༢༠༡༥ ཟླ་ ༡༢ ཚེས་ ༢༡ རེས་གཟའ་ཟླ་བ།
༄༅། །འདི་གའི་ཕྱི་དྲིལ་བོད་ཡིག་ཚན་པའི་ཆེད་གཉེར་གསར་འགོད་པ་བསྟན་འཛིན་རབ་རྒྱས་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༥ ཟླ་ ༡༢ ཚེས་ ༡༩ ཉིན་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་སྒར་དུ་རྟེན་གཞི་བྱས་པའི་བྱེས་ཀྱི་ཆོས་སྡེ་ཆེན་པོ་བཀྲ་ཤིས་ལྷུན་པོ་དཔལ་གྱི་སྡེ་ཆེན་ཕྱོགས་ལས་རྣམ་པར་རྒྱལ་བའི་གླིང་གི་གཙུག་ལག་ཁང་གསར་པ་རྟེན་དང་བརྟེན་པར་བཅས་པ་ལེགས་གྲུབ་ཟིན་པའི་དབུ་འབྱེད་རྟེན་འབྲེལ་གྱི་མཛད་སྒོའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཀྱིས་བཀའ་སློབ་སྩལ་ཡོད།
དེ་ཡང་སྐབས་དེར་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་དང་། ཤར་བྱང་ཆོས་རྗེ་རྣམ་གཉིས། གླིང་མཆོག་སྤྲུལ་རིན་པོ་ཆེ་མཆོག གཞན་ཡང་རིས་མེད་ཆོས་བརྒྱུད་ཁག་གི་བསྟན་བདག་བླ་ཆེན་རྣམ་པའི་སྐུ་ཚབ་རྣམ་པ་དང་མཁན་བླ་སྤྲུལ། བཀྲ་ཤིས་ལྷུན་པོའི་མཁན་པོ་བཀའ་ཆེན་བློ་བཟང་ཚེ་བརྟན་ལགས། ཀར་ནཱ་ཊ་ཀ་མངའ་སྡེའི་གཙོ་འཛིན་ (Governor) སྐུ་ཞབས་ཝ་ཇུ་བཱ་ཧེ་རུ་ད་ཝ་ལཱ་ Vaju Bhai Ruda Bai Wala མཆོག། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག དེ་བཞིན་ཆོས་རིག་དང་བདེ་སྲུང་བཀའ་བློན་རྣམ་གཉིས་དང་སྤྱི་འཐུས་ཁག་གཅིག གཞུང་དང་གཞུང་འབྲེལ་མིན་པའི་ཚོགས་པ་ཁག་ནས་ཕེབས་པའི་སྐུ་མགྲོན། དེ་བཞིན་དད་ལྡན་སེར་སྐྱ་ཁྲི་ཕྲག་བརྒལ་བ་མཉམ་འཛོམས་གནང་ཡོད།
