༢༠༡༠ ཕྱི་ཟླ་ ༦ ཚེས་ ༡ རེས་གཟའ་མིག་དམར།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནང་ཆོས་གོ་སྒྲིག་ཚོགས་ཆུང་གི་གཙོ་འཛིན་སྤྱི་འཐུས་ཟླ་བ་ཚེ་རིང་ལགས་ནས་བོད་པའི་གཞོན་སྐྱེས་རྣམས་ལ་ནང་ཆོས་ངོ་སྤྲོད་སྩལ་རྒྱུའི་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོའི་སྨིན་སྩལ་ཐོབ་སྟེ་ཕྱི་ལོ་ ༢༠༡༠ ཟླ་ ༦ ཚེས་ ༡ ནས་ ༢ བར་ཉིན་གྲངས་གཉིས་རིང་གི་ནང་ཆོས་ངོ་སྤྲོད་མཛད་རྒྱུ་ལྟར་དེ་ཉིན་ཕྱི་ཟླ་ ༦ བཞིན་ཚེས་ ༡ ཉིན་རྡ་སྟེང་བོད་ཁྱིམ་ཚོགས་ཁང་དུ་དབུ་འཛུགས་མཛད་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ པའི་ཐོག་༸གོང་ས་མཆོག་བོད་ཁྱིམ་ཚོགས་ཁང་དུ་ཆིབས་སྒྱུར་སྐྱོང་སྐབས་སློབ་ཕྲུག་ཁག་གཅིག་ནས་གཞས་སྣའི་མཆོད་སྤྲིན་ལམ་ནས་ཕེབས་བསུ་གཟབ་རྒྱས་ཞུས་ཏེ་ཚོགས་ཁང་ནང་གདན་ཞུས་ཀྱིས་༸ཞབས་སོར་འཁོད་མཚམས་བོད་ཁྱིམ་སློབ་གྲྭའི་དགེ་རྒན་བློ་བཟང་དོན་ལྡན་ལགས་ནས། ངས་ཐོག་མར་༸གོང་ས་༸སྐྱབས་མགོན་ཆེན་པོ་མཆོག་འདི་གར་ཆིབས་སྒྱུར་བསྐྱངས་པར་བཀའ་དྲིན་བླ་མེད་དུ་ཆེ་ཞུ་རྒྱུ་དང་ཆབས་ཅིག་བོད་ཁྱིམ་དུ་གསར་འཛུགས་གནང་བའི་བཀྲ་ཤིས་བདེ་ལེགས་ཀྱི་རླུང་འཕྲིན་ཁང་འདི་༸གོང་ས་མཆོག་གི་དབུ་འབྱེད་མ་བསྐྱང་གོང་འདིའི་དགོས་དམིགས་རྣམས་མགོན་པོ་གང་ཉིད་མཆོག་ལ་སྙན་སྒྲོན་ཞུ་རྒྱུ་ཡིན།
དེ་ཡང་ཐོག་མར་བོད་ཁྱིམ་གྱི་མཛད་གཙོ་རྣམ་པའི་ཐུགས་དགོངས་ལ་བོད་ཁྱིམ་ནང་རླུང་འཕྲིན་ཁང་ཞིག་བཙུགས་པའི་ཐོག་བོད་ཕྲུག་ཚོར་རང་མི་རིགས་ཀྱི་སྐད་ཡིག་དང་། ནང་ཆོས། རིག་གཞུང་དང་འབྲེལ་བའི་ལེ་ཚན། དེ་བཞིན་༸གོང་ས་མཆོག་གི་བཀའ་སློབ་དང་གསུང་འཕྲིན། བོད་མིའི་ཡ་རབས་བཟང་སྤྱོད་གཙོ་བོར་གྱུར་བའི་ཕྱི་ནང་གི་ཤེས་བྱའི་ལེན་ཚན་མི་ཉུང་བ་ཞིག་ཐད་ཀར་རྒྱང་སྲིང་ཞུ་ཐུབ་ན་དགེ་མཚན་ཆེ་བ་དང་། ལྷག་པར་དོན་གཉེར་ཅན་གྱི་སློབ་ཕྲུག་རྣམས་ལ་བཀོལ་སྤྱོད་བྱེད་རྒྱུའི་གོ་སྐབས་ཕུལ་ཏེ་ཕྱི་འབྱུང་སློབ་མ་དེ་དག་གི་མི་ཚེའི་ནང་ཕན་ཐོགས་ཡོང་རྒྱུའི་རེ་བ། དེ་བཞིན་རྡ་ས་དང་དེའི་ཉེ་འཁོར་དུ་གནས་སྡོད་བྱེད་བཞིན་པའི་བོད་མི་སྤྱི་དང་། རྒྱ་གར་གྱི་ཡུལ་མི་ཚོར་ཁོར་ཡུག་དང་འཕྲོད་བསྟེན་སོགས་སྤྱི་ཚོགས་སློབ་གསོ་དང་འབྲེལ་བའི་ཤེས་ཡོན་གྱི་ལེ་ཚན་གཉེར་སྐྱོང་བྱེད་རྒྱུ་དང་། ས་གནས་ཀྱི་གནས་ཚུལ་ཕྱོགས་བསྡུས་ཀྱིས་རྒྱང་སྲིང་ཐུབ་པ་སོགས་ཀྱི་རེ་བ་བཅངས་ཏེ། རྒྱ་གར་དབུས་གཞུང་གི་འབྲེལ་ཡོད་ལས་ཁུངས་ལ་བཀའ་འཁྲོལ་ཞུས་པ་ལྟར་འབྲེལ་ཡོད་ལས་ཁུངས་ནས་རང་རེའི་ཐོག་མའི་འཆར་གཞི་གཞི་བཟུང་རླུང་འཕྲིན་ཁང་ཞིག་ཟུར་འཛུགས་ཐུབ་ཐབས་མེད་ཀྱང་། སྤྱི་ཚོགས་རླུང་འཕྲིན་ཁང་ཞིག་བཙུགས་པའི་ཐོག་ལེ་ཚན་གཉེར་སྐྱོང་བྱེད་ཐུབ་པ་སོགས་ཀྱི་བཀའ་འཁྲོལ་བྱུང་སྟེ་ན་ནིང་ལོ་མཇུག་ཙམ་ནས་ (FM 90.4) བརྒྱུད་དེ་ད་བར་བོད་སྐད་དང་དབྱིན་སྐད།
