༢༠༡༥ ཟླ་ ༡༢ ཚེས་ ༩ རེས་གཟའ་ལྷག་པ།
༄༅། །འདི་གའི་ཕྱི་དྲིལ་བོད་ཡིག་ཚན་པའི་གསར་འགོད་པ་བསྟན་འཛིན་རབ་རྒྱས་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༥ ཟླ་ ༡༢ ཚེས་ ༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་ཧོན་སུར་རབ་རྒྱས་གླིང་གཞིས་ཆགས་སུ་རྟེན་གཞི་བྱས་པའི་གསང་ཆེན་སྨད་རྒྱུད་གྲྭ་ཚང་དུ་༸ཞབས་སོར་བདེ་བར་འཁོད་ཡོད།
དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༤ ཙམ་ལ་༸གོང་ས་མཆོག་ཧོན་སུར་རབ་རྒྱས་གླིང་གཞིས་ཆགས་སུ་༸ཞབས་སོར་འཁོད་སྐབས་དཔལ་ས་སྐྱ་གོང་མ་བདག་ཁྲི་རིན་པོ་ཆེ་མཆོག་དང་། ཧོན་སུར་སྨད་རྒྱུད་གྲྭ་ཚང་གི་མཁན་རིན་པོ་ཆེ་མཆོག་དང་མཁན་ཟུར། སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག དེ་བཞིན་བླ་སྤྲུལ་རྣམས་ཀྱིས་དབུས། བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་མཆོག་དང་། བོད་མི་མང་དགེ་ལུགས་སྤྱི་འཐུས་དགེ་བཤེས་རོང་པོ་བློ་བཟང་སྙན་གྲགས་ལགས་ཀྱིས་གཙོས་སྤྱི་འཐུས་ཁག་གཅིག ཧོན་སུར་ས་གནས་འགོ་འཛིན་དང་གནད་ཡོད་མི་སྣ། རྒྱུད་སྨད་གྲྭ་ཚང་གི་སྦྱིན་བདག དེ་བཞིན་ས་གནས་འདྲ་མིན་ནས་དད་ལྡན་ཆོས་ཞུ་བ་སེར་སྐྱ་སྟོང་ཕྲག་བཅོ་ལྔ་ལྷག་ཙམ་གྱིས་དགའ་དད་སྤྲོ་གསུམ་གྱིས་ངང་ནས་ཕེབས་བསུ་ཟབ་རྒྱས་ཞུས་ཡོད།
ཐོག་མར་༸གོང་ས་༸སྐྱབས་མགོན་ཆེན་པོ་མཆོག་གིས་རྡུལ་མཚོན་དཀྱིལ་འཁོར་བཞེངས་གྲུབ་ཟིན་པ་དེར་རབ་གནས་མཛད་པ་དང་སྦྲགས། རྗེ་བཙུན་ཤེས་རབ་སེངྒེའི་སྐུ་རྟེན་གྱི་དྲུང་དུ་སྣང་གསལ་ཞལ་ཕྱེ་མཛད། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གཟིམ་ཆུང་ནང་༸ཞབས་སོར་འཁོད་སྐབས། རྒྱུད་སྨད་མཁན་པོ་མཆོག་དང་བླ་མ་དབུ་མཛད། དེ་བཞིན་ས་གནས་འགོ་འཛིན་བཅས་ཚང་འཛོམས་ཐོག་གསོལ་ཇ་འབྲས་སིལ་འདེགས་འབུལ་ཞུས་པ་དང་སྦྲགས་གཟིམ་ཆུང་ནང་ཁྱུག་ཙམ་རིང་སྐུ་ངལ་གསོ་གནང་མཛད་ཡོད།
ཕྱི་ཚེས་ ༩ ཉིན་རྒྱབ་༸གོང་ས་༸སྐྱབས་མགོན་ཆེན་པོ་མཆོག་གིས་དད་ལྡན་མང་ཚོགས་རྣམས་ལ་གསུང་ཆོས་དངོས་གཞི་དབུ་འཛུགས་བསྩལ་རྒྱུ་ཡིན་འདུག སྤྱིར་༸གོང་ས་མཆོག་གིས་ཁུལ་དེར་ཉིན་གྲངས་ལྔའི་རིང་དད་ལྡན་མང་ཚོགས་རྣམས་ལ་ཆོས་འབྲེལ་བཀའ་དྲིན་ཆེ་བ་སྩལ་རྒྱུ་ཡིན་འདུག་པ་བཅས།།
