༢༠༡༦ ཟླ་ ༣ ཚེས་ ༤ རེས་གཟའ་པ་སངས།
༄༅། །ཕྱི་ལོ་ ༢༠༡༦ ཟླ་ ༢ ཚེས་ ༢༩ ཉིན་གྱི་སྔ་དྲོ་ཆུ་ཚོད་ ༨།༣༠ ཙམ་ལ་རྒྱ་གར་བྱང་ཕྱོགས་ཨུཏྟར་ཁཎྜ་ Uttarkhand མངའ་སྡེའི་རྒྱལ་ས་སྡེ་ར་ལྡུན་གྱི་ཁྱབ་ཁོངས་ཧར་པ་པུར་འདོད་རྒུ་གཡུ་རྒྱལ་གླིང་བོད་མིའི་གཞིས་ཆགས་ཀྱི་རྒས་གསོ་ཁང་གི་ཉེ་འཁྲིས་སུ་མ་སུ་རི་བོད་ཁྱིམ་གྱི་འཛིན་རིམ་བཅུ་པའི་སློབ་ཕྲུག་རྡོ་རྗེ་ཚེ་རིང་ལགས་ཀྱིས། བོད་དོན་ཆེད་རང་ལུས་མེར་སྲེག་བཏང་ཡོད། སྐབས་དེར་ཁོང་ལྡི་ལིའི་སབ་དར་ཇངྒ་ Safdarjung hospital སྨན་ཁང་ནང་མྱུར་སྐྱོབ་བྱས་ཡོད་ཀྱང་། ཕྱི་ཚེས་ ༣ ཉིན་གྱི་ཕྱི་དྲོ་ཆུ་ཚོད་ ༨།༣༠ ཙམ་ལ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་འདུག
དེ་ཡང་ཁོང་མ་གྲོངས་གོང་སྨན་ཁང་ནས་ཁོང་གིས་རང་ལུས་མེར་སྲེག་བཏང་དགོས་པའི་སྐོར་ལ་གསུང་དོན། ངའི་མིང་ལ་རྡོ་རྗེ་ཚེ་རིང་ཡིན། ང་རང་ལོ་བཅུ་དྲུག་ཡིན། བོད་ཁྱིམ་སློབ་གྲྭའི་སློབ་ཕྲུག་ཡིན། ཕྱི་ལོ་ ༡༩༥༩ ལོར་བོད་རྒྱ་ནག་མངའ་འོག་ཏུ་བསྒྱུར་བ་རེད། བོད་མི་ཁ་ཤས་བོད་ནང་དང་། རྒྱ་གར། ཕྱི་རྒྱལ་ཡུལ་གྲུ་ཁག་མང་པོའི་ནང་བྲོས་དགོས་བྱུང་བ་དང་། ངས་ཕ་མ་གཉིས་བློས་བཏང་ནས་བོད་དོན་ཆེད་རང་ལུས་མེར་སྲེག་བཏང་བ་ཡིན། མཐར་༸གོང་ས་མཆོག་སྐུ་ཚེ་ཁྲི་ལོ་ནས་ཁྲི་ལོར་བརྟན་པ་དང་། བོད་རང་བཙན་མྱུར་དུ་ཐོབ་པའི་སྨོན་ལམ་ཡོད་སོགས་གསུང་ནས་བོད་རྒྱལ་ལོ་ཞེས་བསྒྲགས་འདུག །
