༢༠༡༦ ཟླ་ ༦ ཚེས་ ༡༤ རེས་གཟའ་མིག་དམར།
༄༅། །ཨ་རིའི་རྒྱལ་ས་མངའ་ཁུལ་གྱི་བོད་མིའི་སྤྱི་མཐུན་ཚོགས་པས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར། བཀའ་བཞེས་བཟང་པོ་སྨིན་སྩལ་ཐོབ་སྟེ། ཕྱི་ལོ་ ༢༠༡༦ ཟླ་ ༦ ཚེས་ ༡༣ ཉིན་གྱི་ཕྱེད་ཡོལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་གཙུག་ལག་སློབ་གཉེར་ཁང་གི་བྷེན་ཌར་ཨེ་རི་ན་ Bender Arena ཞེས་པའི་ཚོགས་ཁང་ཆེན་མོའི་ནང་བོད་རིགས་རྣམས་ལ་བཀའ་སློབ་སྩལ་ཡོད།
དེ་ཡང་ཐོག་མར་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་དང་མང་གཙོ་ཚོགས་པའི་འགོ་ཁྲིད་ལྕམ་སྐུ་ནེན་སི་པེ་ལོ་སི་ Nancy Pelosi མཆོག་དང་ཨ་རིའི་གློག་བརྙན་འཁྲབ་སྟོན་པ་གྲགས་ཅན་དང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་རི་ཆ་ཌི་གྷེ་རི་ Richard Gere ལགས་རྣམ་གཉིས་ཀྱིས་༸གོངས་མཆོག་སྡིངས་ཆའི་སྟེང་གདན་ཞུ་གནང་བ་དང་ལྷན་ཨ་རིའི་རྒྱལ་ས་མངའ་ཁུལ་གྱི་བོད་མིའི་སྤྱི་མཐུན་ཚོགས་པའི་ཚོགས་གཙོ་འཇིགས་མེད་ལགས་ཀྱིས་ཕེབས་བསུའི་གསུང་བཤད་གནང་གྲུབ་བསྟུན། ས་གནས་བོད་རིགས་སློབ་ཕྲུག་ཕོ་མོ་རྣམས་ཀྱིས་༸གོང་ས་མཆོག་སྐུ་ཚེ་ཞབས་པད་བརྟན་པར་ཤོག ཅེས་པའི་བོད་ནས་བརྩམས་པའི་གླུ་གཞས་གཟིགས་འབུལ་ཞུས་ཡོད། དེ་རྗེས་ལྕམ་ནེན་སི་པེ་ལོ་སི་མཆོག་དང་སྐུ་ཞབས་རི་ཆ་ཌི་གྷེ་རི་ལགས་རྣམ་གཉིས་ནས་ཀྱང་གསུང་བཤད་གནང་ཡོད། སྐབས་དེར་༸གོང་ས་མཆོག་གིས་བོད་རིགས་ཚོར་བཀའ་སློབ་སྩལ་དོན། ཁྱེད་རང་ཚོ་མང་པོ་ཞིག་ཕྱོགས་གཅིག་ནས་ང་ཚོ་བཙན་བྱོལ་བ་ཆགས། གཉིས་ནས་བདོ་དང་ས་ཐག་རིང་པོའི་ས་ཆར་བསླེབས་ནས་དེང་དུས་ཀྱི་ཤེས་ཡོན་དང་དངོས་པོའི་མཐུན་རྐྱེན་ཡག་པོ་ཡོད་པའི་ལུང་པར་བསླེབས་