ཕྱི་ལོ་ ༢༠༡༦ ཟླ་ ༦ ཚེས་ ༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༦ ཟླ་ ༦ ཚེས་ ༡ ཉིན་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོའི་ཐོག་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བཅའ་ཁྲིམས་དོན་ཚན་ ༢༢ པའི་དགོངས་དོན་ལྟར།རང་གི་བཀའ་ཤག་ལྷན་ཚོགས་སུ་བསྐོ་གཞག་ཞུ་རྒྱུའི་བཀའ་བློན་འོས་དམིགས་རྣམས་ནི། བཀའ་ཤག་སྐབས་བཅུ་བཞི་པའི་ཤེས་རིག་བཀའ་བློན་ཟུར་པ་དངོས་གྲུབ་ཚེ་རིང་མཆོག་དང་། བཀའ་དྲུང་གཡུ་ཐོག་ཀརྨ་དགེ་ལེགས་ལགས། ནང་སྲིད་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་ལགས། བདེ་སྲུང་དྲུང་ཆེ་བླ་བྲང་འཕགས་པ་ཚེ་རིང་ལགས། སྤྱི་ཟུར་ཀརྨ་ཡེ་ཤེས་ལགས། སྤྱི་ཟུར་ཆོས་སྐྱོང་དབང་ཕྱུག་ལགས་བཅས་ཀྱི་མཚན་དང་ལོ་རྒྱུས་སྙིང་བསྡུས་རེ་སྤྱི་འཐུས་ལྷན་ཚོགས་སུ་སྒྲོགས་སྦྱང་གནང་རྗེས་གྲོས་ཚོགས་འཐུས་མི་རྣམས་ཀྱིས་མང་མོས་ཐོག་འོས་འདེམས་གནང་ཡོད།
དངོས་གྲུབ་ཚེ་ཪིང་མཆོག་ནི། ཕྱི་ལོ་ ༡༩༥༣ ལོར་འཁྲུངས་ཤིང་། མཐོ་སློབ་ཐོན་རྗེས་ཕྱི་ལོ་ ༡༩༧༩ ལོར་སྐབས་ ༧ པའི་བོད་མི་མང་སྤྱི་འཐུས་ལྷན་ཚོགས་སུ་བདམས་ཐོན་དང་། ཕྱི་ལོ་ ༡༩༨༣ ནས་གཞུང་ཞབས་ཞུས་ཏེ་རིམ་བཞིན་ཟློས་གར་འ
གན་འཛིན་དང་། ཤེས་རིག་དྲུང་ཆེ། ནང་སྲིད་དྲུང་ཆེ་བཅས་གནང་། ཨ་རིར་ནང་མི་ཟླ་བསྒྲིལ་ཆེད་ལོ་ཤས་བསྐྱོད་རྗེས་ཕྱི་ལོ་ ༢༠༡༢ ནས་སླར་ཡང་ཤེས་རིག་དྲུང་ཆེ་གནང་མུས་ཐོག་ཕྱི་ལོ་༢༠༡༤ ལོར་སྐབས་ ༡༤ པའི་བཀའ་ཤག་ཏུ་འོས་ཐོན་གྱིས་ཤེས་རིག་བཀའ་བློན་གྱི་མཛད་འགན་བཞེས་ཡོད།
གཡུ་ཐོག་ཀརྨ་དགེ་ལེགས་ལགས་ནི། ཕྱི་ལོ་ ༡༩༥༥ ལོར་འཁྲུངས་ཤིང་། ནང་པའི་གཞུང་ཆེན་སློབ་གཉེར་དང་། ཨིན་ཇིའི་སྐད་ཡིག་ཐོག་ M.A. ཐོན་རྗེས་ཕྱི་ལོ་ ༡༩༨༦ ནས་གཞུང་ཞབས་ཞུས་ཏེ་རིམ་བཞིན་ཆོས་རིག་དྲུང་ཆེ་དང་། ཉི་ཧོང་སྐུ་ཚབ་དོན་གཅོད། ཤེས་རིག་དྲུང་ཆེ་བཅས་གནང་མཐར་ཕྱི་ལོ་ ༢༠༡༢ ལོར་བཀའ་དྲུང་དུ་བསྐོ་གཞག་གིས་ད་བར་ལས་འཁུར་གནང་མུས་ཡིན།
