༢༠༡༦ ཟླ་ ༤ ཚེས་ ༢༩ རེས་གཟའ་པ་སངས།
༄༅། །ཕྱི་ལོ་ ༢༠༡༦ ཟླ་ ༥ ཚེས་ ༢༩ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་རྡ་ས་བོད་ཀྱི་དཔེ་མཛོད་ཁང་གི་ཚོགས་ཁང་ཞིག་ཏུ་སྤྱི་ཟུར་མགོན་པོ་རྡོ་རྗེ་ལགས་དམ་པ་དེས་རང་གི་མི་ཚེའི་ལོ་རྒྱུས་དང་འབྲེལ་ནས་དུས་རབས་གསར་རྙིང་གི་བོད། ཅེས་པའི་ལོ་རྒྱུས་དེབ་ཕྲེང་སྟོད་སྨད་གཉིས་དབུ་འབྱེད་དང་འབྲེལ་གསུང་བཤད་གནང་སོང་།
དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༤ ཐོག་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་དང་། དམིགས་བསལ་སྐུ་མགྲོན་བཀའ་ཟུར་འབྲོང་ཆུང་དངོས་གྲུབ་མཆོག བཀའ་ཟུར་རིན་ཆེན་མཁའ་འགྲོ་མཆོག བོད་མི་མང་སྤྱི་འཐུས་དགེ་བཤེས་ག་གཟི་ཚེ་རིང་པོ་ལགས། སྤྱི་འཐུས་ཀརྨ་ཡེ་ཤེས་ལགས། སྤྱི་འཐུས་དབྱངས་ཅན་སྒྲོལ་དཀར་ལགས། དབུས་འོས་བསྡུ་ལས་ཁང་གི་འགན་འཛིན་ཤོ་ཟུར་བསོད་ནམས་ཆོས་འཕེལ་ལགས། བོད་ཀྱི་དཔེ་མཛོད་ཁང་གི་དྲུང་ཆེ་ངག་དབང་ཡེ་ཤེས་ལགས། ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་བཀྲ་ཤིས་ཚེ་རིང་ལགས། དེ་བཞིན་གསར་འགོད་པ་བཅས་ཁྱོན་མི་གྲངས་ ༣༠ བརྒལ་བའི་དབུས་སུ་ཐོག་མར་སྲིད་སྐྱོང་མཆོག་གིས་སྣང་གསལ་ཞལ་ཕྱེ་གནང་གྲུབ་མཚམས་བོད་ཀྱི་དཔེ་མཛོད་ཁང་གི་དྲུང་ཆེས་དཔེ་དེབ་ངོ་སྤྲོད་ཞུས། དེ་ནས་སྲིད་སྐྱོང་མཆོག་གིས་དཔེ་དེབ་དབུ་འབྱེད་དང་འབྲེལ་གསུང་དོན།
དེ་རིང་འདིར་སྤྱི་ཟུར་མགོན་པོ་རྡོ་རྗེ་ལགས་ཀྱིས་ལྗགས་རྩོམ་གནང་བའི་ཕྱག་དེབ་སྟོད་སྨད་གཉིས་དབུ་འབྱེད་ཆེད་གལ་ཆེ་དོན་ཆེར་བརྩིས་ནས་ལྷན་རྒྱས་ཚོ་ཕེབས་པ་རེད། དེ་བཞིན་རྡ་ས་བོད་ཀྱི་དཔེ་མཛོད་ཁང་ནས་དཔེ་དེབ་འདི་ཉིད་དཔར་བསྐྲུན་ཞུ་ཆེད་མཐུན་འགྱུར་རོགས་རམ་གནང་བར་ངོས་ཀྱིས་ཐུགས