༢༠༡༦ ཟླ་ ༣ ཚེས་ ༡༥ རེས་གཟའ་མིག་དམར།
༄༅། །ཕྱི་ལོ་ ༢༠༡༦ ཟླ་ ༣ ཚེས་ ༡༠ ཉིན་གྱི་ཕྱི་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སུད་སིའི་གྲོང་ཁྱེར་ཇི་ནི་ཝར་བཞུགས་གནས་མགྲོན་ཁང་དུ་༸ཞབས་སོར་འཁོད་སྐབས་བོད་མི་རྣམས་ཀྱིས་གྲོ་སོ་ཕྱེ་མར་དང་ཆང་ཕུད་སོགས་འདེགས་འབུལ་གྱིས་ལམ་ནས་ཕེབས་བསུ་གཟབ་རྒྱས་ཞུས་འདུག ཕྱི་ཚེས་ ༡༡ ཉིན་གྱི་སྔ་དྲོ་ཁུལ་དེར་༸གོང་ས་མཆོག་གིས་གསར་འགོད་པ་ཚོ་དང་ལྷན་མཇལ་འཕྲད་སྐབས་མགོན་པོ་གང་ཉིད་མཆོག་གི་སྐུའི་མཛད་འགན་གཙོ་བོ་གསུམ་གྱི་སྐོར་བཀའ་སློབ་སྩལ་བ་མ་ཟད། དེང་དུས་ཤེས་ཡོན་གྱི་སློབ་ཚན་ནང་བྱམས་བརྩེ་དང་བཟོད་སྲན་སོགས་འགྲོ་བ་མིའི་གཤིས་རྒྱུད་དང་འབྲེལ་བའི་བཟང་སྤྱོད་རིན་ཐང་གོང་མཐོར་གཏོང་རྒྱུའི་ཐད་ཤུགས་བརྒྱབ་དགོས་སྐོར་དང་། དེ་སྔ་ལོ་སྟོང་ཕྲག་མང་པོའི་རིང་ཆོས་ནི་བདེ་སྐྱིད་ཀྱི་འབྱུང་ཁུངས་ལྟ་བུ་བྱས་ནས་གནས་ཐུབ་ཡོད་ཀྱང་ད་ཆ་ཆོས་དེ་འཁོན་འཛིན་གྱི་རྒྱུ་རུ་འགྲོ་བཞིན་ཡོད། དེ་ནི་ཧ་ཅང་གི་བློ་ཕམ་ཞིག་རེད།
ངོས་ལ་མཚོན་ན་ཕྱི་ལོ་ ༢༠༡༡ ལོ་ནས་བཟུང་བོད་མིའི་ཆབ་སྲིད་འགོ་ཁྲིད་ཀྱི་ལས་འགན་ནས་བགྲེས་ཡོལ་ཆ་ཚང་ཞུས་པ་ཡིན། ངོས་ཀྱིས་ཐག་གཅོད་དེ་ཡང་དགའ་ཞིང་སྤྲོ་ཞིང་། མ་སྐུལ་དང་བླངས་ཀྱི་སྒོ་ནས་སྤོབས་པ་དང་བཅས་ཐག་གཅོད་བྱས་པ་ཞིག་ཡིན། བོད་མི་བརྒྱ་ཆ་ ༩༩ ངོས་ལ་རེ་བ་དང་ཡིད་ཆེས་བློས་འགེལ་གནང་བཞིན་ཡོད། དེར་བརྟེན་ངོས་ནས་ཀྱང་བོད་ཀྱི་ཆོས་དང་རིག་གཞུང་། ཁོར་ཡུག་སྲུང་སྐྱོབ་ཀྱི་ལས་གཞིའི་ཐོག་གང་ཐུབ་འབད་བརྩོན་ཞུ་བཞིན་ཡོད། བོད་ཀྱི་རིག་གཞུང་བརྗོད་སྐབས་བྱམས་བརྩེར་གཞི་རྩར་གྱུར་བའི་འཚེ་མེད་ཞི་བའི་རིག་གཞུང་ཞིག་ཆགས་ཡོད། དེ་ལྟ་བུའི་རིག་གཞུང་དེ་བདག་པོ་བརྒྱབ་རྒྱུ་དེ་ཚང་མར་ཁེ་ཕན་ཡོད། ཅེས་སོགས་ཀྱི་བཀའ་སློབ་སྩལ། གོང་ཚེས་ཉིན་གྱི་ཕྱེད་ཡོལ་རྒྱལ་ཚོགས་ཀྱི་ཨ་རི་དང་ཁེ་ན་ཌའི་གཏན་འཇགས་གཞུང་ཚབ་ལས་ཁུངས་ཐུན་མོང་གིས་གོ་སྒྲིག་འོག་སུད་སི་གྲོང་ཁྱེར་ཇི་ནེ་ཝར་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༣༡ འཚོགས་བཞིན་ཡོད་པ་དང་སྟབས་བསྟུན། ཇི་ནི་ཝའི་ནང་རྟེན་གཞི་བྱས་པའི་ Graduate Institute of Geneva ཞེས་པའི་བསྟི་གནས་ཁང་དུ་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཀྱིས་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་སྐུ་ཏ་ཝ་ཀོལ་ Tawakkol Abdel-Salam Karman མཆོག་དང་ཨི་རན་གྱི་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་སྐུ་ཤི་རིན་ཨི་བྷ་དི་ Shirin Ebadi མཆོག་གི་སྐུ་ཚབ་ཨི་རན་གྱི་འགྲོ་བ་མིའི་ཐོབ་ཐང་གི་ཁྲིམས་རྩོད་པ་ལྕམ་ལི་ལ་ཨ་ལི་ཀར་མི་ལགས། གནད་ཡོད་མི་སྣ་ཁག་གཅིག་བཅས་ལྷན་ཞུགས་ཀྱིས་འགྲོ་བ་མིའི་ཐོབ་ཐང་གོང་འཕེལ་གཏོང་ཐབས་ཀྱི་གནད་དོན་ཐད་ཟུར་ཚོགས་གནང་འདུག
ཟུར་ཚོགས་སྐབས་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་འགན་འཛིན་གཞོན་པ་ཀེཊ་གིལ་མོར་ Mrs. Kate Gilmore མཆོག་གིས་ལས་རིམ་གཙོ་སྐྱོང་གནང་འདུག སྐབས་དེར་༸གོང་ས་མཆོག་གིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཨ་རི་དང་ཁེ་ན་ཌའི་གཏན་འཇགས་གཞུང་ཚབ་ལས་ཁུངས་ཀྱིས་ལས་རིམ་གོ་སྒྲིག་གནང་བར་ཐུགས་རྗེ་ཆེ་ཞེས་ཞུས་གནང་མཛད་པ་དང་ལྷན་མགོན་པོ་གང་ཉིད་མཆོག་གི་གོང་དུ་གསུང་བཤད་གནང་མཁན་གཉིས་ལའང་ཡི་རང་བསྔགས་བརྗོད་མཛད་པ་དང་སྦྲགས་བཀའ་སློབ་སྩལ་དོན། ང་ཚོས་འགྲོ་བ་མིའི་མདུན་ལམ་གྱི་སྐོར་སྐད་ཆ་འཆད་བཞིན་ཡོད། ང་ཚོའི་སྐད་ཆར་ནུས་ཤུགས་དེ་ཙམ་མེད་ནའང་ཁ་གྲགས་རྒྱུ་དེ་ཧ་ཅང་གལ་ཆེན་པོ་རེད། སྐབས་རེ་མི་འགའ་རེས་འཛམ་གླིང་ནང་རྙོག་གྲ་གང་ཡང་མེད་པར་ཚང་མ་ཡག་པོ་ཡོད་སྐོར་ཤོད་མཁན་ཡོད། དེ་དག་ནོར་འཁྲུལ་རེད། ང་ཚོས་ད་ལྟ་དཀའ་ངལ་མང་དག་ཅིག་འཕྲད་བཞིན་ཡོད། ངོས་ཀྱི་མི་ཚེ་འདིར་མཚོན་ནའང་འཁྲུག་རྩོད་དང་མི་གསོད་ཁྲག་སྦྱོར་བསྟུད་མར་བྱུང་བ་མཐོང་བྱུང་། འཁྲུག་རྩོད་དེ་དག་ནང་མི་མང་ས་ཡ་མང་པོའི་ཚེ་སྲོག་ཤོར་ཡོད། ང་ཚོས་འཐུས་གང་ནས་ཤོར་བ་དང་། མ་འདང་པའི་ཆ་གང་ན་འདུག འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་རྒྱུ་རྐྱེན་གང་ཡིན་ཐོག་རྟོག་ཞིབ་གནང་རྒྱུ་གལ་ཆེན་པོ་ཡིན། ངོས་རང་ནང་པའི་དགེ་སློང་ཞིག་ཡིན་ནའང་སྨོན་ལམ་བརྒྱབ་པ་ཙམ་གྱིས་འཛམ་གླིང་ནང་ཞི་བདེ་བསྒྲུབ་ཐུབ་ཀྱི་ཡོད་པར་ཡིད་ཆེས་བྱེད་ཀྱི་མེད། དེའི་ཚབ་ཏུ་ང་ཚོས་གདེང་སྤོབས་ཆེན་པོས་འཛམ་གླིང་ནང་ཞི་བདེ་བསྐྲུན་ཐབས་ཆེད་ཁ་ཡོད་ལག་ཡོད་ཐོག་ལག་བསྟར་བྱེད་རྒྱུ་ཧ་ཅང་གལ་ཆེན་པོ་རེད། རྙོག་གྲ་བཟོ་མཁན་ཚོ་ལའང་གདེང་སྤོབས་ཆེན་པོ་ཡོད། འོན་ཀྱང་ཁོ་པ་ཚོར་བཟང་སྤྱོད་ཀྱིས་འདང་གི་མེད། དེར་བརྟེན་ང་ཚོས་འབྱུང་འགྱུར་འཛམ་གླིང་འདི་ཞི་བདེ་ལྡན་པ་ཞིག་བསྐྲུན་ཐབས་བྱེད་དགོས། དེ་ལྟར་ན་ད་ལྟའི་ཤེས་ཡོན་གྱི་ལམ་ལུགས་འདིའི་ནང་རྙིང་རྗེ་དང་བཟང་སྤྱོད་ཀྱི་སློབ་གསོ་སྤྲོད་རྒྱུ་ཧ་ཅང་གལ་ཆེན་པོ་ཆགས་ཡོད།
དེང་སྐབས་གོ་ལའི་གནམ་གཤིས་འགྱུར་ལྡོག་དང་དཔལ་འབྱོར་འཕེལ་གྲིབ་ཀྱི་ཡར་མར་ཕར་ཆག་འབྱུང་བཞིན་ཡོད་པ་དེས་ང་ཚོ་ཚང་མར་ཤུགས་རྐྱེན་འཐེབ་བཞིན་ཡོད་པ་ལས་རྒྱལ་མཚམས་གང་ཡང་མེད། ང་ཚོས་རིགས་རུས་དང་རྒྱལ་ཁབ། ཆོས་དད་ཡོད་མེད། ཕོ་མོའི་དབྱེ་བ་སོགས་རིམ་པ་གཉིས་པའི་ཐོག་ནས་ཕྱིན་པ་ཡིན་ན། ང་ཚོ་དང་ཁོ་པ་ཚོ། ཞེས་དབྱེ་འབྱེད་བྱ་རྒྱུའི་འདུ་ཤེས་འཛིན་ནས་རྩོད་གཞི་ཆགས་རྒྱུ་རེད། གལ་ཏེ་ང་ཚོ་ཚང་མ་འགྲོ་བ་མི་རིགས་གཅིག་གྱུར་ཡིན་བསམས་པ་དང་། ཕན་ཚུན་སྤུན་མཆེད་ཕོ་མོའི་འདུ་ཤེས་འཛིན་པའི་ཐོག་ནས་ཕྱིན་པ་ཡིན་ན་འཚེ་བར་གདོང་ལེན་བྱེད་ཐུབ། ཅེས་སོགས་ཀྱི་བཀའ་སློབ་སྩལ། བགྲོ་གླེང་ལྷན་ཚོགས་གྲུབ་མཚམས་མགོན་པོ་གང་ཉིད་མཆོག་གིས་ Palais des Nations ཞེས་པར་བོད་མི་མང་ཚོགས་ ༣༠༠༠ བརྒལ་བར་བཀའ་སློབ་བཀའ་དྲིན་སྩལ་རྗེས་ཕྱི་ཉིན་སྔ་དྲོ་རྒྱ་གར་དུ་ཆིབས་ཞལ་གྱུར་ཡོད་པ་བཅས།།