ཡོད། ཁྱེད་རང་ཚོ་དུས་ཡུན་གང་ལ་གང་ཙམ་ཕྱིན་ཡོད་ཀྱང་། བོད་པ་ཡིན་བསམ་པའི་འདུ་ཤེས་མ་བརྗེད་པར་གནས་ཡོད། ཁྱེད་རང་ཚོ་ལོ་རྒན་པ་ཚོས་ལས་བསྡོམས་ནང་གསལ་བ་ལྟར། བོད་ཡིག་དང་བོད་སྐད་སློབ་སྦྱོང་སྤྲད་རྒྱུ་དཀའ་ངལ་འཛེམས་མེད་ཐོག་སེམས་ཁུར་བླངས་པ་དེར་རྗེས་སུ་ཡི་རང་ཡོད། ང་ཚོ་བཙན་བྱོལ་བ་ཉུང་ཤས་ཤིག་གིས་རང་མགོ་གང་ཐོན་བྱེད་རྒྱུ་ཞིག་ཆགས་མེད། བོད་མི་ས་ཡ་དྲུག་ཙམ་གྱི་མི་རིགས་ཀྱི་དཀའ་ངལ་འཕྲད་སྐབས། ང་ཚོ་རང་དབང་ལུང་པར་བསླེབས་ནས་སོ་སོ་རང་དབང་གི་ཐོག་ནས་སོ་སོས་བྱེད་ཐུབ་ན་བྱེད་རྒྱུ་ཡོད་པའི་གནས་སྐབས་དེར་བོད་རྒྱ་ཆེའི་མི་མང་གི་ཚབ་བྱས་ཏེ་ཧུར་ཐག་འབད་ཐག་བྱེད་རྒྱུ་དེ་ཧ་ཅང་གལ་ཆེན་པོ་རེད། བོད་ཀྱི་སྐད་ཡིག་འདིར་རྩིས་པ་ཡིན་ན།་དངོས་གནས་དྲང་གནས་ངོས་རང་ད་ལྟ་ངོས་རང་ལོ་ ༨༡ བསླེབས་ཡོད། བཙན་བྱོལ་བ་ཆགས་ནས་རྒྱ་གར་ལ་བསླེབས་རྗེས་མི་སྣ་འདྲ་མིན་ཐུག་ཡོད། ནང་པའི་ཡུལ་གྲུག་ཁག་ནས་མཁས་དབང་སོགས་མང་པོ་ཞིག་དང་མཇལ་མྱོང་། སྤྱིར་པཱ་ལི་དང་ལེགས་སྦྱར་གྱི་ཆོས་བརྒྱུད་གཉིས་ཡོད། ལེགས་སྦྱར་གྱི་ཆོས་བརྒྱུད་དེ་གཙོ་བོ་རིགས་པའི་ལམ་ནས་གཞི་དང་ལམ། འབྲས་བུའི་རྣམ་གཞག་གཏན་ལ་ཕབ་ཡོད། བཅོམ་ལྡན་འདས་ཀྱིས་གསུངས་པ་རེད་དང་ཡང་ན་ལུང་ལ་འདི་ལྟར་ཡོད་པ་རེད། ཅེས་ལུང་ཙམ་ལ་ཆ་མ་བཞག་པར་རིགས་པའི་ལམ་ནས་གཏན་ལ་ཕབ་རྒྱུ་ཞིག་ཡོད། དཔེར་ན། ངོས་རང་སྔ་མོ་བྷེང་ཀོག་ནང་གི་ནང་པའི་གཙུག་ལག་སློབ་གྲྭ་ཆེན་མོ་ཞིག་ཡོད་པ་དེར་འགྲོ་མྱོང་། ལོ་གསུམ་བཞི་གོང་དུ་གཙུག་ལག་སློབ་གྲྭ་དེའི་མཁས་དབང་དང་དགེ་སློང་འདུལ་བ་འཛིན་པ་འགའ་ཤས་འདུག
