༢༠༡༥ ཟླ་ ༡༢ ཚེས་ ༢༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༥ ཟླ་ ༡༢ ཚེས་ ༢༠ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་སྦེལ་ཀོབ་ཏུ་རྟེན་གཞི་བྱས་པའི་བྱེས་ཀྱི་ཆོས་སྡེ་ཆེན་པོ་བཀྲ་ཤིས་ལྷུན་པོར་ཡུལ་ལུང་ཕྱོགས་མཐའ་འདྲ་མིན་ནས་བཅར་བའི་དད་ལྡན་ཆོས་ཞུ་བ་ཁྲི་ཕྲག་བརྒལ་བར་ཆོས་འབྲེལ་བཀའ་སློབ་དང་ལམ་རིམ་ཁྲིད་ཆེན་བཅོ་བརྒྱད་ཀྱི་བཀའ་ཆོས་དབུ་འཛུགས་བཀའ་དྲིན་ཆེ་བ་སྩལ་སོང་།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་སྐྱབས་རྗེ་གླིང་མཆོག་སྤྲུལ་རིན་པོ་ཆེ་མཆོག་གིས་སྤོས་སྣེས་སྔོན་བསུས་ཏེ་༸གོང་ས་༸སྐྱབས་མགོན་ཆེན་པོ་མཆོག་བཀྲ་ཤིས་ལྷུན་པོའི་གཙུག་ལག་ཁང་གསར་པའི་གསུང་ཆོས་ར་བའི་དབུས་ཀྱི་བཞུགས་ཁྲི་རིན་པོ་ཆེར་༸ཞབས་སོར་འཁོད་མཚམས། དཀོན་མཆོག་རྗེས་དྲན་གྱི་མདོ་དང་། རྒྱུན་ཆགས་གསུམ་པ། ཤེས་རབ་སྙིང་པོ་བཅས་གསུང་འདོན་གནང་། དེ་རྗེས་གསོལ་ཇ་འདེགས་འབུལ་གྲུབ་རྗེས་ལམ་རིམ་གསོལ་འདེབས་ལམ་མཆོག་སྒོ་འབྱེད་རྟ་དབྱངས་དང་བཅས་པའི་ཐོག་གསུང་འདོན་གྲུབ་བསྟུན་གླིང་མཆོག་སྤྲུལ་རིན་པོ་ཆེ་མཆོག་གིས་མགོན་པོ་གང་ཉིད་མཆོག་ལ་མཎྜལ་རྟེན་གསུམ་འདེགས་འབུལ་ལམ་ཞུས།
དེ་རྗེས་མགོན་པོ་གང་ཉིད་མཆོག་གིས་སྐྱབས་འགྲོ་དང་སེམས་བསྐྱེད་སྐོར་དད་ལྡན་ཆོས་ཞུ་བ་ཡོངས་ལ་ངོ་སྤྲོད་སྩལ་དོན། ཁ་སང་ང་ཚོས་སངས་རྒྱས་ཆོས་ཚོགས་མ་འདོན་པ་རེད། གང་ལྟར་ཆོས་ཐུན་འདི་དོན་དང་ལྡན་པ་ཞིག་ཡོང་བར་སངས་རྒྱས་ཆོས་ཚོགས་མ་འདོན་གྱི་ཡོད། དེའི་སྐོར་ཁ་སང་ནས་ཞུས་ཟིན་པར་བརྟེན་བསྐྱར་དུ་བརྗོད་དགོས་པ་མི་འདུག