ཕྱི་ལོ་ ༢༠༡༦ ཟླ་ ༣ ཚེས་ ༡༧ རེས་གཟའ་ཕུར་བུ།

༄༅། །ཕྱི་ལོ་ ༢༠༡༦ ཟླ་ ༣ ཚེས་ ༡༦ ཉིན་གྱི་དགོང་དྲོར་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་གོ་སྒྲིག་འོག བཞུགས་སྒར་རྡ་ས་ཁུལ་གྱི་བོད་རིགས་དང་རྒྱ་གར་ས་གནས་གསར་འགོད་པ་རྣམས་ལ་རྡ་ཤོད་རྡོ་ལ་དར་གསོལ་མགྲོན་ཁང་དུ་གསོལ་སྟོན་ཞིག་གོ་སྒྲིག་ཞུས་ཡོད། ཐེངས་འདིར་ཕྱི་དྲིལ་ལས་ཁུངས་ནས་གསར་འགོད་པ་ཚོར་གསོལ་སྟོན་གོ་སྒྲིག་ཞུས་པ་ཐེངས་གསུམ་པ་ཆགས་ཡོད།

དེ་ཡང་སྐབས་དེར་ཨ་མར་ཨུ་ཇ་ལ་ Amar Ujala དང་། རྒྱ་གར་གྱི་དུས་བབ། Times of India ཨེ་ཨེན་ཨ་ཡི། ANI དང་། TVnews100 ཌིབ་ཡ་ཧི་མཱ་ཅལ། Divya Himachal ཧིན་དུ་སི་ཐན་དུས་བབ། Hindustan Times རུ་ཊར་གསར་ལས་ཁང་། Reuters དེ་བཞིན་བོད་རིགས་གསར་འགོད་པ་བཅས་ཁྱོན་གསར་འགོད་པ་གྲངས་ ༣༩ ཕེབས་ཡོད་པ་མ་ཟད། ཕྱི་དྲིལ་དྲུང་ཆེ་རྣམ་གཉིས་ཀྱང་ཕེབས་འདུག

ཕྱི་དྲིལ་ལས་ཁུངས་ནས་ས་གནས་བརྒྱུད་ལམ་ཁག་གི་གསར་འགོད་པ་རྣམས་ལ་ལོ་འཁོར་གསོལ་སྟོན་གོ་སྒྲིག་ཞུས་དགོས་དོན་ནི། བོད་རིགས་དང་རྒྱ་གར་གྱི་གསར་འགོད་པའི་དབར་འབྲེལ་ལམ་དམ་ཟབ་ཡོང་ཐབས་དང་། ལྷག་པར་བོད་མིའི་སྒྲིག་འཛུགས་དང་ས་གནས་ཀྱི་གསར་འགོད་པའི་དབར་འབྲེལ་ལམ་དམ་ཟབ་ཡོང་སླད་ཡིན་འདུག དེ་བཞིན་གསར་འགྱུར་བརྒྱུད་ལམ་ཁག་གིས་སྤྱི་ཚོགས་ཁྲོད་གོ་རྟོགས་ཀྱི་ལས་དོན་རླབས་ཆེན་སྤེལ་བཞིན་པའི་བྱས་རྗེས་དེར་ངོས་འཛིན་གནང་ཆེད་ཀྱང་ཡིན་འདུག་པ་བཅས།།