༢༠༡༦ ཟླ་ ༥ ཚེས་ ༢༣ རེས་གཟའ་ཟླ་བ།
༄༅། །སྨན་པ་བསྟན་འཛིན་ནོར་བཟང་ལགས་ཀངྒ་རར་རྟེན་གཞི་བྱས་པའི་རཱ་ཇིནྡྲཱ་པྲཱ་སཱད་གཞུང་གི་སྨན་པའི་མཐོ་སློབ་ Dr Rajendra Prasad Government Medical College ནས་སྨན་པའི་སློབ་སྦྱོང་ MBBS ལེགས་པར་ཐོན་ནས་ཟླ་བ་གཅིག་རིང་རྡ་ས་བདེ་ལེགས་སྨན་ཁང་དུ་ཕྱག་ལས་གནང་རྗེས་ཟླ་འདིའི་ཕྱི་ཚེས་ ༢༠ ནས་གཞུང་འབྲེལ་ཐོག་སྦིར་བོད་མིའི་ས་གནས་འཕྲོད་བསྟེན་ཡན་ལག་སྨན་ཁང་གི་སྨན་པར་གསར་དུ་བསྐོ་གཞག་གནང་ཡོད། སྦིར་ས་གནས་འཕྲོད་བསྟེན་ཡན་ལག་སྨན་ཁང་ནས་སྦིར་བོད་ཚོགས་དང་། ནང་ཆེན། སྡེ་དགེ་ཁྱབ་ཁོངས་གཞིས་ཆགས་དང་། སློབ་གྲྭ། དགོན་སྡེ་ཁག་བཅས་ལ་འཕྲོད་བསྟེན་གྱི་མཐུན་རྐྱེན་སྦྱོར་བཞིན་ཡོད། ཕྱི་ལོ་ ༢༠༡༢ ལོར་རྡ་ས་བདེ་ལེགས་སྨན་ཁང་དུ་སྨན་པ་གཉིས་དང་། བོད་མིའི་སྒྲིག་འཛུགས་དང་བོད་མིའི་དང་བླངས་འཕྲོད་བསྟེན་ཚོགས་པའི་ཁྱབ་ཁོངས་རྒྱ་གར་ནང་གི་སྨན་ཁང་ཁག་དང་། ས་གནས་འཕྲོད་བསྟེན་ཡན་ལག་སྨན་ཁང་ཁག་གི་ནང་སྨན་པ་ལྔ་བཅས་ཁྱོན་སྨན་པ་བདུན་ཡོད། འོན་ཀྱང་ཕྱི་ལོ་ ༢༠༡༥ ཟླ་ ༨ ཚེས་ ༡ ནང་ཚུད་སྨན་པ་བཅུ་དྲུག་ཡོད་ཁོངས་ནས་སྨན་པ་བཞིས་རང་ཉིད་ཀྱི་མདུན་ལམ་སོགས་ཀྱི་ཆེད་རྩ་དགོངས་ཞུས་ཏེ་ད་ལྟའི་ཆར་སྨན་པ་བཅུ་གཉིས་ཡོད་པར་བརྟེན། ད་དུང་མིའོ་དང་། ལ་དྭགས། བྷན་ད་ར། མོན་གྷོ། ཧོན་སུར། བལ་ཡུལ་པོ་ཁ་ར། སྦེལ་ཀོབ་བཅས་སུ་ཕྱི་ལུགས་སྨན་པ་ཛ་དྲག་དགོས་ངེས་ཆགས་ཡོད།
རྒྱ་གར་དབུས་གཞུང་གི་འཕྲོད་བསྟེན་དང་ཁྱིམ་ཚང་བདེ་དོན་ལྷན་ཁང་དང་བོད་ཀྱི་ཐེབས་རྩ་བརྒྱུད་ཨ་རིའི་ཐེབས་རྩས་བཙན་བྱོལ་བོད་མིའི་འཕྲོད་བསྟེན་གྱི་གནས་སྟངས་ཡར་རྒྱས་དང་། གོ་ལའི་ཐེབས་རྩའི་གློ་ནད་སྔོན་འགོག་ལས་འཆར་འོག་རིང་མིན་རྒྱ་བལ་གཉིས་ཀྱི་བོད་མིའི་གཞིས་ཆགས་ཁག་གི་ནང་འཕྲོད་བསྟེན་ལས་ཁུངས་ནས་སྨན་པ་གང་མང་ཞིག་བསྐོ་གཞག་གནང་རྒྱུ་མ་ཟད། མཁས་ལས་སྨན་པ་གསོ་སྐྱོང་གནང་རྒྱུ་ཡིན་འདུག། བོད་མིའི་སྒྲིག་འཛུགས་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་། ཤེས་རིག་ལས་ཁུངས་ཀྱི་གན་རྒྱའི་འབྲུ་དོན་ལྟར། ད་ལྟ་སྨན་པའི་སློབ་སྦྱོང་གནང་བཞིན་པའི་བོད་རིགས་སློབ་མ་རྣམས་ལ་སྨན་སློབ་ཐོན་རྗེས་བཟང་སྤྱོད་ཀྱི་འགན་ཁུར་ཐོག་བོད་པའི་སྤྱི་ཚོགས་ནང་ཉུང་མཐར་ལོ་གསུམ་ཞབས་ཞུ་བསྒྲུབ་དགོས་པའི་འབོད་སྐུལ་ཤུགས་ཆེ་གནང་ཡོད། སྤྱིར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་རྒྱ་གར་དང་བལ་ཡུལ། འབྲུག་བཅས་ཀྱི་ནང་སྨན་ཁང་ཁག་བདུན་དང་། ས་གནས་འཕྲོད་བསྟེན་ཡན་ལག་སྨན་ཁང་གྲངས་ ༤༣ དེ་བཞིན་མངོན་དགའ་དམིགས་བསལ་དགོས་མཁོ་ཅན་གྱི་སློབ་གྲྭ་སོགས་སུ་འཕྲོད་བསྟེན་མཐུན་རྐྱེན་སྦྱོར་བཞིན་ཡོད། ད་ཆར་སྨན་པ་གྲངས་བཅུ་གཉིས་ནས་གན་རྒྱའི་འབྲུ་དོན་བཞིན་རང་རེའི་སྤྱི་ཚོགས་ནང་ལོ་གསུམ་རིང་ཞབས་འདེགས་ཞུ་བཞིན་པ་དང་། སྨན་པ་ཁག་གཅིག་གིས་གན་རྒྱའི་ལོ་གསུམ་ལས་ལྷག་ཞབས་འདེགས་ཞུ་བཞིན་ཡོད་པ་མ་ཟད། བྷི་ཀ་ནེར་དང་སིམ་ལ། ཀངྒ་ར། ཀོལ་ཀ་ཊ་བཅས་སུ་བོད་རིགས་སྨན་པའི་སློབ་སྦྱོང་གནང་བཞིན་པ་སློབ་མ་བཅུ་བདུན་ཡོད་པ་དང་། ཁོང་རྣམས་ཀྱིས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་སྨན་པའི་ཟུར་བཅད་ཞབས་སྟེགས་ཐོག་སྨན་པའི་སློབ་སྦྱོང་གནང་སྟེ་ཕྱིར་འཁོར་མཚམས་གན་རྒྱའི་འབྲུ་དོན་ལྟར་བཙན་བྱོལ་བོད་མིའི་སྤྱི་ཚོགས་ནང་ལོ་གསུམ་རིང་ཞབས་འདེགས་ཞུ་རྒྱུར་ཁས་ལེན་ཞུས་ཡོད།།
