༢༠༡༥ ཟླ་ ༡༢ ཚེས་ ༡༤ རེས་གཟའ་ཟླ་བ།
༄༅། །འདི་གའི་ཕྱི་དྲིལ་བོད་ཡིག་ཚན་པའི་གསར་འགོད་པ་བསྟན་འཛིན་རབ་རྒྱས་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༥ ཟླ་ ༡༢ ཚེས་ ༡༣ ཉིན་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དཔལ་ལྡན་སྨད་རྒྱུད་གྲྭ་ཚང་གིས་བཀའ་དྲིན་རྗེས་དྲན་ཞུ་སླད། བཀའ་དྲིན་གཏང་རག་དང་འབྲེལ་བའི་སྒོ་ནས་བརྟན་བཞུགས་བསྟར་འབུལ་ཞུས་ཏེ་ཐེངས་འདིའི་ཧོན་སུར་སྨད་རྒྱུད་གྲྭ་ཚང་དུ་ཉིན་གྲངས་ལྔའི་རིང་དཔལ་གསང་འདུས་ཀྱི་བཀའ་དབང་ལ་སོགས་པའི་བཀའ་ཆོས་བཅས་ཀྱི་མཛད་འཕྲིན་ཁག་ལེགས་པར་གྲུབ་སོང་།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ པའི་ཐོག་མགོན་པོ་གང་ཉིད་མཆོག་བཞུགས་ཁྲིའི་སྟེང་༸ཞབས་སོར་བཀའ་དྲིན་ཆེ་འཁོད་དང་སྦྲགས། སྐབས་གསུམ་པ་སོགས་སྔོན་འགྲོའི་ཞལ་འདོན་རྣམས་གསུང་འདོན་གནང་། དེ་ནས་རྟེན་འབྱུང་གསོལ་ཇ་འབྲས་སིལ་འདེགས་འབུལ་ཞུས། སྐབས་དེར་སྨད་རྒྱུད་གྲྭ་ཚང་གིས་མདོ་སྔགས་གཉིས་ཀྱི་བསྟན་པ་ཟུང་དུ་འཛིན་ཕྱིར་༸རྒྱལ་མཆོག་སྐུ་ཕྲེང་རིམ་བྱོན་གྱི་ལེགས་བཤད་དང་ལྷག་པར་༸གོང་ས་༸སྐུ་ཕྲེང་བཅུ་བཞི་པ་ཆེན་པོ་མཆོག་གི་རྨད་དུ་བྱུང་བའི་སྐུའི་མཛད་ཁུར་རྣམ་གསུམ་སོགས་ཀྱི་ལེགས་བཤད་རྨད་བྱུང་གི་གསུང་འབུམ་པོད་བཅུ་གཉིས་ཕྱོགས་སྒྲིག་པར་སྐྲུན་ཞུས་པ་དེའི་སྔོན་གླེང་སྒྲོགས་སྦྱང་སྙན་སྒྲོན་ཞུས་པ་དང་། དེ་ནས་བརྟན་བཞུགས་ཀྱི་ཞལ་འདོན་ཁག་མུ་མཐུད་གསུང་འདོན་དང་འབྲེལ་བརྟན་བཞུགས་ཀྱི་རྡོ་རྗེ་སློབ་དཔོན་སྨད་རྒྱུད་མཁན་རིན་པོ་ཆེ་མཆོག་གིས་མཎྜལ་ལྗགས་བཤད་རྒྱས་པར་གསུང་འདོན་གནང་སྟེ་མགོན་པོ་གང་ཉིད་མཆོག་ལ་བཀའ་དྲིན་རྗེས་དྲན་གྱི་གཏང་རག་དང་འབྲེལ་བའི་བརྟན་བཞུགས་བསྟར་འབུལ་ཞུས།
སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་དོན། དེ་རིང་ཁྱེད་རང་ཚོས་ལྷག་བསམ་རྩེ་གཅིག་པའི་ཐོག་ནས་གདུང་ཤུགས་དྲག་པོས་རེ་འདུན་དེ་འདྲ་ཞུས་ཡོད། གཙོ་ཆེ་ཤོས་ཆོས་ཕྱོགས་དང་འབྲེལ་བ་ཡོད་པར་བརྟེན་དད་པ་དང་དམ་ཚིག་ཡོད་དགོས་པ་དེ་ཧ་ཅང་གལ་ཆེན་པོ་རེད། དེ་བཞིན་གཞིས་བྱེས་བོད་མི་ཚང་མས་དད་པ་དང་དམ་ཚིག་གཡོ་བ་མེད་པ་ཞིག་གི་སྒང་ནས་གནས་ཡོད། དེ་སྔ་དགའ་ལྡན་ཕོ་བྲང་སྐབས། རྒྱ་སྡེ་བོད་སྡེ་ཞེས་ས་མཚམས་དེ་འདྲ་དབྱེ་བ་ཡོད་པ་ཞིག་ཤོད་ཀྱི་ཡོད། ངོས་རང་སྐྱེས་སའི་ཟི་ལིང་ཁུལ་དེ་སྐབས་དེ་དུས་དགའ་ལྡན་ཕོ་བྲང་ཁོངས་སུ་མེད། གང་ལྟར་ང་ཚོ་ཧ་ཅང་གི་དཀའ་ངལ་ཤུགས་ཆེན་པོ་ཞིག་འཕྲད་པར་བརྟེན་གངས་ཅན་པ་ཞེས་པའི་གཅིག་འགྱུར་གྱི་འདུ་ཤེས་ཡིན་ནའང་ཤུགས་ཆེ་བ་ཆགས་ཡོད། དེ་སྔ་ཆོས་རྒྱལ་ཚོའི་སྐབས་ལ་བོད་གཅིག་གྱུར་གྱི་འདུ་ཤེས་ཡོད་པ་དེ་བར་སྐབས་ང་ཚོ་རྐྱེན་ངན་མང་པོ་ཞིག་གི་འོག་ནས་གཅིག་གྱུར་གྱི་འདུ་ཤེས་ཤུགས་ཆེ་བ་གནས་ཐུབ་ཡོད། གང་ལྟར་གཙོ་བོ་དད་པ་དང་དམ་ཚིག་གཡོ་བ་མེད་པ་ཞིག་ཡོད་པར་བརྟེན་ཏན་ཏན་བདེན་པའི་ནུས་པ་ཞིག་ཡོད་ངེས། དེ་རིང་དཔལ་གསང་བ་འདུས་པའི་དབང་ཆེན་དང་། ཁྲིད་ཆེན་དེ་དག་ཚར་རྗེས་ཁྱེད་རང་ཚོས་གཏང་རག་དང་འབྲེལ་བའི་བརྟན་བཞུགས་གསོལ་འདེབས་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་དང་། དེ་བཞིན་མགོན་པོ་གང་ཉིད་མཆོག་གིས་བཀའ་སློབ་སྩལ་བའི་ནང་། བླ་མ་མཚན་ཉིད་ཚང་བ་ཞིག་ཡོང་བར་འཇིག་རྟེན་ཆོས་བརྒྱད་ཀྱི་གཞན་དབང་དུ་མ་གཏང་བར་ཆོས་ལ་ཐོས་བསམ་སྒྲུབ་པས་གཉེར་དགོས་པ་དང་། ལྷག་པར་དེ་ལྟ་བུའི་འཇིག་རྟེན་ཆོས་བརྒྱད་ཀྱི་བསམ་བློ་དེར་དྲན་ཤེས་བསྟེན་ནས་གཉེན་པོ་བསྟེན་ཚུལ་སོགས་ཀྱི་ལམ་སྟོན་བཀའ་སློབ་དང་། དེ་བཞིན་དེང་སྐབས་གྲྭ་སའི་ནང་ཕྱིའི་བཀོད་པ་སོགས་ལེགས་པར་གྲུབ་པ་བཞིན་ནང་སེམས་རྒྱུད་འདུལ་ཐབས་ལ་འབད་བརྩོན་གནང་དགོས་པ། ཕྱི་བཀོད་པའི་མཚམས་ཁང་གི་མཐུན་རྐྱེན་ཡོད་པ་དེ་དག་གི་ནང་སྐུ་འདྲ་བསྒྲིགས་པ་ཙམ་མིན་པར་སློབ་གཉེར་བྱ་དགོས་པ་དང་སྒོམ་སྒྲུབ་ཉམས་ལེན་གནང་གལ་ཆེ་བ། དགོན་པའི་མཁན་པོ་དང་། བླ་མ་དབུ་མཛད་རྣམས་ཀྱིས་ཐུགས་འགན་བཞེས་པའི་ངང་གྲིས་བཅད་པ་བཞིན་ལམ་དང་ལུགས་སྲོལ་ཡིན་ཞེས་འགྲོ་མི་དགོས་པར་དངོས་ཡོད་གནས་ཚུལ་ལ་གཟིགས་ནས་ཉམས་ལེན་གནང་དགོས་པ་ཡིན། ཞེས་སོགས་ཀྱི་བཀའ་སློབ་སྩལ་གྲུབ་མཚམས་ཧོན་སུར་བུད་མེད་སྐྱ་བོ་རྣམས་ཀྱིས་རིགས་ལམ་གྱི་རྩོད་པ་སྤྱན་འབུལ་ཞུས། དེ་རྗེས་གཟིམ་ཆུང་དུ་ཆིབས་སྒྱུར་གྱིས་ཉིན་གུང་ལྗགས་སྨིན་བཞེས་གནང་མཛད་དེ་ཧོན་སུར་ནས་ཆིབས་འགྲོའི་ནང་སྦེལ་ཀོབ་སེ་ར་ཐེག་ཆེན་གླིང་དུ་ཆིབས་ཞལ་བསྒྱུར་བ་བཅས། །
