༢༠༡༠ ཟླ་ ༥ ཚེས་ ༡༡ རེས་གཟའ་མིག་དམར།
༄༅། །ཕྱི་ལོ་ ༢༠༡༠ ཟླ་ ༥ ཚེས་ ༡༡ ཉིན་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་གིས་གོ་སྒྲིག་ཐོག་བོད་མདོ་ཁམས་སྐྱེ་རྒུ་མདོར་ས་ཡོམ་གྱི་གོད་ཆག་བྱུང་བའི་བདུན་ཚིགས་བཞི་པར་མཆོད་འབུལ་དང་སྨོན་ལམ་རྒྱ་ཆེ་གནང་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༧ ཐོག་ཇི་ལྟར་གསོལ་འདེབས་ཞུས་དོན་ལྟར་ཚོགས་མགོན་དུ་དཔལ་རྒྱལ་བ་ཀརྨ་པ་རིན་པོ་ཆེ་མཆོག་དབུ་བཞུགས་ཐོག་བཙན་བྱོལ་བོད་གཞུང་གི་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་དང་། ཁྲིམས་ཞིབ་པ་གཞན་གཉིས། སྤྱི་འཐུས་རྒྱུན་ལས་རྣམ་པ། ཕྱོགས་མཚུངས་རྣམ་གྲྭ་ཕན་བདེ་ལེགས་བཤད་གླིང་གི་མཁན་རིན་པོ་ཆེ་དང་དགེ་འདུན་འདུས་མང། རྡ་སའི་ཉེ་འཁོར་གྱི་དགོན་སྡེ་ཁག་གི་གྲྭ་བཙུན། སེར་སྐྱ་མི་མང་བཅས་མི་གྲངས་ ༡༠༠༠ བརྒལ་བ་འདུ་འཛོམས་ཐོག་མཆོད་འབུལ་སྨོན་ལམ་རྒྱ་ཆེ་གནང་ཡོད། དེ་བཞིན་མདོ་ཁམས་ཆུ་བཞི་སྒང་དྲུག་གི་ཚོགས་གཙོ་དགེ་བཤེས་གཡུ་དྲུང་རྒྱལ་མཚན་ལགས་ཀྱིས་སྐྱབ་ཐོ་སྒྲོགས་སྦྱང་གནང་བའི་སྙིང་དོན།
མདོ་ཁམས་ཆུ་བཞི་སྒང་དྲུག་གི་སྒྲིག་འཛུགས་འོག་གདུང་སེམས་མཉམ་སྐྱེ་ཆེད་ས་གནས་ཁག་ཏུ་སྨོན་ལམ་གསོལ་འདེབས་དང་མ་ཌྷི་གསོག་སྒྲུབ། ས་གནས་རྒྱུན་ལས་ཁག་གིས་དཔལ་འབྱོར་འདུ་འགོད་བཅས་བྱས་པ་ཧིན་སྒོར་ ༥༡༡༧༩ རྡ་ས་ས་གནས་འགོ་འཛིན་ལ་རྩིས་སྤྲོད་བྱེད་ཐུབ་པ་བྱུང་ཡོད། ས་ཡོམ་གྱི་གོད་ཆག་ཁྲོད་འདས་གསོན་དེ་དག་མངོན་མཐོ་དང་ངེས་ལེགས་ཀྱི་གོ་འཕང་འཐོབ་ཆེད་འཕགས་མཆོག་འདུས་པ་རྒྱ་མཚོར་བསྙེན་བཀུར་གསོལ་ཇ་དང་བཞེས་བག དགེ་འདུན་བཙུན་གསུམ་ལ་ཧིན་སྒོར་ ༡༠༠ རེ་དད་གདུང་དྲག་པོས་འབུལ་ལམ་ཞུས་པ་ལགས་ན། གོད་ཆག་འོག་རྐྱེན་འདས་སུ་གྱུར་བ་རྣམས་འཁོར་བ་དང་ངན་སོང་གི་གནས་སུ་མི་ལྟུང་བར་ཐར་པ་དང་ཐམས་ཅད་མཁྱེན་པའི་གོ་འཕང་རིན་པོ་ཆེར་འདྲེན་སྟོན་ཡོང་བའི་གསོལ་བ་ཕུར་ཚུགས་སུ་འདེབས་རྒྱུ་དང་། གཞན་ཡང་བཙན་བྱོལ་བོད་གཞུང་གི་མཛད་གཙོ་རྣམ་པ་དང་། སྲི་ཞུ་བ་རྣམ་པ། མི་མང་འདིར་འདུས་ཡོངས་ཀྱིས་དགེ་སྦྱོར་བསྔོ་སྨོན་བཟང་པོའི་ནུས་མཐུས་སྐྱེ་འགྲོ་རྣམས་ཐར་པའི་གོ་འཕང་རྙེད་པའི་རྒྱུ་རྐྱེན་བཟང་པོར་གྱུར་ཅིག ཅེས་སྒྲོགས་སྦྱང་གནང་ཡོད་པ་བཅས།།
