ་ར་མེན་ཏོར་ཡོད་པའི་མངའ་སྡེའི་གཞུང་འབྲེལ་སྣེ་ལེན་ཁང་དུ་༸ཞབས་སོར་འཁོད་སྐབས། མངའ་སྡེའི་སྲིད་སྐྱོང་ཇེ་རི་བྷོ་རོན་Jerry Brown སྟེང་ཞལ་གཉིས་ཀྱིས་ཕེབས་བསུའི་སྣེ་ལེན་ཞུས་འདུག དེ་ནས་ཉིན་གུང་ལྗགས་སྨིན་ལྷན་བཞེས་སྐབས་ཁེ་ལི་ཕོར་ནི་ཡ་མངའ་སྡེའི་གྲོས་ཚོགས་ཀྱི་ཚོགས་གཙོ་ Anthony Rendon མཆོག་དང་མངའ་སྡེ་གྲོས་ཚོགས་གོང་མའི་འཐུས་མི་ཁག་གཅིག་ལྷན་ཞུགས་གནང་ཡོད།

དེ་ནས་མགོན་པོ་གང་ཉིད་མཆོག་མངའ་སྡེའི་གྲོས་ཚོགས་སུ་ཆིབས་སྒྱུར་སྐབས་ས་གནས་བོད་མི་རྣམས་ཀྱིས་ལུས་ལ་གཟབ་མཆོར་ལེགས་པར་སྤྲས་ཏེ་ལག་ཏུ་བོད་ཀྱི་རྒྱལ་དར་སོགས་ཐོགས་ཏེ་ཕེབས་བསུ་གཟབ་རྒྱས་ཞུས་ཡོད། དེ་རྗེས་མངའ་སྡེའི་གྲོས་ཚོགས་ནང་གྲོས་ཚོགས་ཀྱི་ཚོགས་གཙོ་དབུ་བཞུགས་ཐོག་གྲོས་ཚོགས་གོང་འོག་གཉིས་ཀྱི་གྲོས་ཚོགས་འཐུས་མི་རྣམས་ཚང་འཛོམས་ཀྱིས་ཐོག་༸གོང་ས་མཆོག་གིས་མགོན་པོ་གང་ཉིད་མཆོག་འདྲ་ཆགས་པོ་དེ་འདྲ་བྱ་རྒྱུར་དགའ་པོ་མེད་སྐོར་འགྲེལ་བརྗོད་མཛད་པ་དང་སྦྲགས་བཀའ་སློབ་སྩལ་དོན། བཀུར་འོས་ཚོགས་གཙོ་རྣམ་པ་དང་

ཉིན་གུང་ལྗགས་སྨིན་ལྷན་བཞེས་སྐབས།

སྤུན་ཟླ་ཕོ་མོ་ཚོ། གཞི་རྩའི་ང་ཚོ་ཚང་མ་འགྲོ་བ་མིའི་རིགས་ཀྱི་ཆ་ཤས་ཤིག་ཡིན་པ་དང་། ང་ཚོ་འགྲོ་བ་མིའི་རིགས་ཚང་མ་ཁྱིམ་ཚང་གཅིག་ཆགས་ཡོད། ང་ཚོ་ཚང་མ་ལུས་སེམས་དང་། སེམས་ཚོར་གང་གི་ཆ་ནས་འགྲོ་བ་མིའི་རིགས་གཅིག་མཚུངས་ཡིན། ང་ཚོ་ཚང་མ་སྤྱི་ཚོགས་ལ་བརྟེན་ནས་འཚོ་དགོས་པའི་སེམས་ཅན་ཞིག་ཡིན་སྟབས། འགྲོ་བ་མི་རིགས་གཅིག་འགྱུར་གྱི་འདུ་ཤེས་འཛིན་པའི་ཐོག་ནས་གོ་ལ་སྤྱིའི་བདེ་དོན་ཆེད་བསམ་བློ་གཏང་རྒྱུ་ཧ་ཅང་གལ་ཆེན་པོ་ཡིན། སོ་སོ་རང་ཉིད་ལ་གཅེས་སྐྱོང་བྱེད་རྒྱུ་ནི་རང་བཞིན་ལྷན་སྐྱེས་སུ་ཡོད། འོན་ཀྱང་ང་ཚོ་ཚང་མ་སྤྱི་ཚོགས་ལ་བརྟེན་ནས་འཚོ་དགོས་པར་བརྟེན། སོ་སོ་རང་ཉིད་ལ་གཅེས་སྐྱོང་བྱེད་རྒྱུའི་ཐབས་ལམ་བཟང་ཤོས་ནི་ང་ཚོ་ཕན་ཚུན་གཅིག་གིས་གཅིག་ལ་གཅེས་སྐྱོང་བྱེད་དགོས།

