༢༠༡༦ ཟླ་ ༣ ཚེས་ ༡༤ རེས་གཟའ་ཟླ་བ།

༄༅། །ཕྱི་ལོ་ ༢༠༡༦ ཟླ་ ༣ ཚེས་ ༡༣ རེས་གཟའ་ཉི་མའི་སྔ་དྲོ་ཆུ་ཚོད་ ༡༠།༣༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་རྡ་སར་༸ཞབས་སོར་བདེ་བར་འཁོད་ཡོད།   ཐེངས་འདིར་༸གོང་ས་མཆོག་ཨ་རིའི་མེ་ཡོ་སྨན་ཁང་དུ་སྐུའི་འཕྲོད་བཞེས་བརྟག་དཔྱད་ལེགས་པར་གྲུབ་རྗེས་ཆོས་འབྲེལ་དང་མང་ཚོགས་ལ་བཀའ་སློབ། དེ་བཞིན་ཚན་རིག་པ་ཁག་གཅིག་དང་ལྷན་བགྲོ་གླེང་མཛད་པ་མ་ཟད། ཕྱི་ཚེས་ ༡༡ ཉིན་སུད་སི་གྲོང་ཁྱེར་ཇི་ནི་ཝའི་ནང་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ཟུར་ཚོགས་ལྷན་ཚོགས་ཤིག་ཏུ་ཇི་ལྟར་གདན་ཞུའི་གསོལ་འདེབས་ཞུ་དོན་ལྟར་ཆིབས་སྒྱུར་བསྐྱངས་ནས་ནོ་བེལ་ཞི་བའི་དེའི་གཟེངས་རྟགས་བཞེས་མྱོང་མཁན་དབུ་ཁྲིད་གཞན་ཁག་གཅིག་དང་ལྷན་འགྲོ་བ་མི་རིགས་སྤྱིའི་བདེ་སྐྱིད་གོང་སྤེལ་གཏོང་ཐབས་ཀྱི་བླང་དོར་བཀའ་སློབ་སྩལ་རྗེས། གོང་ཚེས་ཉིན་རྡ་སའི་ཉེ་འགྲམ་གྷ་གལ་གནམ་ཐང་དུ་༸ཞབས་སོར་འཁོད་སྐབས་ཆེས་མཐོའི་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་དང་།  སྲིད་སྐྱོང་བློ་བཟང་སེངྒེ་མཆོག་ བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གཙོས་གཞུང་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་འཐུས་མི་རྣམས་ཀྱིས་ལག་ཏུ་དཀར་གཙང་མཇལ་དར་དང་།  བོད་མི་ཕོ་མོ་གཉིས་ཀྱིས་གྲོ་སོ་ཕྱེ་མར་དང་ཆང་ཕུད་འདེགས་འབུལ་ཞུས་པ་མ་ཟད།  སྲོལ་རྒྱུན་གྱི་ལམ་ནས་བཀྲ་ཤིས་ཞོལ་པ་སོགས་གཞས་སྣ་འཁྲབ་སྟོན་གྱི་ལམ་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།

སྐབས་དེར་རྒྱ་གར་གྱི་གསར་འགོད་པས་༸གོང་ས་མཆོག་ལ་དྲི་བ་ཞིག་ཕུལ་བར་མགོན་པོ་གང་ཉིད་མཆོག་ཐེངས་འདིར་ཨ་རིར་༸སྐུའི་སྨན་བཅོས་འཕྲོད་བཞེས་བརྟག་དཔྱད་དང་སྐུ་ངལ་གསོ་བཞུགས་གང་ལེགས་མཛད་ཡོད་པ་དང་། སྐུ་གཟུགས་གསལ་ཐང་ཐོག་བཞུགས་སྒར་དུ་ཕྱིར་༸ཞབས་སོར་འཁོད་ཐུབ་པར་ཐུགས་དགྱེས་ ཚོར་ཆེན་པོ་བྱུང་ཞེས་བཀའ་ལན་མཛད་པ་མ་ཟད། སྨན་བཅོས་སྐབས་གཞིས་བྱེས་གཉིས་ཀྱི་བོད་མི་གཙོས་དད་ལྡན་གྲོགས་ཕོ་མོ་བཅས་ཀྱིས་ནད་གསོའི་སྨོན་ལམ་དང་བྱིས་པ་ཚུན་ནས་ཀྱང་དྲག་སྐྱེད་ཆེད་ནད་གསོའི་འཚམས་འདྲི་ཞུས་པར་ཐུགས་རྗེ་ཆེ་ཞུས་གནང་མཛད་ཡོད།  དེ་རྗེས་ཕོ་བྲང་དུ་༸ཞབས་སོར་འཁོད་སྐབས་ཆེས་མཐོའི་ཁྲིམས་ཞིབ་པ་གཞན་གཉིས་མཆོག་གིས་གཙོས་བཀའ་བློན་རྣམ་པ་དང་། བོད་མི་མང་སྤྱི་འཐུས་རྒྱུན་ལས་སོགས་ཀྱིས་གཙོས་དད་ལྡན་སེར་སྐྱ་མང་ཚོགས་རྣམས་ཀྱིས་དགའ་དད་སྤྲོ་གསུམ་གྱི་སྒོ་ནས་ཕེབས་བསུའི་སྣེ་ལེན་གཟབ་རྒྱས་ཞུས་འདུག  གཞན་ཡང་༸གོང་ས་མཆོག་ཕྱི་ཟླ་ ༦ ཚེས་ ༢༡ ཉིན་ཨ་རིར་སླར་ཡང་ཆིབས་སྒྱུར་གྱིས་སལ་ལེག་མངའ་སྡེའི་མང་ཚོགས་རྣམས་ལ་བཀའ་སློབ་སྩལ་རྒྱུ་མ་ཟད།  ཕྱི་ཟླ་ ༩ ཚེས་ ༩ ནས་ ༡༡ བར་བྷེལ་ཇམ་རྒྱལ་ས་བྷར་སེལ་ཁུལ་དུ་ཉིན་གཉིས་དང་ཕྱེད་ཀའི་རིང་སེམས་དང་སྲོག་གི་བགྲོ་གླེང་ལྷན་ཚོགས་ནང་ལྷན་ཞུགས་མཛད་རྒྱུ་མ་ཟད།  ཟླ་ ༩ ཚེས་ ༡༧།༡༨ ཉིན་ཕ་རན་སིའི་གྲོང་ཁྱེར་སི་ཊར་སི་བྷག་ཏུ་ཆོས་འབྲེལ་ཉིན་གཅིག་རིང་དཔལ་མགོན་འཕགས་པ་ཀླུ་སྒྲུབ་ཀྱི་བྱང་ཆུབ་སེམས་འགྲེལ་དང་སྤྱན་རས་གཟིགས་ཀྱི་དབང་སྩལ་ གནང་མཛད་རྒྱུ་ཡིན་འདུག ཆོས་འབྲེལ་ལེགས་གྲུབ་རྗེས་མང་ཚོགས་ལ་ཆོས་ལུགས་དང་མ་འབྲེལ་བའི་བཟང་སྤྱོད་སྐོར་བཀའ་སློབ་སྩལ་རྒྱུ་ཡིན་འདུག །