༢༠༡༠ ཟླ་ ༥ ཚེས་ ༧ རེས་གཟའ་པ་སངས།
༄༅། །འདི་གར་རཱ་ཇི་སྤུར་བོད་ཀྱི་བུ་མེད་མཉམ་ལས་བཟོ་གྲྭའི་ཡིག་ཚང་ནས་བཏང་གནས་ནང་འཁོད་དོན། བཙན་བྱོལ་བོད་གཞུང་བཀའ་ཤག་གིས་ཕྱི་ལོ་ ༢༠༠༩ ཟླ་ ༣ ཚེས་ ༡༠ ནས་ལོ་འཁོར་གཅིག་གི་རིང་བོད་མི་རྣམས་བཙན་བྱོལ་དུ་འབྱོར་ནས་མི་ལོ་ ༥༠ འཁོར་བའི་དུས་དྲན་སྲུང་བརྩི་ཞུ་རྒྱུའི་ལམ་སྟོན་དགོངས་དོན་ལྟར་སྡེ་ར་སྡུན་ས་གནས་འགོ་འཛིན་ལས་ཁང་གིས་གོ་སྒྲིག་འོག་རྒྱ་གར་གཞུང་དམངས་ལ་ཐུགས་རྗེ་ཆེ་ཞུའི་དུས་དྲན་དང་། རྒྱ་གར་ཡུལ་མི་རྣམས་ལ་བོད་ཀྱི་ཐུན་མོང་མ་ཡིན་པའི་ཆོས་རིག་དང་འབྲེལ་བའི་འགྲེམས་སྟོན་རྒྱ་ཆེ་གནང་ཡོད།
དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་དང་། མང་གཙོའི་དུས་དྲན། ནོ་བེལ་ཞི་བདེའི་གཟེངས་རྟགས་སོགས་གཞུང་འབྲེལ་མཛད་སྒོའི་ལས་དོན་ཡོངས་ལ་རཱ་ཇི་སྤུར་བོད་ཀྱི་བུ་མེད་མཉམ་ལས་བཟོ་གྲྭ་ནས་ཕྱར་གྲུ་མཉམ་འདེགས་ཀྱིས་མཉམ་ཞུགས་བྱས་འདུག ཕྱི་ལོ་ ༢༠༡༠ ཟླ་ ༣ ཚེས་ ༡༠ ཉིན་སྡེ་ར་སྡུན་ས་གནས་འགོ་འཛིན་ནས་ཐུགས་འགན་རྐང་བཞེས་ཐོག་ས་གནས་རང་བདེན་ཚོགས་ཆུང་ཁག་གིས་གོ་སྒྲིག་འོག་སྡེ་ར་སྡུན་ཁུལ་དུ་གནས་སྡོད་བོད་རིགས་རྣམས་གྷན་རྡི་ཐང་དུ་འདུ་འཛོམས་ཀྱིས་བཙན་བྱོལ་དུ་འབྱོར་ནས་མི་ལོ་ ༥༠ འཁོར་བའི་དུས་དྲན་དང་། རྒྱ་གར་གཞུང་དམངས་ལ་ཐུགས་རྗེ་ཆེ་ཞུའི་མཛད་སྒོ་དང་སྦྲགས་གྲོང་ཁྱེར་ནང་དུ་ཞི་བའི་རྔམ་སྟོན་ཁྲོམ་སྐོར་བཅས་དུས་དྲན་སྲུང་བརྩི་གཟབ་རྒྱས་ཞུས་འདུག གཞན་ཡང་བོད་རིགས་མང་ཚོགས་ལ་ཆབ་སྲིད་གོ་རྟོག་སྤེལ་སླད་བོད་གཞུང་ཕྱི་དྲིལ་ལས་ཁུངས་ཀྱི་གསར་ཤོག་དང་། བརྙན་འཕྲིན་འོད་སྡེར་བཅས་མང་ཚོགས་ལ་འགྲེམས་སྤེལ་ཡང་ཞུས་ཡོད་པ་བཅས།།
