༢༠༡༦ ཟླ་ ༡ ཚེས་ ༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༦ ཟླ་ ༡ ཚེས་ ༤ ཉིན་རྒྱ་གར་རྒྱལ་ས་ལྡི་ལི་གསར་པའི་ཨོ་བྷོ་རོའི་མགྲོན་ཁང་དུ་ Oberoi Hotel ༸གོང་ས་མཆོག་དབུ་བཞུགས་ཐོག་མགོན་པོ་གང་ཉིད་མཆོག་དང་ཐུགས་འདྲིས་ཧ་ཅང་ཆེ་བའི་རྒྱ་གར་བ་ཁག་གཅིག་གིས། ༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༠ ཕེབས་པའི་གྱ་སྟོན་སྲུང་བརྩི་ཞུ་རྒྱུ་ཡིན་འདུག སྤྱིར་༸གོང་ས་མཆོག་ཕྱི་ལོ་ ༢༠༡༥ ཟླ་ ༧ ནང་དགུང་གྲངས་ ༨༠ ཕེབས་ཡོད་ཀྱང་མགོན་པོ་གང་ཉིད་མཆོག་གི་སྐུའི་གསང་གསུམ་གྱི་མཛད་འཕྲིན་བརྗོད་ཀྱིས་མི་ལང་པ་ཞིག་ཡོད་པར་བརྟེན། ད་བར་མཛད་ཁོམ་མ་བྱུང་སྟབས་རྒྱ་གར་བ་ཚོར་གྱ་སྟོན་སྲུང་བརྩི་ཞུ་རྒྱུའི་གོ་སྐབས་ཐོབ་མེད། འོན་ཀྱང་ཐེངས་འདིར་༸གོང་ས་མཆོག་བྷེང་ལོར་ནས་རྒྱ་གར་རྒྱལ་ས་ལྡི་ལིར་༸ཞབས་སོར་འཁོད་པའི་དུས་བཟང་དང་བསྟུན། གྱ་སྟོན་གཟབ་རྒྱས་ངང་སྲུང་བརྩི་ཞུ་རྒྱུ་ཡིན་འདུག སྐབས་དེར་རྒྱ་གར་གྱི་རོལ་མོའི་སྒྱུ་རྩལ་བ་ཨམ་ཇེ་དི་ཨ་ལི་ཁཱང་ Ustad Amjad Ali Khan དང་ཁོང་གི་སྲས་གཉིས་བཅས་ཀྱིས་རོལ་མོའི་ལམ་ནས་༸གོང་ས་མཆོག་སྐུ་ཚེ་བསྐལ་བརྒྱར་བརྟན་པ་དང་མཛད་འཕྲིན་སྔར་ལྷག་རྒྱས་པའི་གསོལ་འདེབས་ཞུ་རྒྱུ་ཡིན་འདུག མཛད་སྒོ་དེ་བརྙན་འཕྲིན་བརྒྱུད་ཏཱ་ལའི་བླ་མའི་དྲ་རྒྱའི་ཐོག་གོང་ཚེས་ཉིན་གྱི་ཉིན་གུང་ཆུ་ཚོད་ ༡ ནས་ཕྱེད་ཡོལ་ཆུ་ཚོད་ ༥ བར་ཐད་ཀར་རྒྱང་སྲིང་ཞུ་རྒྱུ་ཡིན་འདུག །