འཁོར་ལྷ་ཚང་བསོད་ནམས་སྟོབས་རྒྱལ་ལགས་ནི། ཕྱི་ལོ་ ༡༩༥༤ ལོར་འཁྲུངས་ཤིང་། སློབ་གཉེར་ཐོན་རྗེས་ཕྱི་ལོ་ ༡༩༧༩ ནས་གཞུང་ཞབས་ཞུས་ཏེ་ཪིམ་བཞིན་ཐེག་པ་རིམ་འཛེགས་ཀྱིས་ ཕྱི་ལོ་ ༢༠༠༡ ནས་དྲུང་ཆེར་བསྐོ་གཞག་གིས། སྣེ་ལེན་འབྲེལ་མཐུད་ཁང་གི་འགན་འཛིན་དང་། དཔལ་འབྱོར་ལས་ཁུངས་ཀྱི་དྲུང་ཆེ། མ་སུ་རི་བོད་ཕྲུག་ཁྱིམ་སྡེའི་དྲུང་ཆེ་བཅས་གནང་བ་དང་། ཕྱི་ལོ་ ༢༠༡༢ ནས་བཟུང་ནང་སྲིད་ལས་ཁུངས་ཀྱི་དྲུང་ཆེའི་ལས་འཁུར་གནང་མུས་ཡིན།
བླ་བྲང་འཕགས་པ་ཚེ་རིང་ལགས་ནི། ཕྱི་ལོ་ ༡༩༦༥ ལོར་འཁྲུངས་ཤིང་། ནུབ་བྱང་མི་རིགས་སློབ་གྲྭ་ཆེན་མོ་ནས་སློབ་མཐར་སོན་རྗེས་ཕྱི་ལོ་ ༡༩༩༢ ལོར་བཙན་བྱོལ་དུ་འབྱོར་བ་དང་། ཕྱི་ལོ་ ༡༩༩༣ ནས་གཞུང་ཞབས་ཞུས་ཏེ་རིམ་བཞིན་ཐེག་པ་རིམ་འཛེགས་ཀྱིས་ཕྱི་ལོ་ ༢༠༡༤ ནས་བདེ་སྲུང་འཛིན་སྐྱོང་དྲུང་ཆེའི་ལས་འཁུར་གནང་མུས་ཡིན།
ཀརྨ་ཡེ་ཤེས་ལགས་ནི། ཕྱི་ལོ་ ༡༩༦༥ ལོར་འཁྲུངས་ཤིང་། ཉེ་བའི་གཙུག་ལག་རབ་འབྱམས་པ་ B.A. དང་ དགེ་རྒན་འོས་སྦྱོང་B.Ed. ཐོན་རྗེས་ཕྱི་ལོ་ ༡༩༩༠ ནས་ལོ་བཞིའི་རིང་དགེ་རྒན་དང་། ཕྱི་ལོ་ ༡༩༩༥ ནས་སྐབས་གཉིས་རིང་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་གཞོན་པ། ཕྱི་ལོ་ ༢༠༠༣ ནས་ ༢༠༡༡ བར་ནོར་ཝེ་བོད་ཀྱི་རླུང་འཕྲིན་ཁང་གི་སྤྱི་ཁྱབ་རྩོམ་སྒྲིག་འགན་འཛིན། བོད་མི་མང་སྤྱི་འཐུས་ལྷན་ཚོགས་སྐབས་ ༡༣ དང་ ༡༤། ༡༥ བཅས་ཀྱི་སྤྱི་འཐུས་ཀྱི་ལས་འཁུར་གནང་ཡོད།
ཆོས་སྐྱོང་དབང་ཕྱུག་ལགས་ནི། ཕྱི་ལོ་ ༡༩༧༡ ལོར་འཁྲུངས་ཤིང་། ཉེ་བའི་གཙུག་ལག་རབ་འབྱམས་པ་ B.A. ཐོན་རྗེས་ཕྱི་ལོ་ ༡༩༩༥ ནས་ ༢༠༠༡ བར་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་རྒྱུན་ལས་དང་། ༢༠༠༢ ནས་ ༢༠༠༦ བར་འཕགས་བོད་འབྲེལ་མཐུད་འགན་འཛིན། ཕྱི་ལོ་ ༢༠༠༨ ནས་ ༢༠༡༥ བར་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་ངེས་སྟོན་པ་གནང་བ་དང་། བོད་མི་མང་སྤྱི་འཐུས་ལྷན་ཚོགས་སྐབས་ ༡༤ དང་ ༡༥ པའི་སྤྱི་འཐུས་ཀྱི་ལས་འཁུར་གནང་ཡོད།
