ཕྱི་ལོ་ ༢༠༡༥ ཟླ་ ༡༢ ཚེས་ ༧ རེས་གཟའ་ཟླ་བ།
༄༅། །འདི་གའི་ཆེད་གཉེར་གསར་འགོད་པ་བསྟན་འཛིན་རབ་རྒྱས་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༥ ཟླ་ ༡༢ ཚེས་ ༥ ཉིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་སྦེང་ལོར་གནམ་ཐང་དུ་༸ཞབས་སོར་བདེ་འཁོད་ཀྱིས་སྦེང་ལོར་ཁུལ་དུ་དགའ་ལྡན་ལྔ་མཆོད་ཀྱི་དུས་མཆོད་ཕྱིར་སྨོན་ལམ་གསུང་འདོན་མཛད་པ་སོགས་མཛད་འཕྲིན་རྒྱ་ཆེ་བསྐྱངས་གནང་མཛད་སོང་།
དེ་ཡང་གོང་ཚེས་ཉིན་གྱི་སྔ་དྲོའི་ཆུ་ཚོད་ ༩།༥༠ ཐོག་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་ཀར་ནཱ་ཊ་ཀ་མངའ་སྡེའི་རྒྱལ་ས་སྦེང་ལོར་གནམ་ཐང་དུ་༸ཞབས་སོར་བདེ་བར་
འཁོད་སྐབས་སྐྱབས་རྗེ་གླིང་མཆོག་སྤྲུལ་རིན་པོ་ཆེ་མཆོག་གིས་དབུས་ལྷོ་ཕྱོགས་གཞིས་ཆགས་ཁག་ལྔའི་ནང་གི་དགོན་སྡེ་གྲྭ་ཚང་ཁག་གི་མཁན་བླ་སྤྲུལ་དང་སྐུ་ཚབ་རྣམ་པ། བདེ་སྲུང་དྲུང་ཆེ་ཕ་ཟུར་དབང་ཕྱུག་ལགས། ལྷོ་སྤྱི་ཀརྨ་དགྲ་འདུལ་ལགས་ཀྱིས་གཙོས་བདེ་སླར་དང་ཧོན་སུར་ས་གནས་འགོ་འཛིན། དེ་བཞིན་བདེ་སྲུང་ལས་ཁུངས་ཀྱི་ལས་བྱེད་རྣམ་པས་ཕེབས་བསུའི་སྣེ་ལེན་གཟབ་རྒྱས་ཞུས་ཐོག་མགོན་པོ་གང་ཉིད་མཆོག་ཆིབས་འགྲོའི་ནང་ཤེ་རཱ་ཊོན་ཝིན་སི་ཊོན་ Sheraton Winsor Hotel བཞུགས་གནས་གསོལ་མགྲོན་ཁང་དུ་ཆིབས་ཞལ་བསྒྱུར་བ་དང་། སྐབས་དེར་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ལྔའི་དགོན་སྡེ་གྲྭ་ཚང་ཁག་གི་མཁན་བླ་སྤྲུལ་གྱིས་དབུས་པའི་གྲྭ་བཙུན་རྣམས་དང་། ས་གནས་ནས་བཅར་བའི་བོད་མི་མང་སྤྱི་འཐུས་ལས་ཐོག་པ་ཁག་གཅིག དེ་བཞིན་ལྷོ་གཞིས་ཁག་ལྔའི་ས་གནས་འགོ་འཛིན་གཙོས་པའི་གནད་ཡོད་མི་སྣ། སྦེང་ལོར་ཁུལ་གྱི་སློབ་ཕྲུག་དང་ལས་བྱེད་ཁག་གཅིག་བཅས་ཁྱོན་མི་གྲངས་ ༢༠༠ ཙམ་གྱིས་ལམ་ཟུར་གཡས་གཡོན་གཉིས་སུ་དཀར་གཙང་མཇལ་དར་དང་བདུག་སྤོས་སོགས་ཐོགས་པ་དང་། བོད་རིགས་སློབ་མ་རྣམས་དང་ཧོན་སུར་རྫོང་ཁ་ཆོས་སྡེའི་དགེ་འདུན་པ་ཁག་གཅིག་བཅས་ཀྱིས་སྲོལ་རྒྱུན་གཞས་སྣ་འཁྲབ་སྟོན་གྱི་ལམ་ནས་ཕེབས་བསུ་གཟབ་རྒྱས་ཞུས།
ཐེངས་འདིར་བོད་ཟླ་བཅུ་པའི་ཚེས་ཉེར་ལྔ་ཉིན་རྗེ་ཙོང་ཁ་པ་ཆེན་པོ་དགོངས་པ་མྱ་ངན་ལས་འདས་པའི་དུས་མཆོད་དགའ་ལྡན་ལྔ་མཆོད་འཁེལ་ཡོད་སྟབས། ༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་གནས་མགྲོན་ཁང་དེའི་ནང་དབུ་བཞུགས་མཛད་ཐོག་མཁན་བླ་སྤྲུལ་རྣམས་དང་། དེ་བཞིན་དགེ་བཤེས་དང་དགེ་འདུན་པ་བཅས་ལྷན་བཞུགས་ཀྱིས་རྗེ་ཙོང་ཁ་པ་ཆེན་པོ་མཆོག་རྗེས་སུ་དྲན་པའི་ཐོག་ནས་ཁོང་གིས་མཛད་པའི་རྟེན་འབྲེལ་བསྟོད་པ་དང་། རྟོགས་བརྗོད་བདུན་ལེགས་མ། འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་གྱིས་མཛད་པའི་རྗེའི་གསང་བའི་རྣམ་ཐར་གསུང་འདོན་མཛད།
ཉིན་གུང་ལྗགས་སྨིན་གྲུབ་མཚམས་སྦེང་ལོར་ཁུལ་དུ་རྟེན་གཞི་བྱས་པའི་ཨཱེ་ཊི་སི་གཱར་ཌན་ནི་ཡ་ ITC Gardenia Hotel ཞེས་པའི་མགྲོན་ཁང་ཆེན་མོའི་ནང་རྒྱ་གར་གཏོང་ཕོད་ཅན་གྱི་ལྷན་ཚོགས་ India Philanthropy Initiative ཤིག་གི་ལས་རིམ་ཐོག་མགོན་པོ་གང་ཉིད་མཆོག་ལ་ཇི་ལྟར་གསོལ་འདེབས་ཞུས་དོན་བཞིན་ཐུགས་བརྩེ་གཟིགས་ཆེན་པོས་ཆིབས་བསྒྱུར་བསྐྱངས་ཏེ་ལྷན་ཚོགས་དེའི་ཚོགས་མི་རྣམས་ལ་བླང་དོར་བློ་མིག་འབྱེད་པའི་ལམ་སྟོན་བཀའ་སློབ་སྩལ་གྲུབ་རྗེས་བཞུགས་གནས་མགྲོན་ཁང་དུ་ཆིབས་ཞལ་བསྒྱུར་གནང་མཛད་པ་བཅས། །