མཛད་སྒོའི་ཐོག་མར་༸གོང་ས་༸སྐྱབས་མགོན་ཆེན་པོ་མཆོག་ལ་དུང་རྒྱ་སྤོས་སྣེ་སེར་སྦྲེང་དང་བཅས་གཟིམ་ཆུང་ཉི་འོད་འཁྱིལ་ནས་གསུང་ཆོས་ར་བར་གདན་ཞུ་གནང་མཚམས་སྦེལ་ཀོབ་ལྷ་མོ་ཚོགས་པས་བཀྲ་ཤིས་ཞོལ་པ་འཁྲབ་སྟོན་དང་། བོད་ཁྱིམ་རོལ་ཆ་སྡེ་ཚན་ནས་བོད་རྒྱལ་ཁབ་ཆེན་པོའི་རྒྱལ་གླུ་རྔ་རོལ་དང་བཅས་འབུལ་ལམ་ཞུས། དེ་ནས་ཆོས་སྡེ་ཆེན་པོ་བཀྲ་ཤིས་ལྷུན་པོའི་དགེ་འདུན་པས་ཤིས་ཚིག་གསུང་འདོན་གནང་བ་དང་། ཕྱོགས་མཚུངས་ཆོས་སྡེ་ཆེན་པོ་བཀྲ་ཤིས་ལྷུན་པོའི་མཁན་པོ་བཀའ་ཆེན་བློ་བཟང་ཚེ་བརྟན་མཆོག་གིས་ཆོས་སྡེ་བཀྲ་ཤིས་ལྷུན་པོའི་སྔ་ཕྱིའི་བྱུང་རིམ་དང་། ༸རྒྱལ་མཆོག་ཡབ་སྲས་གཉིས་ཀྱི་ཐུན་མོང་མ་ཡིན་པའི་འབྲེལ་བའི་སྐོར་སོགས་སྙན་སྒྲོན་ཞུས། དེ་རྗེས་བྱེས་ཀྱི་གདན་ས་བཀྲ་ཤིས་ལྷུན་པོའི་མཁན་བླ་འདུས་མང་ཡོངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་༸སྐུའི་གྱ་སྟོན་གྱི་རྟེན་འབྲེལ་དང་འབྲེལ་བའི་བཀའ་དྲིན་རྗེས་དྲན་གྱི་འབུལ་རྫས་གཟེངས་རྟགས་དང་། ཙན་དན་དཀར་པོ་ལས་གྲུབ་པའི་རྗེ་དགེ་འདུན་གྲུབ་པའི་སྣང་བརྙན་བཅས་འདེགས་འབུལ་ཞུས། དེ་རྗེས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་ཆོས་སྡེ་ཆེན་པོ་བཀྲ་ཤིས་ལྷུན་པོའི་གཙུག་ལག་ཁང་ལེགས་གྲུབ་བྱུང་བར་བཀའ་ཤག་ངོས་ནས་འཚམས་འདྲི་དང་དགའ་བསུ་ཞུས་ཤིང་། བཀྲ་ཤིས་ལྷུན་པོའི་བྱུང་རིམ་གྱི་ཐོག་ནས་བོད་མི་རིགས་ཀྱི་ལོ་རྒྱུས་ཐོག་མཛད་རྗེས་ཆེན་པོ་མཛད་པ་དང། དེ་བཞིན་ཀུན་གཟིགས་པཎ་ཆེན་སྐུ་ཕྲེང་བཅུ་པས་བོད་ཀྱི་རྩ་དོན་རིག་གཞུང་དང་། སྐད་ཡིག་སོགས་སྲུང་སྐྱོབ་ཆེད་རྒྱ་ནག་གཞུང་ལ་ཡིག་འབྲུ་ཁྲི་བདུན་གྱི་སྙན་ཞུ་བཏང་གནང་བ་སོགས་ཀྱི་བཀའ་དྲིན་གཞལ་དཀའ་བ་ཡིན་པ་དང་། དེང་གི་ཆར་༸གོང་ས་༸སྐྱབས་མགོན་ཆེན་པོ་མཆོག་གིས་དགེ་འདུན་པ་རྣམས་ཀྱིས་གཙོས་བོད་མི་སེར་སྐྱ་ཡོངས་ལ་དུས་རབས་ཉེར་གཅིག་པའི་ནང་པ་ཞིག་བྱ་དགོས་པའི་བླང་དོར་བཀའ་སློབ་དེ་དག་ལག་བསྟར་དོན་འཁྱོལ་ཡོང་བར་ཚང་མས་ཤུགས་རྒྱག་དགོས་པ་སོགས་ཀྱིས་གསུང་བཤད་གནང་གྲུབ་རྗེས།
བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་ཐེངས་འདིར་བཀྲ་ཤིས་ལྷུན་པོའི་འདུ་ཁང་གསར་རྒྱག་གི་ལས་དོན་ཐོག་འགན་རྐང་བཞེས་མཁན་གྱིས་གཙོས་མཐུན་འགྱུར་རོགས་རམ་གནང་མཁན་ཚང་མར་ཐུགས་རྗེ་ཆེ་ཞུས་པ་དང་། མཛད་སྒོ་དེ་བཞིན་པཎ་ཆེན་རིན་པོ་ཆེའི་མཛད་རྗེས་ལ་ཕྱི་མིག་བལྟས་ནས་བཀའ་དྲིན་རྗེས་དྲན་ཞུ་རྒྱུའི་དུས་ཚོད་ཅིག་ཀྱང་ཆགས་ཡོད་པ། ༸རྒྱལ་བ་ཡབ་སྲས་གཉིས། ཞེས་༸རྒྱལ་བ་རིན་པོ་ཆེ་མཆོག་རྒྱ་གར་དུ་སྐྱབས་བཅོལ་དུ་གྱར་དགོས་པའི་གནས་སྟངས་ཆགས་པ་དང་། ཀུན་གཟིགས་པཎ་ཆེན་རིན་པོ་ཆེ་མཆོག་བོད་ནང་བཞུགས་ནས་ཕྱི་ནང་གཉིས་ནས་མཛད་འཕྲིན་རྒྱ་ཆེ་བསྐྱངས་ཡོད་སྐོར། དེང་སྐབས་ང་རང་ཚོའི་སྤྱི་ཚོགས་ཁྲོད་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་ཞུ་རྒྱུའི་ཚབ་ཏུ་དེ་ལས་ལྡོག་ཏེ་འགྲིག་མེད་པ་སོགས་ཀྱི་སྐྱོན་བརྗོད་ཞུས་པའི་གནས་སྟངས་དེ་དག་མཐོང་སྐབས་རང་ཅག་རྣམས་ཀྱི་བསོད་ནམས་ཟད་པ་ཞིག་མིན་འགྲོ་བསམ་པ་དྲན་གྱི་འདུག ཅེས་སོགས་ཀྱི་གསུང་བཤད་གནང་། དེ་ནས་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཆེན་རྡོ་རྗེ་འཆང་མཆོག་གིས་༸རྒྱལ་དབང་ཐམས་ཅད་མཁྱེན་པ་དང་། པཎ་ཆེན་ཐམས་ཅད་མཁྱེན་པ་གཉིས་ང་ཚོས་༸རྒྱལ་བ་ཡབ་སྲས་གཉིས་ཞེས་བཤད་ཀྱི་ཡོད། དེ་ཚང་མར་ཡོངས་གྲགས་ཆགས་ཡོད། ༸རྒྱལ་དབང་ཐམས་ཅད་མཁྱེན་པ་མཆོག་སྤྱན་རས་གཟིགས་ཀྱི་རྣམ་སྤྲུལ་དང། ༸རྒྱལ་དབང་ཐམས་ཅད་མཁྱེན་པ་པཎ་ཆེན་རིན་པོ་ཆེ་མཆོག་འོད་དཔག་མེད་ཀྱི་རྣམ་སྤྲུལ་ཐུན་མོང་མ་ཡིན་པ་ཞིག་ཡིན་པ་ལུང་གིས་ཟིན་ཡོད་པ་བཞིན་ཇི་སྲིད་སངས་རྒྱས་ཀྱི་བསྟན་པ་འདི་ཉིད་འཛམ་གླིང་འདིའི་སྟེང་གནས་པ་དེ་སྲིད་དུ་འཛམ་གླིང་ནང་ཞི་བདེ་ཡོང་རྒྱུ་ཡིན་པ་དང་། སངས་རྒྱས་ཀྱི་བསྟན་པ་ཡུན་དུ་གནས་པར་༸རྒྱལ་བ་ཐམས་ཅད་མཁྱེན་པའི་སྐུ་ཚེ་བརྟན་མིན་ལ་རག་ལུས་ཡོད་ཅེས་སོགས་ཀྱི་གསུང་བཤད་གནང་།
དེ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་༸རྒྱལ་བ་ཡབ་སྲས་རྣམ་གཉིས་ཀྱི་མཛད་རྣམ་སྐུ་པར་འགྲེམས་སྟོན་གྱི་ཕྱག་དེབ་དབུ་འབྱེད་དང་ཆོས་སྡེ་བཀྲ་ཤིས་ལྷུན་པོའི་མཁན་རིན་པོ་ཆེ་བློ་བཟང་ཚེ་བརྟན་མཆོག་དང་། རྒན་ཐུབ་བསྟན་རིན་ཆེན་ལགས་རྣམ་གཉིས་ལ་ཐུགས་རྗེ་ལེགས་གསོལ་གྱི་གཟེངས་བསྟོད་ཕྱག་རྟགས་སྩལ།དེ་ནས་བཀྲ་ཤིས་ལྷུན་པོའི་སྐུ་ཚབ་ནས་གཙུག་ལག་ཁང་གསར་བཞེངས་ལས་འཆར་གྱི་བྱུང་སོང་ལྷག་གསུམ་དང་བཅས་པའི་རྩིས་ཁྲ་སྙིང་བསྡུས་སྙན་སྒྲོན་ཞུས་གྲུབ་མཚམས། ༸གོང་ས་མཆོག་གིས་བཀའ་སློབ་སྩལ་བའི་ནང་། བཀྲ་ཤིས་ལྷུན་པོའི་གཙུག་ལག་ཁང་བཀོད་ལེགས་གསར་བཞེངས་ལེགས་གྲུབ་ཟིན་པར་འཚམས་འདྲི་དང་། ཆོས་སྡེ་ཁག་ནས་ལུང་རྟོགས་ཀྱི་བསྟན་པ་རིན་པོ་ཆེ་བཤད་སྒྲུབ་འཆད་ཉན་དང་། བསླབ་གསུམ་ཉམས་ལེན་གྱི་ཐོག་ནས་འཛིན་སྐྱོང་སྤེལ་གསུམ་གནང་དགོས་པ། འཕགས་བོད་རྒྱལ་ཁབ་གཉིས་ཀའི་ནང་པའི་མང་ཚོགས་ཀྱི་ཁྲོད་ནང་ཆོས་ཀྱི་གནས་ཚད་ཤིན་ཏུ་ཞན་པོ་ཡིན་པས་ནང་དོན་རིག་པའི་གཞུང་ལུགས་ལ་སློབ་གཉེར་བྱེད་དགོས་ཚུལ། དུས་རབས་ཉེར་གཅིག་པའི་ནང་པ་བྱེད་དགོས་པ་དང་། དུས་རབས་ཉེར་གཅིག་པའི་ནང་པ་ཞེས་པའི་གོ་དོན། ནང་ཆོས་ནས་གསུངས་པའི་གཞི་ལམ་འབྲས་གསུམ་གྱི་རྣམ་གཞག་རྒྱས་ལ་རྨད་དུ་བྱུང་བ་ཡོད་ཚུལ། སློབ་གཉེར་གནང་ཕྱོགས་ཀྱི་ཐད་ནས་བོད་མི་ལྟ་བུ་འཛམ་གླིང་འདིའི་ཐོག་གཞན་མེད་ཚུལ། གཙུག་ལག་ཁང་གིས་བསྟན་པ་འཛིན་སྐྱོང་སྤེལ་གསུམ་མི་བྱེད་སྟབས་བསྟན་པ་འཛིན་སྐྱོང་སྤེལ་གསུམ་བྱ་རྒྱུ་ནི་སློབ་གཉེར་གྱི་ཐོག་ནས་བྱེད་དགོས་ཚུལ།
དེང་སྐབས་འཛམ་གླིང་གི་ནང་སྔ་མོ་ནང་ཆོས་ཀྱི་སྒྲ་ཙམ་གོ་ཐོས་མེད་པའི་ཡུལ་ལུང་ཁག་གི་ནང་ད་ཆ་ནང་ཆོས་དར་ཁྱབ་དང་། དོན་གཉེར་བྱེད་བཞིན་པར་མ་ཟད། ལྷག་པར་ཤེས་ཡོན་ཅན་དང་། ཚན་རིག་པའི་ཁྲོད་ནས་ཐུགས་སྣང་ཇེ་ཆེར་འགྲོ་བཞིན་པ་དང་། དེ་ཡང་ཤེས་ཡོན་གྱི་སྡེ་ཚན་ཞིག་ལ་ངོས་འཛིན་བྱས་པའི་ཐོག་ནས་དོ་སྣང་བྱེད་བཞིན་ཡོད་ཚུལ། ནང་ཆོས་ཁྱབ་སྤེལ་གྱི་སླད་དུ་མིན་པར་ནང་ཆོས་ཀྱི་གཞུང་ལུགས་ཁག་ནས་གསུངས་པའི་སེམས་ཁམས་རིག་པའི་རྣམ་གཞག་དང་། ལྟ་གྲུབ་ཀྱི་རྣམ་གཞག་རྨད་དུ་བྱུང་ཞིང་། རྒྱ་ཆེ་གཏིང་ཟབ་ཡོད་པ་དེ་དག་ལ་ཡིད་དབང་འཕྲོག་ནས་དོ་སྣང་བྱེད་བཞིན་པའི་སྐོར་སོགས་ཀྱི་བཀའ་སློབ་སྩལ།
དེ་རྗེས་མངའ་སྡེའི་གཙོ་འཛིན་མཆོག་སྐུ་མགྲོན་གཙོ་བོར་གདན་ཞུ་གནང་བ་བཞིན་གང་ཉིད་མཆོག་གིས་ཕེབས་བསུའི་སྣེ་ལེན་ཞུས་ཐོག་༸གོང་ས་༸སྐྱབས་མགོན་ཆེན་པོ་མཆོག་དང་། སྐུ་མགྲོན་གཙོ་བོ་ཀར་ནཱ་ཊ་ཀ་མངའ་སྡེའི་བློན་ཆེན་རྣམ་གཉིས་ནས་རྟེན་འབྲེལ་སྣང་གསལ་མར་མེ་ཞལ་ཕྱེ་མཛད་བསྟུན། མགོན་པོ་གང་ཉིད་མཆོག་གིས་ཐེངས་འདིའི་མཛད་སྒོའི་སྐུ་མགྲོན་གཙོ་བོ་ཀར་ནཱ་ཊ་ཀ་མངའ་སྡེའི་བློན་ཆེན་མཆོག་ལ་ཆེ་བསྟོད་ཕྱག་རྟགས་འབུལ་ལམ་ཞུས་ཏེ་མངའ་སྡེའི་བློན་ཆེན་མཆོག་གིས་མཛད་སྒོ་དང་འབྲེལ་བའི་གསུང་བཤད་གནང་བའི་ནང་། ཆོས་རྒྱལ་སྲོང་བཙན་སྒམ་པོའི་སྐབས་སློབ་དཔོན་ཐུ་མི་སམ་བྷོ་ཊ་རྒྱ་གར་དུ་ཡི་གེ་སློབ་པར་བཏང་ནས་རྒྱ་གར་གྱི་ནཱ་ག་རའི་ཡི་གེར་དཔེ་བླངས་ནས་བོད་ཀྱི་ཡི་གེ་བཟོས་པ་སོགས་འཕགས་བོད་གཉིས་ནི་ལོ་རྒྱུས་ཀྱི་ཐོག་ནས་རིག་གཞུང་གཅིག་པའི་མི་རིགས་ཤིག་ཡིན་ལུགས་དང་། ༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༡༩༥༩ ལོར་རྒྱ་གར་དུ་༸ཞབས་སོར་འཁོད་པ་ནས་བཟུང་གང་ཉིད་ཀྱི་ཐུགས་རྗེ་བཀའ་དྲིན་ལ་བརྟེན་ནས་ལྷོ་ཕྱོགས་ཁུལ་དུ་སངས་རྒྱས་ཀྱི་བསྟན་པ་འཛིན་པའི་གདན་ས་ཁག་ཚུགས་ཐུབ་པ་ཙམ་དུ་མ་ཟད། ཕྱིའི་བཀོད་པ་དང་ནང་གི་སློབ་གཉེར་དེ་དག་ཧ་ཅང་ཡག་པོ་ཡོད་ལུགས། བོད་ལ་རང་དབང་གི་ཉི་མ་ཤར་ངེས་ཡིན་པ་དང་། དེ་ཡང་གཱན་རྡི་ཇིས་འཚེ་མེད་ཞི་བའི་ལམ་ནས་རྒྱ་གར་ལ་རང་བཙན་ཐོབ་པ་བཞིན་༸གོང་ས་ཏཱ་ལའི་བླ་མ་མཆོག་གི་ཐུགས་བྱམས་བརྩེ་དང་སྙིང་རྗེའི་མཛད་འཕྲིན་དེའི་ཐོག་ནས་བོད་ལ་སྐྱིད་པའི་ཉི་མ་འཆར་ངེས་ཡིན་པ་སོགས་ཀྱི་གསུང་བཤད་གནང་།
དེ་རྗེས་མགོན་པོ་གང་ཉིད་མཆོག་གིས་མཛད་སྒོར་བཀའ་སློབ་ཕེབས་དོན། ཐོག་མར་མངའ་སྡེའི་བློན་ཆེན་མཆོག་ཆེད་ཕེབས་གནང་བར་ཐུགས་རྗེ་ཆེ་ཞུ་རྒྱུ་ཡིན། ངོས་རང་ཕྱི་ལོ་ ༡༩༥༦ ལོར་སྟོན་པ་མྱང་འདས་ནས་ལོ་ཉིས་སྟོང་ལྔ་བརྒྱ་འཁོར་བའི་དུས་ཆེན་དེར་རྒྱ་གར་དུ་སླེབ་སྐབས་རྒྱ་གར་ས་ཁུལ་ཁག་འགའ་ཤས་ནང་བལྟ་སྐོར་དུ་ཕྱིན་པ་ཡིན། སྦེང་ལོར་དང་མེ་སོར་ལའང་ཕལ་ཆེར་བསླེབས་པ་རེད། སྐབས་དེ་དུས་ཀྱི་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ནི་ཅི་ལིངྒ་པ་མཆོག་ཡིན།ངོས་ཀྱི་སྐབས་དེ་དུས་ནས་སྐུ་ཞབས་དམ་པ་ཁོང་ངོ་ཤེས་ཀྱི་ཡོད། ཁོང་གིས་སྐབས་དེ་དུས་ནས་དམིགས་བསལ་ཐུགས་ཁུར་ཧ་ཅང་ཆེན་པོ་གནང་མཁན་ཞིག་ཡིན། ཕྱི་ལོ་ ༡༩༥༩ ལོར་ང་ཚོ་བོད་མི་ཉུང་ཤས་ཤིག་རྒྱ་གར་དུ་བསླེབས་པ་རེད། སྐབས་དེ་དུས་རྒྱ་གར་སྲིད་བློན་དམ་པ་ནེ་རུ་མཆོག་ལ་བོད་པ་གནས་སའི་གཞིས་ཆགས་ཁག་གནང་སྐྱོང་ཡོང་བར་ཞུས་སྐབས་སྲིད་བློན་མཆོག་གིས་མངའ་སྡེ་ཚོར་ཕྱག་བྲིས་ཕུལ་བའི་ནང་ནས་མེ་སོར་མངའ་སྡེས་སེམས་ཁུར་ཆེན་པོས་དང་ལེན་གནང་འདུག དེར་བརྟེན་རྒྱ་གར་ལྷོ་ཕྱོགས་ནང་བོད་མིའི་གཞིས་སྒར་ཆེ་ཤོས་རྣམས་ཚུགས་ཐུབ་པ་བྱུང་ཡོད། དེ་བཞིན་ཆོས་སྒར་ཆེ་ཁག་ཀྱང་འདིར་འདུས་ཡོད་ཅེས་དང་། གཞིས་ཆགས་ཁག་ཐོག་མར་གསར་འཛུགས་དང་རྒྱ་གར་འཕགས་ཡུལ་དང་། ལྷག་པར་ལྷོ་ཕྱོགས་མངའ་སྡེ་ཁག་ནས་ཐུགས་ཁུར་ཆེ་བཞེས་མཛད་ནས་བཙན་བྱོལ་བ་མང་ཤོས་ཡོད་པའི་ལྷོ་གཞིས་ཆགས་ཚུལ། ཡང་སྒོས་རྒྱ་གར་དབུས་དང་མངའ་སྡེའི་ཐུགས་ཁུར་དང་རྒྱབ་སྐྱོར་གནང་མཁན་ནི་ཅི་ལིངྒ་པ་མཆོག་གིས་གཙོས་བློན་ཆེན་རིམ་པ་རྣམས་ཀྱི་བཀའ་དྲིན་བརྗེད་མེད་སྙིང་བཅངས་བྱེད་དགོས་ཚུལ། བོད་དང་བོད་མི་རིགས། བོད་ཀྱི་ཆོས་དང་རིག་གཞུང་། སྐད་ཡིག་སོགས་འཛིན་སྐྱོང་སྤེལ་གསུམ་བྱ་རྒྱུའི་གལ་གནད་དང་། དེ་དག་གི་ཐོག་ལ་བོད་མི་བཙན་བྱོལ་བ་རྣམས་ཁ་འཐོར་མིན་པར་མཉམ་རུབ་ཐོག་འཚོ་གནས་ཐུབ་ཐབས་སོགས་ལ་དགོངས་བཞེས་ཇི་ལྟར་མཛད་ཚུལ། དེ་བཞིན་བོད་ཕྲུག་རྣམས་ཀྱི་ཆེད་རྒྱ་གར་གཞུང་ནས་འཛིན་སྐྱོང་གནང་བའི་སློབ་གྲྭ་ཁག་གསར་འཛུགས་ཀྱིས་འདབ་ཆགས་གཤོག་པ་ཟུང་ལྡན་ལྟ་བུའི་སློབ་གཉེར་ཐོབ་ཐབས་མཛད་སྟངས་ཀྱི་རླབས་ཆེན་གྱི་དགོངས་བཞེད་ཀྱིས་ད་ལྟ་བཙན་བྱོལ་བོད་མིའི་ཤེས་ཡོན་གྱི་གྲུབ་འབྲས་ཇི་ལྟར་ཐོན་ཚུལ། སྔ་མོ་བོད་ལ་ཞང་ཞུང་སྨར་ཡིག་སོགས་བྱུང་ཚུལ་དང་།
