༢༠༡༠ ཕྱི་ཟླ་ ༥ ཚེས་ ༡༥ རེས་གཟའ་སྤེན་པ།
༄༅། །ཕྱི་ལོ་ ༢༠༡༠ ཟླ་ ༥ ཚེས་ ༡༥ ཉིན་ཨུ་རུ་སུའི་རྒྱལ་ས་མོ་སི་ཀོའི་ནང་རྟེན་གཞི་བྱས་པའི་ཨུ་རུ་སུའི་གྲོས་ཚོགས་གོང་མའི་ཚོགས་ཁང་ཆེན་མོའི་ནང་། ཨུ་རུ་སུའི་ཕྱི་སྲིད་བློན་ཆེན་སྐུ་ཞབས་སར་ཇི་ལབ་རོབ་ (Sergei Lavrov) མཆོག་གིས་གལ་ཏེ་ཕྱོགས་གཉིས་པོས་ཆོས་དང་ཆབ་སྲིད་སོ་སོར་དབྱེ་མཚམས་གསལ་པོ་བཟུང་ན། ཨུ་རུ་སུ་སྲིད་གཞུང་གིས་བོད་ཀྱི་གནད་དོན་སེལ་ཆེད་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་། རྒྱ་ནག་གཞུང་གཉིས་དབར་འབྲེལ་མོལ་ཡོང་རྒྱུར་འབད་བརྩོན་དང་མཐུན་འགྱུར་ཞུ་རྒྱུའི་གྲ་སྒྲིག་ཨང་གསར་ཡོད་སྐོར་དང་། དེ་བཞིན་སྲིད་བློན་མཆོག་གིས་ཨུ་རུ་སུའི་སྲིད་གཞུང་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་རྒྱ་ནག་གཞུང་གི་འབྲེལ་བའི་འཕེལ་རིམ་ལ་གཟབ་ནན་ཐོག་རྟོག་ཞིབ་བྱེད་བཞིན་ཡོད་སྐོར་བརྗོད་ཡོད། ཕྱོགས་མཚུངས་༸གོང་ས་མཆོག་ཨུ་རུ་སུའི་ནང་ཆིབས་སྒྱུར་དང་འབྲེལ་བའི་ཐོག་དྲི་བ་བཏོོན་པར་སྲིད་བློན་གྱིས། ང་ཚོས་མཐུན་འགྱུར་བསྐྲུན་རྒྱུའི་གྲ་སྒྲིག་ཡོད་ཅེས་གསུངས། ཨུ་རུ་སུའི་སྤྱི་མཐུན་རྒྱལ་ཁབ་ཀྱི་ནང་དུ་ནང་པ་གྲངས་ ༧༠༠༠༠༠ ཙམ་ཡོད་པ་མ་ཟད། ཨུ་རུ་སུའི་རྒྱལ་ཁབ་ནང་ཡེ་ཤུའི་ཆོས་ལུགས་དང་། ཁ་ཆེ། ཇིའུ་བཅས་ཆོས་ལུགས་གྲགས་ཆེ་བ་གཞན་དང་མཚུངས་པར་ནང་ཆོས་དེ་ཡང་ཨུ་རུ་སུ་གཞུང་གིས་ངོས་ལེན་ཡོད་པའི་ཆོས་ལུགས་ཤིག་ཆགས་ཡོད།།