དེ་བཞིན་རྒྱ་གར་གྱི་སྐད་ཡིག་བཅས་ཀྱི་ལམ་ནས་ཚོད་ལྟའི་རྒྱང་སྲིང་བྱེད་བཞིན་ཡོད་ཅེས་སོགས་ཀྱི་སྙན་སྒྲོན་ཞུས་གྲུབ་མཚམས་༸གོང་ས་༸སྐྱབས་མགོན་ཆེན་པོ་མཆོག་གིས་བཀྲ་ཤིས་བདེ་ལེགས་ཀྱི་རླུང་འཕྲིན་ཁང་དབུ་འབྱེད་བསྐྱངས་གྲུབ་རྗེས་མཐོ་སློབ་ཁག ༥༤ དང་། ས་གནས་ཁག ༣༣། སློབ་གྲྭ་ཁག ༡༦། དེ་བཞིན་རྒྱལ་ཁབ་ཁག ༤ བཅས་ནས་ཆེད་བཅར་ཞུས་པའི་ཁྱོན་མི་གྲངས་ ༣༠༠༠ བརྒལ་བའི་དབུས་སུ་ནང་ཆོས་མཐུན་ཚོགས་ཀྱི་རྒན་རྒོན་ཁག་གཅིག་སོགས་ནས་མགོན་པོ་གང་ཉིད་མཆོག་ལ་རིགས་ལམ་གྱི་དགག་བཞག་སྤོང་གསུམ་ལམ་ནས་རྟགས་གསལ་རྣམས་སྤྱན་བསྟར་ཞུས་ཡོད། དེ་ནས་སྐུ་ཡིག་དྲུང་ཆེ་བྲེ་སྲང་ཚེ་རིང་མཆོག་གིས་རྟགས་གསལ་གཏོང་མཁན་རྣམས་ལ་མཇལ་དར་གཡོགས་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་ཟབ་གསལ་གོ་བདེའི་ནང་ཆོས་ངོ་སྤྲོད་ཀྱི་བཀའ་སློབ་སྩལ་དོན། ཁྱེད་རང་ཚོ་བགྲོ་གླེང་བྱེད་མཁན་རྣམས་ལ་བཀྲ་ཤིས་བདེ་ལེགས་ཟེར་གྱི་ཡིན། ཁྱེད་རང་ཚོར་དམིགས་བསལ་འཚམས་འདྲི་ཡོད། ཧ་ཅང་ཡག་པོ་བྱུང་འདུག ང་ཚོ་རྒྱ་གར་དུ་བསླེེབས་ནས་རིམ་པས་དགོན་པ་དང་། ལྷག་པར་དུ་བཙུན་མའི་དགོན་པ་ཚོ་དང་དེ་སྔ་དགོན་པ་རིགས་ཁ་ཤས་ཀྱིས་སྔགས་ཕྱོགས་མ་གཏོགས་རིགས་ལམ་སྦྱང་སྟེ་གཞུང་ཆེན་ལྟ་རྒྱུ་མེད་མཁན་དེ་འདྲ་མང་པོ་ཡོད། བཙུན་མའི་དགོན་པར་ཧ་ལམ་གཞུང་ཆེན་བལྟས། རིགས་ལམ་སྦྱང་བྱེད་མཁན་དེ་འདྲ་ཧ་ལམ་མེད་པ་རེད། དེ་ང་ཚོའི་དེ་སྔ་ཕན་ཆད་ཀྱི་གོམས་གཤིས་རེད་དམ་ཟེར་ན་གོམས་གཤིས་ཤིག་རེད། བཙུན་མའི་དགོན་པ་དེ་དག་ནང་རྟགས་གསལ་གཏོང་རྒྱུའི་ལུགས་སྲོལ་མེད་པ་ལྟ་བུ་ཞིག་ཡིན། སྔགས་པ་གྲྭ་ཚང་དེ་དག་ལོ་ངོ་བརྒྱ་ཕྲག་གི་རིང་ལ་འདོན་ཆོག་ལྟ་བུ་བཏོན་པ་མ་གཏོགས་མེད། དེ་དེ་སྔའི་ལུགས་སྲོལ་དེར་བཞག་དགོས་ཀྱི་རེད་དམ་ཟེར་ན། སྔོན་གྱི་ལུགས་སྲོལ་ཡིན་ནའང་ངོ་བོ་དེ་ཕན་ཐོགས་ཡོད་པ་ཞིག་རེད་འདུག རྗེས་ལུས་ཤིག་རེད་འདུག བསམ་བློ་གཏོང་དགོས། དེར་བརྟེན་བསམ་བློ་ཞིག་གཏོང་སྐབས་དེ་རྗེས་ལུས་རེད་མ་གཏོགས་དེར་ཡོན་ཏན་དང་ལེགས་ཆ་ཡོད་པ་དེ་འདྲ་གང་ཡང་མིན། ཞེས་སོགས་ཀྱི་བཀའ་སློབ་ཟབ་མོ་སྩལ་ཡོད།