ང་ཚོ་ཐུག་སྐབས་བདེན་བཞི་མི་རྟག་སོགས་བཅུ་དྲུག་སྐོར་དང་བྱང་ཕྱོགས་སོ་བདུན་གྱི་ལམ་གྱི་འགྲོ་སྟངས་སྐོར་བཀའ་མོལ་བྱུང་ཡོད། དེ་ཐེག་པ་ཐུན་མོང་བ་རེད། སྐབས་དེར་ངོས་ཀྱིས་པཱ་ལི་གཞུང་ནང་བདེན་བཞི་མི་རྟག་སོགས་བཅུ་དྲུག་ནང་འགྲེལ་བཤད་སྐྱོན་སྐབས། གཙོ་བོ་ལུང་ལ་བརྟེན་ནས་འགྲེལ་བཤད་སྐྱོན་གྱི་ཡོད་དམ་ཡང་ན་རིགས་པར་བརྟེན་ནས་འགྲེལ་བཤད་སྐྱོན་གྱི་ཡོད་དམ། ཞེས་བཀའ་འདྲི་ཞིག་ཞུས་པ་ཡིན། ཁོང་ཚོས་བཅོམ་ལྡན་འདས་ཀྱི་བཀའ་སྡེ་སྣོད་གསུམ་ལུང་ལ་བརྟེན་ནས་འགྲེལ་བཤད་རྒྱག་གི་ཡོད། ཅེས་གསུངས་པ་རེད། སྐབས་དེར་ངོས་ཀྱིས་ཁོང་ཚོར་གང་ཡང་མ་ཞུས། འོན་ཀྱང་ངོས་ཀྱིས་བསམ་བློའི་ནང་ལེགས་སྦྱར་གྱི་གཞུང་། དཔེར་ན། སློབ་དཔོན་ཆོས་ཀྱི་གྲགས་པས་ཚད་མ་རྣམ་འགྲེལ་གྱི་ལེའུ་གཉིས་པ་ཚད་མ་སྒྲུབ་པའི་ལེའུའི་ནང་བདེན་བཞི་མི་རྟག་སོགས་བཅུ་དྲུག་དེ་དག་གསུང་སྐབས་རིགས་པའི་སྒྲུབ་བྱེད་བཀོད་ནས་གསུངས་ཡོད། དེ་དང་དེ་འདྲ་བའི་གཞུང་མང་པོ་ཞིག་གི་ནང་རིགས་པས་བསྒྲུབ་རྒྱུ་ཧ་ཅང་གལ་ཆེན་པོ་རྩི་གི་ཡོད། རྩིས་དགོས་དོན་དེ་ཡང་བཅོམ་ལྡན་འདས་ཀྱི་ལུང་ནང་། །དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟག་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། ཞེས་གསུངས་ཡོད། བཅོམ་ལྡན་འདས་ཀྱི་རྗེས་འབྲང་དགེ་སློང་དང་མཁས་དབང་ཚོས་བཅོམ་ལྡན་འདས་ཀྱི་བཀའ་རེད། ཅེས་དད་པ་དང་ཡིད་ཆེས་བྱས་ནས་ཁས་བླངས་དགོས་མ་རེད། བཅོམ་ལྡན་འདས་ཀྱི་བཀའ་གནང་བ་དེར་ཞིབ་འཇུག་དང་ཚོད་བལྟ་བྱས་ནས་ར་འཕྲོད་པ་ཞིག་ཡོང་གི་འདུག་ན། ཁས་ལེན་བྱོས། ཞེས་གསུངས་ཡོད། དེར་བརྟེན་ཀླུ་སྒྲུབ་ཡབ་སྲས་ལ་སོགས་དཔལ་ནཱ་ལེནྡྲའི་མཁས་དབང་ཚོས་བཅོམ་ལྡན་འདས་ཀྱི་བཀའ་ལའང་སྒྲ་ཇི་བཞིན་པར་ཁས་བླང་དུ་རུང་བ་དང་མི་རུང་བ་གཉིས་སུ་ཕྱེ་ནས། སྒྲ་ཇི་བཞིན་པར་ཁས་བླང་དུ་རུང་དང་མི་རུང་ཤོད་སྐབས་ལུང་ལ་བརྟེན་ནས་བཤད་དགོས་བྱུང་ན་ལུང་དེ་ཡང་སྒྲ་ཇི་བཞིན་པར་ཡིན་མིན་ལུང་གཞན་ལ་བརྟེན་དགོས་བྱུང་ན་ཐུག་མེད་དུ་འགྲོ་རྒྱུ་རེད།