མཆོག་གསུམ་ལ་སྐྱབས་སུ་འགྲོ་བའི་སྐྱབས་འགྲོ་དེ་ཡང་བྱང་ཆུབ་མ་ཐོབ་ཀྱི་བར་དུ་སྐྱབས་སུ་འགྲོ་གི་ཡིན་ཞེས་པ་ཐེག་ཆེན་ཐུན་མོང་མ་ཡིན་པའི་སྐྱབས་འགྲོ་ཆགས་ཀྱི་ཡོད། སྐྱབས་སུ་འགྲོ་རྒྱུ་དེ་ཡང་དགོས་པ་དང་དམིགས་ཡུལ་བླ་མེད་རྫོགས་བྱང་བྱང་ཆུབ་ཆེན་པོའི་གོ་འཕང་ཐོབ་པའི་ཆེད་དུ་ཡིན་བསམས་པའི་ཐོག་ནས་སྐྱབས་འགྲོ་དང་། དེ་བཞིན་སེམས་བསྐྱེད་སོགས་ཡིན་པར་བརྟེན་ཁྱེད་རང་ཚོས་མོས་པ་བྱེད་ཤོག་ཨང་། ཞེས་སངས་རྒྱས་ཆོས་ཚོགས་མ་ལན་གསུམ་གསུང་འདོན་མཛད་པ་དང་།
དེ་རྗེས་ལམ་རིམ་བཀའ་ཆོས་ཀྱི་སྔོན་འགྲོར་ཆོས་འབྲེལ་བཀའ་སློབ་སྩལ་དོན། ཐབས་མཁས་ལ་ཐུགས་རྗེ་ཆེན་པོ་དང་ལྡན་པའི་སྟོན་པ་བཀའ་དྲིན་ཅན་དེ་ཉིད་རྒྱ་གར་འཕགས་པའི་ཡུལ་ལ་བྱུང་ནས་ཡོངས་གྲགས་གནས་བརྟན་འདས་པའི་ལུགས་
ལྟར་བྱས་ན་ལོ་ཉིས་སྟོང་དྲུག་བརྒྱ་ཙམ་འགྲོ་གི་ཡོད། ལོ་ཉིས་སྟོང་དྲུག་བརྒྱ་ལྷག་རིང་འཛམ་གླིང་འདིའི་སྟེང་སངས་རྒྱས་པའི་ཆོས་དེ་ཆོས་ཚུལ་གལ་ཆེ་བ་ཞིག་ཆགས་ཡོད། སྟོན་པ་སངས་རྒྱས་བཅོམ་ལྡན་འདས་ཟེར་སྐབས་འཛམ་གླིང་འདིའི་སྒང་ཡོངས་གྲགས་སུ་ཞི་བདེ་དང་འཚེ་བ་མེད་པའི་ལམ་སྟོན་མཛད་མཁན་གྱི་སྟོན་པར་ངོས་འཛིན་ཞུ་གི་ཡོད། དེང་སང་ཆོས་ཚུལ་དེ་གནད་དོན་གང་ཞིག་ཡིན་རུང་ལམ་སེང་ཁས་ལེན་པས་ཡིད་ཆེས་བྱས་པ་མ་ཡིན་པར་བསམ་བློ་བཏང་ནས་དཔྱད་པ་བྱ་རྒྱུ་ཡོད་པ་འདི་སངས་རྒྱས་པའི་ཆོས་ཀྱི་དམིགས་བསལ་ཁྱད་ཆོས་ཆགས་ཡོད། དེར་བརྟེན་དེ་རིང་འདིར་འདུས་པའི་བོད་རིགས། ཧི་མཱ་ལ་ཡི་རི་རྒྱུད་ཀྱི་མི་རིགས། རྒྱ་རིགས། ཝེ་ཐི་ནམ། ཀོ་རི་ཡ། ཉི་ཧོང་། ཐཱ་ལེན་ཌི། ཤི་རི་ལངྐ། སོག་པོ་ཕྱི་ནང་གཉིས། ཨུ་རུ་སུ་ཁོངས་ཀྱི་སོག་པོ་ཁལ་མུག་སོགས་སངས་རྒྱས་པའི་ཆོས་དེ་ང་རང་ཚོའི་ཕ་མེས་ཀྱི་ཆོས་ཤིག་ཆགས་ཡོདf། དེར་བརྟེན་སོ་སོའི་ཆོས་དེ་ཞེན་ཁོག་བྱས་ནས་ངའི་ཆོས་ཡིན་ཞེས་བརྗོད་པ་དེ་མ་འགྲིག་པ་རེད། ང་ཚོའི་ཆོས་ཞེས་ཞེན་ཆགས་བྱས་ན་ཆོས་དད་དེ་ཕྱོགས་ལྷུང་དུ་འགྲོ་ནས་བློ་གཟུ་བོར་གནས་པ་ཆགས་ཀྱི་མེད།
