༢༠༡༦ ཟླ་ ༥ ཚེས་ ༢༤ རེས་གཟའ་མིག་དམར།
༄༅། །འདི་གར་འཕྲོ
ད་བསྟེན་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་གོ་སྒྲིག་འོག་ཕྱི་ལོ་ ༢༠༡༦ ཟླ་ ༥ ཚེས་ ༡༦ ནས་ཚེས་ ༡༨ བར་ཉིན་གྲངས་གསུམ་རིང་རྡ་ས་དབུས་སྣེ་ལེན་འབྲེལ་མཐུད་ཁང་གི་ཚོགས་ཁང་དུ་མི་མང་གི་འཕྲོད་བསྟེན་ཞབས་ཞུ་སྤྱི་དང་། ལྷག་པར་ནད་རིགས་སྔོན་འགོག་གི་ལས་དོན་ཚགས་ཚུད་ཡོང་ཐབས། དེ་བཞིན་སྨན་ཁང་ཁག་གི་འཛིན་སྐྱོང་ཡར་རྒྱས་གཏོང་ཕྱོགས་སྐོར་དམིགས་བསལ་ཚོགས་ཆེན་ཚོགས་པའི་སྐབས་འཕྲོད་བསྟེན་ལས་ཁུངས་ཀྱི་ཁྱབ་ཁོངས་རྒྱ་བལ་ས་གནས་སྨན་ཁང་ཁག་ ༣༦ ནས་སྨན་ཁང་འགན་འཛིན་དང་། སྨན་པ། སྨན་ཞབས། འཕྲོད་ལས་བཅས་མི་གྲངས་ ༥༢ དང་། དགོན་སྡེ་ཁག་ནས་འཕྲོད་བསྟེན་འགན་འཛིན་དང་། ཕྱི་ལུགས་སྨན་པ་བཅས་མི་གྲངས་ ༡༧ དེ་བཞིན་དབུས་བོད་ཀྱི་སྨན་རྩིས་ཁང་དང་ཁྱབ་ཁོངས་ཡན་ལག་སྨན་ཁང་ཁག་གི་སྨན་པ་གྲངས་ ༢༨ བོད་ཀྱི་བདེ་རྩའི་འགན་འཛིན་དང་སྨན་ཞབས་ ༢ བོད་སློབ་ཁག་ནས་སྨན་ཞབས་གྲངས་ ༢༡ བདེ་ལེགས་སྨན་ཁང་གི་སྨན་པ་དང་སྨན་ཞབས་གྲངས་ ༤ གཞན་ཡང་མཐོ་སློབ་ཁག་ནས་སྨན་ཞབས་གྲངས་ ༦ བཅས་ཁྱོན་ཚོགས་བཅར་བ
་གྲངས་ ༡༣༠ མཉམ་ཞུགས་གནང་ཡོད། གོང་གསལ་ཉིན་གྲངས་གསུམ་རིང་ཚོགས་འདུའི་གཙོ་སྐྱོང་འཕྲོད་བསྟེན་བཀའ་བློན་མཆོག་དང་། འཕྲོད་བསྟེན་དྲུང་ཚབ་ནས་གནང་ཐོག་གྲོས་གཞི་དོན་ཚན་སོ་སོར་གོ་བསྡུར་སྦྱང་བཤད་ལྷུག་པོ་གནང་ཡོད།
ཕྱི་ཚེས་ ༡༩ ཉིན་དབུས་བོད་ཀྱི་སྨན་རྩིས་ཁང་དང་ཁྱབ་ཁོངས་ཡན་ལག་སྨན་ཁང་གི་སྨན་པ་གྲངས་ ༢༨ མཉམ་ཞུགས་སྐབས་ཕྱི་ལུགས་ལམ་ནས་ཊི་བི་དང་། མཆིན་ནད་དུག་ཐབས། སྲོག་རླུང་སྟོད་འཚང། ཟ་ཁུ་གཅིན་སྙི་ནད། མོ་ནད། དབང་རྩའི་ནད། འབྲས་ནད་སོགས་བཅོས་ཐབས་དང་། ངོས་འཛིན་བྱེད་ཕྱོགས། གཞན་ཡང་དེང་དུས་ཆེས་མཐོན་གསར་འཕྲུལ་ཆས་ལམ་ནས་བརྟག་དཔྱད་བྱེད་ཐབས་སོགས་ཟབ་ཁྲིད་ལེགས་གྲུབ་བྱུང་ཡོད།
ཉིན་རྒྱབ་འཕྲོད་བསྟེན་ཁྱབ་ཁོངས་སྨན་ཁང་གི་འགན་འཛིན་དང་། སྨན་པ། སྨན་ཞབས་པ། འཕྲོད་ལས་པ་བཅས་རྒྱས་མཛོམས་ཀྱིས་ཁྱབ་ཁོངས་སྨན་ཁང་ཁག་གི་འཛིན་སྐྱོང་ཡར་རྒྱས་གཏོང་ཕྱོགས་དང་། ས་གནས་སྨན་ཁང་ཁག་གི་གློག་པར་སྡེ་ཚན། ཁྲག་ལུད་བརྟག་དཔྱད་སྡེ་ཚན། སྨན་སྦྱོར་ཁང་། ཕྱི་བཅོས་གསོ་ཐབས་སྡེ་ཚན། སོའི་སྡེ་ཚན་བཅས་རང་ཁ་རང་གསོའི་ཐབས་ལམ་སྐོར་དང། ཁྱབ་ཁོངས་སྨན་ཁང་ཁག་གི་ལས་བྱེད་རྣམས་ཀྱི་སྤྱི་སྒེར་གྱི་བདེ་སྡུག་བཅས་སྙན་སེང་ཞུས།
བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་ཐོག་ཚོགས་བཅར་བ་གྲངས་ ༡༣༠ དང་། དབུས་འཕྲོད་བསྟེན་ལས་ཁུངས་ཀྱི་ལས་བྱེད་གྲངས་ ༣༢ བཅས་ཁྱོན་ལས་བྱེད་གྲངས་ ༡༦༢ ལ་འཕྲོད་བསྟེན་ལས་ཁུངས་ནས་༸དཔལ་ལྡན་དགའ་ལྡན་ཕོ་བྲང་ཡིག་ཚང་བརྒྱུད་ཇི་ལྟར་གསོལ་འདེབས་སྙན་སེང་སྒྲོན་འབུལ་ཞུས་དོན་བཞིན། ཕྱི་ཚེས་ ༡༧ རེས་གཟའ་མིག་དམར་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཚོགས་བཅར་བ་ཡོངས་ལ་མཇལ་ཁ་དང་བཀའ་སློབ་གསུང་གི་བདུད་རྩི་བཀའ་དྲིན་བླ་མེད་དུ་ཆེ་བ་སྩལ་བས་དེར་འདུས་ཚོགས་བཅར་བ་རྣམས་དགའ་དད་སྤྲོ་སེམས་འཁོལ་བའི་ངང་བསྐལ་བཟང་གི་དགའ་སྟོན་ཆོག་མི་ཤེས་པ་ཞིག་ཐོབ་ཡོད། ཐེངས་འདིའི་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་གོ་སྒྲིག་གནང་བའི་དམིགས་བསལ་ཚོགས་ཆེན་དོན་སྙིང་ལྡན་ལ་ཚོགས་འདུ་རྒྱལ་ཁའི་ངང་ནས་གྲོལ་ཡོད།།
