༢༠༡༦ ཟླ་ ༡ ཚེས་ ༧ རེས་གཟའ་ཕུར་བུ།
༄༅། །མཚུངས་མེད་བལ་ཡུལ་ཡང་ལེ་ཤོད་༸སྐྱབས་རྗེ་བདེ་བར་གཤེགས་པ་བྱ་བྲལ་སངས་རྒྱས་རྡོ་རྗེ་རིན་པོ་ཆེ་མཆོག་གི་རྗེས་འཇུག་སློབ་ཚོགས་ཡོངས་ཀྱི་དྲུང་དུ།
ཆེད་ཞུ། སྔ་འགྱུར་འོད་གསལ་རྫོགས་པ་ཆེན་པོའི་རྒྱུད་འཛིན་རིག་འཛིན་གྲུབ་བརྙེས་ཡོངས་ཀྱི་སྤྱི་དཔལ་ཆེན་པོ་༸སྐྱབས་རྗེ་བྱ་བྲལ་སངས་རྒྱས་རྡོ་རྗེ་རིན་པོ་ཆེ་མཆོག་ཕྱི་ལོ་ ༢༠༡༥ ཟླ་ ༡༢ ཚེས་ ༣༠ ཉིན་དགུང་གྲངས་ ༡༠༥ ལ་ཕེབས་པའི་ཐོག་དགོངས་པ་གཞན་དོན་དུ་གཤེགས་ཚུལ་བསྟན་པ་དེ་ནི་རྒྱལ་བསྟན་སྤྱི་དང་། ཡང་སྒོས་སྔ་འགྱུར་རྙིང་མའི་བསྟན་པར་ཤིན་ཏུ་ཕངས་པའི་ཡིད་སྐྱོའི་གནས་སུ་གྱུར་པ་བཞིན། བོད་མི་མང་སྤྱི་འཐུས་ལྷན་ཚོགས་ལ་ཡིད་གདུང་དྲག་པོ་བྱུང་ཞིང།
དེ་ཡང་སྐྱེས་མཆོག་དམ་པ་དེ་ཉིད་ནི། བོད་རབ་བྱུང་བཅོ་ལྔ་པའི་ཆུ་གླང་ཕྱི་ལོ་ ༡༩༡༣ ལོའི་བོད་ཟླ་ ༥ ཚེས་ ༡༠ ཉིན་ཁམས་ཉག་རོང་གི་ས་ཆར། ཡབ་པདྨ་དོན་གྲུབ་དང། ཡུམ་བསོད་ནམས་མཚོ་གཉིས་ཀྱི་སྲས་སུ་སྐུ་བལྟམས་ཤིང། རྗེ་འདི་ཉིད་ནི་སྤྲུལ་པའི་གཏེར་ཆེན་བདུད་འདུལ་རྡོ་རྗེའི་དམ་ཆོས་དགོངས་པ་ཡོངས་འདུས་ཀྱི་ལུང་བྱང་དང། ཉག་བླ་པདྨ་བདུད་འདུལ་གྱི་ཞལ་སློབ་གཡོན་རུ་འཆི་མེད་རྡོ་རྗེའི་མ་འོངས་ལུང་བསྟན། གཏེར་ཆེན་བདུད་འཇོམས་འཇིགས་བྲལ་ཡེ་ཤེས་རྡོ་རྗེ་སོགས་ཀྱིས་བསླུ་མེད་རྡོ་རྗེའི་གཏེར་ལུང་དུ་མ་ནས་ཡང་ཡང་ལུང་དུ་བསྟན་པ་བཅས་ཀྱི་སྐྱེས་མཆོག་དམ་པ་ཞིག་ཡིན།
སྐྱབས་རྗེ་གང་ཉིད་ཀྱིས་རིས་སུ་མ་ཆད་པའི་མཁས་གྲུབ་གཉིས་ལྡན་གྱི་སྐྱེས་ཆེན་དམ་པ་བཞི་བཅུ་ལྷག་གི་ཞབས་ལ་གཏུགས་ནས་ཟབ་པའི་གདམས་ངག་མང་པོ་ཞིག་གསན་ཡོད་པ་དང། ལྷག་དོན་དུ་པན་ཆེན་བི་མ་ལའི་རྣམ་འཕྲུལ་མཁན་ཆེན་ངག་དབང་དཔལ་བཟང་ངམ་པདྨ་ལས་འབྲེལ་རྩལ་གྱིས་རྗེས་སུ་བཟུང་ནས། མི་ལོ་དྲུག་དང་ཟླ་བ་ལྔའི་བར་དུ་མཉེས་