གང་ལྟར་ང་རང་ཚོ་ཕ་མེས་ནས་ཡོད་པའི་ཆོས་ཚུལ་འདི་ཁ་ཡོད་ལག་ཡོད་ཀྱི་མིའི་སེམས་འདུལ་བར་ཕན་ཐོགས་ཡོད་པ་ཞིག་གི་ང་རང་ཚོའི་ཕ་མེས་ཆོས་ཤིག་རེད། ལྷག་པར་དཀའ་ངལ་ཆེན་པོ་ཞིག་འཕྲད་པའི་སྐབས་སེམས་ལ་སྙིང་སྟོབས་ཤིག་བསླེབས་ནས་སེམས་གུ་ཡངས་པོར་བཟོ་རྒྱུའི་ཆོས་ཚུལ་ཞིག་ཆགས་ཡོད། དེ་རིང་ཁ་སང་སངས་རྒྱས་པའི་ཆོས་ལ་དད་པ་མེད་མཁན་ཚོས་ཀྱང་སངས་རྒྱས་པའི་ཆོས་ལ་དོ་སྣང་བྱེད་བཞིན་ཡོད། གང་ལྟར་མིའི་སེམས་སྐྱིད་པ་དང་ལུས་བདེ་བ་ཞིག་ཡོང་རྒྱུ་དང་། ཁྱིམ་ཚང་དང་སྤྱི་ཚོགས་བདེ་སྐྱིད་ལྡན་པ་ཞིག་ཡོང་བར་བྱམས་པ་དང་བརྩེ་བ། བཟོད་པ་ཟེར་བ་དེ་དག་ཧ་ཅང་གལ་ཆེན་པོ་ཆགས་ཡོད། གང་ལྟར་བཟོད་པ་བསྒོམ་རྒྱུ་ལ་སོགས་པ་དེ་དག་འཛམ་གླིང་ཆོས་ལུགས་གཙོ་ཆེ་བ་ཚང་མའི་བསླབ་བྱ་གཙོ་བོ་ཆགས་ཡོད། བསླབ་བྱ་དེར་ཡིད་ཆེས་ཡོད་པའི་ཐོག་ནས་ཉམས་ལེན་ཡོང་བར་འཇིག་རྟེན་བཀོད་པ་པོ་དང་འབྲེལ་བའི་ལྟ་གྲུབ་དེ་ཚོ་དེ་འདྲ་བྱས་ནས་ཡོང་གི་ཡོད། ཇི་ཙམ་གྱིས་རང་རང་གི་དཀོན་མཆོག་ལ་དད་པ་ཡོད་པ་དེ་ཚོད་ཀྱིས་བྱམས་པ་དང་བརྩེ་བའི་ཉམས་ལེན་དགོས་རྒྱུ་དེ་ཆགས་ཡོད། ད་ལྟ་བཤད་མ་ཐག་པའི་རྩེ་གཅིག་པའི་དད་པས་བྱམས་པ་དང་བརྩེ་བའི་ཉམས་ལེན་ལ་དངོས་གནས་སྙིང་ཁོངས་རུས་པའི་གཏིང་ནས་དོན་གཉེར་ཡོང་བའི་ཆེད་རྩེ་གཅིག་པའི་དད་པ་དེ་བསྒྲུབ་ཐབས་ལྟ་བུ་ཡིན་པ་ངོས་རང་གིས་དེ་ལྟར་མཐོང་གི་ཡོད།
དད་པ་གཅིག་པུ་བྱས་ནས་དཀོན་མཆོག་གིས་ལམ་སྟོན་གནང་བ་དེར་དོ་སྣང་དེ་ཙམ་མ་བྱས་པ་འདི་དད་པ་གཙོ་བོ་བྱས་ནས་ཆོས་ལག་ལེན་དགལ་རྒྱུ་དེ་ཞོར་ལྟ་བུའི་ངང་ཕྱིན་པ་ཡིན་ན་ནོར་བ་རེད། ལག་ལེན་དགལ་རྒྱུའི་བྱམས་བརྩེ། བཟོད་པ། ཆོག་ཤེས་དེ་དག་གཙོ་བོར་འཛིན་པའི་ཐོག་ནས་དེ་ཉིད་བསྒྲུབ་ཐབས་སུ་ཆོས