དེ་རྗེས་མཁན་སློབ་ཆོས་གསུམ་གྱི་སྐབས་ནས་བོད་གངས་ཅན་གྱི་ལྗོངས་སུ་དམ་པའི་ཆོས་དབུ་བརྙེས་ཤིང་སྲོལ་བཟང་གཏོད་པ་དང་། དར་ཞིང་རྒྱས་པར་མཛད་ནས་ནང་ཆོས་ནས་གསུངས་པའི་གནའ་རབས་ཀྱི་སེམས་ཁམས་རིག་པ་དང་། ལྟ་གྲུབ་ཀྱི་རྣམ་གཞག་ཟབ་ལྷིང་ལྡན་པ་རྣམས་བོད་མིས་སློབ་གཉེར་དང་། འཛིན་སྐྱོང་སྤེལ་གསུམ་བྱས་པ་ལྟར་གཞན་སུས་ཀྱང་བྱས་པ་བྱུང་མེད་ཚུལ། རྒྱ་གར་བ་རྣམས་ང་ཚོའི་དགེ་རྒན་དང་། བོད་མི་རྣམས་སློབ་མ་བཅས་དགེ་སློབ་ཀྱི་འབྲེལ་བ་བྱུང་ཚུལ། ད་ལྟ་ང་ཚོས་འཛིན་སྐྱོང་སྤེལ་གསུམ་བྱས་དང་བྱེད་བཞིན་པ་འདི་དག་རྒྱ་གར་འཕགས་ཡུལ་གྱི་དཔལ་ནཱ་ལེནྡྲ་ནས་བྱུང་ཚུལ། དུས་རབས་ཉེར་གཅིག་པའི་ནང་དེ་དག་འབྲེལ་བ་ཡོད་པ་དང་། དགོས་མཁོ་ཡོད་པ། ཕན་ཐོགས་ཡོད་ཚུལ། བཙན་བྱོལ་དུ་ལོ་ངོ་ ༥༦ རིང་གནས་ཤིང་འཛམ་གླིང་ཤར་ནུབ་ཕྱོགས་ཡུལ་ལུང་གཞན་དང་གཞན་ལ་དོ་སྣང་ཤུགས་ཆེ་བྱེད་བཞིན་པ་དང་། དེ་ཡང་ལྟ་གྲུབ་རྒྱ་ཆེ་གཏིང་ཟབ་ཡོད་པ་ཞིག་ལ་ངོས་འཛིན་བྱེད་བཞིན་པ་དེ་དག་གི་ཐད་ལ་བླ་སྤྲུལ་དགེ་འདུན་པ་བཅས་ཀྱི་ཐོག་ནས་ཞབས་འདེགས་རླབས་ཆེན་ཞིག་བསྒྲུབས་ཡོད་པ་དང་། ཞར་དང་ཞོར་ལ་ཞབས་འདྲེན་ཞུ་མཁན་ཡང་འགའ་ཞིག་བྱུང་ཡོད་པས། མ་འོངས་པར་ཞབས་འདྲེན་ཞུ་མཁན་གྱི་རིགས་གང་ཉུང་ཡོང་ཐབས་བྱེད་དགོས་ཚུལ།
རིས་མེད་ཀྱི་བཤད་གྲྭ་ཁག་ལས་མོན་གྷོར་གཙོ་ཆེ་གཉིས་དང་། སྦེལ་ཀོབ་ཏུ་གདན་ས་ཆེ་ཁག་གཉིས་དང་། རྣམ་གྲོལ་གླིང་བཅས་ལོ་རྒྱུས་ཅན་གྱི་དགོན་སྡེ་ཁག་ཆགས་ཡོད་ཚུལ། བློན་ཆེན་མཆོག་དང་བཅས་པས་ཀུན་གཟིགས་པཎ་ཆེན་ཆུང་སྲིད་རིན་པོ་ཆེའི་སྐོར་གསུང་བཤད་གནང་བར་ཐུགས་རྗེ་ཆེ་ཞེས་སོགས་ཀྱི་བཀའ་སློབ་སྩལ།དེ་ནས་ཐུགས་རྗེ་ཆེ་ཞུའི་གསུང་བཤད་དང་འབྲེལ། རོལ་དབྱངས་དང་བཅས་འཕགས་བོད་གཉིས་ཀྱི་རྒྱལ་གླུ་བླངས་ནས་དབུ་འབྱེད་མཛད་སྒོ་རྒྱལ་ཁའི་ངང་ལེགས་པར་མཇུག་སྒྲིལ་བ་དང་ཉིན་རྒྱབ་ཚད་མ་རྣམ་འགྲེལ་བཀའ་ཁྲིད་སྩལ་ཡོད། །
