ཕྱི་ལོ་ ༢༠༡༦ ཟླ་ ༢ ཚེས་ ༡༦ རེས་གཟའ་མིག་དམར།
༄༅། །ཁམས་དཀར་མཛེས་ཏྲེ་ཧོར་ལྕོག་རི་དགོན་གྲོང་གཉིས་ནས་༸རྒྱལ་བའི་སྐུ་ཕྱྭའི་ཞབས་རིམ་གསོག་སྒྲུབ་དང་འབྲེལ། རྒྱ་ནག་གཞུང་གི་ཉེན་རྟོག་པས་ལྕོག་རི་དགོན་པའི་མཁན་པོ་དཔལ་དགའ་ལགས་དང་དགེ་བཤེས་ཨོ་རྒྱན་ལགས་རྣམ་གཉིས་འཇུ་བཟུང་བཙན་འཁྲིད་བྱས་ཡོད་འདུག
དེ་ཡང་བརྒྱུད་ལམ་ཁག་གཅིག་གི་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༦ ཟླ་ ༡ ཚེས་ ༢༥ ཉིན་ཁམས་དཀར་མཛེས་ཏྲེ་ཧོར་ལྕོག་རི་དགོན་དུ་ཏྲེ་ཧོར་སེར་སྐྱ་མི་མང་ཡོངས་ནས། ལྕོག་རི་དགོན་པར་༸རྒྱལ་བའི་སྐུ་ཕྱྭའི་ཞབས་རིམ་གསོག་སྒྲུབ་དང་འབྲེལ་བའི་ཐོག་ནས། ལྕོག་རི་དགོན་པའི་མཁན་པོ་དཔའ་དགའ་ལགས་དང་དགེ་བཤེས་ཨོ་རྒྱན་ལགས་རྣམ་གཉིས་རྒྱ་ནག་གཞུང་གི་ཉེན་རྟོག་པས་ཉིན་ཤས་གོང་འཇུ་བཟུང་བཙན་འཁྲིད་ཀྱིས་འདྲི་རྩད་བྱེད་བཞིན་ཡོད་འདུག
གཞན་ཡང་རྒྱ་ནག་གཞུང་གིས་ལྕོག་རི་སེར་སྐྱ་མི་མང་གིས་ཡར་ལངས་བྱ་དོགས་ཀྱིས་ལྕོག་རི་དགོན་གྲོང་གཉིས་ཀྱི་གཡས་གཡོན་དུ་དྲག་དམག་ཕོན་ཆེན་འགྲེམས་འཇོག་བྱས་ཡོད་འདུག་པ་མ་ཟད། ཁུལ་དེའི་ཁ་པར་དང་སྤྱི་ཚོགས་དྲ་རྒྱ་སོགས་བཀག་སྡོམ་བྱས་ཟིན་སྟབས། ད་ལྟའི་ཆར་ཞིབ་ཕྲའི་གནས་ཚུལ་ཤེས་རྟོགས་ཐུབ་རྒྱུ་ཧ་ཅང་ཁག་པོ་ཆགས་འདུག
མཁན་པོ་དཔའ་དགའ་ལགས་ནི་དེ་སྔོན་རྒྱ་གར་ལྷོ་ཕྱོགས་འབྲས་སྤུངས་དགོན་ནས་དགེ་བཤེས་ཐོན་རྗེས་བོད་དུ་ལོག་ཡོད་པ་དང་། ད་ལྟའི་ཆར་ལྕོག་རི་དགོན་པའི་མཁན་པོ་ཡིན་འདུག ཁོང་ད་ལྟ་དགུང་ལོ་ ༤༠ མ་ཟིན་ཙམ་ཡིན་ཞིང་། ཕ་ཡུལ་བྲག་མགོ་རྫོང་མཚོ་སྒོ་ཤང་མཚོ་སྒོ་གྲོང་ནས་ཡིན་འདུག
དེ་བཞིན། དགེ་བཤེས་ཨོ་རྒྱན་ལགས་ནི་ཏྲེ་ཧོར་ནས་ཡིན་ཞིང་དེ་སྔོན་རྒྱ་གར་ལྷོ་ཕྱོགས་སེ་ར་ནས་དགེ་བཤེས་ཐོན་རྗེས་བོད་དུ་ལོག་ཡོད་པ་དང་། ད་ལོ་ཕལ་ཆེར་དགུང་ལོ་ ༥༠ ཙམ་ཡིན་འདུག་པ་བཅས། །