་ལུགས་རིགས་གཅིག་གིས་འཇིག་རྟེན་བཀོད་པ་པོ་ཁས་ལེན་མཁན་དང་། གྲངས་ཅན་པ་དང་། གཅེར་བུ་བ། སངས་རྒྱས་པའི་ཆོས་དེ་གསུམ་པོས་འཇིག་རྟེན་བཀོད་པ་པོ་མེད་པ་རེད། ཆོས་ཐམས་ཅད་རྒྱུ་དང་རྐྱེན་ལ་བརྟེན་ནས་བྱུང་བ་རེད་ཅེས་གསུང་གི་ཡོད། དེར་བརྟེན་ལས་དཀར་ནག་དེ་ཚོ་ཧ་ཅང་གལ་ཆེན་པོ་ཆགས་ཡོད། རང་གི་བྱ་བ་བཟང་པོ་ཞིག་བྱས་པ་ཡིན་ན་རང་ལ་འབྲས་བུ་བདེ་བ་ཡོང་གི་རེད་ཅེས་དང་། རང་གི་གཞན་ལ་གནོད་པའི་བྱ་བ་དེ་འདྲ་བྱས་པ་ཡིན་ན་རང་ལ་སྡུག་བསྔལ་ཡོང་གི་རེད་ཅེས་རྒྱུ་མཚན་དེ་འདྲ་ཞིག་བཀོད་ནས་གཞན་ལ་གནོད་པ་བསྐྱལ་རྒྱུ་མེད། བྱམས་བརྩེ་སྒོམ་དགོས་རེད་ཅེས་གསུངས་པ་རེད། དེར་བརྟེན་ཆོས་ལུགས་གཙོ་ཆེ་བ་ཚང་མས་བྱམས་བརྩེ་དང་བཟོད་པའི་ཉམས་ལེན་སྐོར་གསུངས་ཡོད། ཅེས་དང་། དེ་རྗེས་གང་ཉིད་མཆོག་གིས་སངས་རྒྱས་པའི་ཆོས་སྐོར་དང་པོ་བདེན་བཞིའི་རྣམ་གཞག་གི་སྐོར་རྒྱས་པར་བཀའ་སྩལ་བ་དང་།
ལྷག་པར་བདེན་བཞིའི་ནང་ནས་འགོག་བདེན་ནི་དྲི་མ་སྤངས་པའི་བྲལ་བ་དེ་ལ་གོ་བར་བརྟེན་དེའི་གོ་བ་དཔྱིས་ཕྱིན་པ་ཞིག་ཡོང་བར་ཆོས་བསྐོར་གཉིས་པ་དང་གསུམ་པ་རིམ་པ་བྱས་ནས་གསུངས་ཡོད་སྐོར། དེ་ལྟར་གསུངས་པའི་གསུང་སྟངས་དེ་ཡང་དེང་གི་སློབ་སྦྱོང་གི་བརྒྱུད་རིམ་བཞིན་སློབ་ཆུང་། སློབ་འབྲིང་། མཐོ་སློབ་བཅས་རིམ་པ་བཞིན་དང་པོ་བདེན་བཞི་དང་དེ་བཞིན་ལྟ་བ་བཀར་བཏགས་ཕྱག་བརྒྱ་བཞི་སོགས་སངས་རྒྱས་པའི་ཆོས་ཀྱི་སྒྲོམ་གཞི་དེ་ཡང་དེ་ལྟར་ཡིན་པ་སོགས་ཀྱི་བཀའ་སློབ་ཞིབ་རྒྱས་སྩལ་བ་དང་། དེ་བཞིན་ཤེས་རབ་སྙིང་པོ་གསུང་ཡུལ་གྱི་བྱ་རྒོད་ཕུང་པོ་རི་དང་འབྲེལ་ནས་རས་ཆུང་པ་དང་རྗེ་བཙུན་མི་ལ་བླ་སློབ་རྣམ་གཉིས་ཀྱི་རྣམ་ཐར་སྐོར་དང་ཤེར་ཕྱིན་གྱི་གཞུང་དེ་བཞིན་འདུལ་བྱ་ལས་དག་པའི་ངོ་བོར་གསུང་པ་ཞིག་ཡིན་པ་སོགས་དང་། ཤེས་རབ་སྙིང་པོ་ནི་ཤཱ་རིའི་བུ་དང་། འཕགས་པ་སྤྱན་རས་གཟིགས་རྣམ་གཉིས་དྲི་བ་དྲིས་ལན་གྱི་ལམ་ནས་གསུངས་པ་དང་། དེ་བཞིན་ཤེར་ཕྱིན་གྱི་གཞུང་ལུགས་བྱུང་ཚུལ་དང་། ཐེག་ཆེན་བཀའ་སྒྲུབ་ཀྱི་སྐོར། འཁོར་ལོ་རིམ་པ་གསུམ་གྱི་བྱུང་རིམ་སོགས་དང་།
མཁན་སློབ་ཆོས་གསུམ་གྱི་སྐབས་སུ་རང་ཅག་བོད་འབངས་རྣམས་ལ་བཀའ་དྲིན་གཞལ་དུ་དཀའ་བའི་ཆོས་རྒྱལ་ཁྲི་སྲོང་ལྡེའུ་བཙན་གྱིས་བོད་ནང་དཔལ་ནཱ་ལནྡྲའི་ཆོས་བརྒྱུད་དེ་ཉིད་སྤེལ་བར་ཕུགས་རྒྱང་རིང་པོའི་དགོངས་བཞེས་མཛད་པའི་ཐོག་ནས་ནཱ་ལེནྡྲའི་མཁས་པ་བགྲེས་སོང་མཁན་ཆེན་ཞི་བ་འཚོ་བོད་ལ་གདན་འདྲེན་ཞུས་ནས་སད་མི་མི་བདུན་བྱུང་ནས་སངས་རྒྱས་པའི་བསྟན་པ་འདི་ད་བར་དར་སྤེལ་བྱུང་ཐུབ་པ་སོགས་དང་། བར་དུ་སངས་རྒྱས་པའི་ཆོས་དེ་ཉམས་ཆག་བྱུང་བ། ཕྱིས་སུ་སྟོད་མངའ་རིས་ནས་ཆོས་རྒྱལ་གྱི་གདུང་བརྒྱུད་འཛིན་པ་ལྷ་བླ་མ་ཡེ་ཤེས་འོད་ཀྱིས་སངས་རྒྱས་ཀྱི་བསྟན་པ་དེ་ལྟ་བུ་ཞིག་རྒྱུན་སྐྱོང་ཐུབ་ཐབས་རང་ཉིད་ཀྱི་ནུས་པ་ཡོངས་རྫོགས་བསྟན་ནས་མཐར་ཇོ་བོ་རྗེ་དཔལ་ལྡན་ཨ་ཏི་ཤའི་བོད་དུ་གདན་ཞུས་མཛད་དེ་སངས་རྒྱས་པའི་ཆོས་སླར་དར་ཐུབ་པ་ཙམ་དུ་མ་ཟད་ད་བར་དགག་གཞག་སྤང་གསུམ་དང་བཅས་པའི་གཞུང་ལུགས་རྣམས་ཀྱིས་ཚིག་འགྲེལ་ལྟ་བུ་མིན་པར་དམིགས་བསལ་མཐའ་དཔྱོད་ཀྱི་ཐོག་ནས་སེམས་ལ་ཕན་ཐོགས་ཡོད་པའི་སངས་རྒྱས་པའི་ཆོས་ཚུལ་ཞིག་ཡིན་སྐོར་དང་། ལྷག་པར་ལྷ་བླ་མ་ཡེ་ཤེས་འོད་གར་ལོག་རྒྱལ་པོས་བཙོན་དུ་བཅུག་ནས་འདས་གྲོང་དུ་སོང་བ་སོགས་བསྟན་པའི་ཕྱིར་བློས་གཏོང་ཆེན་པོ་གནང་བའི་མཛད་རྗེས་རྨད་བྱུང་ཡིན་པ་སོགས་ཀྱི་ལོ་རྒྱུས་སོགས་ཀྱི་སྐོར་ཐུགས་བརྩེའི་བཀའ་སློབ་སྩལ་ཏེ་ཐེངས་འདིའི་འཆད་པར་བྱ་བའི་ལམ་རིམ་ཁྲིད་ཆེན་བཅོ་བརྒྱད་ཀྱི་བཀའ་ཆོས་དབུ་འཛུགས་མཛད་ཡོད།།