དེར་བརྟེན་ལུང་གང་ཞིག་སྒྲ་ཇི་བཞིན་པར་ཁས་བླང་དུ་རུང་དང་མི་རུང་རིགས་པ་འབའ་ཞིག་ལ་བརྟེན་ནས་བཤད་རྒྱུ་རེད། དེར་བརྟེན་ནཱ་ལེནྡྲའི་ཆོས་བརྒྱུད་འདི་ལྟ་བུ་ཞིག་གི་ཐོག་ནས་རིགས་པའི་ལམ་ལ་བརྟེན་ནས་བརྟག་དཔྱད་དང་། ཚོད་ལྟ་བྱས་ནསའགྲོ་རྒྱུ་ཡོད་པ་དེའི་བདག་པོ་རྒྱག་མཁན་ཕལ་ཆེར་བོད་པ་གཅིག་པུ་རེད་འདུག གཉིས་ནས་སློབ་དཔོན་ཆོས་གྲགས་ཀྱི་ཚད་མ་རྣམ་འགྲེལ་ལྟ་བུ་བོད་ཡིག་ནང་ཆ་ཚང་ཡོད། རྩ་བ་ལུས་ལྟ་བུའི་བསྟན་བཅོས་གསུམ་དང་འཕྲོས་པ་ཡན་ལག་ལྟ་བུ་བསྟན་བཅོས་བཞི། ཞེས་ཚད་མ་སྡེ་བདུན་ཆ་ཚང་བོད་ཡིག་ནང་ཡོད། ཡོད་པ་ཙམ་དུ་མ་ཟད། རྩ་བ་བློ་འཛིན་བྱས་ནས་འགྲེལ་བ་དེ་དག་ཚིག་རེ་རེར་འགྲེལ་བ་བརྒྱབ། དེ་ཡང་རིགས་ལམ་གྱི་སྒོ་ནས་དཔྱད་པ་བྱེད་རྒྱུ་དེ་བོད་པ་ཁོ་ནར་མ་གཏོགས་སུ་ལའང་མེད། དེ་ལྟ་བུའི་འགྲེལ་བཤད་རྒྱག་རྒྱུར་བོད་ཡིག་དེ་ལེགས་སྦྱར་གྱི་སྐད་དང་ཐག་ཉེ་ཤོས་དང་། ལེགས་སྦྱར་ནས་ཚུར་བསྒྱུར་རྒྱུའི་སྒྱུར་བཟང་ཤོས་དེ་བོད་ཡིག་གི་སྒྱུར་ཆགས་ཡོད། དེ་ནི་ང་ཚོ་བོད་མི་རིགས་ཀྱི་སྤོབས་པ་སྐྱེས་དགོས་པ་ཞིག་ཡིན། ངོས་རང་ལྟ་བུར་ཆ་བཞག་ན། དེང་དུས་ཀྱི་ཤེས་ཡོན་གྱི་ཐོག་གང་ཡང་ཤེས་ཀྱི་མེད། གཞུང་ཆེན་སོགས་ལའང་ངོས་ཀྱིས་དེ་ཙམ་དཀའ་ལས་བརྒྱབ་མེད། ངོས་རང་ཆུང་དུས་སྐབས་སློབ་སྦྱོང་བྱེད་རྒྱུར་ཧ་ཅང་སྒྱིད་ལ་ཉེས་པོ་ཡིན། འོན་ཀྱང་ངོས་ལ་རིག་པ་ཡག་པོ་ཡོད། དེ་ལྟར་བྱས་ཏེ་ངོས་ཀྱིས་ཕྲན་བུ་ཤེས་ཀྱི་ཡོད། ཚན་རིག་པ་ཐེ་བས་མཁས་དབང་སུ་འདྲ་ཞིག་དང་ཐུག་ཀྱང་དེར་ཞུམ་དགོས་པ་དང་གང་འདྲ་ཞིག་བྱེད་ཡོང་བསམ་པའི་དངངས་སྐྲག་ཁྱོན་ནས་སྐྱེས་ཀྱི་མི་འདུག