པ་གསུམ་གྱིས་ལེགས་པར་བསྟེན་ནས་ལམ་དང་པོ་སྔོན་འགྲོ་ནས་འཇུག་རིམ་མཐར་ཆགས་སུ་འོད་གསལ་གསང་བ་ཁྲེགས་ཆོད་ཐོད་རྒལ་གྱི་བར་རྒྱུད་ལུང་མན་ངག་གི་ཆོས་ཚུལ་རྣམས་བུམ་པ་གང་བྱོས་ཀྱི་ཚུལ་དུ་གནང་བ་ཐུགས་ཉམས་སུ་བཞེས་པར་བརྟེན། རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་ཐུགས་ལ་འཁྲུངས། སྣང་བཞིའི་རྣལ་འབྱོར་མངོན་དུ་གྱུར། མཁས་དང་གྲུབ་པའི་གོ་འཕང་མཐོན་པོར་གཤེགས་པ་སོགས་ཉམས་རྟོགས་ཡོན་ཏན་གྱིས་ཐུགས་རྒྱུད་རབ་ཏུ་ཕྱུག་པར་གྱུར།
རྗེ་འདི་ཉིད་ཀྱིས་བོད་ཀྱི་རྒྱལ་ཚབ་རྭ་སྒྲེང་རིན་པོ་ཆེའི་དབུ་བླ་མཛད་པ་དང། གཞན་ཡང་རྨད་བྱུང་སྐྱེས་རབས་ཀྱི་ཕྲེང་བ་ཚར་དུ་དངར་བའི་བླ་སྤྲུལ་ཆེ་ཆུང་གང་མང་དང། ལུང་དང་རྟོགས་པའི་ཡོན་ཏན་གྱིས་ཕྱུག་པའི་དམ་པའི་སྐྱེས་བུ།
ཆེན་པོའི་ལུང་དང་ཐམ་ཀས་མངོན་པར་མཐོ་བའི་དཔོོན་ཆེན། རིགས་རུས་མངའ་ཐང་སྟོབས་འབྱོར་གྱིས་དྲེགས་པའི་སྡེ་དཔོན་མི་དྲག་དད་འབྱོར་གཏོང་ཕོད་འཕགས་ནོར་གྱིས་བརྒྱན་པའི་སྦྱིན་བདག་ཕོ་མོ་སོགས་བོད་མདོ་དབུས་ཁམས་གསུམ་གྱི་མི་སྣ་དུ་མ་ཙམ་དུ་མ་ཟད། འཛམ་གླིང་ཤར་ནུབ་ཀྱི་སྐྱེས་བུ་དུ་མས་གདུལ་བྱ་མཆོག་དམན་དུ་མ་ལ་ངོ་བསྲུང་རེ་དོགས་ཀྱིས་མཚོན་ཆོས་བརྒྱད་སྤྲོས་པའི་མངོན་ཞེན་ཕྲ་མོ་ཙམ་གྱིས་སྐུ་ཚེ་ཧྲིལ་པོར་མ་གོས་པར། ཉིན་རེ་བཞིན་ཡུལ་དང་སྐད་རིགས་མི་གཅིག་པའི་སྐྱེ་བོ་དཔག་ཏུ་མེད་པ་རྣམས་ལ་ཞལ་ཏ་བསླབ་བྱ་དང་། རྐྱེན་སེལ་བཀའ་དབང་བྱིན་རླབས་ཀྱི་འབྲེལ་བ་མ་ཐོབ་པ་མེད་པའི་སྒོ་ནས་བློ་ལྡན་དོན་གཉེར་ཅན་རྣམས་ཀྱི་རྒྱུད་ལ་ཐར་པའི་ས་བོན་བསྐྲུན། དུས་རྒྱུན་དུ་གང་ཉིད་ཀྱིས་དཀར་ཟས་ཁོ་ན་བསྟེན་ཅིང་གཞན་ལ་སེམས་ཅན་གྱི་སྲོག་གཅོད་མི་རུང་བ་དང། ཤ་ཁྲག་གི་ཁ་ཟས་བསྟེན་མི་རུང་བ། བསྟེན་པའི་ཉེས་དམིགས། མ་བསྟེན་པའི་ཕན་ཡོན་སོགས་ཀྱི་བཀའ་སློབ་དང་ལྗགས་རྩོམ་དུ་མ་གནང། ཟང་ཟིང་དད་དངོས་འབུལ་བ་རྣམས་ཕྲ་མོ་ཙམ་ཡང་ཆུད་ཟོས་སུ་མ་སོང་བར་སྒྲུབ་སྡེ་ཁག་ཏུ་བཞུགས་པའི་སྤོང་བ་བསམ་གཏན་པ་རྣམས་ལ་སྒྲུབ་རྒྱགས་སྦྱོར་འཇགས་མཛད་པ་དང། སྨྱུང་གནས་དཀར་པོ་ཆ་བརྒྱད་ཀྱི་མཐུན་རྐྱེན་སྦྱོར་བ་སོགས་མཛད།
སྐྱབས་རྗེ་མཆོག་གིས་དད་ལྡན་ཡོངས་ཀྱི་ཞུས་ངོར་བསྩལ་བའི་ལྗགས་རྩོམ་གྱི་སྐོར་ནི། མདོ་རྒྱུད་བསྟན་བཅོས་དང་འབྲེལ་བའི་ལུང། སྒྲ་ཚད་དངོས་སྟོབས་དང་མཐུན་པའི་རིགས་པ། གསལ་བྱེད་མན་ངག་དང་སྦྱར་བའི་གོ་བ་སོགས་མདོར་ན་ཚིག་སྙན་ལ་དོན་བརླིང་པའི་བསྟན་བཅོས་ཡང་དག་གི་མཚན་ཉིད་ཚང་བ། བརྒལ་ལན་དང། གདན་རབས། བསྟོད་ཚོགས། ཞལ་གདམས། རྫོགས་ཆེན་སྙན་རྒྱུད་ཀྱི་སྐོར། དཀར་ཆག ཆོས་འབྱུང། ཕྱག་ལེན། བསྙེན་སྒྲུབ་ལས་སྦྱོར། གར་ཐིག་དབྱངས་རོལ། བཅའ་འབུད་རྡུང་གསུམ་གྱི་སྐོར་བཅས་སྔ་ཕྱི་ཡོངས་བསྡོམས་པོད་ཆེན་ལྔ་ཙམ་བཞུགས་ཡོད་འདུག
ལྷག་དོན་སྐུ་ཚེ་ཧྲིལ་པོར་འདོད་ཆུང་ཆོག་ཤེས་སོགས་ལ་བརྟེན་ནས་སྦས་པའི་རྣལ་འབྱོར་པ་ཆེན་པོ་སྔ་འགྱུར་རྙིང་མ་པ་སྤྱིའི་ངོས་ནས་དབུ་འཛིན་གནང་རྒྱུའི་གསོལ་འདེབས་སྙན་གསན་ཨུ་ནན་ཞུས་ཀྱང་ཞལ་བཞེས་མ་གནང་བ་སྐུ་ཚེ་གང་པོར་མཚན་སྙན་གྲགས་ཐོབ་གོ་ས་སོགས་ལ་གཏན་ནས་མི་དགྱེས་ཤིང་སྤྲོས་པ་ཐམས་ཅད་ཡོངས་སུ་དོར་བའི་ངེས་དོན་བྱ་བཏང་གི་རྣལ་འབྱོར་བ་ཆེན་པོ་ཞིག་ཡིན། དམ་པ་དེ་ཉིད་དགོངས་པ་གཞན་དོན་དུ་གཤེགས་ཚུལ་མཛད་པ་འདིས་སངས་རྒྱས་ཀྱི་བསྟན་པ་སྤྱི་དང། ཁྱད་པར་གང་གི་སྐྱོང་ཡུལ་རྣམས་ལ་གོད་ཆག་ཆེན་པོ་བྱུང་བ་ནི་བརྗོད་མ་དགོས་པ་ཞིག་ཡིན། དེར་བརྟེན་ཞིང་གཤེགས་དམ་པའི་སློབ་ཚོགས་དང་། སྐུ་འཁོར་བཅས་ལ་བོད་མི་མང་སྤྱི་མཐུས་ལྷན་ཚོགས་ནས་ཐུགས་གསོ་ཞུ་རྒྱུ་བཅས། བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་ ༢༠༡༦ ཟླ་ ༡ ཚེས་ ༧ ལ་
ཕུལ།།