་རྗེ་ཆེ་ཞུ་རྒྱུ་ཡིན། ངོས་རང་སྒེར་ངོས་ནས་མགོན་པོ་རྡོ་རྗེ་ལགས་མཇལ་མྱོང་ཡོད། ཁོང་གིས་དཔེ་དེབ་འདོན་བཞིན་ཡོད། ཅེས་བརྗོད་སྐབས་རང་བཞིན་གྱི་རྡོར་གླིང་སྐོར་མང་པོ་ཞིག་ཡོད་ངེས་རེད་བསམས་བྱུང་། ཁོང་ནི་ཆོས་ཕྱོགས་དང་ནང་མིའི་ཐོག་ནས་གནད་འགག་ཡོད་པའི་གང་ཟག་ཞིག་དང་། རྡོར་གླིང་དུ་དགེ་རྒན་གནང་བ། རང་དབང་གསར་ཤོག་ནང་རྩོམ་སྒྲིག་པ་སོགས་ལས་ཁུར་གནང་བ། ས་གནས་གཞོན་ནུ་འགོ་འཛུགས་གནང་མཁན། སྤྱི་འཐུས་གནང་བ་སོགས་ཀྱི་ལོ་རྒྱུས་ཀྱི་བརྒྱུད་རིམ་ཁག་གསུང་གྲུབ་རྗེས་སྲིད་སྐྱོང་མཆོག་གིས་མུ་མཐུད་ནས་གསུང་དོན། མི་རབས་རྒན་པ་ཚོས་ལོ་རྒྱུས་ལྗགས་རྩོམ་གནང་ཐུབ་ན་དགེ་མཚན་ཆེན་པོ་ཡོད་སྐོར་དང་། ༸གོང་ས་མཆོག་གི་བཀའ་སློབ་ཕེབས་པ་བཞིན། མགོན་པོ་ལགས་ཀྱི་མི་ཚེའི་ལོ་རྒྱུས་དེ་དངོས་གནས་མ་འོངས་མི་རབས་རྗེས་མ་རྣམས་ལ་ཕན་ཐོགས་ཡོང་ངེས་པ་ཡིན་སྐོར། དུས་རབས་གསར་རྙིང་གི་བོད། ཅེས་རྗོད་སྐབས་ལོ་རྒྱུས་གཏིང་ཟབ་ཡོད་ངེས་སྟབས་དེར་བསྔགས་རྗོད་ཞུ་རྒྱུ་ཡིན། ལོ་རྒྱུས་དེ་ཉིད་ཀློག་བདེ་པོ་ཡོད་པར་བརྟེན་གཞོན་སྐྱེས་ཚོས་ལྗགས་ཀློག་གནང་ན་ཕན་ཐོགས་ཆེན་པོ་ཡོད་སྐོར་དང་། ལྷག་པར་མི་རབས་རྒན་པ་ཚོའི་དཀའ་ལས་རྒྱག་སྟངས་དང་བོད་ཀྱི་དངོས་ཡོད་གནས་སྟངས་དེ་གསལ་པོར་མཁྱེན་རྟོགས་ཡོང་བར་མི་རབས་རྒན་པས་ལྗགས་རྩོམ་གནང་བའི་དཔེ་དེབ་ཀློག་རྒྱུ་དེ་གལ་ཆེ་ཡིན་སྐོར་གསུངས་པ་མ་ཟད། རྩོམ་པ་པོ་རང་ཉིད་དཔེ་དེབ་དབུ་འབྱེད་མ་གནང་བའི་ཉིན་གསུམ་གོང་སྐུ་ཚེའི་འཕེན་པ་རྫོགས་པར་སྲིད་སྐྱོང་མཆོག་གིས་གདུང་སེམས་མཉམ་སྐྱེ་དང་སྦྲགས། དམ་པ་དེ་ཉིད་ཀྱིས་ཚེ་རབས་ཕྲེང་བ་ནས་བསགས་པའི་སྡིག་ལྟུང་སྦྱངས་ཤིང་རྣམ་མཁྱེན་རྒྱལ་བའི་གོ་འཕང་མྱུར་དུ་ཐོབ་པའི་སྨོན་ལམ་ཡོད་སྐོར་གསུངས།།