དེ་ངོས་རང་ལྷག་པ་དེ་འདྲ་གང་ཡང་མིན། ང་ཚོར་ཡོད་པའི་མཁན་ཆེན་ཞི་བ་འཚོས་ཐོག་མར་ངོ་སྤྲོད་གནང་ནས་ནཱ་ལེནྡྲའི་མཁས་དབང་ཚོས་སློབ་སྦྱོང་བྱེད་སྟངས་ནང་བཞིན་ཞིག་ང་ཚོར་བསླབ་ནས་དེ་ལྟ་བུའི་ཐོག་ཕྱིན་པ་དེས་ང་ཚོའི་རིག་པ་གསལ་པོ་དང་རྣམ་དཔྱོད་དེ་ཤེས་བྱའི་གནས་ཚུལ་གང་དུ་བལྟས་ཀྱང་གང་ཙམ་ཕྱོགས་བསྡོམས་བརྒྱབ་ཐུབ་རྒྱུ་དང་། ལྷག་པར་ཚད་མ་རིག་པ་བསླབས་ཡོད་སྟབས། འདི་ཡིན་ན་འདི་ཡིན་དགོས། ཞེས་ཕན་ཚུན་འགྲེལ་བ་བཙལ་ནས་བསྡོམས་རྒྱག་རྒྱུ་དེ་གཞན་དང་མི་འདྲ་བ་ཞིག་ཡོང་ཐུབ་ཀྱི་ཡོད།
དེར་བརྟེན་ང་ཚོ་བོད་རིགས་ཚོས། ད་ཆ་ང་ཚོའི་མེས་པོ་ཚོས་དཀའ་ལས་བརྒྱབ་སྟེ་ཐོག་མར་བོད་ཡིག་ནང་ཚུར་བསྒྱུར། བར་དུ་ལོ་བརྒྱ་ཕྲག་མང་པོོ་བདག་པོ་བརྒྱབ་ནས་ཡོད་པ་དེ་དེང་སང་གི་དུས་ཚོད་འདིར་ནང་པ་ཙམ་ལ་མ་ཡིན་པར། སྤྱིར་བཏང་ཆོས་དད་མེད་མཁན་ཚོ་ལ་ཡིན་ནའང་སེམས་ཁམས་རིག་པ་གཙོ་བོར་གྱུར་བའི་རྟེན་འབྲེལ་ལྟོས་གྲུབ་ཀྱི་རྣམ་གཞག་གིས་ཆོས་དད་མེད་མཁན་ཚོ་ལའང་ཕན་ཐོགས་ཡོང་ཐུབ། དེང་སྐབས་ཚན་རིག་པ་མང་པོས་དེར་དོ་སྣང་བྱེད་བཞིན་ཡོད། དེར་བརྟེན་འཛམ་གླིང་སྤྱི་ལ་ཕན་ཐོགས་བྱེད་ཐུབ་པའི་ནོར་བུ་དེ་ང་ཚོར་ཡོད་སྟབས། དེ་ང་ཚོས་བདག་པོ་རྒྱག་རྒྱུ་ཧ་ཅང་གལ་ཆེན་པོ་རེད། དེའི་རྩ་བ་བོད་ཡིག་ཤེས་རྒྱུ་ཧ་ཅང་གལ་ཆེན་པོ་རེད། ཁྱེད་རང་ཚོས་ཕྲུ་གུ་ཆུང་ཆུང་དེ་ཚོར་བོད་ཡིག་སློབ་ཁྲིད་བྱེད་རྒྱུ་དེ་ཧ་ཅང་ཡག་པོ་བྱུང་འདུག
