ཕྱི་ལོ་ ༢༠༡༦ ཟླ་ ༡ ཚེས་ ༡༥ རེས་གཟའ་ཕུར་བུ།
༄༅། །ཕྱི་ལོ་ ༢༠༡༦ ཟླ་ ༡ ཚེས་ ༡༥ ཉིན་ཨ་རིའི་གཞུང་གི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ས་རཱ་སི་ཝེལ་ Sarah Sewall མཆོག་རྡ་སར་ཆེད་ཕེབས་གནང་ཡོད།
དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༢།༣༠ ཙམ་ལ་ལྕམ་སྐུ་མཆོག་རྡ་སའི་ཉེ་འགྲམ་ག་གྷ་གལ་གནམ་ཐང་དུ་ཕེབས་འབྱོར་སྐབས་བཀའ་དྲུང་གཡུ་ཐོག་ཀརྨ་དགེ་ལེགས་ལགས་དང་། དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས། དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་དངོས་གྲུབ་རྡོ་རྗེ་ལགས་སོགས་ཀྱིས་ལྕམ་སྐུ་མཆོག་སྐུ་འཁོར་དང་བཅས་པར་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
དེ་ཡང་ལྕམ་སྐུ་མཆོག་ཕྱི་ཚེས་ ༡༥།༡༦ བཅས་ཉིན་གྲངས་གཉིས་རིང་བཞུགས་སྒར་ཁུལ་དུ་མཛད་འཆར་ཁྲོད་༸གོང་ས་མཆོག་མཇལ་ཁ་ཞུ་རྒྱུ་མ་ཟད། བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་གཙོས་འབྲེལ་ཡོད་མི་སྣ་ཁག་གཅིག དེ་བཞིན་གཞུང་དང་གཞུང་འབྲེལ་མིན་པའི་བསྟི་གནས་ཁང་བཅས་ལ་འཚམས་གཟིགས་སུ་ཕེབས་ནས་བོད་ཀྱི་ཐུན་མིན་རིག་གཞུང་འགྲེམས་སྟོན་ཁག་ལ་གཟིགས་ཞིབ་དང་བོད་ཀྱི་ཐུན་མིན་ཆོས་དང་རིག་གཞུང་སྲུང་སྐྱོབ། བོད་མིར་ཤེས་ཡོན་གོ་སྐབས་བསྐྲུན་རྒྱུ་སོགས་ཀྱི་སྐོར་བཀའ་མོལ་གནང་རྒྱུའི་མཛད་འཆར་ཡོད་འདུག ཁོང་དང་ལྷན་དུ་ཨ་རིའི་གཞུང་འབྲེལ་གནད་ཡོད་མི་སྣ་ཁག་གཅིག་ཀྱང་ཕེབས་ཡོད་འདུག་པ་བཅས། །
