༢༠༡༦ ཟླ་ ༤ ཚེས་ ༡༡ རེས་གཟའ་ཟླ་བ།

༄༅། །ཕྱི་ལོ་ ༢༠༡༦ ཟླ་ ༤ ཚེས་ ༡༡ ཉིན་གྱི་སྔ་དྲོའི་ཆུ་ཚོད་ ༡༠།༡༥ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་རྒྱལ་ས་ལྡི་ལི་དང་རྒྱ་གར་བྱང་ཕྱོགས་སྡེ་ར་ལྡུན་ཁུལ་གྱི་མཛད་འཕྲིན་ཁག་ལེགས་པར་གྲུབ་རྗེས་བཞུགས་སྒར་དུ་༸ཞབས་སོར་བདེ་བར་འཁོད་ཡོད། དེ་ཡང་མགོན་པོ་གང་ཉིད་མཆོག་ཕྱི་ལོ་ ༢༠༡༦ ཟླ་ ༤ ཚེས་ ༦ ཉིན་རྒྱ་གར་བྱང་ཕྱོགས་ཨུཏྟར་ཁཎྜ་མངའ་སྡེའི་རྒྱལ་ས་སྡེ་ར་ལྡུན་དུ་རྟེན་གཞི་བྱས་པའི་ཝ་ན་མཚམས་ཁང་ Vana Retreat Centre ཞེས་པར་ཆིབས་སྒྱུར་བསྐྱངས་ཏེ་བཀའ་སློབ་སྩལ་བ་དང་།   ཕྱི་ཚེས་ ༧ ནས་ ༡༠ བར་རྒྱ་གར་རྒྱལ་ས་ལྡི་ལིའི་ནང་ཤེས་ཡོན་བསྟི་གནས་ཁང་སོགས་སུ་ཆིབས་སྒྱུར་གྱིས་གཙུག་ལག་སློབ་དཔོན་དང་ཚན་རིག་པ་སོགས་དང་ལྷན།  དེང་དུས་ཤེས་ཡོན་ལམ་ལུགས་ནང་བཟང་སྤྱོད་ཀྱི་སློབ་ཚན་གཏན་འབེབས་གནང་ཕྱོགས་སྐོར་བགྲོ་གླེང་ཚོགས་འདུའི་དབུ་བཞུགས་ཀྱིས། འགྲོ་བ་མིའི་བཟང་སྤྱོད་གོང་སྤེལ་གཏོང་ཐབས། སློབ་གྲྭའི་ནང་བཟང་སྤྱོད་ཀྱི་རིན་ཐང་དང་ཞི་བདེའི་སྐོར། བྱམས་བརྩེ་དང་འཇིག་རྟེན་ཀུན་ཁྱབ་ཀྱི་འགན་འཁུར། བཟང་སྤྱོད་དང་བདེ་སྐྱིད་སོགས་ཀྱི་བརྗོད་གཞིའི་ཐོག་མང་ཚོགས་དང་སློབ་ཕྲུག ཤེས་ལྡན་མི་སྣ་སོགས་ལ་བཀའ་སློབ་དང་། དེ་བཞིན་གསར་འགྱུར་བརྒྱུད་ལམ་ཁག་གཅིག་གི་བཅར་འདྲིར་དང་ལེན་མཛད་པ་སོགས་ཀྱི་མཛད་འཕྲིན་རྒྱ་ཆེ་བསྐྱངས་ཏེ་གོང་ཚེས་ཉིན་ག་གྷལ་གནམ་ཐང་ནས་བཞུགས་སྒར་དུ་ཆིབས་སྒྱུར་བསྐྱངས་སྐབས། རྡ་སའི་མི་མང་སོགས་ཀྱིས་ལག་ཏུ་དཀར་གཙང་མཇལ་དར་དང་བདུག་སྤོས་སོགས་ཐོགས་ཏེ་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་བཅས། །