ངོས་ལ་ཆ་བཞག་ན་ཕྱི་ལོ་ ༡༩༥༩ ཟླ་ ༣ ཚེས་ ༡༧ ཉིན་ནོར་བུ་གླིང་ག་ནས་བྲོས་ཡོང་བ་ཡིན། སྐབས་དེར་བསམ་བློའི་ནང་སང་ཉིན་ཉི་མ་འཆར་བ་མཐོང་རྒྱུ་ཡོང་ངམ་མི་ཡོང་ལྟ་བུའི་གནས་སྟངས་འོག་ནས་ཧ་ལམ་སོ་སོའི་སྲོག་མགོ་ཐོན་རྒྱུ་བྱས་ནས་ཡོང་བ་ཞིག་ཡིན། དེ་ནས་རྒྱ་གར་ལ་བསླེབས་ནས་ལོ་ཁ་ཤས་ཤིག་གི་རིང་ང་ཚོ་བཙན་བྱོལ་ལ་ཡོད་པ་དེ་དག་གིས་རང་ཁ་རང་གསོ་ཐུབ་རྒྱུར་འབད་བརྩོན་བྱས་ནས་བསྡད་པ་ཡིན། དེ་ནས་རིམ་པས་སློབ་གྲྭ་འཛུགས་རྒྱུ་སོགས་བྱས་ནས་སོ་སོའི་སྐད་ཡིག་དང་རིག་གཞུང་བསླབ་རྒྱུ། དེ་བཞིན་རིས་སུ་མ་ཆད་པའི་ཆོས་སྒར་ཁག་ཚུགས་ཏེ་མུ་མཐུད་སློབ་སྦྱོང་བྱེད་རྒྱུ་ཡོད་པ་སོགས་བྱུང་ཡོད། ཧ་ལམ་ལོ་སྟོང་ཕྲག་རིང་ནས་ཡོད་པའི་ང་ཚོའི་གཅེས་ནོར་བདག་པོ་བརྒྱབ་ནས་བསྡད་པ་རེད། དེ་ནས་ཕྱི་ལོ་ ༡༩༧༣ ལོར་ཐོག་མར་ངོས་རང་ཡུ་རོབ་ལ་བསླེབས་པ་རེད། ཕྱི་ལ་བལྟས་པ་ཡིན་ན་ཁྲ་ཁྲ་ཟིང་ཟིང་འདུག་ཀྱང་སེམས་སྐྱིད་པོ་ཡོད་མེད་ཐེ་ཚོམ་ལྟ་བུ་འདུག ཕྱི་ལོ་ ༡༩༧༩ ལོར་ཨ་རིར་བསླེབས་པ་ནས་བཟུང་ངོས་ལ་ངོ་ཤེས་པ་མང་པོ་ཆགས་སྟབས། སེམས་ཁམས་རིག་པའི་གནས་ཚུལ་ཤེས་པའི་ཐོག་ནས་སེམས་དང་སེམས་བྱུང་གི་འགྲོ་སྟངས་ཡག་པོ་ཤེས་པའི་ཐོག་ནས་སེམས་དཀྲུག་མཁན་གྱི་རིགས་དེར་གཉེན་པོ་བསྟེན་སྟངས། སེམས་ལ་ཕན་ཐོགས་ཡོད་མཁན་རིགས་དེ་དག་འཆར་གཞི་ལྡན་པའི་ཐོག་ནས་ཡར་རྒྱས་གང་འདྲ་གཏོང་དགོས་ཡོད་མེད་མ་ཤེས་པའི་སྐྱོན་ཧ་ཅང་འདུག ད་ཆ་བོད་པས་ལོ་སྟོང་ཕྲག་རིང་ནས་ཉར་ཚགས་བྱས་ཏེ་བདག་པོ་བརྒྱབ་པ་དེའི་ནང་ནས་མིའི་སེམས་དང་སྤྱི་ཚོགས་དང་སྤྱིར་བཏང་གི་འབྲེལ་བ་ཡོད་པ་དེ་འཛམ་གླིང་འདིའི་སྒང་ཕར་ཞབས་འདེགས་བསྒྲུབ་རྒྱུའི་གོ་སྐབས་དང་ཆ་རྐྱེན་ཞིག་ཡོད་པ་ལྟ་བུ་འདུག དེར་བརྟེན་ང་ཚོས་ད་བར་བདག་ཉར་བྱས་པ་དེ་ད་ཆ་འཛམ་གླིང་སྤྱི་ལ་ཞབས་འདེགས་སྒྲུབ་ཐུབ་རྒྱུའི་དུས་ཚོད་ལ་སླེབས་ཡོད་པ་ལྟ་བུ་མཐོང་གི་འདུག ཁྱེད་རང་ཚོ་བོད་རིགས་ཚོས་སེམས་ཤུགས་སྐྱེས་ནས་སོ་སོའི་མི་རིགས་ལ་སྤོབས་པ་བྱས་ནས་ཚང་མས་ཤུགས་རྒྱག་རྒྱུ་ཧ་ཅང་གལ་ཆེན་པོ་རེད།