ཁེ་ལི་ཕོར་ནི་ཡ་མངའ་སྡེའི་གྲོས་ཚོགས་ནང་།

ང་ཚོའི་དབར་རྒྱལ་ཁབ་དང་མི་རིགས། ཆོས་ལུགས་སོགས་མི་འདྲ་བའི་ཁྱད་པར་ཕྲན་བུ་ཡོད་པ་དེ་དག་རིམ་པ་གཉིས་པའི་གནས་སྟངས་ཤིག་ཡིན། ང་ཚོ་ཐོག་མར་མ་ནས་སྐྱེས་སྟངས་དང་མཐར་འཆི་སྟངས་སོགས་གཅིག་མཚུངས་ཆགས་ཡོད། ང་ཚོ་སྐྱེས་པའི་ཉིན་ནས་མའི་བྱམས་བརྩེར་བརྟེན་ཏེ་འཚར་ལོངས་བྱེད་ཀྱི་ཡོད། ཚན་རིག་པ་ཚོས་གཞི་རྩའི་འགྲོ་བ་མིའི་ལྷན་སྐྱེས་རང་བཞིན་དེ་བྱམས་བརྩེ་ལྡན་པ་ཡིན་པ་བརྟག་དཔྱད་ཀྱི་ལམ་ནས་ར་འཕྲོད་བྱུང་ཡོད། གལ་ཏེ་མིའི་ལྷན་སྐྱེས་རང་བཞིན་དེ་ཁོང་ཁྲོ་སོགས་ཉོན་མོངས་པའི་གཞན་དབང་ཡིན་ན་རེ་བ་རྒྱག་ས་མེད། ང་ཚོར་འཛམ་གླིང་འདི་ཞི་བདེ་ལྡན་པ་ཞིག་བསྐྲུན་ཐུབ་རྒྱུའི་རེ་བ་ཡོད་པར་བརྟེན་ང་ཚོས་དེར་འབད་བརྩོན་བྱེད་བཞིན་ཡོད། མི་ཚེ་བདེ་སྐྱིད་ལྡན་པ་ཞིག་འབྱུང་བར་ནང་སེམས་ཀྱི་ཞི་བདེ་དགོས་རྒྱུ་གལ་ཆེན་པོ་ཡིན། ཕྱི་དངོས་པོའི་མཐུན་རྐྱེན་གཅིག་པོས་མི་ཚེ་བདེ་སྐྱིད་ལྡན་པ་ཞིག་སྐྲུན་ཐུབ་པའི་ངེས་པ་མེད། གལ་ཏེ་བྱམས་བརྩེས་ཕྱུག་པའི་དབུལ་ཕོངས་ཤིག་ཡིན་ནའང་མི་ཚེ་བདེ་སྐྱིད་ལྡན་པ་ཞིག་སྐྱེལ་ཐུབ། བདེ་སྐྱིད་ཀྱི་རྩ་བ་ནི་བྱམས་བརྩེ་ཡིན་སྟབས་ང་ཚོ་ཚང་མས་ནང་སེམས་ཀྱི་རིན་ཐང་གོང་སྤེལ་གཏང་རྒྱུར་དོ་སྣང་མང་ཙམ་སྤྲད་དགོས། འཛམ་གླིང་འདིའི་སྟེང་གི་ཆོས་ལུགས་གཙོ་ཆེ་བ་ཚང་མར་འགྲོ་བ་མིའི་རིགས་རྣམས་བྱམས་བརྩེ་ལྡན་པ་ཞིག་ཏུ་བསྐྲུན་རྒྱུའི་ནུས་པ་ཡོད། ང་ཚོ་སྤྱི་ཚོགས་ལ་རྟེན་དགོས་པའི་སེམས་ཅན་ཞིག་ཡིན་སྟབས། གཞན་ཕན་གྱི་ལྟ་བ་དེ་རང་བཞིན་ལྷན་སྐྱེས་སུ་ཡོད། ཅེས་དང་། དེ་བཞིན་མགོན་པོ་གང་ཉིད་མཆོག་གིས་ཆོས་ལུགས་མཐུན་སྒྲིལ་སོགས་ཀྱི་སྐོར་བཀའ་སློབ་སྩལ་ཡོད། དེ་རྗེས་མངའ་སྡེའི་གྲོས་ཚོགས་ཀྱི་འཐུས་མི་རྣམས་དང་སྐུ་པར་ལྷ་སྒྲོན་མཛད། དེ་ནས་༸གོང་ས་མཆོག་ཨ་རིའི་Salt lake city གྲོང་ཁྱེར་དུ་༸ཞབས་སོར་འཁོད་སྐབས་བོད་རིགས་རྣམས་ཀྱིས་གྲོ་སོ་ཕྱེ་མར་འདེགས་འབུལ་ཞུས་ཏེ་ཕེབས་བསུ་གཟབ་རྒྱས་ཞུས་ཡོད་པ་བཅས།།