ཆབ་སྲིད་ཀྱི་ཐོག་ནས་རྩིས་ན་ང་ཚོས་ཡང་དག་པའི་མང་གཙོའི་ལམ་ལ་ཕྱིན་པ་རེད། མདོར་ན་༸རྒྱལ་དབང་སྐུ་ཕྲེང་ལྔ་པ་ནས་བཟུང་བོད་ཆོས་སྲིད་གཉིས་ཀྱི་དབུ་ཁྲིད་གནང་རྒྱུའི་ལམ་ཞིག་ཡོད་པ་དེ་ཕྱི་ལོ་ ༢༠༡༡ ལོ་ནས་ངོས་ཀྱིས་ལུགས་སྲོལ་དེ་མཚམས་བཅད་པ་རེད། མ་འོངས་པར་ང་ཚོ་མང་གཙོ་རང་གི་སྟེང་འགྲོ་རྒྱུ་རེད་མ་གཏོགས། ༸རྒྱལ་དབང་གོང་མ་ཚོས་ཆོས་སྲིད་གཉིས་ཀྱི་དབུ་ཁྲིད་གནང་བ་རེད། ཅེས་བཤད་རྒྱུ་མེད་པ་ཞིག་ངོས་ཀྱིས་དུས་ཚོད་དེ་མཚམས་བཅད་པ་ཡིན། མཚམས་རེ་ངོས་ཀྱིས་བསྟན་བཤིག་རྩེད་དེ་༸གོང་ས་ལྔ་པ་ཆེན་པོས་སྲོལ་གཏོད་པ་དེ་སྐུ་ཕྲེང་བཅུ་བཞི་པའི་མིང་ཡོད་པ་འདིས་མཇུག་རྫོགས་པ་རེད། གལ་ཏེ་༸གོང་ས་ལྔ་པ་ཆེན་པོ་བསྐྱར་དུ་ཕེབས་ན་ག་རེ་གསུང་གྲབས་ཡོད་ན། འོན་ཀྱང་༸གོང་ས་ལྔ་པ་ཆེན་པོ་བསྐྱར་དུ་ཡོང་བའི་ཉེན་ཁ་མེད་སྟབས། ངོས་རང་གང་བྱེད་རེད། ཅེས་བརྗོད་ཀྱི་ཡོད། གང་ལྟར་ང་ཚོས་དུས་ཚོད་དང་རྗེས་ཟིན་པ་བྱས་ཏེ་འགྲོ་བཞིན་ཡོད། ང་ཚོར་ལེགས་ཆ་ཡོད་པ་དང་འཛམ་གླིང་འདིའི་སྒང་ཕན་ཐོགས་ཡོད་པ། ངོམས་སུ་ཆོག་པ་དེ་བདག་པོ་ཡག་པོ་བརྒྱབ་ནས་ཡར་རྒྱས་གཏོང་དགོས། དུས་ཚོད་ཡོལ་ཚར་བའི་ལམ་དང་ལུགས་སྲོལ་ཡོད་པ་དེ་དག་དུས་ཚོད་དང་མཐུན་པའི་ཐོག་ནས་རྗེས་ཟིན་ཐུབ་པ་དང་འགྱུར་བ་གཏང་ཐུབ་པ་ཞིག་དགོས་རྒྱུ་ཧ་ཅང་གལ་ཆེན་པོ་རེད་འདུག སྔར་ང་ཚོས་མ་བྱས་པ་དེང་སང་ཕན་ཐོགས་ཡོད་པ་དང་དགོས་མཁོ་ཡོད་པ་དེ་ཚོ་གྲས་ང་ཚོས་སྔར་ལམ་ཡིན་ཞེས་བཤད་རྒྱུ་མེད། དུས་ཚོད་ལིའུ་རྫོགས་ཟིན། སྔར་མ་བྱེད་པ་ཞིག་ཡིན་ནའང་སྔར་བྱེད་ཀྱི་མེད། ཅེས་མ་བྱས་ནས་སྡོད་རྒྱུ་མིན་པར་དགོས་མཁོ་འདུག་ན་ང་ཚོས་བསྒྲུབ་དགོས། ཞེས་བཀའ་སློབ་སྩལ་ཡོད།།